Published:Updated:

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!
பிரீமியம் ஸ்டோரி
30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

மகசூல்ஜி.பழனிச்சாமி, படங்கள்: ரமேஷ் கந்தசாமி

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

மகசூல்ஜி.பழனிச்சாமி, படங்கள்: ரமேஷ் கந்தசாமி

Published:Updated:
30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!
பிரீமியம் ஸ்டோரி
30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

விவசாயத்தில் தினமும் உத்தரவாதமான வருமானம் காய்கறிகள் மூலமாகவே கிடைத்து வருவதால், விவசாயிகள் பலரும் காய்கறிச் சாகுபடியில் ஆர்வம்காட்டி வருகிறார்கள். குறிப்பாக, பாகல், பீர்க்கன் போன்ற பந்தலில் காய்க்கும் காய்களுக்கு எப்போதுமே கட்டுபடியான விலை கிடைக்கிறது. இதனால், பெரும்பாலான விவசாயிகள் பந்தல் சாகுபடியில் ஈடுபட்டு வருகிறார்கள். அவர்களில் ஒருவர்தான், ஈரோடு மாவட்டம், அறச்சலூர் அடுத்துள்ள சுள்ளிமேடு கிராமத்தைச் சேர்ந்த பிரபுசங்கர். இவர் ‘கொட்டாரப் பந்தல்’ முறையில் பாகல், பீர்க்கன், புடலை போன்ற காய்கறிகளை இயற்கைமுறையில் சாகுபடி செய்து வருகிறார்.

ஒரு காலைப் பொழுதில் பிரபுசங்கரின் தோட்டத்துக்குச் சென்றோம். முக்கோண வடிவில் நீளமாக அமைக்கப்பட்டிருந்தது, கொட்டாரப் பந்தல். பந்தலில் படர்ந்திருந்த கொடிகளில் தோரணம்போலத் தொங்கிக் கொண்டிருந்தன, பீர்க்கன் காய்கள். நம் வருகையைத் தெரிந்துகொண்ட பிரபுசங்கர், மகிழ்ச்சியுடன் வரவேற்றுப் பேச ஆரம்பித்தார்...

“விவசாயமே வேண்டாம். அப்பா காலத்தோடு போகட்டும். டவுன் பக்கம் போயி பெட்டிக்கடை வெச்சுக்கூடப் பிழைச்சுக்கலாம்னு பரம்பரை விவசாயத்தை விட்டுட்டு ஓடிப்போனவன் நான். அப்போ விவசாயத்துல அந்தளவுக்குக் கஷ்டம். நல்ல விளைச்சல் கிடைச்சா விலை கிடைக்காது. விலை கிடைக்கிறப்போ தண்ணீர் இருக்காது. இதுக்கு இடையில உரம், பூச்சிக்கொல்லினு சாகுபடிச் செலவு வேற.

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

 கொட்டாரப் பந்தல்கள்...

பாதிநாள் கடன்லதான் வண்டி ஓடும். திடீர்னு ஒரு போகத்துல நல்ல விலை கிடைச்சு, கடன் அடைஞ்சுடும். அந்த நம்பிக்கையிலயே வாழ்றதுதான் பண்ணையக் காரன் பாடா இருந்துச்சு. அப்படிப்பட்ட பொழைப்பு வேண்டாம்னு தான் 12 ஏக்கர் நஞ்சை பூமியைக் கண்டுக்காம, ஈரோட்டுல லாரித்தொழில தொடங்கினேன். இப்போ 60 டேங்கர் லாரிகளைச் சொந்தமா வெச்சிருக்கேன். நல்லபடியா வருமானம் கிடைச்சும் திரும்ப நான் விவசாயத்துக்கு வந்ததுக்குக் காரணம், இயற்கை விவசாயத்து மேல ஏற்பட்ட ஈர்ப்புதான்” என்று சொன்ன பிரபுசங்கர் தொடர்ந்தார்...

“என்னோட கல்லூரி நண்பர்கள்ல ஒருத்தர் செந்தில்குமார். அவர், ஈரோடு மாவட்ட விவசாயிகளில் 400 பேரை இணைச்சு ‘உயிர் இயற்கை விவசாயிகள் அமைப்பு’னு நடத்திட்டிருக்கார். அந்த அமைப்பு மூலமா, இயற்கை விளைபொருள் விற்பனை அங்காடியையும் நடத்துறாங்க. இந்த அங்காடியில இடைத்தரகு இல்லாம நேரடி விற்பனை நடக்குது. அதில்லாம அப்பப்போ இயற்கை விவசாயம் சம்பந்தமான கூட்டங்களையும் நடத்துவாங்க. அப்படி நடந்த ஒரு கூட்டத்துக்கு நான் போயிருந்தேன். அங்கேதான் ரசாயன உரம், பூச்சிக்கொல்லிகளால வரக்கூடிய தீமைகளைப் பத்தித் தெரிஞ்சுகிட்டேன். அப்புறம்தான் நஞ்சில்லா உணவுமேல எனக்கு ஆர்வம் வந்தது. தொடர்ந்து ‘பசுமை விகடன்’ புத்தகத்தையும் படிக்க ஆரம்பிச்சேன். அடுத்தடுத்து நடந்த இயற்கை விவசாயக் கூட்டங்கள்லயும் நான் கலந்துக்க ஆரம்பிச்சேன். அதுல நிறைய விஷயத்தைத் தெரிஞ்சுகிட்டுப் பரம்பரைத் தொழிலான விவசாயத்தைத் திரும்பக் கையிலேடுத்தேன். தினமும் காலையில விளையாடப் போய்ட்டிருந்ததை நிறுத்திட்டுப் பண்ணைக்குப் போக ஆரம்பிச்சேன். அதுல எங்கப்பாவுக்குத் தான் ரொம்பச் சந்தோஷம்” என்று தான் விவசாயத்துக்கு வந்த கதை சொன்ன பிரபுசங்கர், தான் செயல்படுத்தி  வரும் விவசாயம் குறித்துச் சொன்னார்.

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

 பீர்க்கன் அறுவடையில் பிரபுசங்கர்...

“எங்க குடும்பத்துக்கு மொத்தம் 12 ஏக்கர் நிலம் இருக்கு. அதுல ஒரு ஏக்கர் நிலத்துல மட்டும் இயற்கை முறையில் காய்கறிச் சாகுபடி செய்யலாம்னு முடிவு செஞ்சேன். எந்தக் காயைச் சாகுபடி செய்யலாம்னு வந்த குழப்பத்தால, பழைய பசுமை விகடன் புத்தகங்களை எடுத்துப் படிக்க ஆரம்பிச்சேன். அதுல ஒரு புத்தகத்துல கொட்டாரப்பந்தல் முறை பத்தி எழுதியிருந்தாங்க. செலவு குறைவான அந்தமுறை எனக்குப் பிடிச்சிருந்தது.

உடனே, அதைதான் செய்யணும்னு முடிவு பண்ணி அதுக்கான வேலைகளை ஆரம்பிச்சிட்டேன். வரிசையா மொத்தம் ஆறு பந்தல் அமைச்சிருக்கேன். ஒரு பந்தலுக்கு 10 ஆயிரம் ரூபாய் செலவாச்சு. எல்லா பந்தல்லயும் ஒரே நேரத்தில் நடவு செய்யாம, வருஷம் முழுசும் காய் கிடைக்கிற மாதிரி, பீர்க்கன், பாகல், புடலை, பீன்ஸ்னு மாத்தி மாத்திச் சுழற்சிமுறையில சாகுபடி செய்றேன். இப்போதைக்கு இரண்டு பந்தல்கள்ல பீர்க்கன் காய்ப்புல இருக்கு. ரெண்டு பந்தல்கள்ல புடலை விதைச்சிருக்கேன். ஒரு பந்தல்ல பாகலும் ஒரு பந்தல்ல பீன்ஸும் விதைச்சிருக்கேன்” என்ற பிரபுசங்கர் நிறைவாக மகசூல் மற்றும் வருமானம் குறித்துச் சொன்னார்.

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

 இயற்கைப் பொறி

“ரெண்டு பந்தல்களும் சேந்து கிட்டத்தட்ட 30 சென்ட் பரப்புல இருக்கும். ரெண்டு பந்தல்கள்லயும் ஒருநாள் விட்டு ஒருநாள்னு காய் பறிச்சிட்டிருக்கேன். ஒரு பறிப்புக்கு 80 கிலோ அளவுக்குக் காய் கிடைக்குது. காய்களை உயிர் இயற்கை அங்காடிக்குதான் அனுப்புறேன். இதுவரை 700 கிலோ பறிச்சிருக்கேன். ஆரம்பத்துல அனுப்புன 400 கிலோ காய்க்கு கிலோ 50 ரூபாய்னு விலை கிடைச்சது. அடுத்து அனுப்புன 300 கிலோ காய்க்கு கிலோ 27 ரூபாய்னு விலை கிடைச்சது. அந்த வகையில இதுவரைக்கும் 28,100 ரூபாய் வருமானம் கிடைச்சிருக்கு.

ரெண்டு பந்தல்கள்லயும் சேர்த்து இன்னும் 1,500 கிலோ அளவுக்குக் காய் கிடைக்கும்னு எதிர்பார்க்கிறேன். அந்த வகையில கிலோ 30 ரூபாய்னு விற்பனையானா, 1,500 கிலோ காய்க்கு 45 ஆயிரம் ரூபாய் வருமானம் கிடைக்கும்னு எதிர்பார்க்கிறேன். மொத்தமாகப் பார்த்தா 30 சென்ட் நிலத்துல இருந்து 73,100 ரூபாய் கிடைக்கும்.

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

அதுல, பந்தல் செலவு உள்பட 30 ஆயிரம் ரூபாய் செலவைக் கழிச்சா 43,100 ரூபாய் லாபமா நிக்கும். மார்க்கெட்ல காய் விலை அதிகரிச்சா இன்னும் கூடுதல் லாபம் கிடைக்கும். இந்தப் பந்தல் அஞ்சு வருஷம் வரை தாங்கும்கிறதால அடுத்தடுத்த போகத்துல பந்தலுக்கான செலவு லாபக்கணக்குல சேர்ந்திடும். பீர்க்கன்ல பறிப்பு முடியுற சமயத்துல, புடலை பறிப்புக்கு வந்துடும்” என்று சொல்லி விடைகொடுத்தார், பிரபுசங்கர்.

தொடர்புக்கு,
பிரபுசங்கர்,
செல்போன்: 98428 31144

இப்படித்தான் சாகுபடி செய்யணும்

ஒரு ஏக்கர் நிலத்தில் கொட்டாரப் பந்தல் அமைத்து, பீர்க்கன் சாகுபடி செய்யும்முறை குறித்துப் பிரபுசங்கர் சொன்ன தகவல்கள் பாடமாக இங்கே...

தேர்வுசெய்த ஒரு ஏக்கர் நிலத்தை உழுது சமப்படுத்திப் பந்தல்கள் அமைத்து, சொட்டுநீர்ப்பாசன அமைப்புகளைப் பொருத்திக் கொள்ள வேண்டும். பந்தலின் இருபுறங்களிலும் முக்கால் அடி ஆழம், முக்கால் அடி பக்க அளவு இருப்பதுபோலச் சதுரவடிவக் குழிகளை, ஒன்றரை அடி இடைவெளியில் வரிசையாக எடுக்க வேண்டும். ஒவ்வொரு குழியிலும் ஒரு கிலோ அளவு ஊட்டமேற்றிய தொழுவுரத்தை இட வேண்டும்.

பிறகு ஒரு லிட்டர் தண்ணீரில் 30 மில்லி பஞ்சகவ்யாவைக் கலந்து, அதில் பீர்க்கன் விதைகளை மூழ்க வைத்து எடுத்து நிழலில் காய வைத்துக்கொள்ள வேண்டும். இப்படி விதை நேர்த்தி செய்யப்பட்ட விதைகளைக் குழிக்கு ஒன்றாக விதைத்து, மேல்மண்கொண்டு மூடி விட்டு, பாசனம் செய்ய வேண்டும். தொடர்ந்து மண்ணின் ஈரத்தன்மையைப் பொறுத்துப் பாசனம் செய்து வர வேண்டும்.

30 சென்ட்... 140 நாள்கள்... ரூ.73 ஆயிரம் வருமானம்! - பங்கமில்லாமல் வருமானம் கொடுக்கும் பந்தல் காய்கறி!

விதைத்த 9-ம் நாளுக்குமேல் முளைவிடத் தொடங்கும். 15-ம் நாளுக்குமேல் கொடிகள் படர ஆரம்பிக்கும். அந்தச் சமயத்தில் கொடிகளைப் பந்தல்மேல் எடுத்துவிட வேண்டும். விதைத்த 10, 25, 40 மற்றும் 55-ம் நாள்களில் ஒரு லிட்டர் தண்ணீருக்கு 30 மில்லி என்ற விகிதத்தில் பஞ்சகவ்யாவைக் கலந்து, அரை லிட்டர் அளவு கரைசலை ஒவ்வொரு செடியின் தூரிலும் ஊற்ற வேண்டும். விதைத்த 15, 30, 45, 60-ம் நாள்களில் பத்து லிட்டர் தண்ணீருக்கு 300 மில்லி பஞ்சகவ்யா என்ற விகிதத்தில் கலந்து செடிகள் நனையுமாறு தெளிக்க வேண்டும்.

25 மற்றும் 50-ம் நாள்களில் பத்து லிட்டர் தண்ணீருக்கு 300 மில்லி அரப்பு மோர்க்கரைசலைக் கலந்து, செடிகள் நனையுமாறு தெளிக்க வேண்டும். 40-ம் நாளுக்குமேல் பூவெடுத்து 60-ம் நாளுக்கு மேல் பிஞ்சுகள் உருவாக ஆரம்பிக்கும்.

பூ மற்றும் பிஞ்சுப்பருவத்தில் சாறு உறிஞ்சும் பூச்சிகளின் தாக்குதல் இருக்கும். அதனால் இப்பருவங்களில் இஞ்சி, பூண்டு, பச்சை மிளகாய் கரைசலை (சம அளவில் இஞ்சி, பூண்டு, பச்சை மிளகாய் ஆகியவற்றை எடுத்து, அரைத்து 10 லிட்டர் தண்ணீரில் கலந்த கரைசல்) பத்து லிட்டர் தண்ணீருக்கு 100 மில்லி என்ற விகிதத்தில் கலந்து தெளிக்க வேண்டும்.

10 கிலோ பருத்திப்பிண்ணாக்கு, 5 கிலோ கடலைப்பிண்ணாக்கு ஆகிய இரண்டையும் ஒரு பாத்திரத்தில் இட்டு, அவை மூழ்கும் அளவுக்குத் தண்ணீர் ஊற்றி மூன்று நாள்கள் ஊற வைத்துக் கஞ்சிபோலக் கரைத்துக்கொள்ள வேண்டும். இக்கரைசலுடன் 500 கிராம் அசோஸ்பைரில்லம், 500 கிராம் பாஸ்போ பாக்டீரியா ஆகிய உயிர் உரங்களைச் சேர்த்துக்கொள்ள வேண்டும்.

இக்கரைசலை 55, 70, 85, 100, 115 மற்றும் 130-ம் நாள்களில் ஒவ்வொரு செடியின் தூரிலும் சிறிதளவுவிட்டுப் பாசனம் செய்ய வேண்டும். இக்கரைசலைத் தொடர்ந்து கொடுத்துவந்தால் தொய்வில்லாமல் காய்கள் காய்த்துக் குலுங்கும். விதைத்த 65-ம் நாளுக்குமேல் காய்களைப் பறிக்கத் தொடங்கலாம். தொடர்ந்து ஒருநாள்விட்டு ஒரு நாள் காய் பறிக்கலாம். 140-ம் நாள் வரை காய்கள் கிடைக்கும்.

கொட்டாரப் பந்தல் அமைப்பது எப்படி?

16 அடி உயரம்கொண்ட இரண்டு மூங்கில்களை ‘V’ என்ற ஆங்கில எழுத்து, தலைகீழாக இருப்பதுபோல இணைத்து, மேற்புறம் ஆணி அடிக்க வேண்டும். கீழ்புறம் உள்ள இரண்டு முனைகளிலும் தாரில் நனைத்த கோணிச்சாக்கைச் சுற்றி (கறையான் அரிக்காமல் இருக்க) நிலத்தில் ஊன்ற வேண்டும். கீழ்புறம் இரு முனைகளுக்குமான இடைவெளி பத்தடி இருக்க வேண்டும்.

பிறகு, மூங்கில் கம்புகளைக் கயிறுகொண்டு வலைபோலப் பின்னி இணைத்துக் கட்ட வேண்டும். இதுபோல 20 ஜோடி மூங்கில்களைப் பத்தடி இடைவெளியில் வரிசையாக அமைக்க வேண்டும். அடுத்து ஏழு அடி இடைவெளியில், அடுத்த வரிசைப் பந்தலை அமைக்க வேண்டும்.