Published:Updated:

எருமைகளுக்குச் சேறு கண்ட இடம் சொர்க்கம்!

எருமைகளுக்குச் சேறு கண்ட இடம் சொர்க்கம்!
பிரீமியம் ஸ்டோரி
எருமைகளுக்குச் சேறு கண்ட இடம் சொர்க்கம்!

சினை மேலாண்மை பற்றிப் பேசும் குறுந்தொடர் - 4கால்நடைமுனைவர் க.கிருஷ்ணகுமார், தொகுப்பு: த.ஜெயகுமார், படங்கள் ரா.திலீப்குமார்

எருமைகளுக்குச் சேறு கண்ட இடம் சொர்க்கம்!

சினை மேலாண்மை பற்றிப் பேசும் குறுந்தொடர் - 4கால்நடைமுனைவர் க.கிருஷ்ணகுமார், தொகுப்பு: த.ஜெயகுமார், படங்கள் ரா.திலீப்குமார்

Published:Updated:
எருமைகளுக்குச் சேறு கண்ட இடம் சொர்க்கம்!
பிரீமியம் ஸ்டோரி
எருமைகளுக்குச் சேறு கண்ட இடம் சொர்க்கம்!

பொதுவாக மாடுகள், கருவூட்டல் செய்த நாளிலிருந்து 270 முதல் 280 நாள்களில் கன்று ஈன்றுவிடும். கருவூட்டல் செய்த 60 நாள்கள் கழித்துச் சினைப்பிடித்திருப்பதை உறுதிசெய்து கொள்ள வேண்டும். கருவூட்டல் செய்த சில வாரங்களிலேயே சினைப்பிடித்திருப்பதைப் பார்க்க முடியும் என்றாலும், அந்தச் சமயங்களில் சோதனை செய்யும்போது கரு கலைந்துவிட வாய்ப்புகள் உண்டு. இரண்டு மாதங்களில் கரு ஓரளவுக்கு வளர்ந்துவிடும் என்பதால், அந்தச் சமயத்தில் சோதனை செய்வது நல்லது.

சினைப்பிடித்திருப்பதைச் சில அறிகுறிகள் மூலமாகவும் அறிய முடியும். சினைப்பிடித்த மாடுகள், பருவத்துக்கு வராது (கோழை அடிக்காது). முதல்முறை சினைப்பிடிக்கும் மாடுகளுக்கு நான்காவது மாதத்தில் மடி இறங்கும். ஏற்கெனவே கன்றுபோட்ட மாடுகளுக்கு ஏழு மாதங்களுக்குப் பிறகுதான் மடி இறங்கும். கருவுற்ற மாடுகள் அமைதியாகக் காணப்படும். மெதுவாகத்தான் நடக்கும். மாட்டின் உடலில் ஒரு மினுமினுப்பு தெரியும். கருவுற்ற மாடுகளுக்குத் தினமும் 3 கிலோ அளவு அடர்தீவனம் கொடுத்து வர வேண்டும். தீவனத்தில் சரிவிகித சத்துக்கள் இருப்பதை உறுதிசெய்துகொள்ள வேண்டும்.

கறவை மாடுகளில் கருவுற்றதிலிருந்து ஏழு மாதங்கள் வரை பால் கறக்கலாம். கருவுற்ற எட்டாம் மாதத்துக்குமேல், பால் உற்பத்திக்கான திசுக்கள் அழிந்து புதிய திசுக்கள் உருவாகும். அதனால், இந்தக் காலகட்டத்தில் கறவையை நிறுத்திவிட வேண்டும். அப்படி நிறுத்தினால்தான், கன்று ஈன்ற பிறகு, தரமான சீம்பால் சுரப்பதோடு, பால் உற்பத்தியும் அதிகரிக்கும். பாலில் கொழுப்புச்சத்தும் அதிகரிக்கும்.

அதே சமயம் பால் கறப்பதைத் திடீரென்று நிறுத்தினால் மடிநோய் வருவதற்கு வாய்ப்புண்டு. அதனால், ஒரு நாள்விட்டு ஒரு நாள் பால் கறக்க ஆரம்பித்து, சில நாள்களில் நிறுத்த வேண்டும். சில மாடுகள் கருவுற்ற பிறகும் நன்றாகப் பால் கறந்துகொண்டிருந்தால், அடர் தீவனத்தைப் படிப்படியாகக் குறைத்து, பிறகு பால் கறப்பதை நிறுத்த வேண்டும்.

எருமைகளுக்குச் சேறு கண்ட இடம் சொர்க்கம்!

சினை மாடுகளை வேகமாக ஓட விடுவதோ, வேலை வாங்குவதோ கூடாது. அவற்றை அடித்துத் துன்புறுத்தக்கூடாது. கரடு முரடான பாதைகளில் நடக்கவிடக் கூடாது. கருவுற்ற மாடுகளை வாகனங்களில் ஏற்றி, இடம் மாற்றுவதைத் தவிர்த்துவிட வேண்டும்.

கருப்பை முறுக்கிக் கொள்ளுதல்

‘மனிதர்களுக்குச் சோறுகண்ட இடம் சொர்க்கம், எருமைகளுக்குச் சேறுகண்ட இடம் சொர்க்கம்’ என்று கிராமங்களில் சொல்வார்கள். எருமைகள் உடல் வெப்பத்தைக் குறைத்துக்கொள்ள அடிக்கடி சேற்றில் புரள விரும்பும்.

கருவுற்ற எருமைகள் சேற்றில் புரளும்போது, கருப்பை முறுக்கிக் கொள்ள வாய்ப்புண்டு. இதனால், கருவிலிருக்கும் சிசு இறந்துபோவதோடு, தாய் எருமையின் உயிருக்கும் ஆபத்தாக முடிந்துவிடும். மாடுகள் அடிக்கடி படுத்து எழுவது, பற்களை நரநரவென்று கடிப்பது, அமைதியின்றி இருப்பது, மடி உள்வாங்கிக்கொள்வது, கட்டியாகச் சாணம் இடுவது, இனப்பெருக்க உறுப்பின் வாய்ப்பகுதி சற்றுக் கோணலாகக் காணப்படுவது போன்ற அறிகுறிகள் தென்பட்டால், கருப்பை முறுக்கி இருக்கலாம். இந்த அறிகுறிகளைக் கண்டால், கண்டிப்பாக 24 மணி நேரத்துக்குள் தகுந்த சிகிச்சை அளிக்க வேண்டும். ஆற்றங் கரையோரம், ஏரிகள் நிறைந்த பகுதிகளில் வளரும் எருமை மற்றும் பசுக்களுக்கு இந்தப் பாதிப்புகள் ஏற்பட வாய்ப்புகள் உண்டு.

எருமைகளுக்குச் சேறு கண்ட இடம் சொர்க்கம்!

கருப்பை வெளிவருதல்

மாடுகளில் கருவுற்ற ஆறாம் மாதத்துக்குப் பிறகு, சில சமயங்களில் கருப்பையின் வாய்ப்பகுதி வெளியே வந்துவிடும். இப்படி வருவதை நாமக்கல் பகுதியில் ‘செவுளி தள்ளுது’ என்றும், சென்னையில் ‘நாய்த்தலை வருது’ என்றும், திருநெல்வேலிப் பகுதியில் ‘செவப்புத் தள்ளுது, பூ தள்ளுது’ என்றும் சொல்வார்கள். ஹார்மோன் பற்றாக்குறையால் ஏற்படும் பிரச்னை இது. இப்படிப்பட்ட மாடுகளைச் சமதளப் பகுதியில்தான் கட்டி வைக்க வேண்டும்.

மேடு பள்ளமான பகுதியாக இருந்தால், மாடுகள் படுக்கும்போது அதன் பின்புறம் சிறிது உயரமாக இருக்குமாறு படுக்க வைக்க வேண்டும். கருப்பை வெளித் தள்ளிய மாடுகளின் பின்புறத்தைக் பறவைகள் கொத்த வரும். நாய்களும் கடிக்க வாய்ப்பு உண்டு. சாணம், சிறுநீர் போன்றவையும் இனப்பெருக்க உறுப்பில் ஒட்டிக்கொள்ள வாய்ப்புகள் உண்டு. அதனால், கருப்பை வெளிவந்த மாடுகளின் இனப்பெருக்க உறுப்பைச் சுத்தமான ஈரத்துணி கொண்டு கட்டிப் பாதுகாத்து, பிறகு தகுந்த சிகிச்சை அளிக்க வேண்டும்.

எருமைகளுக்குச் சேறு கண்ட இடம் சொர்க்கம்!

கருச்சிதைவு

அதிர்ச்சி, ஒவ்வாமை, மாடுகள் முட்டிக் கொள்ளுதல்... போன்ற காரணங்களால் மாடுகளுக்குக் கருச்சிதைவு ஏற்பட வாய்ப்பு உண்டு. இனப்பெருக்க உறுப்பில் ரத்தக்கசிவு மற்றும் ரத்தம் கலந்த கோழை வருவது போன்ற அறிகுறிகளை வைத்துக் கருச்சிதைவை அறியலாம். இந்த அறிகுறிகள் தென்பட்டவுடன் உடனே சிகிச்சை அளித்தால், மாடுகளின் உயிரைக் காப்பாற்ற முடியும்.

சினையில் இருக்கும் மாடுகளுக்கு அதிகத் தாகம் எடுக்கும். ஆனால், ஒரே நேரத்தில் அதிகத் தண்ணீரைக் குடிக்கவிடாமல், மூன்று வேளைகளாகப் பிரித்துக் குடிக்க வைக்க வேண்டும். அதேபோலப் பசுந்தீவனம், அடர் தீவனம் ஆகியவற்றையும் மூன்று வேளைகளாகப் பிரித்துக் கொடுக்க வேண்டும்.

- கறக்கும்

எவ்வளவு தண்ணீர்... எவ்வளவு தீவனம்?

முந்நூறு கிலோ எடையுள்ள, சராசரியாகப் பத்து லிட்டர் பால் கறக்கும் மாட்டுக்கு ஒரு நாளைக்கு... 20-25 கிலோ பசுந்தீவனம், 4-5 கிலோ உலர் தீவனம், 3-4 கிலோ அடர் தீவனம் கொடுக்க வேண்டும். தினமும் ஐந்து மணி நேரம் மேய்ச்சலுக்கு விட வேண்டும்.

மாடுகளின் எடை, சீதோஷ்ண நிலை, உண்ணும் உணவு, பால் கறவைத் திறன் ஆகியவற்றைப் பொறுத்துக் குடிநீரின் தேவை வேறுபடும். பொதுவாக, ஒரு மாட்டுக்கு ஒரு நாளுக்கு 40 முதல் 45 லிட்டர் தண்ணீர் தேவைப்படும். அடர்தீவனம் எடுத்துக் கொண்ட பிறகு குடிநீரைக் கொடுப்பது சிறந்த முறை. அதிக அளவு பசுந்தீவனம் எடுத்துக் கொள்ளும் மாடுகள் குறைந்தளவே தண்ணீர் அருந்தும். பாலின் அளவு கூடும்போது ஒரு லிட்டர் பாலுக்கு 4 லிட்டர் தண்ணீர் என்ற விகிதத்தில் தண்ணீரின் அளவை அதிகரித்துக் கொள்ள வேண்டும்.

அடர்தீவனம்

புரதச்சத்து, தாது உப்புகள், வைட்டமின்கள் ஆகியவை சரிவிகிதத்தில் கலந்திருக்கும் கலவைதான் அடர்தீவனம். கறவையில் உள்ள மாடுகள், கருவுற்ற மாடுகளுக்கு அடர்தீவனம் அவசியம். அடர்தீவனம் சாப்பிடும் மாடுகள் ஆரோக்கியமாக இருக்கும். கறவைத்திறனும் அதிகரிக்கும்.

100 கிலோ அடர்தீவனம் தயாரிக்கத் தேவையான பொருள்கள்

கடலைப்பிண்ணாக்கு    -    30 கிலோ
பருப்புக்குருணை    -    15 கிலோ
கோதுமைத்தவிடு    -    43 கிலோ
வெல்லப்பாகு    -    10 கிலோ
தாது உப்புக்கலவை    -    1.5 கிலோ
உப்பு    -    அரைக்கிலோ


இவற்றை ஒன்றாகக் கலந்து அரைத்து வைத்துக்கொள்ள வேண்டும். ஐந்து லிட்டர் பால் கறக்கும் மாட்டுக்குத் தினமும் 2 கிலோ அடர்தீவனம் போதுமானது. ஐந்து லிட்டருக்கு மேல் பாலின் அளவு கூடும்போது, ஒரு லிட்டர் பாலுக்கு அரைக்கிலோ அடர் தீவனம் என்ற விகிதத்தில் மாடுகளுக்குக் கொடுக்கும் அளவை அதிகரித்துக்கொள்ள வேண்டும். சினை மாடுகளுக்குத் தினமும் 3 கிலோ அடர் தீவனம் கொடுக்க வேண்டும்.