Published:Updated:

“சம்பங்கியில் இரட்டை லாபம் கிடைக்கும்”

“சம்பங்கியில் இரட்டை லாபம் கிடைக்கும்”
பிரீமியம் ஸ்டோரி
“சம்பங்கியில் இரட்டை லாபம் கிடைக்கும்”

அக்ரி எக்ஸ்போ - திருச்சி - 2017கண்காட்சிஜி.பழனிச்சாமி, படங்கள்: என்.ஜி. மணிகண்டன், ம.அரவிந்த்

“சம்பங்கியில் இரட்டை லாபம் கிடைக்கும்”

அக்ரி எக்ஸ்போ - திருச்சி - 2017கண்காட்சிஜி.பழனிச்சாமி, படங்கள்: என்.ஜி. மணிகண்டன், ம.அரவிந்த்

Published:Updated:
“சம்பங்கியில் இரட்டை லாபம் கிடைக்கும்”
பிரீமியம் ஸ்டோரி
“சம்பங்கியில் இரட்டை லாபம் கிடைக்கும்”
“சம்பங்கியில் இரட்டை லாபம் கிடைக்கும்”

சென்ற இதழ்த் தொடர்ச்சி...

ரோடு, திருச்சி ஆகிய மாநகரங்களில் 2015-ம் ஆண்டிலிருந்து இயற்கை விவசாயக் கண்காட்சி மற்றும் கருத்தரங்குகளை நடத்திவருகிறது ‘பசுமை விகடன்’. இந்த ஆண்டு நான்காவது நிகழ்வாக, மலைக்கோட்டை மாநகர் திருச்சியில் கடந்த செப்டம்பர் 1-ம் தேதி முதல் 4-ம் தேதி வரை பிரமாண்டமாக நடைபெற்றது ‘பசுமை விகடன் அக்ரி எக்ஸ்போ-2017’. கண்காட்சியின் நான்கு நாள்களிலும் பல்வேறு தலைப்புகளில் கருத்தரங்குகள் நடைபெற்றன. இக்கருத்தரங்கில் பல்வேறு துறைகளைச் சார்ந்த பேச்சாளர்கள் ஆற்றிய உரைகளின் சாராம்சங்கள் இங்கே...

“சம்பங்கியில் இரட்டை லாபம் கிடைக்கும்”

ஒட்டுமொத்த விகடனுக்கும் ஒரே ஷார்ட்கட்!

கண்காட்சியின் நிறைவு நாளன்று காலை அமர்வில் முதல் பேச்சாளராக மேடையேறிய முனைவர் வெங்கடாச்சலம், ‘உயிராற்றல் தரும் காடுகள்’ என்ற தலைப்பில் பேசினார்.

விறகு, வறட்டி, பயோ-காஸ், சூரிய ஆற்றல் மின்சாரம் ஆகியவைதான் ‘மரபு சாரா எரிசக்தி’ என்று அழைக்கப்படுகின்றன. உண்மையில் அவைதான் மரபு சார்ந்த எரிசக்திகள். மரங்கள், சூரிய ஆற்றலின்மூலம்தான் உருவாகுகின்றன. காய்கறிகள், தானியங்கள்... என அனைத்து உணவுப் பொருள்களுக்குள்ளும் சூரிய ஆற்றல் இருக்கிறது. மரங்களிலிருந்து கிடைக்கும் விறகு, எரிகட்டி(கரி) போன்றவை மூலம், மின்சாரம் உற்பத்திசெய்யப்படுகிறது. காய்கறிக் கழிவுகள்மூலம் பயோ-காஸ் உற்பத்திசெய்ய முடியும். காற்றிலிருந்து கார்பனையும் நீரிலிருந்து ஹைட்ரஜனையும் எடுத்து ஹைட்ரோ கார்பனாக மாறும் ஆற்றல் சூரிய ஒளிக்கு உண்டு. பல்லாயிரம் ஆண்டுகளுக்கு முன்பு, பூமியில் புதைந்த மரங்கள்தாம் இன்று நிலக்கரியாகவும் பெட்ரோலியமாகவும் நமக்குக் கிடைக்கின்றன. அறிவியலைத் தொழில்நுட்பமாக மாற்றிப் பயன்படுத்தினாலும் அது, இயற்கைக்கு விரோதமாக இருக்கக் கூடாது.

பல்லாயிரம் கோடி ரூபாய் செலவு செய்து, பூமியில் பல ஆயிரம் மீட்டர் துளைபோட்டு, சுற்றுச்சூழலைக் கெடுத்து, விவசாயத்தை அழித்து, ஹைட்ரோ கார்பன் போன்ற எரிபொருள்களை எடுக்க வேண்டிய அவசியமேயில்லை.

பூமிக்குமேல் ஆற்றல் காடுகளை உருவாக்கி, இயற்கைக்குப் பங்கமில்லாமல் எரிவாயு உற்பத்திசெய்ய முடியும். ஒவ்வொரு கிராமத்திலும் ஆற்றல் காடுகளை உருவாக்கி, அந்த மரங்களைப் பயன்படுத்தி மின்சாரம் தயாரித்துத் தன்னிறைவு அடைய முடியும். மரங்கள் வளர்ப்பதால் ஆக்ஸிஜன் கிடைப்பதோடு மழை வளமும் கிடைக்கிறது.

“சம்பங்கியில் இரட்டை லாபம் கிடைக்கும்”

முப்பது ஆண்டுகளாக என் வீட்டுக்கு மரபு சார்ந்த ஆற்றலைத்தான் பயன்படுத்தி வருகிறேன். சோலார் பேனல்கள் அமைத்து, தேவையான மின்சாரத்தை உற்பத்தி செய்து கொள்கிறேன். காய்கறிக் கழிவுகள்மூலம் பயோ-காஸ் உற்பத்தி செய்து சமைக்கிறேன். பயோ-காஸ் கழிவுகளை வீட்டுத்தோட்டச் செடிகளுக்கு உரமாகப் பயன்படுத்துகிறேன். அதன் மூலம் நஞ்சில்லாத காய்கறிகளை விளைவிக்கிறேன். மழைநீரைச் சேகரித்து வைத்துத் தண்ணீர்த் தேவையைப் பூர்த்தி செய்துகொள்கிறேன்.

இவற்றை அனைவராலுமே எளிதாகக் கடைப்பிடிக்க முடியும். சாணத்தை உருட்டி, தட்டி நம் முன்னோர் தயாரித்த வறட்டிதான் முதல் எரி ஆற்றல் (எரிபொருள்). அதுபோன்ற மரபு சார்ந்த அறிவியல் தொழில்நுட்பங்களைப் பயன்படுத்திச் சுயசார்புடன் வாழ்ந்தால் இயற்கைக்கு எப்போதும் தீங்கு நேராது” என்றார் வெங்கடாச்சலம்.

அவரையடுத்து, ‘சாண எரிவாயுக் கழிவில் இயற்கை விவசாயம்’ என்ற தலைப்பில் பேசினார்  முன்னோடி இயற்கை விவசாயி ‘கதிராமங்கலம்’ ஸ்ரீராம். “எங்க குடும்பத்துக்கு இருக்குற 60 ஏக்கர் நஞ்சை நெலத்துலயும், போகம் தவறாமல் இயற்கை முறையில கரும்பையும் நெல்லையும் சாகுபடி செய்றோம்.

நாங்க கொடுக்குற முக்கியமான இடுபொருள் சாண எரிவாயுக் கலன்ல இருந்து வெளியாகுற ‘சில்லரி’தான். கரும்புக்குப் பதினஞ்சு நாள்களுக்கு ஒருதடவை, பாசனத் தண்ணீர்ல சில்லரியைக் கலந்து பாசனம் செய்றப்போ நல்ல பலன் கிடைக்குது.

“சம்பங்கியில் இரட்டை லாபம் கிடைக்கும்”

தூயமல்லி, மாப்பிள்ளைச்சம்பா, வெள்ளைப்பொன்னி, சீரகச்சம்பா, கிச்சிலிச்சம்பா, மைசூர் மல்லி, சிவப்புக்கவுனி, தேங்காய்ப்பூச் சம்பா, வாலன், பாசுமதி, கறுப்புக்கவுனி, பூங்கார்னு பாரம்பர்ய ரகங்களைத்தான் 31 ஏக்கர்ல சாகுபடி செய்றோம். நெல்லுக்குப் பதினஞ்சு நாளுக்கு ஒரு தடவை, பாசனத் தண்ணீர்ல சில்லரியைக் கலந்து பாசனம் செஞ்சா நல்ல விளைச்சல் கிடைக்கிது. மோட்டா ரகத்துல ஒரு ஏக்கருக்கு 1,700 கிலோவும் சன்ன ரகத்துல ஒரு ஏக்கருக்கு 2,300 கிலோவும் மகசூல் எடுக்கிறோம்.

சாண எரிவாயுக்கலன் அமைக்க ஒன்பதாயிரம் ரூபாய் செலவாச்சு. எங்ககிட்ட இருக்கிற நாலு மாடுகளோட சாணத்தைதான் பயன்படுத்துறோம். அதுமூலமா எங்க குடும்பத்துக்குத் தேவையான அளவு எரிவாயு கிடைச்சிடுது. மாசத்துக்கு 6 ஆயிரம்  லிட்டர் சில்லரி கிடைக்குது. அதைத்தான் இடுபொருளாகப் பயன்படுத்துறோம்” என்றார்.

கருத்தரங்கின் நிறைவுப் பேச்சாளராக மேடையேறிய ‘கரூர்’ மனோகரன், ‘இயற்கை விவசாயத்தில் மலர்ச் சாகுபடி’ என்ற தலைப்பில் விளக்கப்படங்களுடன் உரையாற்றினார்.

“சம்பங்கியில் இரட்டை லாபம் கிடைக்கும்”

“மலர் சாகுபடி செய்தால் தினந்தோறும் வருமானம் பார்க்க முடியும். காலை 5 மணிக்கு முன்னதாகவே பூக்களைப் பறிக்க வேண்டுமென்பதால், வேலையாள்கள் கிடைப்பது சிக்கல்தான். அதனால், அதிகப்பரப்பில் சாகுபடி செய்யாமல், குறைந்தளவில் மட்டும் சாகுபடி செய்ய வேண்டும். குடும்ப உறுப்பினர்களே பூ பறிப்பில் ஈடுபட்டால் மிகவும் நல்லது. இயற்கைமுறையில் சாகுபடி செய்யப்படும் பூக்கள், பல மணி நேரமானாலும் வாடுவதில்லை.

ரோஜா, குண்டுமல்லி, சம்பங்கி, செண்டுமல்லி ஆகிய பூக்களுக்கு நல்ல சந்தை வாய்ப்புண்டு. சம்பங்கியில் இரட்டை லாபம் உண்டு. மற்ற மலர் வகைகளில் பூக்களில் மட்டும்தான் வருமானம் பார்க்க முடியும். சம்பங்கியில் பறிப்பு முடிந்ததும் விதைக்கிழங்கு மூலமும் வருமானம் பார்க்கலாம். மூன்று ஆண்டுகள் நிறைவடைந்த செடிகளிலிருந்து ஒரு ஏக்கரில் 450 கிலோ அளவு விதைக்கிழங்கு கிடைக்கும். சம்பங்கி வயலில் ஊடுபயிராக வெங்காயம் சாகுபடி செய்யலாம்” என்றார்.

நிறைவு நிகழ்ச்சியாகக் கருத்தரங்கில் பார்வையாளர்களாக வந்திருந்த விவசாயிகள் சிலர், தங்கள் அனுபவங்களைப் பகிர்ந்து கொண்டனர்.

நிறைவு பெற்றது.

“சம்பங்கியில் இரட்டை லாபம் கிடைக்கும்”

இயற்கை விளைபொருளுக்கு...

மலேசியாவில் ஏற்றுமதி வாய்ப்பு!


ருத்தரங்கில் அயல்நாட்டுச் சிறப்பு அழைப்பாளராகக் கலந்துகொள்ள மலேசியாவிலிருந்து பறந்துவந்திருந்தார், பினாங்கு பயனீட்டாளர் சங்கத்தின் சுற்றுச்சூழல் மற்றும் இயற்கை விவசாயக் கல்வி அதிகாரி என்.வி.சுப்பாராவ். மலேசியா நாட்டுக்கு இயற்கை விவசாய விளைபொருள்களை ஏற்றுமதி வாய்ப்புகள் பற்றிப் பேசினார்.

‘‘நம்மாழ்வார் ஐயா மலேசியா நாட்டுக்கு வருகைபுரிந்து இங்குள்ள விவசாயிகளுக்குப் பயிற்சிகொடுத்துச் சென்றபிறகு, இயற்கை விவசாயம் குறித்த விழிப்பு உணர்வு அதிகரித்து இருக்கிறது. அதேபோல் மலேசியா மற்றும் சிங்கப்பூர் வாழ் நுகர்வோர் மத்தியில் நஞ்சில்லா உணவு வேண்டும் என்கிற ஆர்வம் ஏற்பட்டுள்ளது. பலரும் என்னிடம் கேட்கும் முதல் கேள்வி, ‘விவசாய விளைபொருள்களை மலேசியா நாட்டுக்கு ஏற்றுமதி செய்யமுடியுமா?’ என்பதுதான். ஏற்கெனவே ஏற்றுமதியாளர்கள் பலரும் இந்தியாவிலிருந்து காய்கறி, பழங்கள், எண்ணெய்ப் பொருள்கள் மற்றும் அரிசி உள்ளிட்ட மளிகைப் பொருள்களை அனுப்பிவருகிறார்கள்.

ஆனால், இதைவிட இயற்கை விவசாயத்தில் விளைந்த காய்கறிகள், பழங்கள், வெங்காயம், கறிவேப்பிலை, மிளகாய் வத்தல், சுத்தமான தேன், பாரம்பர்ய அரிசி வகைகள், உளுந்து, துவரை, பாசிப்பயறு... போன்ற உணவுப்பொருள்களுக்கு அங்கு பெரும் வரவேற்பு உள்ளது. குறிப்பாகக் கோவில்பட்டிக் கடலை மிட்டாய்க்கு நல்ல சந்தை வாய்ப்புள்ளது. அதேபோல் தமிழ்நாட்டின் கடலைப்பொரிக்கும்கூட வரவேற்பு உள்ளது’’ என்று பட்டியலிட்டுப் பேசினார்.

“சம்பங்கியில் இரட்டை லாபம் கிடைக்கும்”

எல்லா ஊரிலும் கண்காட்சி நடத்த வேண்டும்!

கா
ஞ்சிபுரம் மாவட்டம், உத்திரமேரூர் பகுதியிலிருந்து கண் காட்சிக்கு வந்திருந்தார், முன்னோடிப் பெண் விவசாயி மகாலட்சுமி. “நான்கு நாள் கருத்தரங்கில் பேச்சாளர் பட்டியலில் பெண் விவசாயி ஒருவர் பெயர்கூட இல்லை. அடுத்தமுறை பெண்களுக்கு வாய்ப்புக் கொடுங்கள்” என்று கோரிக்கை வைத்தவரை மேடையேற்றினோம். மிகுந்த மகிழ்ச்சி அடைந்த அவர், “நான் ஒரு ஏரிப்பாசன நெல் விவசாயி. பாரம்பர்ய நெல் ரகமான ஆத்தூர் கிச்சிலிச் சம்பாவை இரண்டு ஏக்கர் நிலத்தில் நடவுசெய்துள்ளேன்.

பசுமை விகடனின் தீவிர வாசகி. என்னை இயற்கை விவசாயத்துக்கு மடை மாற்றியது பசுமை விகடன்தான். அந்தப்பாசம் காரணமாகத்தான் இருநூறு கிலோமீட்டர் தூரத்துக்குமேல் பயணம் செய்து, இந்தக் கண்காட்சிக்கு வந்துள்ளேன்.

அடுத்ததாக சென்னை, வேலூர், கடலூர் போன்ற மாவட்டங்களிலும் பசுமை விகடன் கண்காட்சிகளை நடத்த வேண்டும் என்ற கோரிக்கை வைத்த மகாலட்சுமி, ஜீரோபட்ஜெட் நெல் சாகுபடி குறித்துச் சில தொழில்நுட்பங்களைச் சொல்லிப் பார்வையாளர்களிடம் கரவொலி பெற்றார்.