Published:Updated:

தொடரும் காப்பீட்டுக் குளறுபடி... கதறும் விவசாயிகள்!

தொடரும் காப்பீட்டுக் குளறுபடி...  கதறும் விவசாயிகள்!
பிரீமியம் ஸ்டோரி
தொடரும் காப்பீட்டுக் குளறுபடி... கதறும் விவசாயிகள்!

பிரச்னைகு.ராமகிருஷ்ணன், படங்கள்: க.சதீஷ்குமார்

தொடரும் காப்பீட்டுக் குளறுபடி... கதறும் விவசாயிகள்!

பிரச்னைகு.ராமகிருஷ்ணன், படங்கள்: க.சதீஷ்குமார்

Published:Updated:
தொடரும் காப்பீட்டுக் குளறுபடி...  கதறும் விவசாயிகள்!
பிரீமியம் ஸ்டோரி
தொடரும் காப்பீட்டுக் குளறுபடி... கதறும் விவசாயிகள்!

டந்தாண்டு நிலவிய கடும் வறட்சி காரணமாக, டெல்டா மாவட்டங்களில் சம்பா நெல் சாகுபடி பெரியளவில் பாதிப்புக்குள்ளானது. பாதிப்புக்கு முன்பே விவசாயிகள் பலரும் நெல் பயிருக்குக் காப்பீட்டுத் தொகை செலுத்தியிருந்தனர்.  இதனால், ‘இழப்பீடு கிடைக்கும்’ என்று எதிர்பார்த்திருந்தனர். 

இந்தச் சூழ்நிலையில், நூற்றுக்கணக்கான கிராமங்களில் ‘வறட்சியால் பயிர்களுக்குப் பாதிப்பில்லை’ எனக் கைவிரித்துவிட்டது காப்பீட்டு நிறுவனம். மேலும், பாதிப்பு ஏற்பட்டுள்ளதாகச் சொல்லப்பட்ட கிராமங்களில் பலருக்கும் ஒழுங்காக இழப்பீட்டுத் தொகை வழங்கப்படவில்லை என்று நொந்துபோய்க்கிடக்கிறார்கள் டெல்டா பகுதி விவசாயிகள்.

இதனால் தஞ்சாவூர், திருவாரூர், நாகப்பட்டினம் ஆகிய மாவட்டங்களில் சாலை மறியல், உண்ணாவிரதம், ஆர்ப்பாட்டம், வங்கிகள் முற்றுகை... எனப் பல போராட்டங்களை நடத்திவருகிறார்கள் விவசாயிகள். மாவட்ட ஆட்சியர் அலுவலகங்களில் நடைபெறும் விவசாயிகள் குறைதீர்க்கும் கூட்டங்களிலும் இப்பிரச்னையே முதன்மையானதாக உள்ளது.

தொடரும் காப்பீட்டுக் குளறுபடி...  கதறும் விவசாயிகள்!

இதுகுறித்து நம்மிடம் பேசிய ‘தஞ்சை மாவட்டக் காவிரி விவசாயிகள் பாதுகாப்புச் சங்க’த்தின் துணைச்செயலாளர் சுகுமாறன், “பழைய இன்ஷூரன்ஸ் திட்டத்துல ஒரு ஏக்கருக்கு 65 ரூபாய்தான் பிரீமியம் தொகையாகக் கட்டிட்டிருந்தோம். இப்போ, பிரதமர் மோடி அறிவிச்ச புதிய பயிர்க் காப்பீட்டுத் திட்டத்துல, பிரீமியம் தொகையை 365 ரூபாயாக உயர்த்தினாங்க. ஆனா, இழப்பீடு வழங்குறதுல ஏகப்பட்ட குளறுபடிகள் பண்றாங்க. பிரீமியம் தொகை செலுத்தின பல விவசாயிகளுக்கு இழப்பீட்டுத் தொகையை ஒழுங்காகத் தரல. தஞ்சை மாவட்டத்துல இருநூற்றுக்கும் மேற்பட்ட வருவாய் கிராமங்கள்ல இருக்குற விவசாயிகளுக்கு இழப்பீடு கிடைக்கல. இப்படி ஆயிரக்கணக்கான விவசாயிகள் பாதிக்கப்பட்டிருக்காங்க. ஒரு வருவாய் கிராமத்துக்குக் குறைந்தபட்சம் ஆயிரம் ஏக்கர்னு வெச்சுக்கிட்டாலே கிட்டத்தட்ட 2 லட்சம் ஏக்கர் நிலம் இருக்கும்.

போன வருஷம் தமிழ்நாடு முழுக்கவே வறட்சினு எல்லோருக்கும் தெரியும். ஆனா, ‘வறட்சியால பாதிப்பு இல்லை’னு அப்பட்டமான பொய்யைச் சொல்லி, இழப்பீடு கொடுக்க மாட்டேங்குறாங்க.

ஒட்டுமொத்த விகடனுக்கும் ஒரே ஷார்ட்கட்!

தொடரும் காப்பீட்டுக் குளறுபடி...  கதறும் விவசாயிகள்!

தஞ்சாவூர் மாவட்டம், திருவையாறு பக்கத்திலுள்ள மேலத்திருப்பந்துருத்தி கிராமத்துல ஆய்வு செஞ்ச கலெக்டர் அண்ணாதுரை, ‘கடுமையான வறட்சியினால் பயிர்கள் பாதிக்கப்பட்டிருக்கு’னு அந்தக் கிராமத்துல இருந்தே ஊடகங்களுக்குப் பேட்டி கொடுத்தார். ஆனா, அந்தக் கிராமத்துல ஒருத்தருக்குக்கூட இழப்பீட்டுத்தொகை கிடைக்கல. அந்தக் கிராமத்துல, ‘வறட்சியால பாதிப்பே இல்லை’னு இன்ஷூரன்ஸ் நிறுவனம் சொல்லுது. பாதிப்பு சதவிகிதம் பூஜ்யம்னு சொல்லியிருக்கு. ஆனா, அதுக்கு ரொம்பப் பக்கத்துல இருக்குற கீழத்திருப்பந்துருத்தி கிராமத்துல 60 சதவிகிதம் பாதிப்புனு இன்ஷூரன்ஸ் நிறுவனம் அறிவிச்சிருக்கு. விவசாயிகளை இன்ஷூரன்ஸ் நிறுவனம் ஏமாத்துதுங்கிறதுக்கு இந்த உதாரணமே போதும்.

விவசாயிகள்கிட்ட இருந்து கோடிக்கணக்கான பணத்தை பிரீமியமா வாங்கிகிட்டு மோசடி செய்றாங்க. இந்த மோசடிக்கு வேளாண்மைத் துறையும், மாவட்ட நிர்வாகமும் துணையா இருக்கு. இன்ஷூரன்ஸ் நிறுவனத்துமேல உடனடியா அரசாங்கம் நடவடிக்கை எடுத்து, பாதிக்கப்பட்ட விவசாயிகளுக்கு இழப்பீட்டுத்தொகையை வாங்கித்தரணும்” என்றார்.

கும்பகோணம் அருகே உள்ள கூனஞ்சேரி கிராமத்தைச் சேர்ந்த ராமதாஸ், “எங்களோட வீடு இருக்குறது கூனஞ்சேரி. வயல் திருமண்டங்குடி கிராமத்துல இருக்கு. நிலம் இருக்குற ஊரோட வறட்சி சதவிகித அடிப்படையில் எனக்கு 68.69 சதவிகிதம் இழப்பீடு கொடுக்கணும். ஆனா, எங்க வீடு இருக்குற கூனஞ்சேரி கிராமத்துக்கான 61.69 சதவிகிதக் கணக்குல இழப்பீடு கொடுத்திருக்காங்க. அதனால, எங்களுக்கு நாலரை ஏக்கருக்கு மொத்தமா 9 ஆயிரம் ரூபாய் குறைவாகக் கிடைச்சிருக்கு. இதேமாதிரிப் பல குளறுபடிகளால ஆயிரக்கணக்கான விவசாயிகள் பாதிக்கப்பட்டிருக்காங்க” என்கிறார்.

மேலத்திருப்பந்துருத்தி கிராமத்தில் நடந்துள்ள குளறுபடி குறித்துத் தஞ்சாவூர் மாவட்ட ஆட்சியர் அண்ணாதுரையிடம் பேசினோம். “மேலத்திருப்பந்துருத்தி கிராமத்தில் கடந்தாண்டு நான் மேற்கொண்ட ஆய்வு வறட்சி நிவாரணத்துக்கானது. இன்ஷூரன்ஸ் நிறுவனம் மேற்கொண்ட ஆய்வு, இழப்பீட்டுக்கானது. அவர்கள் அறிவியல்பூர்வமாக ஆய்வு மேற்கொண்டதால், வறட்சிப் பாதிப்பின் முடிவில் வேறுபாடு வந்திருக்கக்கூடும். வறட்சியால் பயிர் பாதிக்கப்பட்ட அனைத்து விவசாயிகளுக்கும் விரைவில் இழப்பீடு கிடைத்துவிடும்.

சில விவசாயிகள் ஒரே சர்வே நம்பருக்கு, தொடக்க வேளாண் வங்கி மற்றும் தேசிய மயமாக்கப்பட்ட வங்கி என இரண்டு இடங்களில் பிரீமியம் செலுத்தியிருப்பதாலும் சில குளறுபடிகள் உள்ளன. அவற்றைக் கண்டுபிடித்துச் சரிசெய்து அனைவருக்கும் உடனடியாக இழப்பீடு வழங்கப்படும்” என்றார்.

ஏற்கெனவே பல பிரச்னைகளில் சிக்கித்தவித்துக் கொண்டிருக்கும் விவசாயிகள், இழப்பீட்டுத் தொகை கிடைக்காமல் கடும் நெருக்கடியில் உள்ளனர். ஆனால், பிரச்னைக்குத் தீர்வு காண வேண்டிய முதலமைச்சர் மற்றும் அமைச்சர்கள் எம்.ஜி.ஆர் நூற்றாண்டு விழாக் கொண்டாட்டத்தில் மட்டுமே கவனம் செலுத்திவருவது, தமிழக விவசாயிகள் மத்தியில் பெரும் அதிருப்தியை ஏற்படுத்தியுள்ளது.

வழக்குத் தொடுக்கலாம்... வட்டி கோரலாம்!

யிர்க் காப்பீடுமூலம் பாதிக்கப்பட்ட விவசாயிகளுக்கு வழிகாட்டிவரும், ‘தஞ்சை மாவட்டக் கிராமப்புற நுகர்வோர் பாதுகாப்பு இயக்க’த்தின் தலைவர் ‘சுவாமிமலை’ விமல்நாதன், சில விஷயங்களை நம்மிடம் பகிர்ந்துகொண்டார்.

“பயிர் இன்ஷூரன்ஸ் இழப்பீடு கிடைக்காத விவசாயிகள், அந்தந்த மாவட்டங்களில் உள்ள நுகர்வோர் நீதிமன்றத்தில் 100 ரூபாய்க் கட்டணம் செலுத்தி வழக்குத் தொடுத்து, ஒரு லட்ச ரூபாய் வரை நஷ்ட ஈடாகப் பெறமுடியும். இதற்கான அனைத்து வழிகாட்டுதல்களையும் இலவசமாகச் செய்துதர எங்கள் அமைப்பு தயாராக இருக்கிறது.

தொடரும் காப்பீட்டுக் குளறுபடி...  கதறும் விவசாயிகள்!

1997-98-ம் ஆண்டில் செவ்வழுகல் நோயினால் கரும்புப் பயிரைப் பறிகொடுத்த விவசாயிகளுக்கு, ‘நியூ இந்தியா அஸ்யூரன்ஸ் நிறுவனம்’ இழப்பீடு தர மறுத்தது. நுகர்வோர் நீதிமன்றம்மூலம், பாதிக்கப்பட்ட விவசாயிகளுக்கு இழப்பீடு பெற்றுக் கொடுத்தோம். இழப்பீடு கிடைக்காத சூழ்நிலையில் மட்டுமல்ல, இழப்பீடு கிடைக்கத் தாமதமானாலும், நுகர்வோர் நீதிமன்றத்தில் வழக்குத் தொடுக்கலாம். தாமதமான காலகட்டத்துக்கு வட்டிகோர முடியும்.

தற்போதுள்ள திட்டப்படி, விவசாயிகள் தங்களது பிரீமியம் தொகையை நேரடியாக இன்ஷூரன்ஸ் நிறுவனத்துக்குச் செலுத்த முடியாது. தொடக்க வேளாண் கூட்டுறவு வங்கிகள், தேசிய மயமாக்கப்பட்ட வங்கிகள், வேளாண்மைத் துறை ஆகியவற்றின் மூலமாகத்தான் பிரீமியம் செலுத்த முடியும். இதனால், இழப்பீட்டுத் தொகையும் நேரடியாக விவசாயிகளுக்கு வருவதில்லை. இன்ஷூரன்ஸ் நிறுவனங்களும் விவசாயிகளை மதிப்பதில்லை.

விவசாயிகள் நேரடியாக அணுகும் நிலையில் இருந்தால், இன்ஷூரன்ஸ் நிறுவனங்கள் ஓரளவுக்கு நேர்மையாக நடக்க வாய்ப்புள்ளது.

விவசாயியின் பெயர், சர்வே எண், எவ்வளவு இழப்பீட்டுத்தொகை போன்ற விவரங்கள் அடங்கிய பட்டியலை, தொடக்க வேளாண் கூட்டுறவு வங்கி, வேளாண் விரிவாக்க மையம், ஊராட்சி அலுவலகம் உள்ளிட்ட அனைத்து அரசு அலுவலகங்களிலும் மக்கள் பார்வைக்கு வைக்க வேண்டும். இப்படி வெளிப்படைத்தன்மை இல்லாததால்தான் பல முறைகேடுகள் நடக்கின்றன. அதோடு, பல மாவட்டங்களில் இழப்பீட்டுத் தொகையில் 30 சதவிகிதம் வரை, வங்கி அலுவலர்கள் எடுத்துக் கொள்ளும் அவலநிலையும் உள்ளது.

தற்போது இழப்பீடு வழங்காத பிரச்னை பூதாகரமாகியுள்ள நிலையில், மாவட்ட நிர்வாகம் இன்ஷூரன்ஸ் நிறுவன அதிகாரிகள், விவசாயிகளை அழைத்துச் சிறப்புக்கூட்டங்களை நடத்தித் தீர்வு காண வேண்டும்” என்றார்.

தொடர்புக்கு,
விமல்நாதன்,
செல்போன்: 94420 60608.
மின்னஞ்சல்: thanjairti@gmail.com