Published:Updated:

கொச்சிச் சம்பா... நாஞ்சில் நாட்டின் நாட்டு ரக நெல்!

கொச்சிச் சம்பா... நாஞ்சில் நாட்டின் நாட்டு ரக நெல்!
பிரீமியம் ஸ்டோரி
கொச்சிச் சம்பா... நாஞ்சில் நாட்டின் நாட்டு ரக நெல்!

1 ஏக்கர் 25 சென்ட்... ரூ 72,640 லாபம்!மகசூல்இ.கார்த்திகேயன் - படங்கள்: ரா.ராம்குமார்

கொச்சிச் சம்பா... நாஞ்சில் நாட்டின் நாட்டு ரக நெல்!

1 ஏக்கர் 25 சென்ட்... ரூ 72,640 லாபம்!மகசூல்இ.கார்த்திகேயன் - படங்கள்: ரா.ராம்குமார்

Published:Updated:
கொச்சிச் சம்பா... நாஞ்சில் நாட்டின் நாட்டு ரக நெல்!
பிரீமியம் ஸ்டோரி
கொச்சிச் சம்பா... நாஞ்சில் நாட்டின் நாட்டு ரக நெல்!
கொச்சிச் சம்பா... நாஞ்சில் நாட்டின் நாட்டு ரக நெல்!

* வயது: 135 முதல் 150 நாள்கள். 

* அனைத்து வகையான மண்ணிலும் வளரும்.

* ஆவணி - புரட்டாசி பட்டங்கள் ஏற்றது.

* ஒரு கிலோ அரிசி 80 ரூபாய்.


“விதைத்தவனே விலை நிர்ணயம் செய்ய முடியும் என்பது இயற்கை விவசாயத்தில் மட்டுமே சாத்தியம். அதுவும் பாரம்பர்ய நெல் ரகச் சாகுபடியில் நாம் நிர்ணயிக்கும் விலைக்கே விற்க முடிகிறது” என்று அடித்துச் சொல்கிறார், கன்னியாகுமரி மாவட்டத்தைச் சேர்ந்த இயற்கை விவசாயி ஸ்ரீகிருஷ்ணபெருமாள். கடந்த நான்கு ஆண்டுகளாக இயற்கை விவசாயத்தில் ஈடுபட்டு வரும் இவர், கன்னியாகுமரி மாவட்டத்தின் பாரம்பர்ய நெல் ரகங்களான கட்டிச்சம்பா, கொச்சிச்சம்பா ஆகிய ரகங்களைச் சாகுபடி செய்து வருகிறார். நாகர்கோவிலிலிருந்து 12 கிலோமீட்டர் தொலைவிலுள்ள புத்தளம் கிராமத்தில்தான் ஸ்ரீகிருஷ்ணபெருமாளின் நெல் வயல் உள்ளது. ஒரு காலைவேளையில் அவரது வயலுக்குச் சென்றோம். அறுவடைப்பணியில் இருந்த கிருஷ்ணபெருமாளிடம் நம்மை அறிமுகப்படுத்திக் கொண்டதும் உற்சாகமாகப் பேசத் தொடங்கினார்.

“விவசாயம்தான் பரம்பரைத் தொழில். பி.யூ.சி வரை படிச்சுட்டு, அப்பாவுக்கு உதவியா விவசாயத்துல இறங்கிட்டேன். அப்பா காலத்துல ரசாயன உரமோ பூச்சிக்கொல்லியோ உபயோகப்படுத்த மாட்டோம். மட்கின தொழுவுரம் மட்டும்தான் போடுவோம். அப்போ அதிகளவுல பூச்சி, நோய்த்தாக்குதல்களெல்லாம் இல்லை.

கொச்சிச் சம்பா... நாஞ்சில் நாட்டின் நாட்டு ரக நெல்!

ஒட்டுமொத்த விகடனுக்கும் ஒரே ஷார்ட்கட்!

1970-ம் வருஷத்துக்குப் பிறகுதான் அதிக மகசூல் ஆசையில், நெல்லுக்கு ரசாயன உரங்கள் போட ஆரம்பிச்சேன். பாரம்பர்ய ரக நெல் விவசாயத்தை விட்டுட்டு, ரசாயன விவசாயத்துக்கு மாறி திருப்பதிசாரம், ஆடுதுறை, அம்பைனு ஒட்டு ரக நெல்லைச் சாகுபடி செய்ய ஆரம்பிச்சேன்.

2011-ம் வருஷம், திருத்துறைப்பூண்டியில் நடந்த நெல் திருவிழாவுக்கு, எங்க பகுதி விவசாயிகளை வேளாண்மைத்துறையில இருந்து அழைச்சுட்டுப் போனாங்க. நானும் அவங்களோட போனேன். அங்கதான் நூற்றுக்கும் மேற்பட்ட பாரம்பர்ய நெல் விதைகளைப் பத்தித் தெரிஞ்சுகிட்டேன். அங்கே ‘கட்டிச்சம்பா’ ரகத்தையும், ‘கொச்சிச்சம்பா’ ரகத்தையும் பார்த்தேன். எங்கப்பா, பாரம்பர்ய நெல் ரகத்தை மட்டும்தான் சாகுபடி செய்வார். அப்போ அந்த ரெண்டு ரகங்களையுமே சாகுபடி செஞ்சது நினைவுக்கு வந்தது. உடனே, அந்த ரெண்டுலயும் ஒவ்வொரு கிலோ வாங்கிட்டு வந்தேன்.

அந்த விதையை விதைச்சு, கொஞ்சம் கொஞ்சமா விதை நெல்லைப் பெருக்கினேன். அந்தப் பாரம்பர்ய ரகங்கள்ல இருந்து கிடைச்ச 10 கிலோ அரிசியைத் திருவாரூர்ல இருக்கிற, என்னோட அக்காவுக்குக் கொடுத்தனுப்பினேன். அவங்களுக்குச் சர்க்கரை வியாதி இருந்துச்சு. இந்த அரிசியைச் சாப்பிட ஆரம்பிச்சதும் வியாதி கட்டுப்பாட்டுக்குள் வந்துடுச்சுனு அக்கா, என்கிட்ட சொன்னாங்க. இதேமாதிரி அவங்க  டாக்டர்கிட்டேயும் சொல்லியிருக்காங்க அக்கா. அதைக் கேட்டு ஆச்சர்யப்பட்ட அவங்களோட டாக்டர், அக்காகிட்ட இருந்து அரிசியை வாங்கிக்கிட்டாராம். அதன்பிறகுதான், பாரம்பர்ய நெல்லோட அருமையையும், இயற்கை விவசாயத்தோட அவசியத்தையும் நான் உணர்ந்தேன். அதுல இருந்து பாரம்பர்ய நெல் ரகத்தை மட்டும் சாகுபடி செஞ்சுட்டு வர்றேன்” என்ற கிருஷ்ணபெருமாள் தொடர்ந்தார்...

“இப்போ நாலு வருஷமா முழு இயற்கை முறையில் நெல் விவசாயம் செஞ்சுட்டு இருக்கேன். மொத்தம் 6 ஏக்கர் இருக்கு. முழுசும் களிமண் நிலம். இதுல ஒண்ணேகால் ஏக்கர் நிலத்துல கொச்சிச்சம்பா போட்டு அறுவடை செஞ்சுட்டேன். விதைக்காக 10 சென்ட் நிலத்துல கீரைச்சம்பா போட்டிருக்கேன். அது அறுவடைக்குத் தயாரா இருக்கு. மீதி நிலத்தை உழுது வெச்சிருக்கேன். அடுத்த போகத்தில் கட்டிச்சம்பா போடலாம்னு இருக்கேன்.

கொச்சிச் சம்பா... நாஞ்சில் நாட்டின் நாட்டு ரக நெல்!

வருஷக் கணக்குல ரசாயன உரம் போட்டு விவசாயம் செஞ்ச நிலத்துல, திடீர்னு இயற்கை இடுபொருள்களைப் போட ஆரம்பிச்சதும், மகசூல் குறைவாத்தான் இருந்துச்சு. அப்புறம், பலதானிய விதைப்பு, ஆட்டுக்கிடைனு மாத்தி மாத்தி செஞ்சு நிலத்தை வளமாக்கினேன். ரெண்டு வருஷம் வளப்படுத்தினதும், நல்ல மகசூல் கிடைக்க ஆரம்பிச்சுடுச்சு. இதை முழுசா புரிஞ்சுக்காம சிலர் இயற்கை விவசாயத்தைக் குறை சொல்றாங்க. அது தப்பு. எங்க புத்தளம் பகுதியில நெல் மகசூல்ல, ரசாயன விவசாயிகளைவிட கூடுதலாத்தான் நான் மகசூல் எடுத்துட்டிருக்கேன்” என்று பெருமையாகச் சொன்ன கிருஷ்ணபெருமாள் மகசூல் மற்றும் வருமானம் குறித்துச் சொல்ல ஆரம்பித்தார்.

“ஒண்ணேகால் ஏக்கர் வயல்ல கொச்சிச்சம்பா போட்டதுல 2,176 கிலோ நெல் கிடைச்சது. இதை அரிசியாக்குனதுல 1,208 கிலோ கிடைச்சிருக்கு. ஒரு கிலோ அரிசியை 80 ரூபாய்ங்கிற கணக்குல 542 கிலோ அரிசியை விற்பனை செஞ்சிட்டேன். மீதியை விற்பனைக்காக வெச்சிருக்கேன். அதையும் இந்த விலைக்குத்தான் விற்பனை செய்வேன்.

அந்த வகையில 1,208 கிலோ அரிசியை விற்பனை செஞ்சா, 96,640 ரூபாய் வருமானம் கிடைக்கும். இதுல 24 ஆயிரம் ரூபாய் செலவு போக 72,640 ரூபாய் லாபமா கிடைக்கும்னு எதிர்பார்க்கிறேன். பாலுக்காக ரெண்டு கறவை மாடுகள் வளர்க்கிறேன். அந்த மாடுகளுக்காக வைக்கோலை எடுத்து வெச்சுக்குவேன். நாலு வருஷமா கன்னியாகுமரி, திருநெல்வேலி, தூத்துக்குடி மாவட்டங்கள்லதான் அரிசியை விற்பனை செய்றேன். இயற்கை அங்காடிகளுக்கெல்லாம் அனுப்புறதில்லை. நானே நேரடியா விற்பனை செய்றதால, விலை நிர்ணயம் செய்ய முடியுது. பாரம்பர்ய அரிசியைச் சாப்பிடுற நிறைய வாடிக்கையாளர்கள் இருக்கிறாங்க. அவங்க தேடி வந்து வாங்குறாங்க. அதனால, விற்பனைக்கும் பிரச்னையில்லை” என்று சொல்லி விடைகொடுத்தார்.

தொடர்புக்கு,
ஸ்ரீகிருஷ்ணபெருமாள், செல்போன்: 99946 57670

கோடைக்காலத்தில் கட்டிச்சம்பா... மழைக்காலத்தில் கொச்சிச்சம்பா!

“கன்னியாகுமரி மாவட்டத்தைப் பொறுத்தவரையில் கன்னிப்பூ (ஜூன் முதல் செப்டம்பர் வரை), கும்பைப்பூ (அக்டோபர் முதல் பிப்ரவரி வரை) என இரண்டு போகங்கள் உண்டு. இதில் முதல் போகமான கன்னிப்பூ, கட்டிச்சம்பா சாகுபடிக்கும்; இரண்டாம் போகமான கும்பைப்பூ, கொச்சிச்சம்பா சாகுபடிக்கும் ஏற்றவை. கட்டிச்சம்பா வெயிலில் நன்றாக விளையும். கொச்சிச்சம்பா மழையில் நன்றாக விளையும்” என்கிறார், கிருஷ்ணபெருமாள்.

இப்படித்தான் சாகுபடி செய்யணும்!

ஒரு ஏக்கர் 25 சென்ட் பரப்பில் கொச்சிச்சம்பா நெல் சாகுபடி செய்யும் விதம் குறித்து ஸ்ரீகிருஷ்ணபெருமாள் சொன்ன விஷயங்கள் பாடமாக இங்கே...

பாரம்பர்ய ரக நெல் வகைகள் எல்லா மண்ணிலும் விளையும். கொச்சிச்சம்பா ரகத்துக்கு ஆவணிப் பட்டமும், புரட்டாசிப் பட்டமும் ஏற்றவை. இதன் வயது 135 முதல் 150 நாள்கள். நெல் சாகுபடிக்காகத் தேர்வு செய்த ஒன்றே கால் ஏக்கர் நிலத்தில் ஒரு சால் உழவு ஓட்டிவிட்டு, 3 டிராக்டர் மட்கிய தொழுவுரத்தைச் கொட்டி பரப்பி, ஒரு சால் உழவு ஓட்ட வேண்டும்.

ஒன்றே கால் ஏக்கர் நிலத்தில் விதைக்க, இரண்டரை சென்ட் அளவில் நாற்றாங்கால் அமைக்க வேண்டும். ஒன்றே கால் ஏக்கருக்கு 12 கிலோ விதை நெல் தேவை. நாற்றாங்கால் தயாரான பிறகு, காலை நேரத்தில் 12 கிலோ விதை நெல்லை ஒரு வட்ட வடிவப் பாத்திரத்தில் இட்டு, 20 லிட்டர் தண்ணீர் ஊற்றி, குச்சியால் பத்து நிமிடங்கள் கிளற வேண்டும். இப்படிக் கிளறும்போது நெல்லுடன் சேர்ந்துள்ள தூசி தும்புகள் மிதந்துவரும். அவற்றை அப்புறப்படுத்திவிட்டு, அந்தத் தண்ணீரிலேயே 200 கிராம் சூடோமோனஸை இட்டுக் கிளறி 12 மணி நேரம் (இரவு வரை) ஊற வைக்க வேண்டும்.

பிறகு, தண்ணீரை வடிகட்டி விதை நெல்லை சணல் சாக்கில் போட்டு இறுக்கமாகக் கட்டி தண்ணீர் தெளித்து, 12 மணி நேரம் வைக்க வேண்டும். பிறகு, அந்த நெல் மணிகள் லேசாக முளைவிடத் தொடங்கும். மறுநாள் காலையில் சாக்கிலிருந்து முளைவிட்ட நெல் விதைகளை எடுத்து நிழலில் 15 நிமிடம் உலர்த்திவிட்டு நாற்றாங்காலில் தூவ வேண்டும். பாசனம் மட்டும் செய்து பராமரித்தால் 20 நாள்களில் நாற்றுகள் தயாராகிவிடும். 25 நாள்களுக்குள் நாற்றுகளைப் பிடுங்கி நடவு செய்துவிட வேண்டும். இல்லாவிடில் நாற்றுகள் முதிர்ச்சி அடைந்துவிடும்.

விதைப்பு வயலைச் சேறாக்கி 22 சென்டிமீட்டர் இடைவெளியில் கயிறு பிடித்து நாற்றுகளை நட்டுத் தண்ணீர் பாய்ச்ச வேண்டும். தொடர்ந்து காய்ச்சலும் பாய்ச்சலுமாகப் பாசனம் செய்தால் போதுமானது.

நாற்று நடவு செய்த 15 மற்றும் 30-ம் நாள்களில் களைகளை அகற்ற வேண்டும். 20-ம் நாள் 300 கிலோ மண்புழு உரத்தை பரவலாக வயல் முழுவதும் தூவிவிட வேண்டும். 30, 50 மற்றும் 70-ம் நாள்களில் 10 லிட்டர் தண்ணீரில் 300 மில்லி பஞ்சகவ்யாவைக் கலந்து கைத்தெளிப்பானால் தெளிக்க வேண்டும். ஒன்றே கால் ஏக்கருக்கு 10 டேங்க் வரை தெளிக்க வேண்டியிருக்கும்.

இலைச்சுருட்டுப்புழு தாக்குதல் தென்பட்டால், 10 லிட்டர் தண்ணீருக்கு 300 மில்லி பஞ்சகவ்யா, 50 மில்லி வேப்பெண்ணெய் ஆகியவற்றைக் கலந்து தெளிக்க வேண்டும். 90 முதல் 95-ம் நாள்களுக்குள் கதிர் பிடிக்கத் தொடங்கும். இந்தச் சமயத்தில், 10 லிட்டர் தண்ணீருக்கு 150 மில்லி மீன் அமினோ அமிலம் என்ற விகிதத்தில் கலந்து தெளிக்க வேண்டும். 135-ம் நாளுக்கு மேல் அறுவடைக்கு வந்துவிடும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism