Published:Updated:

மரபணு கடுகுக்கு அனுமதி... - மான்சான்டோவுக்கு மரியாதை!

மரபணு கடுகுக்கு அனுமதி... - மான்சான்டோவுக்கு மரியாதை!
பிரீமியம் ஸ்டோரி
மரபணு கடுகுக்கு அனுமதி... - மான்சான்டோவுக்கு மரியாதை!

பிரச்னை துரை.நாகராஜன்

மரபணு கடுகுக்கு அனுமதி... - மான்சான்டோவுக்கு மரியாதை!

பிரச்னை துரை.நாகராஜன்

Published:Updated:
மரபணு கடுகுக்கு அனுமதி... - மான்சான்டோவுக்கு மரியாதை!
பிரீமியம் ஸ்டோரி
மரபணு கடுகுக்கு அனுமதி... - மான்சான்டோவுக்கு மரியாதை!

‘ஜி.இ.ஏ.சி’ (GEAC-The Genetic Engineering Appraisal Committee) என அழைக்கப்படும் ‘மரபணு மாற்றுப் பயிர்களுக்கான அனுமதியளிக்கும் குழு’ சமீபத்தில், ‘மரபணு மாற்று கடுகுக்கு அனுமதி வழங்கலாம்’ என மத்திய சுற்றுச்சூழல் துறைக்குப் பரிந்துரை செய்துள்ளது. இதையடுத்து எப்போது வேண்டுமானாலும் மரபணு மாற்று கடுகுக்கு அனுமதி கிடைத்து, விளைநிலங்களை ஆக்கிரமிக்கக்கூடிய நிலை உருவாகியுள்ளது.

கடந்த காலங்களில் பி.டி பருத்திக்கு அனுமதி வழங்கப்பட்டு அதனால், விவசாயிகள் அனுபவித்த துன்பங்கள் அனைவரும் அறிந்ததே. காங்கிரஸ் ஆட்சியின்போது, பி.டி கத்திரிக்கு அனுமதி வழங்கப்பட்டபோது, சுற்றுச்சூழல் ஆர்வலர்களின் தொடர் போராட்டத்தால் அதற்குத் தடை விதிக்கப்பட்டது. இந்நிலையில் கடுகுக்கு அனுமதி அளிக்கப்பட்டால், அதுதான், இந்தியாவில் மரபணு மாற்றம் செய்யப்பட்ட முதல் உணவுப்பொருளாக இருக்கும்.

இவ்விவகாரம் குறித்து நம்மிடம் பேசிய பாதுகாப்பான உணவுக்கான கூட்டமைப்பின் ஒருங்கிணைப்பாளர் அனந்து, “இம்முறை மரபணு மாற்று கடுகைக் கொண்டு வருவதற்கான முழுமுயற்சியுடன் மத்திய அரசு இறங்கியிருப்பது, தெளிவாகத் தெரிகிறது. ஜி.இ.ஏ.சி தங்களது அறிக்கையைச் சுற்றுச்சூழல் அமைச்சகத்திடம் சமர்ப்பித்துவிட்டது. தற்போது, அனுமதி அளிப்பதற்கான அதிகாரம் மத்திய சுற்றுச்சூழல் அமைச்சகத்துக்குத்தான் உண்டு. மரபணு மாற்று கடுகைக் கொண்டுவர, மத்திய அரசு மூன்று காரணங்களை முன் வைக்கிறது.

மரபணு கடுகுக்கு அனுமதி... - மான்சான்டோவுக்கு மரியாதை!

‘இந்தியாவில் எண்ணெய் வித்துகள் உற்பத்தி அதிகம் இல்லை. அதனால் வெளிநாடுகளிலிருந்து அதிகமான எண்ணெய் இறக்குமதி செய்யப்படுகிறது’ என்பது ஒரு காரணம். எண்ணெய் இறக்குமதி செய்யப்படுவது உண்மைதான். 60 ஆயிரம் கோடி ரூபாய் அளவுக்கு இறக்குமதி செய்யப்படுகிறது. ஆனால், அதில் 80% பாமாயில்தான். சோயா எண்ணெய், கடுகு எண்ணெய் எல்லாம் சேர்த்தே 10 சதவிகிதம்தான். இதில் கடுகு எண்ணெய், வெறும் 1.6 சதவிகிதம் மட்டும்தான். இதற்காக மரபணு மாற்று கடுகைக் கொண்டு வருகிறோம் என்று சொல்வது வடிகட்டிய பொய்.

ஒட்டுமொத்த விகடனுக்கும் ஒரே ஷார்ட்கட்!

அடுத்த காரணம், ‘விளைச்சல் அதிகரிக்கும்’ என்பது. இந்தியாவில் உள்ள சில பாரம்பர்ய கடுகு ரகங்களை ஒற்றை நாற்று முறையில் நடவு செய்து சோதனை செய்தபோது, அபரிமிதமான மகசூல் (வழக்கமான மகசூலை விட 58% முதல் 145% வரை கூடுதல் மகசூல்)கிடைப்பது உறுதி செய்யப்பட்டுள்ளது. குறிப்பாக மரபணு மாற்று கடுகைவிட அதிக மகசூல் (மரபணு மாற்று கடுகில் வழக்கமான அளவைவிட 25 சதவிகிதம்தான் கூடுதல் மகசூல்) கிடைக்கும் என்பதும் உறுதிப்படுத்தப்பட்டுள்ளது. அதற்கான ஆதாரங்களும் பல்கலைக்கழகங்களில் உள்ளன. இந்தச் சொற்ப அளவு, கூடுதல் மகசூல் கொடுக்கும் மரபணு மாற்று கடுகு ஆராய்ச்சிக்காக, இதுவரை 100 கோடி ரூபாய் செலவழித்திருக்கிறார்கள்.

மரபணு கடுகுக்கு அனுமதி... - மான்சான்டோவுக்கு மரியாதை!


அனுமதி அளிக்கும் குழு சொல்லும் மூன்றாவது காரணம், ‘மரபணு மாற்று கடுகுக்குக் களைக்கொல்லிகளால் பாதிப்பு வராது’ என்பது. இது, மிகவும் அபத்தமான காரணம். களைக்கொல்லி, பூச்சிக்கொல்லி, ரசாயன உரங்கள் ஆகியவற்றைக் குறைத்து, இயற்கை வேளாண்மை முறை பெருகிவரும் வேளையில், ‘களைக்கொல்லியைத் தாங்கி வளரும்’ என்று சொல்வது அபத்தமானது. அதிலும், பேயர் நிறுவனம் தயாரிக்கும் களைக்கொல்லியால் பயிர்கள் வளரும் என்பது ஆதாரமற்றது.

2002-ம் ஆண்டுப் பேயர் நிறுவனம் மரபணு மாற்று பயிருக்கு அனுமதி கோரியபோது, அனுமதியளிக்க மறுத்தது, ஜி.இ.ஏ.சி. தற்போது, இந்த மூன்று காரணங்களைச் சொல்லி அனுமதியளிக்கப் பரிந்துரை செய்துள்ளது. டெல்லிப் பல்கலைக்கழகத்தின் பெயரால் இந்தக் கடுகு கொண்டு வரப்பட்டாலும், இதில் பயன்படுத்தப்படும் மரபணுக்களின் காப்புரிமை இன்னும்  மான்சான்டோ, பேயர் ஆகிய நிறுவனங் களிடம்தான் உள்ளன.

அரசாங்கமும் ஜி.இ.ஏ.சி-யும் இது பாரம்பர்ய கடுகிலிருந்துதான் எடுக்கப்படுகிறது எனச் சொல்லி வந்தாலும், டெல்லிப் பல்கலைக்கழகம் நேரடியாக விற்பனையில் ஈடுபடாது. அதனால், மரபணு மாற்று கடுகு விற்பனை கார்ப்பரேட்டுகளின் கைக்குதான் போகும். அடுத்தடுத்து அனைத்து உணவுப்பொருள்களுக்கும் மரபணு மாற்றம் செய்யப்பட்ட விதைகள் உருவாக்கப்படும். நீண்ட காலம் ஆராய்ச்சி செய்யாமல் எந்தப் பொருளையும் அனுமதிக்கக் கூடாது. மரபணு மாற்று கடுகுக்கு அனுமதி என்பது கார்ப்பரேட்களுக்கு விரிக்கும் ரத்தினக்கம்பளம்தான் என்பதில் துளிகூடச் சந்தேகம் இல்லை” என்றார், வருத்தத்துடன்.

தமிழ்நாடு இயற்கை விவசாயிகள் கூட்டமைப்பின் ஒருங்கிணைப்பாளர், ‘அறச்சலூர்’ செல்வம், “இந்த ஒரு பயிரை இந்தியாவுக்குள் ஊடுருவவிட்டாலே போதும். இதைக் காரணமாக வைத்து அனைத்து வகையான காய்கறிகளையும் கொண்டு வந்துவிட முடியும். இதுதான் பன்னாட்டு நிறுவனங்களின் நோக்கம். மரபணு மாற்றம் செய்யப்பட்ட கடுகில் பார்னேஸ், பார்ஸ்டார் மற்றும் பார் என்ற மரபணுக்கள் பயன்படுத்தப்பட்டுள்ளன. இந்த மரபணுக்களுக்குப் பேயர் உள்ளிட்ட பன்னாட்டு நிறுவனங்கள் காப்புரிமை பெற்றுள்ளன.

மரபணு கடுகுக்கு அனுமதி... - மான்சான்டோவுக்கு மரியாதை!


இந்த மரபணுக்களைப் பயன்படுத்துவதற்குப் பன்னாட்டு நிறுவனங்கள் டெல்லிப் பல்கலைக்கழகத்துடன் செய்துள்ள ஒப்பந்தங்கள் மறைத்து வைக்கப்பட்டுள்ளன. பார்னேஸ் மரபணு, செடிகளில் ஆண் மலட்டுத்தன்மையை உருவாக்கும். அதனால், பார்னேஸ் மரபணுவை, உலக வேளாண் அமைப்புத் தடை செய்துள்ளது. இருந்தும், பார்னேஸ் மற்றும் பார்ஸ்டார் ஆகிய மரபணுக்கள் இதில் பயன்படுத்தப்பட்டுள்ளன. மரபணு மாற்றப்பட்ட கடுகு, தமிழ்நாட்டுக்கு வருவதைத் தடுக்க வேண்டும். இதோடு, இதை அனுமதிக்கக்கூடாது என மத்திய அரசுக்கு, தமிழக அரசு அழுத்தம் கொடுக்க வேண்டும்” என்றார்.

கடந்த மே, 17-ம் தேதி சமூக ஆர்வலர்கள் ஒன்று கூடி மத்திய சுற்றுச்சூழல் துறை அமைச்சகம் முன்பு... மரபணு மாற்று கடுகை அனுமதிக்கக்கூடாது என முழக்கமிட்டதோடு, சுற்றுச்சூழல் துறை அமைச்சர் அனில் மாதவ் தேவைச் சந்தித்து, மரபணு மாற்று கடுகு குறித்த தங்களது கருத்துகளையும் பதிவு செய்தனர். அதற்கு மறுநாளே அமைச்சர் அனில் மாதவ் தேவ் மாரடைப்பில் இறந்துவிட்டார். இந்நிலையில் சுற்றுச்சூழல் அமைச்சகம் என்ன முடிவு எடுக்கப்போகிறது என்பதைப் பொறுத்திருந்துதான் பார்க்க வேண்டும்.

எந்தப் பயிராக இருந்தாலும், மரபணு மாற்று விதைகளை நம் மண்ணுக்குள் அனுமதிக்கக் கூடாது என்பதுதான் இயற்கை ஆர்வலர்களின் ஒருமித்த குரலாக இருக்கிறது. மத்திய அரசு செவி சாய்க்குமா?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism