Published:Updated:

பங்கமில்லாமல் வருமானம் கொடுக்கும் பாகல்!

பங்கமில்லாமல் வருமானம் கொடுக்கும் பாகல்!
பிரீமியம் ஸ்டோரி
பங்கமில்லாமல் வருமானம் கொடுக்கும் பாகல்!

ஒரு ஏக்கர்... 160 நாள்கள்... ரூ 3 லட்சம் லாபம்!மகசூல்ஜி.பழனிச்சாமி - படங்கள்: நா.ராஜமுருகன்

பங்கமில்லாமல் வருமானம் கொடுக்கும் பாகல்!

ஒரு ஏக்கர்... 160 நாள்கள்... ரூ 3 லட்சம் லாபம்!மகசூல்ஜி.பழனிச்சாமி - படங்கள்: நா.ராஜமுருகன்

Published:Updated:
பங்கமில்லாமல் வருமானம் கொடுக்கும் பாகல்!
பிரீமியம் ஸ்டோரி
பங்கமில்லாமல் வருமானம் கொடுக்கும் பாகல்!

திரடியாக உச்சத்துக்கு ஏறாமலும் திடீரென அதலபாதாளத்துக்கு இறங்காமலும் நிலையாக விலை கிடைக்கக்கூடிய காய்கறிகளில் ஒன்று பாகற்காய். கொடிவகை காய்கறியான பாகற்காய், பந்தல் காய்கறிச் சாகுபடி செய்பவர்களின் கட்டாயத் தேர்வாக இருந்துவருகிறது. அதே நேரத்தில் கல்தூண் பந்தல் அமைக்க லட்சக்கணக்கான ரூபாய் செலவு பிடிக்கும் என்பதால், பல விவசாயிகள் பந்தல் சாகுபடியில் ஈடுபடத் தயக்கம் காட்டி வருவதும் நிதர்சனம். பந்தலுக்காக அதிகம் செலவழிக்காமல், எளிய தொழில்நுட்பத்தில் குறைந்த செலவில் பந்தல் அமைத்துப் பாகற்காய்ச் சாகுபடி செய்து வருகிறார் கரூர் மாவட்டத்தைச் சேர்ந்த ராஜசேகர்.   

பங்கமில்லாமல் வருமானம் கொடுக்கும் பாகல்!

சின்னதாராபுரம் அடுத்துள்ள மல்லநத்தம் கிராமத்தில்தான் ராஜசேகரின் பாகற்காய்த் தோட்டம் இருக்கிறது. இவர் இயற்கை வேளாண்மை முறையில் பாகற்காய்ச் சாகுபடி செய்து நல்ல வருமானம் ஈட்டி வருகிறார்.

வளைந்து வளைந்து செல்லும் வண்டிப்பாதையின் இரு பக்கங்களிலும் பச்சைச் சுவர்போல நீண்டு கிடக்கிறது கிளுவை மர உயிர்வேலி. அதில் படர்ந்து தொங்குகின்றன சிவப்பு நிறக் கோவைப்பழங்கள். வேலியடைத்த காட்டில் வளர்ந்து நிற்கும் கொழுக்கட்டைப் புற்களை மேய்ந்து கொண்டிருந்தன செம்மறி ஆடுகள். குறுக்கும் நெடுக்குமாகப் பறந்து கொண்டிருந்த பட்டாம் பூச்சிகளையும் தோகை விரித்து விளையாடிக்கொண்டிருந்த மயில்களையும் பார்க்கும்போது, இன்னமும் இங்கு இயற்கை சூறையாடப்படவில்லை என்பதைப் பறை சாற்றிக் கொண்டிருந்தது. இப்படி இயற்கையை ரசித்துக்கொண்டே ராஜசேகரின் தோட்டத்துக்குள் நுழைந்தோம்.  

ஒட்டுமொத்த விகடனுக்கும் ஒரே ஷார்ட்கட்!

பங்கமில்லாமல் வருமானம் கொடுக்கும் பாகல்!

பாகற்காய்த் தோட்டத்தில் மனைவி ராஜேஸ்வரியுடன் அறுவடைப் பணியில் ஈடுபட்டிருந்த ராஜசேகர், நாம் வந்ததை அறிந்ததும் மகிழ்ச்சியாக வரவேற்றுப் பேசினார்.

“எங்களுக்குப் பூர்வீகமே இந்தக் கிராமம்தான். மொத்தம் 24 ஏக்கர் நிலமிருக்கு. அதுல 15 ஏக்கர் நிலத்தை வேலி அடைச்சு மேய்ச்சல் நிலமா விட்டிருக்கோம். 2 ஏக்கர் நிலத்துல முருங்கை இருக்கு. 4 ஏக்கர் நிலத்துல நிலக்கடலை போட்டிருக்கோம். 50 செம்மறியாடுகள் இருக்கு. செம்மறியாடுகளுக்குத்தான் இந்த மேய்ச்சல் காடு. முன்ன 16 ஏக்கர் நிலத்தை மேய்ச்சலுக்காகத்தான் விட்டிருந்தோம். அதுல ஒரு ஏக்கர் நிலத்தை எடுத்துதான் பாகல் சாகுபடி பண்றோம்.  

பங்கமில்லாமல் வருமானம் கொடுக்கும் பாகல்!

ஆடுகள்ல கிடைக்கிற குட்டிகளை அப்பப்போ கன்னிவாடி சந்தையில வித்துடுவோம். முருங்கையை மூலனூர் சந்தைக்குக் கொண்டுபோய் விற்போம்.நிலக்கடலையை வெள்ளக்கோவில்ல இருக்குற ஆயில் மில்லுக்கு அனுப்பிடுவோம். இப்படி ஆடு, நிலக்கடலை, முருங்கையைத் தவிர வேற விவசாயம் எதுவும் தெரியாமதான் இருந்தோம். ஒரு திருப்புமுனையாத்தான் பாகல் சாகுபடி பண்ண ஆரம்பிச்சோம்” என்ற ராஜசேகரைத் தொடர்ந்து பேச ஆரம்பித்தார் அவரது மனைவி ராஜேஸ்வரி.

“ஆறேழு வருஷத்துக்கு முன்ன ஒரு விசேஷத்துக்காக மதுரைக்குக் கார்ல போயிட்டிருந்தோம். திண்டுக்கல் தாண்டி போறப்போ, ஓர் இடத்துல பந்தல் போட்டு விவசாயம் செஞ்சுட்டிருக்குறதைப் பார்த்தோம். கல்தூண், சிமென்ட் தூணெல்லாம் இல்லாம மரக்கிளைகள், குச்சிகளை வெச்சே பந்தல்போட்டுக் காய்கறி போட்டிருந்தாங்க. உடனே, காரை நிறுத்தி அந்தத் தோட்டத்துக்காரரைச் சந்திச்சுப் பேசினோம். ‘இந்த மாதிரிச் செலவில்லாம பந்தல் அமைச்சே பாகல், புடலை, பீர்க்கன் சாகுபடி செய்யலாம்’னு அவர் சொன்னதோடு தோட்டத்தைச் சுத்திக்காட்டி பந்தல் அமைக்கிற விவரங்களையும் சொன்னார். உடனே, எங்களுக்கும் பந்தல் காய்கறிச் சாகுபடி செய்யலாம்னு ஆசை வந்துடுச்சு. ஊர் திரும்பினதும் மேய்ச்சல் நெலத்துல ஒரு ஏக்கரைப் பிரிச்சு, அதுல குச்சிகளை வெச்சுப் பந்தல்போட்டுக் காய்கறிப் பயிர் செய்ய ஆரம்பிச்சோம். அஞ்சு வருஷமா தொடர்ந்து பாகல், பீர்க்கன், புடலைனு மாத்தி மாத்திச் சாகுபடி செஞ்சுட்டுருக்கோம்” என்றார் ராஜேஸ்வரி.    

பங்கமில்லாமல் வருமானம் கொடுக்கும் பாகல்!

அறுவடை செய்த காய்களைப் பெட்டிகளில் அடுக்கி வைத்துவிட்டு வந்த ராஜசேகர் மீண்டும் பேச ஆரம்பித்தார்... “ஆரம்பத்துல ரசாயன உரம், பயோ உரம் ரெண்டையும் போட்டுத்தான் பாகல் சாகுபடி செஞ்சுட்டிருந்தோம். ஒருமுறை எங்க ஊருக்குப் பக்கத்து ஊர்க்காரரான இயற்கை விவசாயி மனோகரனை எதேச்சையா மூலனூர்ல பார்த்துப் பேசினேன்.

அப்போ இயற்கை விவசாயம் பத்திப் பேச்சு வந்துச்சு. நான் அதுபத்தி ஆர்வமா கேட்டதும், ‘தோட்டத்துக்கு வந்து பாருங்க’னு சொன்னார். மறுநாளே அவர் தோட்டத்துக்குப் போய்ட்டேன். அவர்தான் இயற்கை இடுபொருள்களைத் தயாரிக்கக் கத்துக்கொடுத்தார். அதுக்கப்புறம்  பஞ்சகவ்யா, ஜீவாமிர்தம், மூலிகைப் பூச்சிவிரட்டினு தயாரிச்சுப் பயன்படுத்த ஆரம்பிச்சோம். இயற்கை விவசாயத்துல பாகல், பீர்க்கன், புடலை மூணுமே நல்ல முறையில விளையுது.

இந்த மூணையுமே இடைத்தரகர் இல்லாம நேரடியா விற்பனை செய்றோம். வெள்ளக்கோவில், காங்கேயம், பரமத்தினு மூணு இடங்கள்லயும் வாரச்சந்தை கூடும். ‘டெம்போ’ல காய்களை ஏத்திட்டுப் போய், நாங்களே விற்பனை செஞ்சுடுவோம். வேன் வாடகை மட்டும்தான் செலவு. 

பங்கமில்லாமல் வருமானம் கொடுக்கும் பாகல்!

இந்தப் பந்தல் அமைக்கப் பத்தாயிரம் ரூபாய்தான் செலவாச்சு. ரெண்டு வருஷத்துக்கு இது தாங்கும். பாகல், பீர்க்கன், புடலைனு மாத்தி மாத்திச் சாகுபடி செய்றதால மண்ல சத்து குறையாம இருக்கு. அதேமாதிரி வெள்ளாமை வேலைகளுக்குக் கூலிக்கு ஆள் வைக்கறதில்லை. நடவு, களை எடுக்குறது, பறிப்புனு எல்லா வேலைகளையும் எங்க குடும்ப ஆள்களேதான் பாத்துக்குறோம்” என்ற ராஜசேகர் நிறைவாக,

“தண்ணி வசதி இருக்குற விவசாயிகள் கண்டிப்பா அரை ஏக்கர் நெலத்துலயாவது பந்தல் அமைச்சுக் காய்கறி விவசாயம் செஞ்சா, எப்படியும் ஒரு போகத்துக்கு 2 லட்ச ரூபாய் வருமானம் பார்த்துடலாம். இந்த அஞ்சு வருஷத்துல இதுதான் நாங்க கத்துக்கிட்ட பாடம்” என்று சொல்லிக் காய்களைச் சந்தைக்கு எடுத்துச்செல்ல ஆயத்தமானார்.

தொடர்புக்கு, ராஜசேகர், செல்போன்: 75981 99352

இப்படித்தான் சாகுபடி செய்யணும்

ரு ஏக்கர் நிலத்தில் பாகற்காய்ச் சாகுபடி செய்யும் விதம் குறித்து ராஜசேகர் சொல்லிய விஷயங்கள் பாடமாக இங்கே...

செம்மண்ணில் பாகற்காய்ச் சாகுபடி செய்யும்போது நல்ல மகசூல் கிடைக்கும். இதற்குப் பட்டம் கிடையாது. ஆண்டு முழுவதும் நடவு செய்யலாம். இதன் வயது 150 முதல் 160 நாள்கள் வரை. ஒரு ஏக்கர் அளவு நிலத்தில் விதைக்க 200 கிராம் விதை தேவை. தேர்ந்தெடுக்கப்பட்ட ஒரு ஏக்கர் நிலத்தில் ஆட்டுக்கிடை அடைக்க வேண்டும். பிறகு, நிலத்தை ஆழமாக உழுது 5 டன் தொழுவுரத்தைக் கொட்டிப் பரப்பி, மீண்டும் உழவு செய்ய வேண்டும். 15 அடி இடைவெளியில் 3 அடி அகலம், முக்கால் அடி உயரம் என்ற அளவில் நீளமாகப் பார்கள் எடுக்க வேண்டும். நிலத்தின் அமைப்பைப் பொறுத்துப் பார்களின் நீளத்தை அமைத்துக்கொள்ளலாம். பாரில் இரண்டரை அடி இடைவெளியில் வரிசையாகக் குழிக்கு ஒரு விதை வீதம் நடவுசெய்து தண்ணீர் பாய்ச்ச வேண்டும்.

பிறகு பந்தல் அமைத்துக்கொள்ள வேண்டும். நிலத்தின் ஈரப்பதத்தைப் பொறுத்துத் தண்ணீர் பாய்ச்சி வர வேண்டும். 15, 25 மற்றும் 45-ம் நாள்களில் களையெடுக்க வேண்டும். விதைத்த 8-ம் நாளுக்குள் விதை முளைத்துவரும். 20-ம் நாளில் கொடி வீசத் தொடங்கும். அந்தச் சமயத்தில் கொடிகளைப் பந்தலில் ஏற்றி விட வேண்டும். 

30-ம் நாளுக்குள் பந்தல் முழுவதும் பாகல் கொடிகள் படர்ந்துவிடும். 35-ம் நாளுக்குமேல் பூவெடுக்கும். 55-ம் நாளுக்குமேல் காய்கள் திரளத் தொடங்கும். 60-ம் நாளுக்குமேல் பறிப்பைத் தொடங்கலாம். ஆரம்பத்தில் மகசூல் குறைவாக இருக்கும். அடுத்தடுத்த பறிப்புகளில் மகசூல் அதிகரிக்கும்.

பாகற்காயில் வருமானக் கணக்கு

பா
கற்காய் மகசூல் மற்றும் வருமானம் குறித்துப் பேசிய ராஜசேகர், “வைகாசி மாசம் 11-ம் தேதி விதைச்சோம். ஆடி மாசம் 11-ம் தேதியிலிருந்து அறுவடை பண்ணிட்டிருக்கோம். இன்னிக்கு (19.09.2017) வரைக்கும் 20 முறை காய் பறிச்சதுல மொத்தம் 10,650 கிலோ பாகல் கிடைச்சிருக்கு. அதுல 900 கிலோ பாகலைக் கிலோ 40 ரூபாய்னு விற்பனை செஞ்சதுல 36,000 ரூபாய் கிடைச்சது. 4,950 கிலோ பாகலைக் கிலோ 30 ரூபாய்னு விற்பனை செஞ்சதுல 1,48,500 ரூபாய் கிடைச்சது. 3,000 கிலோ பாகலைக் கிலோ 25 ரூபாய்னு விற்பனை செஞ்சதுல 75,000 ரூபாய் கிடைச்சது. 1,800 கிலோ பாகலைக் கிலோ 20 ரூபாய்னு விற்பனை செஞ்சதுல 36,000 ரூபாய் கிடைச்சது.

ஆக மொத்தம் 10,650 கிலோ பாகலை விற்பனை செஞ்சதுல மொத்தமா 2,95,500 ரூபாய் வருமானம் கிடைச்சிருக்கு. உழவு, விதை, பந்தல், அறுவடை, வேன் வாடகைனு இதுவரை 62,000 ரூபாய் செலவாகியிருக்கு. அதுபோக மீதி 2,33,500 ரூபாய் நிகரலாபமா கிடைச்சிருக்கு. இன்னும் எட்டு, ஒன்பது பறிப்பு இருக்கும்னு எதிர்பார்க்கிறேன். அதுமூலமா 6,000 கிலோ பாகல் கிடைக்கும். குறைஞ்சபட்ச விலையா 20 ரூபாய்னு அது விற்பனையானாலே 1,20,000 ரூபாய் வருமானம் கிடைச்சுடும். அதுல அறுவடை, போக்குவரத்துனு 30 ஆயிரம் ரூபாய் செலவானாலும் 90 ஆயிரம் ரூபாய் லாபமா கிடைக்கும்னு எதிர்பார்க்கிறேன். அந்த வகையில 160 நாள்ல ஒரு ஏக்கர்ல இருந்து மொத்தமா 3,23,500 ரூபாய் லாபம் கிடைச்சுடும்” என்றார்.

மூலிகைப் பூச்சிவிரட்டி தயாரிப்பு

பா
கற்காயில் பூக்கள் பூப்பதற்கு முன்பாகச் சாறு உறிஞ்சும் பூச்சிகள், இலைச்சுருட்டுப் புழு, காய்ப்புழு ஆகியவற்றின் தாக்குதல் இருக்கும். பூச்சிகள் தென்பட்டால் அவற்றைக் கட்டுப்படுத்த மூலிகைப் பூச்சிவிரட்டி மற்றும் இஞ்சி, பூண்டு, பச்சை மிளகாய்க் கரைசலைச் சுழற்சி முறையில் தெளிக்க வேண்டும். காட்டாமணக்கு இலை, ஊமத்தம் இலை, ஊமத்தம் காய், சோற்றுக்கற்றாழை மடல், நொச்சியிலை, வேப்பிலை ஆகியவற்றில் தலா அரைக்கிலோ எடுத்து ஒன்றாகச்சேர்த்து, உரலில் இட்டு இடிக்க வேண்டும்.

பிறகு, இடித்த கலவையை 15 லிட்டர் மாட்டுச் சிறுநீரில் மூன்று நாள்கள் ஊற வைக்க வேண்டும். அக்கரைசலுடன் 250 கிராம் மஞ்சள்தூள், 1 கிலோ பசுஞ்சாணம் ஆகியவற்றைச் சேர்த்து 7 நாள்கள் ஊற வைக்க வேண்டும். இந்த ஏழு நாள்களும் தினமும் இரண்டு வேளைகள் கலக்கி வர வேண்டும்.

இக்கரைசலை வடிகட்டி 10 லிட்டர் தண்ணீருக்கு 500 மில்லி கரைசல் எனக் கலந்து தெளிக்க வேண்டும். இது பயிர் வளர்ச்சி ஊக்கியாகவும் செயல்படும்.

இஞ்சி, பூண்டு, பச்சை மிளகாய்க் கரைசல் 

தலா ஒரு கிலோ அளவில் இஞ்சி, பூண்டு, பச்சை மிளகாய் ஆகியவற்றை எடுத்துக்கொண்டு மூன்றையும் தனித்தனியாக விழுதாக அரைக்க வேண்டும். மூன்றையும் ஒன்றாகச்சேர்த்து வைத்துக்கொள்ள வேண்டும். 10 லிட்டர் தண்ணீரில் 100 கிராம் விழுது எனக் கலந்து செடிகளில் தெளிக்கலாம். இது இலைச்சுருட்டுப்புழு, காய்புழு, அசுவினி, வெள்ளை ஈ ஆகியவற்றின் தாக்குதல்களிலிருந்து செடிகளைக் காப்பாற்றும்.

பாகலுக்கு ஊட்டம் 

வி
தைத்த 15-ம் நாளிலிருந்து 15 நாள்களுக்கு ஒருமுறை, ஒவ்வொரு செடியின் தூரிலும் ஒரு லிட்டர் தண்ணீரில் 30 மில்லி பஞ்சகவ்யாவைக் கலந்து ஊற்ற வேண்டும். 20-ம் நாளிலிருந்து 15 நாள்களுக்கு ஒருமுறை 25 கிலோ கடலைப்பிண்ணாக்கு, 5 கிலோ வேப்பம் பிண்ணாக்கு ஆகியவற்றை 200 லிட்டர் தண்ணீரில் கலந்து, ஒவ்வொரு செடியின் அருகிலும் சிறிதளவு ஊற்ற வேண்டும்.

குச்சிப்பந்தல்

ந்தல் அமைப்பது குறித்துப் பேசிய ராஜசேகர், “பத்து அடி உயரம்கொண்ட சவுக்குக் குச்சிகளை 8 அடி இடைவெளியில் நிலத்தைச் சுற்றி ஊன்ற வேண்டும். சவுக்குக் குச்சிகளின் மேல்பகுதியில் கயிறுகொண்டு இறுக்கமாகக் கட்ட வேண்டும். நிலத்துக்குள் 7 அடி உயரம்கொண்ட வேப்பங்குச்சிகளை... தெற்கு வடக்காக 8 அடி இடைவெளி, கிழக்கு மேற்காக 15 அடி இடைவெளி எனக் கொடுத்து ஊன்ற வேண்டும். 

சவுக்கு மற்றும் வேப்பங்குச்சிகளின் அடிப்பகுதியில் ‘ஒர்க் ஷாப்’களில் கிடைக்கும் பழைய ஆயிலைப் பூசிவிட்டால், கறையான் அரிக்காது. வேப்பங்குச்சிகளை ஊன்றிய பிறகு, நாடா நூல் கொண்டு குறுக்கும் நெடுக்குமாகப் பின்னி, பந்தல் அமைக்க வேண்டும். ஒவ்வொரு செடிக்கும் அருகே ஊஞ்ச மரத்தின் கொடிகளை நட்டு அவற்றை இழுத்து மேலாகக் கட்டிவிட்டால், பாகல் கொடிகள் அதைப் பற்றிக்கொண்டு படர்ந்துவிடும்” என்றார்.