Published:Updated:

கலப்பைக் கல்யாணம்!

கலப்பைக் கல்யாணம்!
பிரீமியம் ஸ்டோரி
கலப்பைக் கல்யாணம்!

நிகழ்ச்சிஎம்.திலீபன்

கலப்பைக் கல்யாணம்!

நிகழ்ச்சிஎம்.திலீபன்

Published:Updated:
கலப்பைக் கல்யாணம்!
பிரீமியம் ஸ்டோரி
கலப்பைக் கல்யாணம்!

க்னி குண்டம், யாகம் என எதுவுமில்லாமல், ஏர்க் கலப்பையைச் சாட்சியாக வைத்துத் தன் மகனுக்குத் திருமணம் நடத்தி அசத்தியிருக்கிறார் அரியலூர் மாவட்டத்தைச் சேர்ந்த விவசாயி அன்பழகன். இத்திருமணத்தில் ஏர்க் கலப்பையைச் சுற்றி வந்த மணமக்கள், தங்களின் சந்ததியினருக்கும் இதே முறையில் திருமணத்தை நடத்துவோம் என்று உறுதிமொழி எடுத்துள்ளனர்.

இந்தத் திருமணம் நடந்தேறியது, ஜெயங்கொண்டம் அருகில் உள்ள குவாகம் எனும் கிராமத்தில். இக்கிராமத்தைச் சேர்ந்த விவசாயி அன்பழகனின் மகன் அன்பரசன். இவருக்கும் கீழமாளிகை கிராமத்தைச் சேர்ந்த துர்காதேவி என்பவருக்கும்தான், தமிழக ஏரி மற்றும் ஆற்றுப்பாசன விவசாயிகள் சங்க மாநிலத்தலைவர் விஸ்வநாதன் தலைமையில் கலப்பைச் சாட்சித் திருமணம் நடை பெற்றுள்ளது.

கலப்பைக் கல்யாணம்!

இத்திருமணம் குறித்து நம்மிடம் பேசிய அன்பழகன், “மிருகங்களைப்போலத் திரிந்த மனிதனின் நாகரிக வளர்ச்சியில் முக்கியமான கருவி ஏர் கலப்பை. கலப்பை என்பது விவசாயிகளுக்குக் கடவுள்போல. நான் இப்போது வரை மரக்கலப்பையை மட்டும்தான் உழவுக்குப் பயன்படுத்தி வருகிறேன். எல்லோரும் தெய்வத்தைச் சாட்சியாக வைத்துத் திருமணம் செய்வார்கள். எனக்குக் கலப்பைதான் தெய்வம். அதனால், கலப்பையைச் சாட்சியாக வைத்து என் மகனுக்குத் திருமணம் செய்திருக்கிறேன்” என்றார் முகம் மலர.

தொடர்ந்து பேசிய மணமகன் அன்பரசன், “விவசாயம் செஞ்சுதான் என்னைப் படிக்க வெச்சு வெளிநாட்டு வேலைக்கு அனுப்பினார் அப்பா. அதனாலதான் விவசாயத்தை மறந்துடக் கூடாதுங்கிறதுக்காக விவசாயிகள் முன்னிலையில், கலப்பையைச் சாட்சியா வெச்சுத் திருமணம் செஞ்சுருக்கேன். எனக்குப் பிறக்கப் போகும் பிள்ளைகளுக்கும் சின்ன வயசுல இருந்தே கண்டிப்பா விவசாயத்தைக் கத்துக் கொடுப்பேன்” என்றார் உறுதியான குரலில்.

திருமணத்தை நடத்திவைத்த தமிழக ஏரி மற்றும் ஆற்றுப்பாசன விவசாயிகள் சங்க மாநிலத்தலைவர் விஸ்வநாதன், “தமிழர்களின் மரபுப்படி விவசாயத்தை அடையாளம் காட்டவும், விவசாயிகளைப் பெருமைப் படுத்தும் விதமாகவும் நடந்த இத்திருமணத்தை முன்னின்று நடத்தியதைப் பெருமையாக நினைக்கிறேன். திருமணத்துக்கு வந்திருந்த ஒருவர், ஆட்டுக்குட்டியையும் மரக் கன்றுகளையும் அன்பளிப்பாக வழங்கியதோடு, ‘பட்டியில் ஆடுகள் பெருகுவதுபோல, மணமக்களின் வாழ்வும் வளமும் பெருக வேண்டும்’ என வாழ்த்திச் சென்றார். திருமணத்துக்கு வந்திருந்த பலர், அவர்கள் வீட்டுத் திருமணங்களையும் இதேபோல நடத்தித் தர வேண்டும் எனக் கேட்டுள்ளனர்” என்றார்.

விவசாயத்தின் சிறப்பைப் பறைசாற்றும் விதமாகத் திருமணம் நடத்திய மண வீட்டாருக்குப் ‘பசுமை விகடன்’ சார்பாக வாழ்த்துகளைச் சொல்லி விடைபெற்றோம்.