Published:Updated:

வறண்ட நிலத்திலும் வருமானம் கொடுக்கும் கொடுக்காப்புளி!

வறண்ட நிலத்திலும்  வருமானம் கொடுக்கும் கொடுக்காப்புளி!
பிரீமியம் ஸ்டோரி
வறண்ட நிலத்திலும் வருமானம் கொடுக்கும் கொடுக்காப்புளி!

புரட்டாசியில் நடவு செய்யலாம்!மகசூல்ஆர்.குமரேசன் - படங்கள்: ஆர்.எம்.முத்துராஜ்

வறண்ட நிலத்திலும் வருமானம் கொடுக்கும் கொடுக்காப்புளி!

புரட்டாசியில் நடவு செய்யலாம்!மகசூல்ஆர்.குமரேசன் - படங்கள்: ஆர்.எம்.முத்துராஜ்

Published:Updated:
வறண்ட நிலத்திலும்  வருமானம் கொடுக்கும் கொடுக்காப்புளி!
பிரீமியம் ஸ்டோரி
வறண்ட நிலத்திலும் வருமானம் கொடுக்கும் கொடுக்காப்புளி!

“அடிக்கடி தோட்டத்துக்குப் போய் விவசாயத்தைக் கவனிக்க முடியாது. தண்ணி ரொம்பக் குறைவாத்தான் இருக்கு. உரம், பூச்சிக்கொல்லிச் செலவை நினைச்சாலே பயமா இருக்கு” எனக் கவலைப்படும் விவசாயிகளாக இருந்தாலும் சரி... “செடியை நடவு  செஞ்சோமா, அறுவடை  பண்ணிணோமா, பணத்தை எண்ணுணோமா” என நினைக்கும் விவசாயிகளாக இருந்தாலும் சரி... இரு தரப்பினருக்குமே ஏற்ற பயிராக இருப்பது கொடுக்காப்புளி.

அவ்வப்போது பாசனம், மகசூல் சமயத்தில் கொஞ்சம் பராமரிப்பு இவற்றை மட்டும் செய்து வந்தாலே  ஒரு ஏக்கர் நிலத்திலிருந்து ஆண்டுக்கு ஒன்றரை லட்ச ரூபாய் அளவுக்கு வருமானம் கொடுக்கிறது கொடுக்காப்புளி.

முப்பது வயதைக் கடந்த பலரும் தமது பள்ளிக் காலங்களில் கொடுக்காப்புளியைச் சுவைத்து இருப்பார்கள். இன்றைக்கு இருப்பதுபோல விதவிதமான தின்பண்டங்கள் அந்தக் காலங்களில் இல்லையென்றாலும், அவற்றைவிட அதிகச் சுவையையும் மகிழ்ச்சியையும் கொடுத்தவை மாங்காயும் கொடுக்காப்புளியும். அப்போது, கிராமங்களின் வரப்போரங்கள், கிணற்று மேடுகள், வீடுகளுக்கு அருகிலுள்ள தோட்டங்கள் என ஆங்காங்கு கொடுக்காப்புளி மரங்கள் இருக்கும். பறவைகள் சாப்பிட்டு இடும் எச்சம் மூலமாகத் தானாகவே இம்மரம் பல இடங்களிலும் பரவியிருந்தது. தோட்டங்களில் வேலிப்பயிராகவும் சில விவசாயிகள் இதை நடவு செய்திருப்பார்கள்.

வறண்ட நிலத்திலும்  வருமானம் கொடுக்கும் கொடுக்காப்புளி!

சுருள் சுருளாகப் பச்சையும், சிவப்புமாக இருக்கும் இக்காய்களைப் பறித்து உண்பதுதான் அன்றைய சிறுவர்களின் ஆனந்தப் பொழுதுபோக்கு. விடுமுறை நாள்களில் கையில் தொரட்டியோடு கொடுக்காப்புளி மரங்களே கதியெனக் கிடந்த நிகழ்வு நம்மில் பலருக்கு நிகழ்ந்திருக்கும். ஆனால், அன்று இலவசமாகப் பறித்துத் தின்ற கொடுக்காப்புளியை இன்று அதிகப் பணம் கொடுத்து வாங்கி உண்ண வேண்டியிருக்கிறது. ஆம், கொடுக்காப்புளியின் தற்போதைய விலை கிலோ 300 ரூபாய்க்கு மேல்.

இந்தச் சத்தான சந்தை வாய்ப்பைப் பயன்படுத்திக்கொண்டு வேலிப்பயிராக இருந்த கொடுக்காப்புளியைத் தனிப்பயிராகச் சாகுபடி செய்து வருகிறார்கள் பல விவசாயிகள். அவர்களில் ஒருவர்தான் விருதுநகர் மாவட்டம், சிவகாசி அருகேயுள்ள பூசாரிநாயக்கன்பட்டி கிராமத்தைச் சேர்ந்த கிருஷ்ணசாமி. இவர், தன்னுடைய ஐந்து ஏக்கர் மானாவாரி நிலத்தில் கொடுக்காப்புளி சாகுபடி செய்துவருகிறார்.

5 ஏக்கர் கொடுக்காப்புளி... 5 ஏக்கர் நாவல்...

கொடுக்காப்புளி சாகுபடி குறித்துக் கிருஷ்ணசாமியைச் சந்தித்துப் பேசினோம். “எனக்கு விவசாயத்துல ரொம்ப ஆர்வம். இது முழுக்க மானாவாரி பூமி. நான் வாங்கும்போது தரிசாக இருந்தது.  வாங்கி சில வருஷம் தரிசாத்தான் போட்டு வெச்சிருந்தேன். ஒரு சமயம், விருதுநகர் பக்கத்துல தாதம்பட்டிங்கிற ஊரைச் சேர்ந்த பாண்டியன் என்கிற விவசாயியைச் சந்திக்கிற வாய்ப்பு கிடைச்சது. அவரு கொடுக்காப்புளியைத் தனி விவசாயமா செஞ்சிருந்தாரு. வேலிப்பயிரைத்  தனி விவசாயமா செய்றாரேனு ஆச்சர்யப்பட்டு அவர் தோட்டத்துக்குப் போய்ப் பார்த்தேன். அதுல நல்ல வருமானம் கிடைக்கிறதாச் சொன்னாரு. இருந்தாலும் எனக்கு அவ்வளவா நம்பிக்கை வரல. தொடர்ந்து ரெண்டு வருஷமா அவருடைய தோட்டத்துக்குப் போய்ப் பார்த்ததுல, அவர் சொன்னது அத்தனையும் உண்மைனு தெரிஞ்சுகிட்டேன். அவர் சொன்ன ஆலோசனைப்படிதான் நான் 5 ஏக்கர் நிலத்துல கொடுக்காப்புளியை நடவு செஞ்சேன்.

குறைச்சலான தண்ணி, அதிகப் பாடில்லாத பயிர்னு எனக்குத் தோதாப்படவும் சாகுபடியில் இறங்கினேன். வண்டியூர் பக்கத்துல ஒருத்தர், அருமையா நாவல் சாகுபடி பண்றார்னு கேள்விப்பட்டேன். அவரையும் போய்ப் பார்த்துப் பேசி, இன்னொரு 5 ஏக்கர் நிலத்துல நாவல் நட்டேன். கொடுக்காப்புளி, நாவல் ரெண்டையுமே நட்டு ரெண்டு வருஷமாச்சு” என்ற கிருஷ்ணசாமி தோட்டத்தைச் சுற்றிக் காட்டியபடியே பேச ஆரம்பித்தார்.

“போர்வெல் போட்டுத்தான் பாசனம் செய்றேன். இது, செம்மண் கலந்த சரளை மண். எவ்வளவு மழைத் தண்ணி விழுந்தாலும் உடனே மண்ணு குடிச்சிடும். அதனால, சொட்டுநீர்ப் பாசனம் அமைச்சிருக்கேன். கொடுக்காப்புளியில ஒட்டுக்கன்னுதான் நடவு செஞ்சிருக்கேன். இது, நாட்டு மரம் மாதிரி அதிக உயரத்துக்குப் போகாது. பூச்சி, நோய்த் தாக்குதலும் இருக்காது. காய்க்கிற நேரத்துல மரத்துக்கு மட்டும் கொஞ்சம் ஊட்டம் கொடுக்கணும். ஒரு ஏக்கருக்கு அரை லிட்டர்ங்கிற கணக்குல ஹுயூமிக் அமிலத்தைச் சொட்டுநீர்ல கலந்துவிடுவேன். மத்தபடி பிக்கல், பிடுங்கல் இல்லாத பயிரா இருக்கு. பறவைங்க தொல்லை இருந்தாலும் பெரிசா பாதிப்பு இல்லை.

ஒட்டுமொத்த விகடனுக்கும் ஒரே ஷார்ட்கட்!

வறண்ட நிலத்திலும்  வருமானம் கொடுக்கும் கொடுக்காப்புளி!

தேனி மாவட்டம், பெரியகுளம் தோட்டக்கலைக் கல்லூரியில நாட்டுக் கொடுக்காப்புளி மரங்கள்ல இருந்து விதை எடுத்து, நாத்துகள உருவாக்கிக் கொடுக்குறாங்க. நான் அங்கதான் நாத்துகள வாங்கி நடவு பண்ணினேன். நடவு செஞ்சு ரெண்டு வருஷம் ஆச்சு. இந்த வருஷம் கொடுக்காப்புளி பரவலா காய்ச்சிருக்கு. அடுத்தடுத்த வருஷங்கள்ல கூடுதல் மகசூல் கிடைக்கும்” என்ற கிருஷ்ணசாமி, மகசூல் மற்றும் வருமானம் குறித்துச் சொல்ல ஆரம்பித்தார்.

“5 ஏக்கர்லயும் மொத்தம் 250 மரங்கள் இருக்கு. இந்த வருஷம் 5 ஏக்கர் நிலத்துல இருந்து மொத்தம் 550 கிலோ மகசூல் கிடைச்சது. வெளிமார்க்கெட்டுல கிலோ 300 ரூபாய்க்கு விற்பனை செய்றாங்க. நான் மொத்த வியாபாரிகளுக்குக் கொடுத்ததால கிலோவுக்கு 150 ரூபாய் விலை கிடைச்சது. மொத்தமா 550 கிலோவுக்கு 82,500 ரூபாய் கிடைச்சது.

வறண்ட நிலத்திலும்  வருமானம் கொடுக்கும் கொடுக்காப்புளி!



அடுத்த வருஷத்துல இருந்து ஒரு மரத்துல 50 கிலோ பழம் கிடைக்கும்னு சொல்றாங்க. மரத்துக்கு 25 கிலோ காய்ச்சாலும் 250 மரங்கள் மூலமா 6,250 கிலோ மகசூல் கிடைக்கும். ஆறாயிரம் கிலோனு வெச்சுக்கிட்டாலும் 9 லட்ச ரூபாய் கிடைச்சுடும். இதுல 2 லட்ச ரூபாய் செலவு போனாலும் மீதி 7 லட்ச ரூபாய் லாபமா நிக்கும். வெளி மார்க்கெட்ல விற்பனை செஞ்சா, இன்னமும் கூடுதல் லாபம் கிடைக்கும்” என்ற கிருஷ்ணசாமி நிறைவாக,

“என்னைப் பொறுத்தவரைக்கும் அதிகம் அலட்டிக்காத, தண்ணி தேவைப்படாத கொடுக்காப்புளியைத் தரிசு நிலத்தோட தங்கம்னு தான் சொல்வேன். கொஞ்சமா தண்ணி வசதி இருந்து நிலத்தைத் தரிசா போட்டு வெச்சிருக்கற விவசாயிகளுக்கு அருமையான பயிர் இது” என்று கைநிறைய கொடுக்கப்புளியை அள்ளிக்காட்டினார் கிருஷ்ணசாமி.

தொடர்புக்கு,
கிருஷ்ணசாமி,
செல்போன்: 94892 50517


கொடுக்காப்புளியை எந்தெந்த மாதங்களில் நடவு செய்வது, அதை பராமரிப்பது உள்ளிட்ட தகவல்கள் இங்கே இடம் பெறுகிறது.

வறண்ட நிலத்திலும்  வருமானம் கொடுக்கும் கொடுக்காப்புளி!

சாகுபடிச் செய்வது குறித்துப் பேசிய கிருஷ்ணசாமி, “கொடுக்காப்புளி, நாவல் இரண்டுமே அனைத்து வகையான மண்ணிலும் வளரும் என்றாலும் செம்மண் கலந்த சரளை மண்ணில் நன்றாக வளர்கின்றன. கொடுக்காப்புளி நடவுக்குப் புரட்டாசி-ஐப்பசி (செப்டம்பர்-அக்டோபர்) ஆகிய மாதங்கள் ஏற்றவை. இந்த மாதங்களில் நடவு செய்தால் தொடர்ந்து கிடைக்கும் மழையில் செடிகள் நன்கு வளர்ந்துவிடும். கொடுக்காப்புளி, நாவல் இரண்டுக்குமே நடவுமுறை ஒன்றுதான். நடவு செய்யவுள்ள நிலத்தில் 3 அடி நீள, அகல, ஆழம் இருக்குமாறு குழிகளை எடுத்துக்கொள்ள வேண்டும். குழிகளுக்கான இடைவெளி 30 அடி இருக்க வேண்டும். இந்த இடைவெளியில் ஏக்கருக்கு 50 குழிகள் வரை எடுக்கலாம். ஒவ்வொரு குழியிலும் இரண்டடி உயரத்துக்குக் கரம்பை, குப்பை எருவைப் போட்டு, ஒரு மாதம் ஆற விட வேண்டும். பிறகு, செடிகளை நடவு செய்து தண்ணீர் பாய்ச்ச வேண்டும்.

நடவு செய்த ஆறாவது மாதத்திலிருந்து பூக்கள் பூக்கும். அவற்றை உதிர்த்துவிட வேண்டும். அப்போதுதான் மரம் பருமனாகவும் வலுவானதாகவும் வளரும். ஒன்றரை ஆண்டுகளுக்கு மேல் பூக்களை அனுமதித்தால் இரண்டாவது ஆண்டிலிருந்து கொடுக்காப்புளி மகசூல் கொடுக்கத் தொடங்கும். ஜனவரி கடைசி வாரத்தில் தொடங்கி ஏப்ரல் மாதம் வரை கொடுக்காப்புளியின் மகசூல் காலம். கொடுக்காப்புளிக்கு ஓர் ஆண்டில் இரண்டு முறை தொழுவுரம் கொடுத்தால் போதுமானது. காய்ப்பு வரும் நேரத்தில் வளர்ச்சி ஊக்கிகளைக் கொடுக்கலாம்” என்றார். 

பாடில்லா விவசாயம்!

விருதுநகர் மாவட்டம், தாதம்பட்டி அருகேயுள்ள ஒண்டிப்புளியைச் சேர்ந்த விவசாயி பாண்டியன். இவர் முப்பது ஆண்டுகளாகக் கொடுக்காப்புளி விவசாயம் செய்து வருகிறார். அவர் பகிர்ந்துகொண்ட தகவல்கள் இங்கே...

“எங்க தோட்டத்துல நூறு வயசைத் தாண்டுன கொடுக்காப்புளி மரங்கள்கூட இருக்கு. எங்களோட நிலம் வெள்ளை மண்ணு (சுக்கான் மண்). அதுல கொடுக்காப்புளி நடலாம்னு முடிவு செஞ்சு, எங்ககிட்ட இருந்த பழைய மரங்கள்ல இருந்து நாத்து உற்பத்தி பண்ணி நடவு போட்டேன். மொத்தம் நாலு ஏக்கர்ல நடவு செஞ்சிருக்கேன். நான் நடவு செஞ்ச மரங்களுக்கு இப்போ முப்பது வயசாகிடுச்சு. 30 அடி இடைவெளியில நடவு செஞ்சும் மரங்கள் ஒண்ணுக்கொண்ணு முட்டிக்கிட்டுதான் நிக்குது. கொடுக்காப்புளி மரங்களோட வயசு அதிகரிக்க அதிகரிக்க நல்ல மகசூல் கொடுக்கும். அதனால, நீண்ட நாள்கள் வெச்சு மகசூல் எடுக்க நினைக்கிறவங்க, இடைவெளியை இன்னமும் அதிகமாக்கிக்கலாம். நடவு செஞ்ச ரெண்டாவது வருஷம் காய்ப்புக்கு வரும். ஆரம்பத்துல ஒரு மரத்துல இருந்து பத்து கிலோ அளவுக்குக் காய்கள் கிடைக்கும். ஒவ்வொரு வருஷமும் கொஞ்சம் கொஞ்சமா மகசூல் கூடி பத்தாவது வருஷத்துல இருந்து, ஒரு மரத்துக்கு நூறு கிலோவுக்கு மேல மகசூல் கிடைக்கும்.

நாங்க வாய்க்கால் மூலமாத்தான் பாசனம் பண்றோம். வருஷா வருஷம் குப்பை எரு அடிப்போம். இந்த வருஷம் கரம்பை எடுக்க அரசாங்கம் அனுமதி கொடுத்ததால, நிலம் முழுக்க ஓர் அடி உசரத்துக்குக் கரம்பை கொட்டியிருக்கேன். நாலு ஏக்கர்ல இருக்கிற மரங்கள்ல இருந்து இந்த வருஷம் 5 லட்ச ரூபாய்க்குக் பழங்கள வித்திருக்கோம்.

சீசன் நேரத்துல தினமும் 300 கிலோ மகசூல் கிடைச்சது. பிஞ்சு, காய்களைப் பறிக்காம நல்லா பழுத்த பழங்களை மட்டும்தான் பறிப்போம். நான் சில்லறையா ஒரு நாளைக்கு 50 கிலோ வரைக்கும் விப்பேன். அப்படி விக்கும்போது ஒரு கிலோ 250 ரூபாய்ல இருந்து 300 ரூபாய் வரைக்கும் விற்பனையாகும். மீதியைக் கமிஷன் கடைக்கு அனுப்பிடுவேன். அங்க கிலோவுக்கு நூறு ரூபாய் கொடுப்பாங்க. சில நேரங்கள்ல 50 ரூபாய்க்குக்கூட போகும். கமிஷன் கடை மூலமா வித்ததுலயே இந்தத் தடவை 5 லட்ச ரூபாய் வருமானம் கிடைச்சது” என்றார்.

வறண்ட நிலத்திலும்  வருமானம் கொடுக்கும் கொடுக்காப்புளி!

சந்தையை உறுதிப்படுத்திக் கொள்வது அவசியம்!

கொடுக்காப்புளி சாகுபடி பற்றி ‘குன்றக்குடி வேளாண் அறிவியல் மைய’த்தின் தலைவர் மற்றும் பேராசிரியர் செந்தூர்குமரனிடம் பேசியபோது சில விஷயங்களைப் பகிர்ந்துகொண்டார். 

“கொடுக்காப்புளி வறட்சியைத் தாங்கி வளரக்கூடிய மரம். இதில் பூச்சி, நோய்த் தாக்குதல் இருக்காது. இந்தியாவைப் பொறுத்தவரை இதைத் தீவனப் பயிருக்காகத்தான் வளர்த்து வருகிறார்கள். ஆனால், இதன் பழங்களுக்கான தேவை அதிகம் இருக்கிறது. பிலிப்பைன்ஸ், இந்தோனேசியா போன்ற நாடுகளில் பழத்துக்காக இதை அதிகளவு சாகுபடி செய்கிறார்கள்.

கொடுக்காப்புளிக்குப் பல சிறப்புகள் உண்டு. 5 டிகிரி செல்சியஸ் வெப்பநிலை முதல் 45 டிகிரி செல்சியஸ் வெப்பநிலை வரை வளரும் இயல்புடையது. நல்ல வளமான மண்ணிலும் வளரும். மிகவும் மோசமான மண்ணிலும் வளரும். எதற்குமே பயன்படாது என நினைக்கும் மண்ணிலும்கூட இது வளரும். கடுமையான வறட்சியைத் தாங்கும் இயல்புடையது. உப்புத் தண்ணீரிலும் கூட இது நன்றாக வளரும்.

தன்னைத்தானே தகவமைத்துக் கொள்ளும்!

பொதுவாக, முள் உள்ள பயிர்களில் பூச்சி நோய்த் தாக்குதல் குறைவாகத்தான் இருக்கும். ஆனால், கொடுக்காப்புளியில் இலைகள் பசுமையாக இருக்கும் காலத்தில், இலைகளை வெட்டி உண்ணும் ஒரு வகையான புழுக்கள் தாக்கும். ஆனால், கொடுக்காப்புளி அந்தச் சமயத்தில் இலைகள் முழுவதையும் கொட்டித் தன்னைத்தானே தகவமைத்துக்கொள்ளும். இந்த அற்புதமான ஆற்றல் இயற்கையிலேயே கொடுக்காப்புளிக்கு இருக்கிறது. உதிர்த்த இலைகளை மறு உற்பத்தி செய்யத் தாவரங்கள் குறிப்பிட்ட காலத்தை எடுத்துக்கொள்ளும். ஆனால், கொடுக்காப்புளி இலைகளை உதிர்த்த உடனேயே அடுத்த துளிர் வந்துவிடும். இதன் விதை மண்ணில் விழுந்த இரண்டாவது நாளில் முளைத்துவிடும். எட்டாவது நாளில் வேர்விடும். ஒரு மாதத்தில் நடவுக்கு ஏற்ற நாற்றாகத் தயாராகிவிடும். இதன் இலைகள் அருமையான கால்நடைத் தீவனம். இலைகளில் இருக்கும் 19 சதவிகிதப் புரதச்சத்து, கால்நடைகளின் வளர்ச்சிக்குப் பெரிதும் உதவுகிறது.

வறண்ட நிலத்திலும்  வருமானம் கொடுக்கும் கொடுக்காப்புளி!



கொடுக்காப்புளி மரம் 15 மீட்டர் முதல் 25 மீட்டர் வரை வளரும். எந்தப் பராமரிப்பும் இல்லாமலேயே கொடுக்காப்புளி மரம், ஓர் ஆண்டுக்கு ஒன்றரை அடி உயரம் வரை வளரும். நன்றாகப் பராமரித்தால் ஆண்டுக்கு மூன்றடி வரை கூட வளரும். ஜனவரி, பிப்ரவரி மாதங்களில் பூவெடுக்கத் தொடங்கி ஏப்ரல், மே மாதங்களில் பழங்கள் கிடைக்கும். இது அயல்மகரந்தச் சேர்க்கை மூலமாகக் காய்க்கக்கூடிய மரம்.

வறட்சியைத் தாங்கி வளரும் என்றாலும் பழத்துக்காகச் சாகுபடி செய்யும்போது, பாசனம் செய்ய வேண்டியது அவசியம். குறைந்தபட்சம் பத்து நாள்களுக்கு ஒரு முறையாவது பாசனம் செய்ய வேண்டும். சொட்டுநீர்ப் பாசனமே இதற்குச் சிறந்தது. இதை வேலிப்பயிராகப் பயிரிடுபவர்கள் பத்தடி இடைவெளியில் பயிரிடலாம். பழத்துக்காகத் தனிப்பயிராகப் பயிர் செய்ய நினைப்பவர்கள் 25 அடி இடைவெளியில் சாகுபடி செய்ய வேண்டும். இது வறண்ட பூமியிலும் வளமான மகசூலைக் கொடுக்கும் என்பதில் எந்தச் சந்தேகமும் இல்லை.

வறண்ட நிலத்திலும்  வருமானம் கொடுக்கும் கொடுக்காப்புளி!

நுகர்வோரிடம் தற்போதுதான் கொடுக்காப்புளி தொடர்பான விழிப்பு உணர்வு ஏற்பட்டு வருகிறது. உண்மையில் மனித உடலுக்குத் தேவையான பலவிதமான சத்துகளைக் கொண்டது கொடுக்காப்புளி. இதன் வரத்து குறைவாக இருப்பதால் அதிக விலைக்கு விற்பனை செய்யப்படுகிறது. வரத்து அதிகமானால் விலை குறையலாம். அதனால், இதைத் தனிப்பயிராகச் சாகுபடி செய்ய நினைக்கும் விவசாயிகள் சந்தை வாய்ப்பைத் தெளிவாக ஆராய்ந்து விற்பனையை உறுதிப்படுத்திக் கொண்டு சாகுபடியில் இறங்குவது நல்லது.

ஒருங்கிணைந்த பண்ணையங்களில் கொடுக்காப்புளியை இடம் பெறச் செய்வதன் மூலம் ஆடு மாடுகளுக்கான தீவனத்தையும் உற்பத்தி செய்துகொள்ள முடியும்.

சிவப்பு நிறத்துக்கு மாறிய பிறகுதான் உண்ண வேண்டும்!

இதன் பழங்கள் துவர்ப்பு கலந்த இனிப்புச் சுவையுடையவை. வெளிநாடுகளில் இதை மருத்துவத்துக்காகப் பயன்படுத்துகிறார்கள். இதில் நோய் எதிர்ப்புச் சக்தி கொடுக்கக்கூடிய வைட்டமின்-சி அதிகளவில் உள்ளது. குளிர்காலத்தில் ஏற்படும் தொண்டைச் சளி, நுரையீரல் சளிகளுக்கு இதன் பழங்கள் மிகச்சிறந்த மருந்து. கொடுக்காப்புளி பழம் வெள்ளை நிறத்திலிருந்து சிவப்பு நிறத்துக்கு மாறிய பிறகுதான் அதை உண்ண வேண்டும். அப்போதுதான் துவர்ப்பு, இனிப்பு இரண்டும் கலந்ததாக இருக்கும். சிவப்பு நிறமான பிறகு அந்தப் பழம் முழுக்கவே ஆன்டி ஆக்ஸிடன்ட்டாக மாறிவிடும். இது வேறெந்தப் பழத்திலும் கிடைக்காத அற்புதம். கல்லீரல் வீக்கம் மற்றும் கல்லீரல் தொடர்பான பிரச்னை உள்ளவர்கள் கொடுக்காப்புளி பழங்களைத் தொடர்ந்து சாப்பிட்டு வந்தால் நல்ல தீர்வு கிடைக்கும்.

 இந்த மரத்தின் பட்டையைக் காய்ச்சி எடுக்கும் கஷாயம் வயிற்றுப்போக்குக்குச் சிறந்த மருந்து. இதன் இலைகள், செரிமானக்கோளாறு மற்றும் உணவுக்குழாயைச் சுத்தப்படுத்தி, குடல்களில் உருவாகும் நோய்க் கிருமிகளை அழிக்கக்கூடியவை. அதனால்தான் ஆடுகள் இதைத் தின்று, தங்களைத் தாங்களே சரிசெய்து கொள்கின்றன. இதன் பழங்களை உண்பதால் வாய்ப் புண்கள் சரியாகும். இந்தப் பழங்களை உண்ணும்போது, நமது பற்களுக்கும் ஈறுகளுக்கும் இடையே ஓர் இறுக்கமான பிணைப்பு ஏற்படும்” என்றார்.  

தொடர்புக்கு,
பாண்டியன், செல்போன்: 99762 47090
செந்தூர்குமரன், தொலைபேசி: 04577 264288

நாற்றுகள் எங்கு கிடைக்கும்?

நல்ல விளைச்சல் கொடுக்கும் மரங்களிலிருந்து கிடைக்கக்கூடிய முற்றிய விதைகளைச் சேகரிக்க வேண்டும். இந்த விதைகளைப் பிளாஸ்டிக் பைகளில் இட்டு வளர்த்தால் ஒரு மாதத்தில் நாற்றுகள் தயாராகிவிடும். வீரிய கன்றுகள் தேவைப்படுபவர்கள் பெரியகுளம் தோட்டக்கலைக் கல்லூரியில் வாங்கலாம். தவிர, அருகில் உள்ள அரசுத் தோட்டக்கலைத்துறை நாற்றுப்பண்ணைகளிலும் கிடைக்கும். பெரியகுளம் தோட்டக்கலைக் கல்லூரி அறிமுகப்படுத்தியுள்ள பி.கே.எம்-1 ரகம் (வீரிய ஒட்டு ரகம்) வணிக ரீதியான சாகுபடிக்கு ஏற்றதாக இருப்பதாக விவசாயிகள் சொல்கிறார்கள்.

தொடர்புக்கு, தொலைபேசி: 04546 231726.

மாரடைப்பைத் தடுக்கும் கொடுக்காப்புளி!

கொடுக்காப்புளி பழத்தில் அதிகளவு பொட்டாசியம் உள்ளது. இதைப் பற்றிப் பேசிய இயற்கை மருத்துவரும் யோகா நிபுணருமான ஷர்மிளா பாலகுரு, “பொட்டாசியம் சத்து மனிதர்களுக்கு அவசியமான ஒன்று. இது எலும்புகளுக்குப் பலத்தைக் கூட்டுகிறது. ரத்தத்தில் பொட்டாசியத்தின் அளவு குறைவதும் ரத்த அழுத்தத்துக்கு ஒரு காரணம். பொட்டாசியம் அளவு குறைவாக இருந்தால் ரத்தத் தட்டுகள் சீராக இல்லாமல், ரத்தக் குழாய்கள்மேல் ஒட்டிக்கொள்ளும்.

மாரடைப்பு வருவதற்கான பல்வேறு காரணங்களில் இதுவும் ஒன்று. நமது உணவு முறையில் பெரும்பாலும் பொட்டாசியம் சத்து கிடைப்பதற்கான வாய்ப்பு குறைவாகவே இருக்கிறது. எனவே பொட்டாசியம் நிறைந்த உணவுகள், பழங்களை உண்பது பல நோய்களிலிருந்து நம்மைக் காக்கும்’’ என்றார்.

கொடுக்காப்புளி வரலாறு! பித்தெஸெல்லோபியம் டூல்ஸ்

(Pithecellobium Dulce) என்ற தாவரவியல் பெயர்கொண்ட கொடுக்காப்புளியின் தாயகம் மெக்சிகோ. 1815-ம் ஆண்டு இதைச் சட்டவிரோதமாக எடுத்துச் சென்று பிலிப்பைன்ஸ் நாட்டில் அறிமுகப்படுத்தப்பட்டது. பிறகு, அங்கிருந்து உலகம் முழுவதும் இது பரவியிருக்கிறது. ஆனால், முதன்முதலில் இதன் பழங்களை உண்ணலாம் எனப் பிலிப்பைன்ஸ் நாட்டின் தலைநகர் மணிலாவில்தான் கண்டுபிடித்ததாகச் சொல்கிறார்கள்.

அதனால், இது ‘மணிலா புளி’ எனவும் ஆங்கிலத்தில் ‘மணிலா டேமரின்’ எனவும் அழைக்கப்படுகிறது. மியான்மர், மலேசியா, பிலிப்பைன்ஸ், சீனா, இந்தியா போன்ற ஆசிய நாடுகளில் மட்டுமே இந்த மரம் பெருமளவில் காணப்படுகிறது.

கென்யா, தான்சானியா ஆகிய நாடுகளில் கொடுக்காப்புளி பழங்களை உணவாகப் பயன்படுத்துகிறார்கள். உலகளவில் கொடுக்காப்புளியை அதிகளவு பழத்துக்காகச் சாகுபடி செய்வது பிலிப்பைன்ஸ் மற்றும் இந்தோனேசியா நாடுகள்தான். இதன் மற்றொரு ஆங்கிலப் பெயர் ‘மெட்ராஸ் தார்ன்’.

ஆங்கிலேயர்கள் இந்தியாவை ஆண்ட காலகட்டத்தில் தமிழ்நாட்டில் பரவலாக இதைப் பார்த்ததாலும் அதில் முட்கள் இருந்ததாலும் அவர்கள் ‘மெட்ராஸ் தார்ன்’ எனப் பெயர் வைத்துவிட்டார்கள் என்ற கருத்து நிலவுகிறது. ஆப்பிரிக்கக் காடுகளில் உள்ள குரங்குகள், கொடுக்காப்புளி காயைப் பறித்துக் காதுகளில் தோடுபோல அணிந்துகொள்ளும். இதற்குப் ‘பேய்களின் நெக்லஸ்’ என்ற பெயரும் இருக்கிறது.