Published:Updated:

விளையும் விலையும்! - சந்தைக்கு வழிகாட்டும் தொடர் - 19

விளையும் விலையும்! - சந்தைக்கு வழிகாட்டும் தொடர் - 19
பிரீமியம் ஸ்டோரி
விளையும் விலையும்! - சந்தைக்கு வழிகாட்டும் தொடர் - 19

இயற்கைச் சந்தையைப் பரவலாக்குவோம்!சந்தைஅனந்து, தொகுப்பு: க.சரவணன்

விளையும் விலையும்! - சந்தைக்கு வழிகாட்டும் தொடர் - 19

இயற்கைச் சந்தையைப் பரவலாக்குவோம்!சந்தைஅனந்து, தொகுப்பு: க.சரவணன்

Published:Updated:
விளையும் விலையும்! - சந்தைக்கு வழிகாட்டும் தொடர் - 19
பிரீமியம் ஸ்டோரி
விளையும் விலையும்! - சந்தைக்கு வழிகாட்டும் தொடர் - 19

வெகுஜனச் சந்தைக்குப் பின்னால் இருக்கும் அரசியல், வெற்றிகரமான இயற்கை விவசாயச் சந்தைகள் மற்றும் மாற்றுச் சந்தைகளுக்கான வாய்ப்புகள் குறித்து அலசும் தொடர் இது...

இயற்கை விளைபொருள்களுக்கான சந்தையில்... அந்தப் பொருள்கள்மீது நுகர்வோருக்கு நம்பகத்தன்மையை உருவாக்குவது பெரும் சவாலான விஷயம். பெரும்பாலும், ‘அங்ககச் சான்றிதழ் இருந்தால்தான் அது இயற்கைப்பொருள்’ என்ற எண்ணம் மக்களிடம் உள்ளது. ஆனால், சான்றிதழ் பெறுவதற்கு விவசாயிகள் கணிசமான தொகையைச் செலவுசெய்ய வேண்டியிருக்கிறது. மேலும், சிக்கலான வழிமுறைகளையும் பின்பற்ற வேண்டியுள்ளது. ஆனால், நுகர்வோரிடையே விழிப்பு உணர்வு ஏற்படுத்துவதோடு, எந்த விவசாயியிடம் இருந்து விளைபொருள் தருவிக்கப்பட்டது என்பதை வெளிப்படையாக அறிவிப்பதன்மூலம் நம்பகத்தன்மையை ஏற்படுத்த முடியும். அதோடு, அனைவருக்கும் நன்மை பயக்கும் விதமாகவும் சந்தை அமைய வேண்டும். இப்படிப்பட்ட செயல்பாடுகளுடன் வெற்றிகரமாக இயங்கும் சில அமைப்புகள் பற்றி ஏற்கெனவே பார்த்திருக்கிறோம். அப்படிப்பட்ட அமைப்புகள் மற்றும் இயற்கை அங்காடிகளின் செயல்பாடுகளைத் தெரிந்துகொண்டு... நம்முடைய பகுதிக்கும் சூழலுக்கும் ஏற்ற வகையில் சில விஷயங்களை மாற்றிச் செயல்படத் துவங்கலாம். இயற்கைச் சந்தைகளை ஓர் இயக்கமாக மக்களிடம் கொண்டு செல்ல வேண்டியது அவசியம்.

விளையும் விலையும்! - சந்தைக்கு வழிகாட்டும் தொடர் - 19

அதேசமயம் நுகர்வோருக்கும் விழிப்பு உணர்வு அவசியம். ஏதாவது ஒரு விஷயத்தை வைத்துக் கொண்டு அது, இயற்கைப் பொருள்தான் என்று கண்மூடித்தனமாக நம்பிவிடக் கூடாது. ஆராய்ந்துதான் முடிவு செய்ய வேண்டும். சில இயற்கை அங்காடிகளில், ரசாயனங்களைக்கொண்டு பதப்படுத்தி,  பிளாஸ்டிக் பாட்டில்களில் அடைக்கப் பட்டுப் பழச்சாறுகளெல்லாம் விற்பனை செய்யப்படுகின்றன. மேலும், வெளிநாடுகளிலிருந்து இறக்குமதி செய்யப்பட்ட பழங்கள், எண்ணெய்... எனப் பல பொருள்கள் விற்பனை செய்யப்படுகின்றன. இவையெல்லாம், இயற்கைச் சந்தையின் அடிப்படை அம்சங்களையே கேள்விக்குள்ளாக்கும் செயல்பாடுகள். எனவே அங்ககச்சான்று, புகழ்பெற்ற பிராண்டு... போன்ற விஷயங்களை மட்டும் வைத்து இயற்கைப்பொருள் என நம்பிவிடக் கூடாது. வாங்கும் பொருளில், சேர்க்கப்பட்டுள்ள மூலப்பொருள்களின் பட்டியலையும் தெரிந்துகொள்ள வேண்டியது அவசியம். தேவைப்பட்டால் நுகர்வோர் குழுவாக இணைந்து, சந்தேகப்படும் பொருள்களை ஆய்வுக்கூடத்துக்கு அனுப்பிச் சோதனை செய்து பார்க்க வேண்டியதும் அவசியம். இப்படிப்பட்ட செயல்பாடுகள்மூலம் தவறுகளைக் கண்டுபிடித்துக் களையெடுக்க முடியும். முழுமையான இயற்கைப் பொருள்களை மட்டுமே சந்தையில் விற்பனைசெய்ய முடியும்.

விளையும் விலையும்! - சந்தைக்கு வழிகாட்டும் தொடர் - 19

இயற்கைச் சந்தைகளை ஊக்குவிப்பதன் மூலம்... ரசாயனக் கலப்பற்ற, நிறமூட்டிகளில்லாத, கலப்படமில்லாத பொருள்களின் விற்பனையை உறுதி செய்ய முடியும். விவசாயிகளிடமிருந்து நேரடியாகக் கொள்முதல் செய்யப்படுவதால், அவர்களுக்கு நியாயமான விலை கிடைப்பதையும் உறுதிசெய்ய முடியும்.

விளையும் விலையும்! - சந்தைக்கு வழிகாட்டும் தொடர் - 19

இவ்விதமான இயற்கைச் சந்தைகள் அமைக்கும்போது... சேமிப்புக் கிடங்குகள், உலர்த்தும் களம், கொள்முதல் நிலையங்கள், பொருளீட்டுக்கடன் போன்ற அரசு திட்டங்களையும் சரியாகப் பயன்படுத்திக் கொள்ள வேண்டியது அவசியம். இப்படிப்பட்ட இயற்கைச் சந்தைகள் அமைப்பதற்குக் கூட்டு முயற்சி, பொறுமை ஆகியவை அவசியம். இந்த விஷயங்களை மேற்கொள்வதற்கு ‘பசுமை விகடன்’ ஒரு மேடையாக இருந்து வருகிறது.

நான் வெளிநாட்டு வேலையை விட்டுட்டு இந்தியா வந்த பிறகு, நாடு முழுக்கச் சுற்றுப்பயணம் மேற்கொண்டு இயற்கை விவசாயிகள், இயற்கை விவசாயக் கூட்டமைப்புகளின் பிரதிநிதிகள் எனப் பலதரப்பினரைச் சந்தித்தேன். அப்போது தமிழகச் சுற்றுப்பயணத்தில், பல இயற்கை விவசாயிகளைச் சந்தித்தேன். அப்படிச் சந்தித்தவர்களிடம், இயற்கை விவசாயத்துக்கு மாறியதற்கான காரணம் குறித்துக் கேட்டபோது நம்மாழ்வார், பசுமை விகடன் போன்ற பதில்களே மாறி மாறி வந்தன.

பசுமை விகடன் ஒரு நிறுவன இயக்கம். நம்மாழ்வார் தனிநபர் இயக்கம். இயற்கை வேளாண்மையைத் தமிழகத்தின் கடைக்கோடி கிராமம் வரை கொண்டு சேர்த்ததில், இந்த இரு இயக்கங்களுக்கும் முக்கியப் பங்குண்டு. விழிப்பு உணர்வு ஏற்படுத்துதல், பயிற்சிகளை ஒருங்கிணைத்தல், வெற்றிகரமான இயற்கை விவசாயிகள், அமைப்புகளை அடையாளம் காட்டுதல் எனப் பசுமை விகடனின் பணி அளப்பறியது. பசுமை விகடன்தான் உழவர்களின் கண்ணியத்தை மீட்டெடுத்திருக்கிறது என்பதை, நான் இங்கு ஆழமாகப் பதிவு செய்ய விரும்புகிறேன். பசுமை விகடனில் எழுதப்பட்ட விவசாயிகளுக்கும் சந்தைகளுக்கும் வரவேற்புகள் அதிகமாகக் கிடைக்கின்றன. அதற்கு எங்களின் ரீஸ்டோர் அங்காடி சிறந்த உதாரணம்.

விளையும் விலையும்! - சந்தைக்கு வழிகாட்டும் தொடர் - 19

உலகளவில் பார்க்கும்போது, ‘மசானபு ஃபுகோகோ’ எழுதிய ‘ஒற்றை வைக்கோல் புரட்சி’ புத்தகத்தை வாசித்து இயற்கை விவசாயத்துக்குத் திரும்பியவர்கள்தான் அதிகம். அந்த எண்ணிக்கைக்கு இணையாகப் பசுமை விகடன் இதழை வாசித்து இயற்கை விவசாயத்துக்குத் திரும்பியவர்களின் எண்ணிக்கையும் இருக்கும் என்பது என் கருத்து. அந்த வகையில் விகடன் குழுமத்தின் தனித்துவம் வாய்ந்த முயற்சி ‘பசுமை விகடன்’. அதனால்தான், சமீபத்தில் நடந்த உலக இயற்கை மாநாட்டில், ஓ.எஃப்.ஏ.ஐ (OFAI) அமைப்பின் தலைவர் கிளாடு ஆல்வாரிஸ், பசுமை விகடனின் சிறப்புப் பங்களிப்பு பற்றிப் பாராட்டிப் பேசினார்.

இவ்வளவு பெருமைகளைக்கொண்ட பசுமைவிகடனில் ‘விளையும் விலையும்’ தொடரை எழுதச் சொல்லி, உரிய முக்கியத்துவம் கொடுத்து வெளியிட்ட விகடன் குழுமத்துக்கும், தொடரைச் செழுமைப்படுத்திய ஆசிரியர் குழுவுக்கும், வடிவமைப்புக் குழுவுக்கும், புகைப்படக்காரர்களுக்கும் என் நெஞ்சார்ந்த நன்றி. தொடரைத் தொகுத்து எழுதிய நண்பர் சரவணனுக்கும் என் நன்றி. தொடரை வாசித்து, என்னுடன் உரையாடி, இயற்கைச் சந்தைகளைப் பற்றிய புரிதலை உருவாக்குவதில், பரவலாக்குவதில் பங்கெடுத்திருக்கும் வாசகர்களுக்கும் நன்றி. பசுமை விகடனின் சமூக அக்கறைகொண்ட பணி தொடர வேண்டும்.

விளையும் விலையும்! - சந்தைக்கு வழிகாட்டும் தொடர் - 19

ஒரு தொடர் எழுதியவுடன் நானோ, பசுமை விகடனோ, இயற்கைச் சந்தைக்கான முயற்சிகளை முடித்துவிட்டதாக அர்த்தம் கிடையாது. அது ஒரு நீண்ட பயணம். அதில்  அனைவரின் பங்களிப்பும் இருக்க வேண்டும். தமிழகம் முழுக்க இயற்கை விவசாயிகள் சிதறிக் கிடப்பதால், அவர்களால் இணைய முடிவதில்லை. உற்பத்தியாளருக்கும் நுகர்வோருக்குமிடையில் பாலமாகச் செயல்படும் சில இயற்கை அங்காடிகளும் எண்ணிக்கையில் குறைவாகவே உள்ளன.

அதனால், தமிழகத்தின் மாநகரங்களிலும் சிறு நகரங்களிலும் இயற்கைச் சந்தைகளைக் கட்டமைத்து வழிநடத்தும் பொறுப்பை நாம் எடுக்க வேண்டும். இயற்கை உணவைத் தாண்டி, கைவினைப் பொருள்கள், உரைகள், விவாதங்கள், படத்திரையிடல் எனப் இயற்கைச் சந்தைகள் திருவிழாக்களைப்போலக் களைகட்ட வேண்டும். அந்தந்தப் பகுதிகளில் உள்ள இயற்கை விவசாயிகளையும் நுகர்வோரையும் இந்தப் இயற்கைச் சந்தைகள் இணைக்க வேண்டும். ஆர்வமும் அக்கறையும் உள்ள அனைவரும் ஒன்றிணைவோம்... இயற்கைச் சந்தையைப் பரவலாக்குவோம்!

இன்னொரு தருணத்தில் மீண்டும் சந்திப்போம்!

தொடர்புக்கு,

அனந்து, செல்போன்: 94441 66779

- நிறைவுற்றது