Published:Updated:

டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!

ஒட்டுமொத்த விகடனுக்கும் ஒரே ஷார்ட்கட்

Use App
டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!
டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!

நல்மருந்துஇ.கார்த்திகேயன் - படங்கள்: எல்.ராஜேந்திரன்

பிரீமியம் ஸ்டோரி

ற்போதைய சூழ்நிலையில் சாதாரணமாகக் காய்ச்சல் வந்தாலே ‘டெங்கு’ காய்ச்சலோ எனப் பயந்துகொண்டிருக்கிறார்கள் மக்கள். டெங்குவால் ஏற்படும் உயிரிழப்புகளைக் குறைத்துக் கணக்குக் காட்டுவதற்காக, இதற்கு ‘மர்மக்காய்ச்சல்’ என்று பெயர் வைத்திருக்கிறது தமிழக அரசு. இதுகுறித்த வெளிப்படைத்தன்மை இல்லாததால் அச்சத்தில் வாழ்ந்து கொண்டிருக்கிறார்கள் மக்கள்.  

டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!

இந்நிலையில் டெங்குக் காய்ச்சலைக் குணப்படுத்தும் ஒரே மருந்தாக, ‘நிலவேம்புக் குடிநீரை’ சிபாரிசு செய்துவருகிறது தமிழக அரசு. அரசு மருத்துவமனைகள் அனைத்திலும் மக்களுக்கு நிலவேம்புக் குடிநீர் வழங்கப்பட்டு வருகிறது. தனியார் அமைப்புகளும் முகாம்கள் நடத்தி, நிலவேம்புக் குடிநீரை வழங்கி வருகின்றன. இச்சூழ்நிலையில், சமூக வலைதளங்களில் ‘நிலவேம்புக் குடிநீரைப் பருகினால் மலட்டுத்தன்மை உண்டாகும்’ என்று ஒரு செய்தி பரவ, நிலவேம்பு குறித்தான சந்தேகமும் மக்களிடையே எழுந்துள்ளது.

இது சம்பந்தமாகத் திருநெல்வேலி மாவட்டம், பாபநாசம் பகுதியைச் சேர்ந்த சித்தமருத்துவர் மைக்கேல் செயராசுவிடம் பேசினோம். அவர் பகிர்ந்துகொண்ட தகவல்கள் இங்கே...

டெங்குக் காய்ச்சல் புதிதல்ல!

“தற்போது குழந்தைகள் முதல் பெரியவர்கள் வரை எல்லா மக்களையும் வாட்டி வதைத்துவரும் டெங்குக் காய்ச்சல், தமிழகத்துக்குப் புதிதல்ல. 1913-ம் ஆண்டிலேயே தமிழகத்தில் டெங்குக் காய்ச்சல் பரவியது. ஆனால், அந்த நேரத்தில் பெரியளவிலான பாதிப்பை ஏற்படுத்தவில்லை. நோயும் கட்டுக்குள் வந்து மறைந்துவிட்டது. கடந்த 2009-ம் ஆண்டில் சிக்குன்குனியா, 2010-ம் ஆண்டில் பன்றிக்காய்ச்சல், 2011-ம் ஆண்டில் பறவைக்காய்ச்சல் எனப் பலவித காய்ச்சல்கள் தொடர்ந்தன. இவை மூன்றும் புதியவையாக இருந்தாலும், பெரியளவில் தொடராமல் கட்டுக்குள் வந்து மறைந்துவிட்டன. ஆனால், கடந்த 2012-ம் ஆண்டில் மீண்டும் தலைதூக்கிய டெங்குக் காய்ச்சல், மெள்ள மெள்ளப் பரவ ஆரம்பித்து மழைக்காலங்களில் தீவிரமாகியது. தற்போது 2017 வரை நிலை கொண்டு, பல இடங்களில் உயிரிழப்புகளை ஏற்படுத்தி வருகிறது டெங்குக் காய்ச்சல். 

டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!



இக்காய்ச்சல் பரவுவதற்கு, ’டெங்கு’ எனும் வைரஸ் கிருமிதான் காரணம். இக்கிருமி, ‘ஏடிஸ் ஏஜிப்டி’ (Aedes Aegypti) என்ற கறுப்பு நிறமுடைய பெண் கொசு மூலமாகத்தான் பரப்பப்படுகிறது. இக்கொசுக்கள், இரவு நேரங்களைவிடக் காலை மற்றும் மாலை நேரங்களில்தான் மனிதர்களை அதிகம் கடிக்கின்றன. தலைவலி, தசைவலி, கண் எரிச்சல், மூட்டுவலி, காய்ச்சலுடன் கூடிய மூச்சுத்திணறல் ஏற்படுவது ஆகியவைதான் டெங்குக் காய்ச்சலின் முக்கிய அறிகுறிகள்.
ஏடிஸ் ஏஜிப்டி வகைக் கொசுக்கள் கடித்த அனைவருக்குமே டெங்கு வந்து விடாது. எந்த நோய்க்கிருமிகள் நம்மைத் தாக்கினாலும், நமது உடலில் வலிமை குறைவாக இருக்கும்போதுதான் பாதிக்கப்படுவோம். வலிமை கூடுதலாக இருந்தால், நமக்குப் பாதிப்பு ஏற்படாது.

‘இன்ஃபக்‌ஷன் தியரி’ (Infection Theory) யின்படி, உடம்பிலுள்ள எதிர்ப்புசக்தி குறைவாக இருப்பவர்களைத்தான் டெங்குக் கிருமி தாக்குகிறது. முந்தைய காலத்தில் சிறுதானியம், பாரம்பர்ய அரிசி வகைகள், இயற்கையாக விளைந்த காய்கறிகள் ஆகியவற்றை உணவாகச் சாப்பிட்டபோது, உடல் வலிமையுடன் எதிர்ப்புசக்தியும் மிகுந்திருந்தது.

உணவுப்பழக்கம் மாறியதால், பல நோய்களும் நம்மை வந்து ஒட்டிக் கொண்டுவிட்டன. மேலும், நோய்க் கிருமிகளை அழிப்பதற்காகக் கடந்த 15 ஆண்டுகளில் நாம் உட்கொண்டு வந்த ஆன்டிபயாட்டிக் மருந்துகளாலும் எதிர்மறை விளைவுகள் ஏற்பட்டுள்ளன. அதாவது, இம்மருந்துகளுக்குக் கட்டுப்படாத அளவுக்கு வீரியமாகிவிட்டன நோய்க்கிருமிகள்.

மறந்துபோன பாரம்பர்யப் பாட்டி வைத்தியம்!

குழந்தைகள் டெங்குக் காய்ச்சலால் பாதிக்கப்பட்டிருப்பதற்குக் காரணம், நாம் கசப்பான உணவுகளைக் குழந்தைகளுக்குக் கொடுக்க மறந்ததுதான். முந்தைய காலத்தில் வேப்பிலைச்சாறு, இஞ்சிச்சாறு, ஓம உருண்டை, வேப்பிலை உருண்டை, சுக்கு ஆகியவற்றைக் குழந்தைகளுக்கு வாரம் ஒருமுறை கொடுக்கும் பழக்கம் இருந்தது. வீட்டில் இருக்கும் பாட்டிமார்கள், இவற்றைத் தயார்செய்து குழந்தைகளுக்குச் சங்கு மூலம் புகட்டுவார்கள். அவற்றையெல்லாம் மறந்து தற்போது, சாக்லேட், ஐஸ்கிரீம், குளிர்பானங்கள் என்று குழந்தைகளுக்குக் கொடுத்து வருகிறோம். இவையெல்லாமே குளிர்ச்சியை ஏற்படுத்தக்கூடியவை என்பதால்... வயிற்றில் பூச்சிகள், கிருமிகள் ஆகியவை வேகமாக உருவாகிப் பாதிப்பை ஏற்படுத்துகின்றன.

அதேபோல, முன்பெல்லாம் ஒவ்வொரு வீடுகளிலும் மாலை நேரத்தில் மண் சட்டியில் சாம்பிராணி, வேப்பிலை, நொச்சி ஆகியவற்றைப் போட்டுச் சிறிது மஞ்சள் பொடியைத் தூவி, வீடு முழுவதிலும் புகை பரவும்படி காட்டுவார்கள். தற்போது இப்பழக்கம் கிராமங்களிலேயே இல்லை. அதோடு வீட்டின்முன்பு பழைய குப்பைகள், காய்ந்த இலைகளைக் குவித்து வேப்பிலைகளைப்போட்டு, தீமூட்டி  கொசுவை விரட்டுவார்கள். தற்போது இதையெல்லாம் மறந்ததால்தான் கொசுக்கள் பல்கிப் பெருகிவிட்டன. 

டெங்குவை விரட்டும் நிலவேம்பு! 

மூலிகைகளிலேயே அதிகமான கசப்புத்தன்மை உடையது ‘நிலவேம்பு’. ‘சிறியாநங்கை’ என வீடுகளில் வளர்க்கப்பட்டு வரும் செடிதான் நிலவேம்பு. இதன் இலைகள் பார்ப்பதற்கு மிளகாய்ச் செடியின் இலைகள் போலவே இருக்கும். இதன் காய் முதிர்ந்து தானாக வெடித்து விதைகள் பரவும். ஒன்றிரண்டு செடிகளை நட்டு வைத்தால், மூன்று மாதங்களிலேயே நிலவேம்புச் செடிகள் முளைத்துவிடும். நிலவேம்புக் குடிநீரை, ‘சர்வசுரக் குடிநீர்’ எனச் சித்த மருத்துவத்தில் சொல்கிறார்கள். தென்மாவட்டங்களில் இதை ‘விஷக்குடிநீர்’ எனவும் சொல்கிறார்கள்.  

டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!

சித்த மருத்துவம், காய்ச்சலை 64 வகைகளாகப் பிரித்துள்ளது. இந்த 64 வகைக் காய்ச்சல்களையும் நிலவேம்புக் குடிநீர் குணமாக்கும். சர்க்கரை நோய், தைராய்டு, ரத்த அழுத்தம் முதலான நாள்பட்ட நோய்களுக்கு ஆங்கில மருந்துகள் எடுத்து வருபவர்களும், இந்தக் குடிநீரைக் குடிக்கலாம். காய்ச்சலின்போது கஷாயம் குடிப்பதோடு, அதற்கேற்ற உணவு முறையைக் கடைப்பிடிக்க வேண்டியதும் அவசியம். காய்ச்சல் ஏற்பட்ட சமயங்களில் உடலின் ஜீரண மண்டல உறுப்புகள் அனைத்துமே சோர்வுற்று இருக்கும். இந்தச் சமயத்தில் எளிதில் செரிமானம் அடையக்கூடிய உணவையே உட்கொள்ள வேண்டும்.

இந்த வகையில் காய்ச்சல் வந்த முதல் நாளில் ‘அன்னப்பால் கஞ்சி’ குடிக்க வேண்டும். சிறிதளவு அரிசியுடன், இரண்டு மிளகு, ஒரு ஏலக்காய், அரைத் தேக்கரண்டி சீரகம் ஆகியவற்றை இளம் வறுப்பாக வறுத்து, உரல் அல்லது மிக்ஸியில் ஒன்றிரண்டாக இடித்து, அதனுடன் நிறைய தண்ணீர் சேர்த்துக் கஞ்சியாகக் காய்ச்சினால் அதுதான் அன்னப்பால் கஞ்சி. முதல் நாள் முழுவதும் அன்னப்பால் கஞ்சிதான் பருக வேண்டும்.

இரண்டாவது நாள், காலை மற்றும் இரவு உணவாக இட்லி சாப்பிடலாம். தக்காளி, புளி இல்லாமல் மிளகு, சீரகம் கொண்டு தயாரித்த ரசத்தைச் சாதத்துடன் சேர்த்து மதிய உணவாகச் சாப்பிடலாம்.

மூன்றாவது நாள், காலை மற்றும் இரவு உணவாக இட்லி சாப்பிடலாம். கத்திரிக்காய், அவரைக்காய் சேர்த்த சிறுபருப்பு சாம்பார் ஊற்றிய சாதத்தை மதிய உணவாகச் சாப்பிடலாம்.

காய்ச்சல் நேரத்தில் பழச்சாறுகளைப் பருகலாம் என்ற தவறான கருத்து அனைவரிடமும் உள்ளது. பழச்சாறு பருகினால் உடலில் புளிப்பு அதிகரித்துக் குளிர்ச்சி அதிகரிக்கும். இதனால் காய்ச்சல் குணமாவது தாமதமாகும். அதோடு ரொட்டி, பன், பிஸ்கட் போன்ற உணவுகளையும் சாப்பிடக் கூடாது. இவை மலச்சிக்கலை ஏற்படுத்த வாய்ப்புகள் உள்ளன” என்ற மைக்கேல் செயராசு நிறைவாக, “தற்போது சமூக வலைதளங்களில் நிலவேம்புக் குடிநீர் குறித்த தவறான தகவல்கள் பரப்பப்பட்டு வருகின்றன. 

கொல்கத்தாவில் 1980-களில், ஒரு மூலிகை ஆராய்ச்சியாளர் தனியாக நிலவேம்புப் பொடியை மட்டும் எலிகளுக்கு 6 வாரம் கொடுத்துப் பார்த்து ஆய்வு செய்தார். அந்த ஆய்வின் முடிவில், நிலவேம்புப் பொடி மலட்டுத்தன்மையை உருவாக்குவதாக அறிவித்துள்ளார். மூலிகை ஆராய்ச்சி என்பது வேறு. சித்த மருத்துவம் என்பது வேறு. தனி ஒரு மூலிகையை மட்டும் பொடியாக்கி ஆராய்வது மூலிகை ஆராய்ச்சி. ஆனால், சித்த மருத்துவத்தில் அனைத்து மருந்துகளும் பல மூலிகைகளின் தொகுப்பாகத்தான் உள்ளன.

திரிகடுகு என்பது சுக்கு, மிளகு, திப்பிலி ஆகிய மூன்று பொருள்களின் தொகுப்பு. கடுக்காய்த்தோல், நெல்லி வற்றல், தான்றிக்காய் தோல் ஆகிய மூன்றின் தொகுப்புதான் திரிபலா. இப்படி மூலிகைகளின் தொகுப்புத்தான் மருந்தாகக் கொடுக்கப்படுகிறது. ஒரு மூலிகைச் சரக்கில் உள்ள துர்குணத்தை (கெட்ட குணம்) நீக்கும் விதமாக மற்ற பொருள்கள் சேர்க்கப்படுகின்றன. நிலவேம்புக் குடிநீரும் அப்படிப் பல மூலிகைகளின் தொகுப்புதான். அதனால், ஆராயாமல் இப்படித் தகவல்களைப் பரப்புவது கண்டிக்கத்தக்க செயல்.

நாம், தினமும் உணவாகப் பயன்படுத்தும் துவரம் பருப்பு, கொடிய வாயுவை உண்டாக்கும் பொருள். அந்த வாயுவை நீக்கும் விதமாகப் பூண்டு, சீரகம், பெருங்காயம் முதலிய பொருள்களைச் சேர்த்துதான் சாம்பார் வைக்கிறோம். அதனால்தான் பாதிப்பு ஏற்படுவதில்லை. இந்த அடிப்படையில்தான், நிலவேம்புக் குடிநீர் குறித்துச் சிந்திக்க வேண்டும்” என்றார்.

தொடர்புக்கு, மைக்கேல் செயராசு, செல்போன்: 98421 66097.

டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!

நாமே தயாரிக்கலாம் நிலவேம்புக் குடிநீர்!

‘‘நி
லவேம்புக் குடிநீர், நிலவேம்புவை மட்டும் கொண்டு தயாரிக்கப்படும் மருந்தல்ல. நிலவேம்பு, வெட்டிவேர், விளாமிச்சை வேர், கோரைக்கிழங்கு, சந்தனச்சிறாய், பேய்ப்புடல், பற்படாகம், சுக்கு, மிளகு ஆகிய 9 சரக்குகள் சேர்த்துத் தயாரிக்கப்படுவது.

இவை அனைத்துமே நாட்டு மருந்துக்கடைகளில் கிடைக்கும். இவற்றில் வகைக்கு 100 கிராம் எடுத்துக்கொண்டு, ஒன்றிரண்டாக அரைத்து வெயிலில் 3 மணி நேரம் காயவைக்க வேண்டும்.  இதைக் காற்றுப்புகாத பாத்திரத்திலோ கண்ணாடி பாட்டிலிலோ பத்திரப்படுத்தி வைத்துக்கொள்ளலாம். இதை 6 மாதங்கள் முதல் ஓர் ஆண்டு வரை வைத்திருந்து பயன்படுத்தலாம்.

அரைத்து வைத்த மருந்தில், 30 கிராம் பொடியை 1 லிட்டர் தண்ணீரில் போட்டு அடுப்பிலேற்றி, கால் லிட்டராக வற்றும் வரை கொதிக்க வைக்க வேண்டும். பிறகு, வடிகட்டி ஒரு பிளாஸ்க்கில் ஊற்றி வைத்துக்கொண்டு இளஞ்சூட்டில் குடித்து வர வேண்டும்.

டெங்கு மற்றும் விஷக்காய்ச்சல்களால் பாதிக்கப்பட்டவர்கள், 3 மணி நேரத்துக்கு ஒருமுறை, இந்தக் குடிநீரை (கஷாயத்தை) தொடர்ந்து 3 நாள்கள் குடித்தால், காய்ச்சல் குணமாகிவிடும். டெங்கு மட்டுமல்லாமல், எந்த வகைக் காய்ச்சலாக இருந்தாலும், இக்குடிநீரைக் குடித்தால் குணமாகிவிடும். உணவுக்கு முன்போ, பின்போ எப்படி வேண்டுமானாலும் குடிக்கலாம்.

‘விருந்தும் மருந்தும் மூன்று நாள்கள்’ என்பதுபோல இந்தக் கஷாயத்தை 3 நாள்கள் தொடர்ந்து குடித்து வர வேண்டியது அவசியம். காய்ச்சல் சமயத்தில் தனி அறையில் கதவை மூடிவிட்டு, போர்வையை இழுத்துப் போர்த்திக்கொண்டு படுக்காமல், காற்றோட்டமான இடத்தில் ஓய்வெடுக்க வேண்டும். 12 வயதுக்கு மேற்பட்டவர்கள், ஒரு வேளைக்கு 30 மில்லி முதல் 50 மில்லி வரை குடிக்கலாம். 3 வயது முதல் 12 வயதுக்குட்பட்டவர்கள், ஒரு வேளைக்கு 20 மில்லி முதல் 30 மில்லி வரை குடிக்கலாம். 3 மாதம் முதல் 3 வயது வரை உள்ள குழந்தைகள், ஒரு வேளைக்கு 5 மில்லி முதல் 20 மில்லி வரை குடிக்கலாம். நோயின் தீவிரத்தைப் பொறுத்து, நாள் ஒன்றுக்கு  3 முதல் 5 முறை இக்குடிநீரைக் குடிக்கலாம்’’ என்கிறார் மைக்கேல் செயராசு.

டெங்கு மட்டுமல்ல... 64 வகை காய்ச்சல்களுக்கும் நிலவேம்புக் குடிநீர்!

‘‘வதந்தி பரப்பினால்...  நடவடிக்கை உண்டு!’’

நி
லவேம்பு குறித்துப் பரவிவரும் செய்திகள் பற்றி, ஊடகங்களுக்குப் பேட்டியளித்த தமிழகச் சுகாதாரத்துறைச் செயலர் ராதாகிருஷ்ணன், ‘‘நிலவேம்புக் கசாயம் குடிப்பதால் எந்தவிதமான பின் விளைவும் ஏற்படாது. நிலவேம்பு குறித்துச் சமூகவலைதளங்களில் பரவும் வதந்திகளை நம்ப வேண்டாம். மத்திய அரசின் ஆய்வுக்குட்படுத்தப்பட்டதில் எந்தப் பக்கவிளைவும் இல்லை என நிரூபிக்கப்பட்டுள்ளது. நிலவேம்பு குறித்து வீண் வதந்திகளைப் பரப்புவோர்மீது நடவடிக்கை எடுக்கப்படும்’’ எனத் தெரிவித்துள்ளார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு