Published:Updated:

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!
பிரீமியம் ஸ்டோரி
News
மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

மகசூல்எம்.திலீபன்

நாகரிகம் என்ற பெயரில், மேலை நாட்டுப் பழக்கவழக்கத்தைப் பின்பற்றத் தொடங்கியதால், நம்

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

பாரம்பர்ய சிறுதானிய உணவுகள் ஒதுக்கப்பட்டுவிட்டன. இதனால், பட்டை தீட்டப்பட்ட அரிசி உணவுகள், பதப்படுத்தப்பட்ட உணவுகள், துரித உணவுகள் என்று மாறிவிட்டது நம் உணவு கலாசாரம். தேவையின் அடிப்படையில்தான் உற்பத்தி இருக்கும் என்பதால், விவசாயிகள் பலரும் பாரம்பர்யமாக மேற்கொண்டு வந்த சிறுதானியங்கள், நெல் ரகங்கள் போன்றவற்றைக் கைவிட்டு, வீரிய ரக நெல் வகைகள், பயிர்கள் எனச் சாகுபடி செய்ய ஆரம்பித்துவிட்டனர். ஆனாலும் பல இயற்கை விவசாயிகள் இன்னமும் சிறுதானியங்கள், பாரம்பர்ய நெல் வகைகள் எனச் சாகுபடி செய்து கொண்டுதான் இருக்கிறார்கள். அவர்களில் ஒருவர்தான் அரியலூர் மாவட்டத்தைச் சேர்ந்த ரவிச்சந்திரன்.

அரியலூரில் வசித்துவரும் ரவிச்சந்திரன், கடு.பொய்யூர் கிராமத்தில் உள்ள அரசு ஆரம்பப் பள்ளியின் தலைமை ஆசிரியராகப் பணி புரிந்துகொண்டே விவசாயமும் செய்து வருகிறார். அரியலூர்- கள்ளக்குறிச்சி சாலையில் எட்டாவது கிலோமீட்டர் தூரத்தில் உள்ள ஆனந்தவாடி பஞ்சாயத்தில்தான் ரவிச்சந்திரனுக்குச் சொந்தமான நிலம் உள்ளது.

ஒரு விடுமுறை நாளில் தோட்டத்தில் வேலை செய்து கொண்டிருந்த ரவிச்சந்திரனைச் சந்தித்தோம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

“எங்க மாவட்டமே வறட்சியானதுதான். மழையை நம்பி செய்ற மானாவாரி விவசாயம் இங்கு அதிகம். பெரும்பாலும், சிறுதானியங்கள்தான் சாகுபடி செய்வோம். குறிப்பா எங்க பகுதியில வரகை அதிகமா சாகுபடி செய்வாங்க. அதனாலதான், ஒரு கிராமத்துக்கே ‘வரகூர்’னு பேர் வெச்சுருக்காங்க. அந்தளவுக்கு இங்க வரகு சாகுபடி அதிகம். நாங்கள்லாம், சின்ன வயசுல வரகரிசிச் சாப்பாடுதான் அதிகம் சாப்பிடுவோம்.

பக்கத்துல இருக்குற சோழன்குறிச்சி கிராமம்தான் எனக்குச் சொந்த ஊர். பரம்பரை விவசாயக் குடும்பம் எங்களோடது. அம்மா, அப்பா ரெண்டு பேருமே சேர்ந்து உளுந்து, கம்பு, சோளம், பாசி, வரகு, தினைனு மானாவாரியா சாகுபடி செய்வாங்க. நானும் பள்ளிக்கூடத்துல படிக்கிற காலத்துலேயே விவசாய வேலைகளைச் செய்ய ஆரம்பிச்சுட்டேன். பத்தாவது படிக்கிறப்போ, பொதுத்தேர்வு சமயத்துலகூட, விடிய விடிய வரகுல கதிர் அடிச்சுட்டு காலையில பரீட்சை எழுதப்போயிருக்கேன். அந்தளவுக்கு நாங்க விவசாய வேலைகளுக்கு முக்கியத்துவம் கொடுப்போம். வேலைக்குப் போனாலும் இப்போ வரைக்கும் விவசாயத்தை விடாம செஞ்சுட்டு இருக்கேன்.

ஆரம்பத்துல கிடை அடைச்சு, எரு போட்டுதான் விவசாயம் செஞ்சேன். ‘என்னதான் தொழு உரம் போட்டாலும், ரசாயன உரம்தான் பயிருக்குத் தேவையான சத்துகளைக் கொடுக்கும்’னு வேளாண்மைத்துறை அதிகாரிகள் சொன்னதை வெச்சு, ரசாயன விவசாயத்துக்கு மாறினேன். ஆரம்பத்துல நல்ல மகசூல் கிடைச்சது. அதுக்கப்புறம் மகசூல் குறைய ஆரம்பிச்சது. அதுக்கேத்த மாதிரி உரத்தோட அளவைக் கூட்ட வேண்டியிருந்தது. ரசாயனத்தை அதிகம் கொட்டக்கொட்ட மண் இறுக ஆரம்பிச்சது. இருந்தாலும் விவசாயம் பார்க்கணுமேங்கிறதுக்காக உரத்தைக் கொட்டிதான், பாசி, சோளம், உளுந்து, முந்திரினு சாகுபடி செஞ்சிட்டுருந்தேன்.

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

நான் ரொம்ப வருஷமா ஜூனியர் விகடன் வாசகன். அதே மாதிரி சுட்டி விகடனையும் தொடர்ந்து வாசிப்பேன். போன 2009-ம் வருஷம்னு நினைக்கிறேன். சுட்டி விகடன் வாங்குறதுக்காகக் கடைக்குப் போனப்போ எதேச்சையா ‘பசுமை விகடன்’ புத்தகத்தைப் பார்த்து வாங்கினேன். இயற்கை விவசாயம் சம்பந்தமா நிறைய விஷயம் இருக்கவும், தொடர்ந்து படிக்க ஆரம்பிச்சேன். அதுக்கப்புறம் ரசாயன உரம், பூச்சிக்கொல்லிகளைத் தவிர்த்துட்டு இயற்கை விவசாயம் செய்ய ஆரம்பிச்சேன். 10-ம் தேதியும், 25-ம் தேதியும் எப்போது வரும்னு காத்திருந்து பசுமை விகடனை வாங்கிப் படிச்சிட்டுருக்கேன். அதுல வர்ற தகவல்களை வெச்சுதான் விவசாயம் செஞ்சிட்டுருக்கேன்” என்று, தான் இயற்கை விவசாயத்துக்கு வந்த கதையைச் சொன்ன ரவிச்சந்திரன் தொடர்ந்தார்...

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

“மொத்தம் 10 ஏக்கர் நிலம் இருக்கு. அதுல 4 ஏக்கர் நிலத்துல முந்திரியும், 1 ஏக்கர் நிலத்துல தேக்கு மரமும் இருக்கு. ஒரு ஏக்கர் நிலத்துல வரகையும் ஒரு ஏக்கர் நிலத்துல மாட்டுத்தீவனத்துக்கான சோளத்தையும்

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

போட்டிருந்தேன். ரெண்டையும் இப்போதான் அறுவடை செஞ்சிருக்கேன். வரகுல 512 கிலோ மகசூலாகக் கிடைச்சுருக்கு. போன முறை வரகு போட்டப்போ சரியா மழை கிடைக்கலை. அதனால, ஒரு ஏக்கர் நிலத்துல 287 கிலோ வரகுதான் கிடைச்சது. மானாவாரி விவசாயத்துல எதிர்பார்த்த மாதிரி மழை கிடைச்சாதான் உண்டு. இல்லேன்னா மகசூல் குறைஞ்சு போயிடும்” என்ற ரவிச்சந்திரன், விற்பனை மற்றும் வருமானம் குறித்துச் சொன்னார்.

“நான் விளைவிக்கிற தானியங்கள் எல்லாத்தையும் உள்ளூர்ல இருக்குற வியாபாரிகிட்டதான் கொடுக்கிறேன். அவர் எனக்குச் சொந்தக்காரரும் கூட. ஒரு கிலோ வரகு 40 ரூபாய்னு விலை பேசியிருக்கேன். வரகு வைக்கோலை மொத்தமா 5,000 ரூபாய்னு விலை பேசியிருக்கேன். மொத்தம் 512 கிலோ வரகை விற்பனை செஞ்சா 20,480 ரூபாய் வருமானம் கிடைக்கும். வைக்கோல் மூலமா கிடைக்கிற வருமானத்தையும் சேர்த்தா 25,480 ரூபாய் மொத்த வருமானம். அதுல மொத்தமாச் செலவு செஞ்ச 7,900 ரூபாய் போக 17,580 ரூபாய் லாபமாக் கிடைச்சுடும்” என்ற ரவிச்சந்திரன் நிறைவாக,

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

“ஒரு கிலோ 40 ரூபாய்ங்கிறது குறைவான விலைதான். இன்னும் கொஞ்சம் மெனக்கெட்டா, கிலோ 50 ரூபாய் வரை விற்பனை செய்ய முடியும். ஆனா, பள்ளி வேலையையும் பார்த்துக்கிட்டு, என்னால விற்பனைக்கு அலைய முடியலை. அதில்லாம இப்போ தோட்டத்துக்கே வந்து எடைபோட்டு எடுத்துக்குறதால போக்குவரத்துச் செலவும் மிச்சம். அடுத்து வரகை மதிப்புக்கூட்டி வரகரிசி, சேவு, குக்கீஸ்னு தயார் செஞ்சு விற்பனை செய்ற யோசனையும் இருக்கு. இந்த மதிப்புக்கூட்டுற யோசனையும் பசுமை விகடன் மூலமாகத் தெரிஞ்சுக்கிட்டதுதான்” என்று சொல்லியபடி அறுவடை செய்த வரகைக் கைகளில் அள்ளிக்காட்டினார் ரவிச்சந்திரன்.

தொடர்புக்கு,
ரவிச்சந்திரன்,
செல்போன்: 99439 04121

இப்படித்தான் சாகுபடி செய்யணும்!

ஒரு ஏக்கர் நிலத்தில் மானாவாரியாக வரகுச் சாகுபடி செய்யும் விதம் குறித்து ரவிச்சந்திரன் சொன்ன விஷயங்கள் பாடமாக இங்கே...

மானாவாரியில் விளைந்த வரகு! - பள்ளி ஆசிரியரின் இயற்கைச் சாகுபடி!

வரகு அனைத்து வகை மண்ணிலும் விளையும். வரகுக்கு ஆடிப்பட்டம் ஏற்றது. தேர்வு செய்த ஒரு ஏக்கர் நிலத்தில் சித்திரை மாதம் கோடை உழவு செய்து காய விட வேண்டும். அடுத்த மழை கிடைத்தவுடன், 8 டன் தொழுவுரத்தைக் கொட்டிப் பரப்பி, ஓர் உழவு செய்ய வேண்டும். ஆடி மாதம் மழை கிடைத்தவுடன் களைகள், புற்கள் ஆகியவற்றை அகற்றும் வகையில் நன்கு உழவு செய்ய வேண்டும். பிறகு உழுதுகொண்டே 20 கிலோ வரகு விதையைத் தூவி விதைக்க வேண்டும். விதைத்த 7-ம் நாளுக்குப் பிறகு விதைகள் முளைத்துவரும். விதைத்த பிறகு கிடைக்கும் மழையைப் பொறுத்துப் பயிரின் வளர்ச்சி இருக்கும். 30-ம் நாளில் களை எடுக்க வேண்டும். 65-ம் நாளில் தூர்கள் வெடித்துக் கிளைகள் படரும். அந்தச் சமயத்தில் களைகளை அகற்றி வரகுச் செடிகளைச் சுற்றி மண் அணைத்து விட வேண்டும்.

விதைத்த 140-ம் நாளுக்கு மேல் கதிர்கள் உருவாகி, 160-ம் நாளுக்கு மேல் பால் பிடிக்கும். 170-ம் நாளுக்குமேல் கதிர்களின் பச்சை வண்ணம் மாறி முற்றத் தொடங்கும். கதிர்கள் அனைத்தும் முற்றியவுடன் அறுவடை செய்து, கதிர்களை ஆங்காங்கு நிலத்தில் போட்டு 2 நாள்கள் காய விட வேண்டும். அதன் பிறகு கதிர்களைக் களத்தில் கொட்டி, டிராக்டரைச் சுற்றவிட்டு வரகைப் பிரித்தெடுத்து சேமித்து வைக்கலாம்.