Published:Updated:

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!
பிரீமியம் ஸ்டோரி
News
மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

சுற்றுச்சூழல்‘வனதாசன்’ ரா.ராஜசேகரன் - தொகுப்பு: ஆர்.குமரேசன்

‘தாய் நிலம் தந்த வரம் தாவரம்... அது தழைக்கத் தழைக்க மகிழ்வார்கள் யாவரும்’- பொதிகை தொலைக்காட்சியின் ‘வயலும் வாழ்வும்’ நிகழ்ச்சியில் ஒலித்த இந்தப்பாடல் பலருக்கும் தெரிந்திருக்கும். நாம் நட்டு வைத்த தாவரங்கள் தழைக்கத் தழைக்க மனதில் மகிழ்ச்சி உருவாவதை அனைவரும் உணர்ந்திருப்போம். இப்படி நமக்கு மகிழ்ச்சி அளிக்கும் தாவரங்களில் சில இயற்கைச் சீற்றங்களின்போது நமக்குப் பாதுகாப்பு அரணாகவும் இருக்கின்றன. குறிப்பாக, கடற்கரையோரச் சதுப்பு நிலங்களில் வாழும் தாவரங்கள், கடலில் ஆக்ரோஷமாகப் பொங்கிவரும் அலைகளை ஆற்றுப்படுத்தி, சீற்றத்தைத் தணிக்கின்றன. அதனால், இத்தாவரங்கள் சூழ்ந்த சதுப்பு நிலக்காடுகளை ‘அலையாத்திக் காடுகள்’ என்று அழைக்கிறார்கள். ஆறும் கடலும் இணையும் கழிமுகப்பகுதிகளில் உருவாகும் காடுகள்தான் சதுப்பு நிலக்காடுகள்.   

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

மலைப்பகுதிகளில் உள்ள காடுகள், வறட்சியின்போது காய்ந்து போகும். ஆனால், இந்த அலையாத்திக் காடுகள் எப்போதும் தண்ணீரில் அல்லது தண்ணீருக்கு அருகிலேயே இருப்பதால் பசுமையாகவே இருக்கின்றன. எனவே இவை, ‘பசுமை மாறாக் காடுகள்’ எனவும் அழைக்கப்படுகின்றன. சூழலியல் சமன்பாட்டில் இத்தகைய சதுப்பு நிலக்காடுகள் முக்கியப் பங்கு வகிக்கின்றன.

மேலும், இவ்வகை காடுகள் சுரபுன்னைக் காடுகள், கண்டல் காடுகள் என்றும் அழைக்கப்படுகின்றன. மேற்கு வங்க மாநிலத்தில் இக்காடுகளில் சுந்தரி மரங்கள் இருப்பதால், ‘சுந்தரவனக் காடுகள்’ என்றும் அழைக்கப்படுகின்றன. சதுப்பு நிலங்கள் இடத்துக்கு இடம் மாறுபடும் தன்மையுடையவை. அதனால், இடத்தின் தன்மைக்கு ஏற்ப லிட்டோரல் வனங்கள் (Littoral Forests), மாங்குரோவ் காடுகள் ( Mangrove Forests), தூயநீர்ச் சதுப்பு வனங்கள் (Fresh Water Swamps), ஆற்றுப்படுகை வனங்கள் (Piparian Fringing Forests) எனவும் அழைக்கப்படுகின்றன. அடர்ந்த அல்லது மிதமான பசுமைக் காடுகள் வகையைச் சேர்ந்தவை சதுப்பு நிலக்காடுகள். ஒவ்வொரு முறை அலை எழுச்சியின்போதும், இத்தாவரங்கள் நீரில் மூழ்கினாலும், உயிர் வாழும் சிறப்பைப் பெற்றவை. இக்காடுகளில் அலையாத்தி, கண்டல், காயகண்டல், சிறுகண்டல், சிவப்புக் கோகண்டம் போன்ற மர வகைகளும் கழுதைமுள்ளி, சங்கன்குப்பிப் போன்ற குறுஞ்செடிகளும் செழித்து வளர்கின்றன. இவற்றில் பல தாவரங்கள் பிணி தீர்க்கும் மூலிகைகளாகவும் உள்ளன.    

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

நிலப் பகுதிகளிலுள்ள காடுகளை நேசிக்கும் அளவுக்கு, இந்தச் சதுப்புநிலக் காடுகளை மனித மனங்கள் நேசிப்பதில்லை. ஆனால், இவைதான் புயல் மற்றும் ஆழிப்பேரலைகளிலிருந்து கடலோரப்பகுதி மக்களைப் பாதுகாக்கின்றன. சதுப்பு நிலக்காடுகளின் அழகும் அமைதியும் மரங்களைக் கரைகளாகக்கொண்ட நீர்ப்பரப்பும் தனித்துவமான சுற்றுச்சூழலை உருவாக்குகின்றன. கடற்கரைப் பகுதிகளை ஒட்டியுள்ள இக்காடுகள், மேட்டுப்பகுதி நிலங்களில் ஏற்படும் மண் அரிப்பை வெகுவாகக் குறைக்கின்றன. 2004-ம் ஆண்டு ஆழிப்பேரலை(சுனாமி) தமிழகத்தில் கடுமையான பாதிப்புகளை ஏற்படுத்திய போதும், இக்காடுகள் இருந்த பகுதிகளில் சேதம் குறைவாகத்தான் இருந்தது.

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!



1968-ம் ஆண்டு இந்தியாவில் ஆய்வு மேற்கொண்ட சர்ஹாரி சேம்பியன் மற்றும் சேத் ஆகிய வனவியல் அறிஞர்கள், இந்தியக் காடுகளில் 16 வகையான வனங்கள் இருப்பதாகப் பட்டியலிட்டுள்ளனர். அதில் சதுப்பு நிலக்காடுகள் உள்ளிட்ட ஒன்பது வகையான வனங்கள், தமிழகத்தில் இருப்பது நமது மாநிலத்தின் சிறப்புகளுள் ஒன்று.

தமிழகத்தில் 1960-களிலிருந்த காடுகளின் பரப்பளவு தற்போது இல்லை. அந்தக் காலகட்டத்தில், தமிழக வனத்துறையில் மாவட்ட வன அலுவலராகப் பணியாற்றிய காலஞ்சென்ற கே.ஆர்.வெங்கடேசன், சதுப்பு நிலத் தாவரங்களைப் பற்றிப் பல்வேறு ஆராய்ச்சிகளைச் செய்திருக்கிறார். கடற்கரையோரமாக வாழும் மக்கள், விறகுக்காகவும் பிற உபயோகங்களுக்காகவும் இக்காடுகளை அழிக்கத் தொடங்கினார்கள். ஆழிப்பேரலையான சுனாமி, மக்களின் தவறை உணர்த்திய பிறகுதான், ஆள்பவர்களும் மக்களும் விழிப்படைந்தனர். அதன் பிறகுதான், உகந்த பகுதிகளில் மீன் முள் வடிவில் நிலப்பகுதிகளை ஏற்படுத்தி, அங்கு உரிய தாவர வகைகளை நட்டு இயற்கையான காடுகளைப்போன்ற மரக்கூட்டங்களை உற்பத்திசெய்து, பராமரித்து வருகிறார்கள்.

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

சதுப்பு நிலக்காடுகள், கடலின் ஆக்ரோஷமான அலைகளை ஆற்றுப் படுத்துவதால் மட்டுமே அலையாத்திக் காடுகள் என அழைக்கப்படுவதில்லை. ‘அலையாத்தி’ என்ற மர வகையும் இங்கு வளர்கிறது. உவர் தன்மையைத் தாங்கி வளரும் அரிய வகைத் தாவரங்கள் இந்தக் காடுகளில் மட்டுமே உள்ளன. இந்தத் தாவரங்களைச் சுற்றி எப்போதும் தண்ணீர் தேங்கியுள்ளதால், இவற்றுக்குச் சில சிறப்புக் குணங்களை அளித்திருக்கிறது இயற்கை. உயிர்வாயுத் தேவைக்காக இந்தத் தாவரங்கள் சுவாச வேர்களைத் தோற்றுவிக்கின்றன. தண்ணீருக்குமேல் நீட்டிக்கொண்டிருக்கும் இந்த வேர்கள் மூலமாகவே இந்தத் தாவரங்கள் சுவாசிக்கின்றன. இந்தத் தாவரங்களுக்கு மற்றொரு சிறப்பும் உண்டு. வழக்கமாகத் தாவரங்களின் விதைகள் பூமியில் விழுந்த பிறகே முளைக்கத் தொடங்குகின்றன. ஆனால், சதுப்பு நிலக்காடுகளில் இருக்கும் தாவரங்களின் விதைகள் ‘ஆகாய விதை முளைத்தல்’ (Vivipary) என்ற சிறப்பான குணம் படைத்தவை. மரத்திலிருந்து கீழே விழும் விதைகள், தண்ணீரால் அடித்துச் செல்லப்பட்டுவிடும் என்பதால் பெரும்பாலான தாவரங்களின் விதைகள் மரங்களில் ஒட்டியிருக்கும்போதே முளைக்கத் தொடங்கிவிடுகின்றன. உரிய பருவம் அடையும்போது கீழே விழுந்து, சேற்றுப்பகுதியில் ஈட்டிபோலக் குத்தி நிற்கின்றன. பிறகு நிலத்தில் வேரை இறக்கி, நிலைபெற்று நின்றுவிடுகின்றன.   

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

இக்காடுகள் உள்ள பகுதியில் கடற்சூழல் நிலவுவதால், பல வகையான கடல்வாழ் உயிரினங்கள் வாழ்வதற்கு ஏற்ற இடமாகவும் இவை இருக்கின்றன. இச்சூழலில் இறால்கள் நன்றாக வளரும் என்பதால், அலையாத்திக் காடுகளை ‘இறால் மீனின் தொட்டில்’ என அழைக்கிறார்கள். மீனவர்களும் இதை உணர்ந்துகொண்டதால், தற்போது அலையாத்திக் காடுகளைச் சேதப்படுத்துவதில்லை. கடற்பறவைகள் வாழ்வதற்கும் இக்காடுகள் பெரிதும் உதவியாக இருக்கின்றன. பல்லாயிரம் கிலோமீட்டர் தூரம் கடந்து வலசை வரும் பறவைகளுக்கு அலையாத்திக் காடுகளே உறைவிடமாக இருக்கின்றன. அரிய வகைப் பறவைகளான பூநாரை, செங்கால் நாரை, கரண்டிவாயன், நத்தைக்கொத்தி நாரை, கூழைக்கடா, வெள்ளை அரிவாள் மூக்கன், கறுப்பு அரிவாள் மூக்கன், நெடுங்கால் உள்ளான், ஆலா மற்றும் கடல்புறா ஆகியவை இக்காடுகளில் விரும்பித் தங்கும் பறவைகள். இப்பறவைகள், கடல் சூழலில் உற்பத்தியாகும் பல வகையான பூச்சிகள், புழுக்களை உண்டு கடலைச் சுத்தப் படுத்துகின்றன.

மன்னார் வளைகுடா உயிர்க்கோளப் பகுதியில் சுமார் பதிமூன்று வகையான தாவரங்கள் இருக்கின்றன. ‘மன்னார் வளைகுடா உயிர்க்கோளக் காப்பக அறக்கட்டளை’ மன்னார் வளைகுடாப் பகுதியின் கடல் வளத்தைப் பாதுகாக்கவும் மீனவர்கள் வாழ்வை மேம்படுத்தவும் தமிழக அரசால் அமைக்கப்பட்ட சிறப்பு அமைப்பு.    

மரம் செய விரும்பு! - 14 - சூழலைச் சமன்செய்யும் சதுப்பு நிலக்காடுகள்!

தனுஷ்கோடி முதல் கன்னியாகுமரி வரை பரந்துள்ள இந்தியக் கடல் பரப்பு, மன்னார் வளைகுடா என்று அழைக்கப்படுகிறது. இதன் பரப்பளவு 10,500 சதுர கிலோமீட்டர். இப்பகுதியில் சுமார் 3,600 வகையான கடல்வாழ் உயிரினங்கள் வசிக்கின்றன. இவற்றில் பெரும்பாலான உயிரினங்கள் உலகில் வேறெங்கும் காண முடியாத அரியவகை உயிரினங்கள். இங்குள்ள அலையாத்திக் காடுகளில் காணப்படும் கீரிச்செடி, இந்த உயிர்கோளப் பகுதியில் மட்டுமே காணப்படும் அரியவகைத் தாவரம்.

அலையாத்திக் காடுகளை அழிக்காமல் செழிக்க வைத்துச் சூழலைக் காப்போம்!

- வளரும்