Published:Updated:

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

ஒட்டுமொத்த விகடனுக்கும் ஒரே ஷார்ட்கட்

Use App
பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!
பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

பால் வளம்ஆர்.குமரேசன், படங்கள்: வீ.சிவக்குமார்

பிரீமியம் ஸ்டோரி

ரியாகப் படிக்காத மாணவர்களை ஆசிரியரும் பெற்றோரும் ‘நீ மாடு மேய்க்கத்தான் லாயக்கு’ என்று திட்டுவதைப் பார்த்திருப்போம். ஆனால், மாடுகளை மேய்த்துப் பல்லாயிரக்கணக்கானோர் வாழ்ந்துகொண்டிருக்கின்றனர் என்பதுதான் உண்மை. கிராமத்தில் வசிக்கும் ஒரு குடும்பம் தற்சார்பாக வாழ இரண்டு கறவை மாடுகளே போதுமானவையாக இருக்கின்றன. உறவுகள், நட்புகள், சமூகம் என எவற்றாலும் கிட்டாத பொருளாதாரப் பாதுகாப்பைப் பசு மாடுகள் உறுதிசெய்கின்றன. கடந்த இரண்டு மூன்று ஆண்டுகளாக நிலவிவரும் வறட்சியான சூழ்நிலையிலும், கிராமப் பொருளாதாரம் இன்னமும் உயிர்ப்போடு இருப்பதற்கு முக்கியக் காரணம் பால் மாடுகள்தான்.

அதே சமயத்தில் விளைபொருள்களை விற்பனை செய்யும்போது வியாபாரிகளாலும் இடைத் தரகர்களாலும் எப்படியெல்லாம் விவசாயிகள் ஏமாற்றப்படுகின்றனரோ, அதே அளவுக்குப் பால் உற்பத்திசெய்யும் விவசாயிகளும் ஏமாற்றப்படுகிறார்கள். தனியாருக்கு விற்பனை செய்யும்போது பாலுக்கான நியாயமான விலை கிடைப்பதில்லை. அளவு, விலை எனப் பல விஷயங்களில் பால் உற்பத்தியாளர்கள் ஏமாற்றப்படுகிறார்கள். நாடு முழுவதும் இதேநிலைதான் இருந்து வருகிறது.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

ஆனால், இந்நிலையை மாற்றி நபார்டு வங்கியின் உதவியுடன் உற்பத்தியாளர் நிறுவனத்தை அமைத்து, தாங்கள் உற்பத்திசெய்யும் பாலுக்கு நியாயமான விலையைப் பெற்றுவருகிறார்கள் திண்டுக்கல் பகுதியிலுள்ள விவசாயிகள். இப்படி விவசாயிகள் இணைந்து அமைத்திருக்கும் ‘குளுமைப் பால் உற்பத்தியாளர் நிறுவனம்’ தற்போது ஆச்சர்யப்படுத்தும் வகையில் வளர்ச்சிப்பாதையில் பயணித்துக் கொண்டிருக்கிறது. ‘ஒற்றுமை’ என்ற வார்த்தையின் அபார சக்தியால் இது சாத்தியமாகியிருக்கிறது.

திண்டுக்கல் மாவட்டம், ரெட்டியார்சத்திரம் ஒன்றியத்திலுள்ள தருமத்துப்பட்டிக் கிராமத்தில் இயங்கி வருகிறது குளுமைப் பால் உற்பத்தியாளர் நிறுவனம். எம்.எஸ்.சுவாமிநாதன் ஃபவுண்டேஷன்தான் இதற்கு அடித்தளமிட்டுள்ளது. ரெட்டியார் சத்திரம், ஒட்டன்சத்திரம், பழநி, திண்டுக்கல் ஆகிய ஒன்றியப் பகுதிகளில் பால் உற்பத்தி செய்யும் விவசாயிகள் இணைந்து, இந்த நிறுவனத்தை நடத்திவருகிறார்கள்.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

குளுமைப் பால் உற்பத்தியாளர் நிறுவனத்தின் முதன்மைச் செயல் அலுவலர் நந்தகுமாரிடம் இவர்களின் பணிகள் குறித்துப் பேசினோம். “இந்தப் பகுதிகள்ல அதிகமா பால் மாடு வளர்க்கிறாங்க. மாடு இல்லாத வீடுகள் ரொம்பக் குறைவு. பெரும்பாலும் விவசாயிகள் வியாபாரிகளுக்குத் தான் பாலை ஊத்துவாங்க. வியாபாரிகள், பாலை அளக்குறதுக்குத் தனியா ஒரு உழக்கு (ஒரு லிட்டர் அளவை) வெச்சிருப்பாங்க. ஒரு லிட்டர் அளவுனு சொல்ற உழக்கை ஒண்ணேகால் லிட்டர் பிடிக்கிற மாதிரி வெச்சிருப்பாங்க. அதனால, ஒரு லிட்டர் பாலில் கால் லிட்டர் பால் உற்பத்தியாளருக்கு நஷ்டம். அதுவுமில்லாம, ஒரு லிட்டர் பாலுக்கு 18 ரூபாய்தான் கொடுத்து வாங்குவாங்க. பாலோட தரத்துக்கேற்ப பணம் கிடைக்காது. பணத்தையும் முறையாகக் கொடுக்கமாட்டாங்க. ஆனாலும், வேற வழியில்லாம இவங்களுக்குத்தான் விவசாயிகள் பால் ஊத்திட்டு இருந்தாங்க.

அப்படிப்பட்ட நிலையிலதான்  ‘எம்.எஸ்.சுவாமிநாதன் ஃபவுண்டேஷன்’, பால் உற்பத்தியாளர்களை ஒருங்கிணைச்சு, இந்தக் கம்பெனியை ஆரம்பிச்சுக் கொடுத்தாங்க. இதோட அடிப்படை நோக்கம், பால் உற்பத்தியாளர்கள் அனைவரும் மொத்தமா விற்பனை செய்து லாபம் சம்பாதிக்கிறதுதான். இப்போ பால் வியாபாரிகள் அடைஞ்சுட்டிருக்கிற லாபத்தை, பால் உற்பத்தி செய்ற விவசாயிகளே அடைஞ்சுட்டு இருக்காங்க. இந்த நிறுவனத்துல இப்போ 875 உறுப்பினர்கள் இருக்கிறாங்க. அவங்க எல்லாருமே பால் உற்பத்தியாளர்கள். அவங்க அத்தனைபேரும் கம்பெனியின் பங்குதாரர்கள்” என்ற நந்தகுமார், நிறுவனத்தின் செயல்பாடுகள் குறித்துச் சொல்ல ஆரம்பித்தார்.

“பதினாலு இடத்துல பால் கொள்முதல் மையம் வெச்சிருக்கோம். உறுப்பினர்களுக்குப் பால் மாடு வாங்க ஓர் ஆளுக்கு 90 ஆயிரம் ரூபாய்னு பாண்டியன் கிராம வங்கியில கடன் வாங்கிக் கொடுக்கிறோம்.  உறுப்பினர்கள் கடனுக்கான தவணையைச் சரியா கட்டிட்டு வர்றாங்க. ஆதிதிராவிடர் பெண்களுக்கு நபார்டு வங்கி மூலமா 30 ஆயிரம் ரூபாய் மானியமும் உண்டு. எங்க கம்பெனியில பெரும்பாலான பொறுப்புகள்ல பெண்கள்தான் இருக்காங்க. கொள்முதல் மையங்கள்ல மாட்டுத்தீவனத்தையும் மருந்துகளையும்  விற்பனை செய்றோம். மாட்டுத்தீவனத்தை நாங்களே உற்பத்தி செய்றோம். உறுப்பினர்கள் கடனுக்குக்கூடத் தீவனத்தை வாங்கிட்டுப் பால் ஊத்திக் கழிச்சுக்கலாம்.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

பசுந்தீவனத்துக்காக கோ-4, வேலிமசால், அகத்தி, அசோலா மாதிரியான விதைகளைக் கொடுக்குறோம். அதைச் சாகுபடி செய்றதுக்கும் சொல்லிக் கொடுக்குறோம். தமிழ்நாடு கால்நடை அறிவியல் மருத்துவப் பல்கலைக்கழகத்தின் சார்பா திண்டுக்கல்ல செயல்படுற பயிற்சி மற்றும் ஆராய்ச்சி மையத்திலிருந்து எங்க விவசாயிகளுக்குப் பயிற்சி கொடுக்குறாங்க. அதுமூலமா, அறிவியல் முறைப்படி தீவன உற்பத்தி, பால் உற்பத்திப் பத்தி விவசாயிகள் கத்துக்கிறாங்க. கால்நடைத்துறை மூலமா கால்நடைகளுக்குத் தேவையான சிகிச்சைகளும் கிடைக்கிது.

எங்க கொள்முதல் மையங்கள்ல இருக்கிற பொறுப்பாளர்களுக்கும் பயிற்சிகள் கொடுத்திருக்கிறதால, சின்னச் சின்னப் பிரச்னைகளை அவங்களே சமாளிச்சிக்கிறாங்க. முன்னாடி, பால் உற்பத்தியாளர்கள் கடன்லதான் இருந்தாங்க. இப்போ, வாரா வாரம் பால் உற்பத்தியாளர்களுக்குப் பணம் கொடுத்திடுறதால, விவசாயிகள் கடன் வாங்குறது ரொம்பக் குறைஞ்சிருக்கு. தினமும் நான்காயிரம் லிட்டர் அளவு பால் உற்பத்திசெய்து தனியார் நிறுவனத்துக்கு விற்பனை செஞ்சிட்டிருக்கோம். அடுத்ததா, ‘சில்லிங் யூனிட்’ அமைக்கிற முயற்சியில் இருக்கோம். பாலை மதிப்புக்கூட்டி விற்பனை செய்ற யோசனையும் இருக்கு. இந்தக் கம்பெனி ஆரம்பிச்சு ஒரு வருஷம்தான் ஆகுது. இதுவரை பத்து லட்ச ரூபாய் வருமானம் ஈட்டியிருக்கோம்” என்றார் சந்தோஷமாக.

குளுமைப் பால் உற்பத்தியாளர் நிறுவனத்தின் தலைவராக இருப்பவர் ஆலந்தூரான்பட்டி கிராமத்தைச் சேர்ந்த செல்வராணி. அவரைச் சந்தித்துப் பேசியபோது, “எங்க பகுதியில பால் மாடுளை வெச்சுதான் நிறைய குடும்பங்கள் பிழைக்குது. எம்.எஸ்.சுவாமிநாதன் ஃபவுண்டேஷன்காரங்க, ‘நீங்களே சொந்தமா கம்பெனி ஆரம்பிங்க’னு சொன்னாங்க. இப்ப வரைக்கும் அவங்கதான் உதவியா இருக்காங்க. ஆரம்பத்துல கம்பெனியில் சேர்றதுக்கு நிறைய விவசாயிகள் ஆர்வம் காட்டல. இந்தக் கிராமத்துல பத்து பேர் மட்டும்தான் முன்வந்தாங்க. ஆனா, கம்பெனியால் கிடைக்கிற நன்மைகளைப் புரிஞ்சுக்கிட்டு நிறையபேர் வர்றாங்க. எங்க மையத்துல பால் ஊத்தினதும் ‘எலக்ட்ரானிக் டிஸ்பிலே  போர்டு’ல கொழுப்பு, எஸ்.என்.எப் அளவு,  பால் அளவு, பாலுக்கான விலை... எல்லாமே தெரியும். பால் ஊத்துறவங்க நேரடியா சரிப்பாத்துக்கலாம். அதுக்கப்புறம், அந்த விவரங்களைப் பிரின்ட் பண்ணிக் கொடுத்திடுவோம்.

வாராவாரம் பால் ஊத்துன ஒவ்வொருத்தருக்கும் கொடுக்க வேண்டிய பணத்தை, அவங்க பேங்க் அக்கவுன்ட்லயே கட்டிடுவோம். நாங்க பணம் போட்ட தகவல், எஸ்.எம்.எஸ் மூலமா போயிடும். திண்டுக்கல் மாவட்டத்துல பால் மாடு வெச்சிருக்கவங்க யார் வேணும்னாலும் எங்க நிறுவனத்துல இணையலாம். உறுப்பினர் கட்டணமா ஆயிரம் ரூபாய் கட்டணும். பால் மாடு வளக்க ஆசைப்படுறவங்களுக்கு, மாடு வாங்க கடன் வாங்கிக் கொடுத்து, எங்க கம்பெனியில சேர்த்துக்கிறோம்.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

கம்பெனி மூலமா பால் கொள்முதல் செய்ய ஆரம்பிச்ச பிறகு, வியாபாரிகள் கூடுதல் விலை கொடுக்க ஆரம்பிச்சிருக்காங்க. லிட்டருக்கு 17 ரூபாய் கொடுத்தவங்க இப்ப 22 ரூபாய் வரைக்கும் கொடுக்கிறாங்க. ஆனா, எங்க மையத்துல தரத்துக்கு ஏத்த மாதிரி அதிகபட்சமா லிட்டருக்கு 34 ரூபாய் வரைகூடக் கொடுக்கிறோம். மாடுகளுக்கு இன்ஸூரன்ஸ் போட்டுடுவோம். ஏதாவது அசம்பாவிதம் நடந்துட்டா, பத்து நாளுக்குள்ள இழப்பீடு கிடைக்கவும் ஏற்பாடு செய்றோம். எங்க உறுப்பினர்களுக்கு இப்ப நிரந்தர வருமானம் கிடைச்சிட்டிருக்கு” என்ற செல்வராணி கொள்முதல் மையப் பணிகளைப் பார்வையிட நம்மை அழைத்துச்சென்றார்.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

பத்தடிக்குப் பத்தடி என்ற அளவில் சிறிய அறையில் இயங்கிக்கொண்டிருந்தது அந்தக் கொள்முதல் மையம். எடைபோடும் சிறிய மேடை, அதன்மேல் பால் ஊற்ற ஒரு டிரம் இருந்தது. அதற்குமேல் ஒரு டிஜிட்டல் போர்டு சிவப்பு நிற விளக்குகளால் ஒளிர்ந்து கொண்டிருந்தது. டிரம்மில் ஊற்றும் பாலில் 50 மில்லி எடுத்துச் சோதனை செய்கிறார் மையப் பொறுப்பாளர். ஐந்து நிமிடங்கள் நடக்கும் இந்த சோதனை முடிந்தவுடன், அவர் கணினி தட்டச்சில் என்டர் பட்டனைத் தட்டியதும், டிஜிட்டல் திரையில் பாலின் ஜாதகம் பளிச்சிடுகிறது. பால் உற்பத்தியாளரின் உறுப்பினர் எண், பாலின் எடை, கொழுப்பின் அளவு, ஒரு லிட்டருக்கான விலை, மொத்த விலை என விவரமாகத் தெரிந்துகொள்ள முடிகிறது. உடனடியாக அச்சிட்டப்பட்ட காகிதமும் வெளிவருகிறது. அதைப் பெற்றுக்கொண்டு கிளம்பி விடுகிறார் பால் உற்பத்தியாளர்.

ஆலந்தூரான்பட்டி கிராமத்தில் இயங்கிவரும் கொள்முதல் மையத்தின் பொறுப்பாளர் முத்துரத்தினம், “இந்த மையத்துல தினமும் 250 லிட்டர் பால் கொள்முதல் செய்றோம். பாலோட தரத்தைச் சோதிக்கவும் மாடுகளுக்கான வைத்திய முறைகளைக் கையாளவும் எனக்குச் சொல்லிக் கொடுத்து இருக்காங்க.  எங்க உறுப்பினர்களோட மாடுகளுக்கு ஏதாவது பிரச்னைனா, கூடுமானவரை நானே ஆலோசனை சொல்லிடுவேன். இங்கே, மாடுகளுக்குத் தேவையான தீவனம், மருந்துகளையும் விற்பனை செய்றோம். காலையில் 7 மணிக்கு மையத்தைத் திறப்போம். ஒரு மணி நேரத்துல பால் கொள்முதல் முடிஞ்சிடும். கம்பெனி வண்டி வந்ததும் பாலை ஏத்தி விட்டுடுவோம். இந்தப்பக்கம் இருக்கிற விவசாயிகள் நிறைய பேருக்கு எங்க மையம் வந்த பிறகுதான், பால்ல இருக்கிற கொழுப்புக்கு ஏற்ப விலை கிடைக்கும்ங்கிற விவரமே தெரிஞ்சிருக்கு. அதனால, இப்ப வேற வழியில்லாம வியாபாரிகளும் விலையை ஏத்திக் கொடுக்க ஆரம்பிச்சுட்டாங்க” என்றார் மகிழ்ச்சிப் பொங்க.

தொடர்புக்கு,
நந்தகுமார்,
செல்போன்: 90438 71883.

‘‘வாரா வாரம் பணம் கிடைக்குது!’’

ஆலந்தூரான்பட்டி கிராமத்தில் கறவை மாடு வளர்த்துவரும் சின்னப்பிள்ளை, குளுமைப்பால் உற்பத்தியாளர் நிறுவனத்தின் உறுப்பினர். அவரிடம் பேசியபோது, “எங்ககிட்ட ரெண்டு மாடுக இருக்கு. வீட்டுக்கு முன்னால இருக்கிற கொஞ்சூண்டு நிலத்துல மாட்டுக்குத் தேவையான சோளத்தட்டையை விதைச்சிக்குவோம். தவிடு, பிண்ணாக்கு, மாட்டுத்தீவனம் போன்றவைக்கு அதிகம் செலவு செய்றதில்லை. போதுமான அளவுக்குப் பச்சை கொடுத்திடுறோம். கம்பெனியில சொல்ற அளவுக்கு மட்டும்தான் தீவனம் கொடுக்கிறோம். இதுக்கு முன்னாடி வியாபாரிக்குத்தான் பால் ஊத்திகிட்டு இருந்தேன். அவங்க கொண்டு வர்ற உழக்குலதான் ஊத்தணும்னு சொல்லுவாங்க. பாலை வழிய வழிய ஊத்தணும். பாலுக்கான பணம் உடனே கிடைக்காது. அப்பப்ப கொஞ்சம் கொஞ்சமா கொடுப்பாங்க. பல நேரங்கள்ல முழுசா பணம் கைக்கு வந்து சேராது. பாலோட தரத்தை வெச்செல்லாம் விலை கொடுக்க மாட்டாங்க.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

இப்ப கம்பெனிக்குப் பால் ஊத்துறப்போ, நாங்க கொண்டுபோற பாலோட அளவுக்கும் தரத்துக்கும் சரியான பணம் கிடைக்குது. பாலை நானே கறந்துகொண்டுபோய் மையத்துல ஊத்திடுவேன். தினமும் நானே மாட்டுல பால் கறக்குறதால, மாட்டுக்கு ஏதாவது பிரச்னை வந்தாலும் உடனே தெரிஞ்சிடுது. இந்த ரெண்டு மாட்டுல இருந்து, தினமும் இருபது லிட்டர் வரை பால் கிடைக்குது. வாராவாரம் பணம் கிடைக்குறதால, கைச்செலவுக்குக் கவலையில்லாம இருக்க முடியுது” என்றார்.

முன்பு 18 ரூபாய் இப்போது 30 ரூபாய் வரை...

நிறுவனத்தால் பயனடையும் பால் உற்பத்தியாளர்களின் வருமானம் குறித்துப் பேசிய நந்தகுமார், “இந்த நிறுவனம் தொடங்கி ஒரு வருஷம்தான் ஆகுது. அதற்குள்ள நிறைய பேர் உறுப்பினர் ஆகியிருக்கிறார்கள். பால் உற்பத்தியாளர்களைப் பொறுத்தவரை  முன்பு வெளியிடத்தில் பால் ஊற்றிக் கொண்டிருந்தபோது, லிட்டருக்கு 18 ரூபாய்தான் வருமானம் ஈட்டிக்கொண்டிருந்தனர்.

இப்போது கம்பனிக்கு பால் ஊற்றுவதால் 20 ரூபாயிலிருந்து 30 ரூபாய் வரை ஒரு லிட்டர் பாலுக்கு வருமானம் ஈட்டிவருகிறார்கள். இதோடு கடன் வசதிகளும், தீவனங்களும், மருத்துவச் செலவும் நிறுவனத்தின்மூலம் மாடு வளர்ப்புக்கு கிடைத்துவருகிறது. நிறுவனம் வளர வளர இன்னும் பல சலுகைகளும் பால் உற்பத்தியாளர்களுக்குக் கிடைக்கும்” என்றார்.

மத்திய அரசின் மானியம் உண்டு!

திண்டுக்கல் மாவட்ட நபார்டு வங்கியின் துணை மேலாளர் சஞ்சீவ், “திண்டுக்கல் பகுதியில் உழவர் மன்றங்கள் அமைக்கப்பட்டு, அவர்களுக்குத் தேவையான பயிற்சிகளைக் கொடுத்து வருகிறோம். இந்த உழவர் மையங்களை இணைத்து ‘நாப் கிஷான்’ மூலமாக வங்கிக் கடனுதவிக்கு ஏற்பாடு செய்கிறோம். திண்டுக்கல்லில் பதினான்கு உழவர் உற்பத்தியாளர் நிறுவனங்கள் செயல்படுகின்றன. திண்டுக்கல் பகுதியைப் பொறுத்தவரை, ‘பாண்டியன் கிராம வங்கி’ மூலமாகத்தான் கடன் உதவிகளை ஏற்பாடு செய்துதருகிறோம்.

பால் கொடுக்கும் ‘பலே’ வருமானம்! - உழவர்களை உயர்த்தும் உற்பத்தியாளர் நிறுவனம்!

மேலும், மத்திய அரசின் மானியத்திட்டங்கள், பயனாளிகளுக்குக் கிடைக்கவும் வழிவகை செய்கிறோம். குளுமைப் பால் உற்பத்தியாளர் நிறுவனம் சிறப்பாகச் செயல்பட்டுவருகிறது. தொடர்ந்து, பால் பொருள்கள் மதிப்புக்கூட்டலிலும் கவனம் செலுத்த ஆலோசனை வழங்கியுள்ளோம். உழவர் மன்றங்கள், உழவர் உற்பத்தியாளர் நிறுவனங்கள் அமைக்க விரும்பும் விவசாயிகள், அந்தந்த மாவட்டங்களிலுள்ள நபார்டு வங்கி அலுவலகங்களை அணுகினால், தேவையான உதவிகள் கிடைக்கும்” என்றார்.

திண்டுக்கல், கால்நடை மருத்துவ அறிவியல் பல்கலைக்கழகப் பயிற்சி மற்றும் ஆராய்ச்சி மையத்தின் தலைவர் மற்றும் பேராசிரியர் பழனிச்சாமி, “எங்கள் மையம்மூலமாக, குளுமைப் பால் உற்பத்தியாளர் நிறுவனத்தைச் சேர்ந்த பால் உற்பத்தியாளர்களுக்குத் தேவையான ஆலோசனைகளை வழங்கிவருகிறோம். தீவன மேலாண்மை, நோய் மேலாண்மை போன்ற விஷயங்களையும் கற்றுக்கொடுக்கிறோம். கறவை மாடுகள் வளர்ப்பு தொடர்பான பயிற்சிகளையும் அளித்து வருகிறோம். 10 லிட்டர் பால் கொடுக்கக்கூடிய மாட்டுக்கு மூன்றரைக் கிலோ கலப்புத்தீவனம், 15 கிலோ பசுந்தீவனம், 5 கிலோ முதல் 10 கிலோ வரை உலர்தீவனம் (வைக்கோல்) கொடுத்தாலே போதுமானது. இந்த வாய்ப்பாட்டைத்தான் குளுமைப்பால் உற்பத்தியாளர் கம்பெனி விவசாயிகள் கடைப்பிடித்து லாபம் சம்பாதித்து வருகிறார்கள்” என்றார்.

தொடர்புக்கு, சஞ்சீவ், செல்போன்: 94433 80613

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு