Published:Updated:

விளையும் விலையும்! - சந்தைக்கு வழிகாட்டும் தொடர் - 14

விளையும் விலையும்! - சந்தைக்கு வழிகாட்டும் தொடர் - 14
பிரீமியம் ஸ்டோரி
News
விளையும் விலையும்! - சந்தைக்கு வழிகாட்டும் தொடர் - 14

இயற்கை அங்காடி... இப்படித்தான் இருக்க வேண்டும்!சந்தைஅனந்து - தொகுப்பு: க.சரவணன்

வெகுஜன சந்தை, அதனைக் கட்டமைக்கும் அரசின் கொள்கைகள், வர்த்தக ஒப்பந்தங்கள் ஆகியவை விவசாயிகளின் வாழ்வாதாரத்தைப் பறித்து, பெருநிறுவனங்களுக்குத் துணை போகின்றன. இந்த வெகுஜன சந்தையின் பிடியிலிருந்து மீள, நாம் மாற்றி யோசிக்க வேண்டியது அவசியம். ஆக்கபூர்வமான, நேர்மையான மற்றும் வெளிப்படையான சந்தைகள்தான் விவசாயிகளுக்கும் நுகர்வோருக்கும் கைகொடுக்கும். இப்படிப்பட்ட சந்தைகள் குறித்து நாம் தொடர்ந்து பார்த்து வருகிறோம்.   

விளையும் விலையும்! - சந்தைக்கு வழிகாட்டும் தொடர் - 14

மாற்று சந்தை, இப்படித்தான் இருக்க வேண்டும் என்று கறாராக விதிகளை வகுக்க முடியாது. மாற்று சந்தையை வெற்றிகரமாகச் செயல்படுத்தும் அமைப்புகள், பல இடங்களில் கிளைகளைத் தொடங்க வேண்டும் என்ற அவசியமில்லை. அதே நேரத்தில், மாற்று சந்தையின் அவசியம் குறித்தும் ஆரோக்கியமான உணவு குறித்தும் நுகர்வோருக்குத் தொடர்ந்து விழிப்பு உணர்வு ஏற்படுத்தி வர வேண்டும். பாரம்பர்ய உணவுத் திருவிழாக்களை நடத்துவதன் மூலமாகவும் விழிப்பு உணர்வு ஏற்படுத்தலாம். 

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
விளையும் விலையும்! - சந்தைக்கு வழிகாட்டும் தொடர் - 14



வெகுஜன சந்தையின் விலையைக்கொண்டு இயற்கை வேளாண் சந்தையில் பொருள்களின் விலையை நிர்ணயிக்கக் கூடாது. விவசாயிகளே விலையை நிர்ணயிப்பதுதான் சிறந்தது. உற்பத்திச் செலவுடன், நியாயமான லாபம் வைத்து விலை நிர்ணயிக்கலாம். அதிலும் விவசாயிகளே நேரடியாகச் சந்தைப்படுத்த வேண்டும்.

விளையும் விலையும்! - சந்தைக்கு வழிகாட்டும் தொடர் - 14

அதேபோல, சில்லறை வணிகத்தில் இயற்கை அங்காடிகள் அமைக்க நினைப்பவர்கள் பெரிய முதலீடு, அதிகப் பொருள்கள் என்று அமைக்க வேண்டியதில்லை. அதிகளவில் கடன் வாங்கி அமைக்கப்பட்ட பல அங்காடிகள், சில ஆண்டுகளிலேயே காணாமல் போயிருக்கின்றன. சீரான, படிப்படியான வளர்ச்சியே நிலைத்து நிற்கும். இயற்கை அங்காடிகள் பிரதானச் சாலைகளில்தான் அமைய வேண்டும் என்ற அவசியமில்லை. இயற்கைப் பொருள்களைப் பற்றிய புரிதல் உள்ளவர்கள், விவசாயிகளின்மேல் கரிசனம் உள்ளவர்கள், ஆரோக்கியத்தில் அக்கறை உள்ளவர்கள் ஆகியோர் மட்டுமே இயற்கை அங்காடிகளை நாடுகின்றனர். எனவே, இயற்கை அங்காடிகள் எங்கு இருந்தாலும், அவர்கள் தேடி வருவார்கள். மேலும், கடைகள் உள்ளடங்கி இருக்கும்போது வாடகையும் குறைவாக இருக்கும். இயற்கை அங்காடிகளுக்கு அதிகப் பொருள் செலவில் உள் அலங்காரம் மற்றும் குளிர்சாதன வசதிகள் தேவையில்லை. சிறிய அளவில் இருந்தாலும் தூய்மையாக நிர்வகிக்கப்படும் அங்காடிகள்தான் வாடிக்கையாளர்களைக் கவர்கின்றன. அதே நேரத்தில், அங்காடிகளில் பாரம்பர்ய ரக விளைபொருள்கள், ஆரோக்கியமான இயற்கை விளைபொருள்கள் நிச்சயம் இருக்க வேண்டும். தானியங்கள், பருப்பு வகைகள், சிறுதானியங்கள், மசாலா பொருள்கள், மதிப்புக் கூட்டப்பட்ட பொருள்கள் ஆகியவை கட்டாயம் இருக்க வேண்டும். காய்கறி மற்றும் பழங்களை வாரம் இருமுறை விற்பனை செய்யலாம். மூலிகைப் பொருள்கள், அழகு சாதனப் பொருள்கள் ஆகியவற்றைக் கொஞ்சம் கொஞ்சமாக விற்பனைக்குக் கொண்டு வரலாம்.   

விளையும் விலையும்! - சந்தைக்கு வழிகாட்டும் தொடர் - 14

நஞ்சற்ற உணவுப் பொருள்கள் விற்பனை செய்யப்படுவதன்மூலம், நியாயமான விலை விவசாயிகளுக்குக் கிடைக்கிறது என்பதை உறுதி செய்ய வேண்டும். இந்த முறையில் நுகர்வோரிடம் பரப்புரை மேற்கொள்ள வேண்டும். பொருள்கள் எங்கிருந்து வருகின்றன என்பதையும் நுகர்வோருக்குத் தெரியப்படுத்த வேண்டும். அங்காடிகளுக்கான பொருள்களை விவசாயிகளிடம் நேரடியாகக் கொள்முதல் செய்ய வேண்டும். அவற்றை நாமே சிப்பம், பொட்டலம் கட்ட வேண்டும். இதனால், நமக்கு வேலை அதிகரித்தாலும், விவசாயிகளுக்குக் கணிசமான லாபம் கிடைக்க வாய்ப்புள்ளது. தரமான பொருள்களைத் தொடர்ந்து கொடுப்பதன் மூலம், வாடிக்கையாளர்களை நிலைநிறுத்த முடியும்.    

விளையும் விலையும்! - சந்தைக்கு வழிகாட்டும் தொடர் - 14

கடை வாடகை, சம்பளம், தொலைபேசிக் கட்டணம் ஆகியவை மொத்த விற்பனையில் பத்து சதவிகித அளவுக்குள் இருக்க வேண்டும். போக்குவரத்து மற்றும் பொருள் இழப்பு ஏழு சதவிகிதத்துக்குள் இருக்க வேண்டும். கடையிலுள்ள பொருள்களின் மதிப்பு மற்றும் கையிருப்புத் தொகை, விற்பனை செய்ததன்மூலம் வர வேண்டிய பாக்கித் தொகை ஆகிய மூன்றின் கூட்டுத்தொகை... அங்காடிக்கான மொத்தக் கடன் மற்றும் விவசாயிகளுக்கான நிலுவைத்தொகை ஆகியவற்றைவிட அதிகமாக இருக்க வேண்டும். எப்போதும் விவசாயிகளுக்குப் பாக்கி வைக்கக் கூடாது. உடனுக்குடன் பணத்தைப் பட்டுவாடா செய்ய வேண்டும். இது விவசாயிகளுடன் நல்லுறவை வளர்க்கும்.   

விளையும் விலையும்! - சந்தைக்கு வழிகாட்டும் தொடர் - 14

கடையில் வியாபாரம் அதிகரிக்கும்போது, உள் அலங்காரம், கணினிப் பயன்பாடு ஆகியவற்றில் கவனம் செலுத்தலாம். கணினிப் பயன்பாடுமூலம் கணக்கு வழக்குகள் தெளிவாக இருப்பதோடு, சில புள்ளி விவரங்களையும் பெற முடியும். சட்ட விதிகளுக்கு உட்பட்டு, உள்ளாட்சி அமைப்புகளின் வணிக உரிமம், பதிவு, உணவுக் கட்டுப்பாட்டுத்துறையில் பதிவு செய்து சான்றிதழ் பெறுதல் (FSSAI), கடைகள் மற்றும் கட்டமைப்புகள் சட்டத்தின்படிப் பதிவு செய்தல், வரி செலுத்துதல் (GST) எடை இயந்திர உரிமம் பெறுதல் ஆகியவற்றைக் கடைப்பிடிப்பது நீண்டகாலச் செயல்பாட்டுக்கு உதவும்.

இயற்கை விளைபொருள்களில் பூச்சிகள் அதிகம் தாக்கக்கூடும். அதனால், அங்காடி அமைந்திருக்கும் இடத்தின் தட்ப வெப்ப நிலை, சுற்றுச்சூழல் ஆகியவற்றை அறிந்து, அதற்கு ஏற்றபடி இயற்கை விளைபொருள்களைப் பாதுகாக்கும் முறைகளைக் கடைப்பிடிக்க வேண்டும். அவ்வப்போது சரியான அளவிலான சல்லடைகளைப் பயன்படுத்தி அரிசி, கோதுமை, பருப்பு வகைகள் ஆகியவற்றைச் சலித்துப் பூச்சிகளை நீக்கி, இருப்பு வைக்க வேண்டும். சூரிய ஒளியில் காய வைப்பதன் மூலம் எளிதாகப் பூச்சிகளைக் கட்டுப்படுத்தலாம்.   

விளையும் விலையும்! - சந்தைக்கு வழிகாட்டும் தொடர் - 14

மேலும், நோய்த் தொற்றுகளையும் நீக்கலாம். காய்ந்த மிளகாய், வசம்பு, மஞ்சள், லெமன் கிராஸ், வேப்பிலை ஆகியவற்றைத் தானியங்களுடன் போட்டு வைத்தாலும் பூச்சிகள் வராது. எலி போன்ற கொறிக்கும் உயிரினங்களிடமிருந்து தானியங்களைப் பாதுகாப்பதும் அவசியம்.

இவற்றையெல்லாம் கவனத்தில் கொள்வதுடன், சிறப்பாகச் செயல்படும் இயற்கை அங்காடிகளை நேரில் பார்வையிட்டு அனுபவப் பாடத்தைக் கற்றுக் கொள்வதும், வெற்றிகரமாக இயங்க உதவும்.

-விரிவடையும்

அங்காடிக்கு எவ்வளவு செலவு செய்யலாம்? 

யற்கை அங்காடி அமைப்பதற்கு எவ்வளவு செலவு செய்யலாம் என்பது குறித்துச் சில ஆலோசனைகள்:

சென்னை, திருச்சி, கோயம்புத்தூர் போன்ற மாநகரங்களின் உள்பகுதிகளிலிருந்துவரும் கடை வாடகையின் அளவைப் பொறுத்து உத்தேசமாகக் கணக்கிடப்பட்டுள்ளது. 

கடை வாடகை    5,000 ரூபாய் முதல் 8,000 ரூபாய் வரை இருக்கலாம். ஆரம்பத்தில் சிறிய கடையாகத் தொடங்குவது நலம்.

கடையில் விற்பனைக்கு வைக்கும் பொருள்கள் 50,000 ரூபாயிலிருந்து 75,000 ரூபாய் மதிப்பில் இருக்கலாம். அதிகமாக முதலீடு செய்யாமல், கிடைக்கும் லாபத்திலிருந்து படிப்படியாக விற்பனைக்கான பொருள்களை அதிகரிக்க வேண்டும்.

பொருள்களை வைக்கும் கன்டெய்னர்கள் மற்றும் தளவாடச் சாமான்களுக்கான முதலீடு 30,000 ரூபாயிலிருந்து 50,000 ரூபாய் வரை இருக்கலாம். தேவையைப் பொறுத்துப் படிப்படியாக அதிகரித்துக் கொள்ளலாம்.

ஆரம்பத்தில் 10,000 ரூபாய்ச் சம்பளத்தில் ஒரே ஒரு நபரை வேலைக்கு வைக்கலாம். விற்பனை அதிகரிப்பதைப் பொறுத்து ஆள்களை அதிகரித்துக் கொள்ளலாம்.

சுத்தப்படுத்தல், பேக்கிங், போக்குவரத்து ஆகியவற்றுக்கான செலவு, பொருளின் மதிப்பில் 10% அளவுக்குள் இருக்க வேண்டும்

ஆரம்பக் காலங்களில் விளம்பரத்துக்கு 5,000 ரூபாய் வரை செலவு செய்யலாம்.

நுகர்வோரின் கவனத்துக்கு...

யற்கை அங்காடிகளில் விற்பனை செய்யப்படும் இயற்கை விளைபொருள்கள் எங்கிருந்து, எந்த விவசாயியிடமிருந்து வாங்கப்பட்டன என்பதை நுகர்வோர் கேட்டுத் தெரிந்துகொள்ள வேண்டும். அங்ககச் சான்றுகளை நம்புவதைவிட இது சிறந்தது. விளைபொருளின் தரம், சுவை ஆகியவற்றை வைத்தே இயற்கை விளைபொருள்தானா என்பதைத் தெரிந்துகொள்ள முடியும். மூலப்பொருளின் விலையைவிட மதிப்புக் கூட்டப்பட்ட பொருளின் விலை, குறைவாக இருந்தால் அதில் கலப்படம் உள்ளது என்பதை எளிதாக அறிய முடியும். அதே நேரத்தில் கலப்படப் பொருளை அதிக விலை வைத்து விற்பனை செய்யவும் வாய்ப்புகள் உண்டு. அதனால், கவனமாக இருக்க வேண்டும்.

மதிப்புக் கூட்டப்பட்ட பொருள்களில் நமக்குத் தெரியாத பொருள்களோ, வேதிப் பொருள்களோ கலந்திருப்பது தெரியவந்தால், அவற்றைத் தவிர்த்து விட வேண்டும். இயற்கை அங்காடிகளில் பாலித்தீன் பயன்பாட்டைத் தவிர்க்க வேண்டும். சாமியார்கள், யோகா குருக்கள், பிரபலமான நபர்களின் படங்களைத் தாங்கியிருப்பதாலேயே அவை இயற்கைப் பொருள்கள் என்று நம்பி விடக்கூடாது.