இந்த உலகம் மனிதர்களுக்கு மட்டுமானதல்ல; கண்ணுக்குத் தெரியாத நுண்ணுயிரிகள் உள்படக் கோடிக்கணக்கான உயிர்களுக்கும் உறைவிடம். தாம்தான் உலகை ஆட்டிவைத்துக் கொண்டிருக்கிறோம் என எண்ணிக்கொண்டிருக்கிறான் மனிதன். ஆனால், உண்மையில் உலகை ஆட்டிவைப்பவை பூச்சிகளும் கண்ணுக்குத் தெரியாத நுண்ணுயிரிகளும்தாம்.

நுண்ணுயிரிகள் என்றாலே மனிதனுக்கு எதிரானவை என்ற பொதுவான எண்ணம் உண்டு. உண்மையில் அப்படியில்லை. தனது அனைத்துப் படைப்பிலும் இரண்டு வாசல்களை வைத்திருக்கிறது இயற்கை. ஒரு வாசல் அடைத்தால், இன்னொருவாசல் திறக்கும். அதன்படி, தீமை செய்யும் நுண்ணுயிரிகளைக் கட்டுப்படுத்த, சில நன்மை செய்யும் நுண்ணுயிரிகளையும் படைத்துள்ளது. அப்படிப்பட்ட நுண்ணுயிரிகளைப் பற்றித் தெரிந்து கொள்ளத்தான் இந்தத் தொடர்.

விவசாயத்தில் நுண்ணுயிரிகளின் பங்களிப்பு பற்றியும் அதைச்சார்ந்த பல்வேறு இடுபொருள்கள் பற்றியும் பார்த்து வந்தோம். நுண்ணுயிரிகளைப் பயன்படுத்திப் பயனடைந்துள்ள விவசாயிகளின் அனுபவங்களை இந்த இதழில் தெரிந்துகொள்வோம்.

திண்டுக்கல் மாவட்டம், எரியோடு பகுதியைச் சேர்ந்தவர் சுப்புராஜ். இவர், பயோ என்.பி.கே திரவத்தைப் பயிர்களுக்குப் பயன்படுத்திவருகிறார். அதுபற்றிச் சுப்புராஜ் சொல்வதைக்கேளுங்கள்.

“நான் ஏழெட்டு வருஷமா ரெண்டு ஏக்கர் நிலத்துல பசுமைக் குடில் அமைச்சு வெள்ளரி விவசாயம் செஞ்சிட்டிருக்கேன். ஆரம்பத்துல ரசாயன உரங்களை மட்டும்தான் பயன்படுத்தினேன். இப்போ, கொஞ்சம் கொஞ்சமா ரசாயன உரங்களைக் குறைச்சுகிட்டு, இயற்கை இடுபொருள்களைப் பயன்படுத்த ஆரம்பிச்சிருக்கேன்.

முனைவர் உதயகுமார்தான் பயோ என்.பி.கே பத்தி என்கிட்ட சொன்னார். அவர் சொன்னபடி, பயோ என்.பி.கே தயாரிச்சுச் சொட்டுநீர் மூலமா, பதினஞ்சு நாளுக்கு ஒருமுறை பயிர்களுக்குக் கொடுக்க ஆரம்பிச்சேன். இதைக் கொடுத்த பிறகு, வெள்ளரிச் செடிகளோட வளர்ச்சி அபாரமா இருந்துச்சு. மகசூலும் அதிகரிச்சது. எனக்கே நம்ப முடியலை. இத்தனை வருஷத்துல செடிகள்ல இப்படியொரு வளர்ச்சியை நான் பார்த்ததேயில்லை.

அதனால, தொடர்ந்து பயோ என்.பி.கேவைக் கொடுத்திட்டிருக்கேன். அடுத்து, பசுமைக் குடில்ல சாகுபடி பண்ற தக்காளிக்கும் கொடுத்துப்பார்த்தேன். தக்காளியிலயும் நல்ல பலன் கிடைச்சிட்டிருக்கு. இப்போ, ரசாயன உரத்துக்கான செலவுல 25 சதவிகித அளவு குறைஞ்சிருச்சு. பயோ என்.பி.கே கொடுக்குறதுல நிறைய நன்மை இருந்தாலும், ஒரேயொரு குறையும் இருக்கு. செடிகள் அபாரமா வளர்றதால பூச்சி, நோய்த் தாக்குதல் வந்திடுது. அதுக்கான தடுப்பு நடவடிக்கைகள்ல கவனமா இருக்க வேண்டியிருக்கு. அடுத்து கொய்யாத்தோப்புல இதைப் பயன்படுத்திப் பார்க்கலாம்னு இருக்கேன்” என்றார்.

புதுக்கோட்டையைச் சேர்ந்தவர் நெப்போலியன். இவர் இறந்துபோன அசோலாவை இ.எம் மூலமாக உயிர்ப்பித்திருக்கிறார். அவரது அனுபவத்தைக் கேட்போமா...

“நான் மதுரையிலிருந்து ரெண்டு கிலோ அசோலா வாங்கிட்டு வந்து, தென்னந்தோப்புல ‘தொட்டி’ அமைச்சு வளர்க்க ஆரம்பிச்சேன். எல்லாம் சரியாகச் செஞ்சிருந்தும் அஞ்சாம் நாளுக்கப்புறம், அசோலா கொஞ்சம் கொஞ்சமா காய ஆரம்பிச்சுடுச்சு. தொட்டில இருந்த அசோலாவுல, கிட்டத்தட்ட முக்கால்வாசி காய்ஞ்சுடுச்சு. என்ன பண்றதுனே தெரியாம, தொட்டில இருந்த தண்ணியை மாத்திட்டு... வாழைக்காகத் தயார் பண்ணி வெச்சிருந்த இ.எம் திரவக் கரைசல்ல (200 லிட்டர் தண்ணீரில் 70 மில்லி இ.எம் கலந்த கரைசல்) இருந்து மூணு லிட்டரை எடுத்து அசோலா தொட்டில ஊத்தினேன்.

மூணு நாள்ல அசோலாவுல பச்சை தெரிய ஆரம்பிச்சது. எனக்கு ஒரு நம்பிக்கை வந்தது. திரும்பவும் தண்ணியை மாத்திட்டு மூணு லிட்டர் அளவு நீர்த்த இ.எம் கரைசலை ஊத்தினேன். அடுத்த நாலஞ்சு நாள்லயே தொட்டி முழுசும் அசோலா பச்சையா படர்ந்துருச்சு. வாழைக்குப் பாசனத் தண்ணியோட இ.எம் கலந்து பாசனம் செய்யும்போது, நல்ல மகசூல் கிடைக்குது. அதுக்கூட எனக்குப் பெருசா தெரியலை. ஆனா, காய்ஞ்சுபோன அசோலா துளிர்த்ததும் இந்தத் திரவத்துக்கு இவ்வளவு சக்தியானு ஆச்சர்யப்பட்டுப் போயிட்டேன். உண்மையிலேயே இ.எம் விவசாயிகளுக்குக் கிடைச்ச வரப் பிரசாதம்தான்” என்றார்.

நுண்ணுயிரிகளைப் பற்றிய இந்தத் தொடரில் நான் சொல்லியிருப்பது மிகக் குறைவான அளவுதான். இன்னும் சொல்ல வேண்டிய செய்திகள் ஏராளம் இருக்கின்றன. பணிச்சுமை காரணமாக அடுத்த இதழுடன் இந்தத் தொடரை நிறைவு செய்கிறேன். அதனால், இந்தத்தொடரில் வெளிவந்த விஷயங்கள் குறித்த சந்தேகங்கள் உங்களுக்கு இருந்தால் கடிதம், மின்னஞ்சல் அல்லது தொலைபேசி மூலமாகக் கேளுங்கள். அவற்றில் பொதுவான கேள்விகளுக்கு நான் பதிலளிக்கிறேன். விவசாயத்தில் நுண்ணுயிரிகளின் பயன்பாட்டை அதிகரித்து, ரசாயன இடுபொருள்களைக் குறைத்துக்கொள்ளுங்கள். அது, உங்கள் பொருளாதாரத்தையும் வளமாக்கும், உங்கள் ஆரோக்கியத்தையும் வலிமையாக்கும்.

- பரவும்

இ.எம் கேள்வி-பதில்கள் பகுதி

பசுமை விகடன்
757, அண்ணா சாலை,
சென்னை-600002.
தொலைபேசி: 044 28524054.
(காலை 10 முதல் மாலை 5 மணி வரை)
இ.மெயில்: pasumaivikatan@gmail.com