Published:Updated:

நீங்கள் கேட்டவை: குறைந்த விலையில் மரக்கன்றுகள் எங்கு கிடைக்கும்?

நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?
பிரீமியம் ஸ்டோரி
நீங்கள் கேட்டவை: குறைந்த விலையில் மரக்கன்றுகள் எங்கு கிடைக்கும்?

புறாபாண்டிஓவியம்: ஹரன்

நீங்கள் கேட்டவை: குறைந்த விலையில் மரக்கன்றுகள் எங்கு கிடைக்கும்?

புறாபாண்டிஓவியம்: ஹரன்

Published:Updated:
நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?
பிரீமியம் ஸ்டோரி
நீங்கள் கேட்டவை: குறைந்த விலையில் மரக்கன்றுகள் எங்கு கிடைக்கும்?
நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?

‘‘எங்கள் நண்பருக்குத் திருமணம் நடைபெற உள்ளது. திருமணத்துக்கு வருபவர்களுக்கு மரக்கன்றுகளை அன்பளிப்பாக வழங்கவுள்ளோம். புதுக்கோட்டையில் குறைந்த விலையில் மரக்கன்றுகள் கிடைப்பதாகக் கேள்விப்பட்டோம். அதைப் பற்றிய விவரம் சொல்லவும்?’’

ஆர்.கருப்பையா, சிவகங்கை.

நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?


புதுக்கோட்டை மாவட்டம், கல்லக்குடி இருப்பு நர்சரி சங்கத்தைச் சேர்ந்த செல்லையா பதில் சொல்கிறார்.

‘‘எங்கள் ஊர் திருச்சி, தஞ்சாவூர், புதுக்கோட்டை மாவட்டங்களில் உள்ள பெரும்பாலான விவசாயிகளுக்குப் பரிச்சயமானது. இருபது ஆண்டுகளுக்கு முன்பு வரை இயற்கையால் வஞ்சிக்கப்பட்டு வறுமை தாண்டவமாடிய கிராமம் இது. தண்ணீர்ப் பற்றாக்குறையால், ஊர் முழுக்கவே காட்டுக்கருவை மரங்கள்தான் மண்டிக்கிடந்தன. இன்றோ, நாற்றுப் பண்ணைகளாக மலர்ந்திருக்கின்றன. தனிநபர்கள் மட்டுமல்லாது, சுயஉதவிக் குழுவினரும் இக்கிராமத்தில் நாற்று உற்பத்தியில் ஈடுபட்டிருக்கின்றனர்.

அரை ஏக்கர் பரப்பு முதல் ஒரு ஏக்கர் பரப்பு வரையில் சிறியதும் பெரியதுமான நாற்றுப் பண்ணைகள், சுமார் எழுபது வகையான மலர் நாற்றுகள், 65 வகையான மரக்கன்றுகள் என்று இங்கு உற்பத்தி செய்யப்படுகின்றன. தினந்தோறும் ஆயிரக்கணக்கான நாற்றுகள் விற்பனையாகின்றன. சுற்றுவட்டாரக் கிராமங்களில் சுமார் 200 நர்சரிகள் உள்ளன. மா, கொய்யா, மாதுளை, பலா, சப்போட்டா... என்று சகலவிதமான மரக்கன்றுகளையும் உற்பத்திசெய்து வருகிறோம். மரக்கன்றுகள் உற்பத்திசெய்ய ஆகிற செலவை மட்டும்தான் விலையாக வைத்துள்ளோம். இந்தப் பகுதிகளில், ஆச்சரியப்படும் வகையில் குறைந்த விலையில் கன்றுகள் கிடைக்கும். இரண்டு ரூபாய் முதல் 5 ரூபாய் வரைதான் கன்றுகள் விற்பனை செய்யப்படுகின்றன.

குறைந்த விலையில் கிடைப்பதால், தரம் இருக்காது என்று நினைக்க வேண்டாம். வனத்துறை, தோட்டக்கலைத்துறை போன்ற துறைகள், இந்தப் பகுதிகளில்தான் கன்றுகளை வாங்குகின்றன. தனியார் நர்சரி உரிமையாளர்கள் எங்களிடமிருந்து மொத்தமாகக் கன்றுகளை வாங்கிச்சென்று, வெளியில் அதிக விலைக்கு விற்பனை செய்தும் வருகிறார்கள். தமிழ்நாடு மட்டுமல்லாமல் வெளிமாநிலத்தினரும் கன்றுகளை வாங்கிச் செல்கிறார்கள். தமிழ்நாட்டில் திருமண வீடுகளில் மரக்கன்றுகளைப் பரிசாகக் கொடுக்கும் நல்ல பழக்கம் பரவி வருகிறது. எந்தப் பகுதியில் திருமணம் நடக்கிறது என்பதை அறிந்து, அதற்குத் தகுந்தபடி கன்றுகளை நாங்கள் கொடுத்து வருகிறோம். கிராமப் பகுதியாக இருந்தால் பழமரக்கன்றுகளையும், நகர்ப்புறம் சார்ந்த பகுதியாக இருந்தால் மலர்ச் செடிகளையும்,  தூசு, தும்புகளை இழுக்கும் பலா கன்றுகளையும் வழங்கலாம்.’’

தொடர்புக்கு, செல்போன்: 99428 18629.

நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?

‘‘கொய்யா சாகுபடி செய்துள்ளோம். இதில் கடைப்பிடிக்க வேண்டிய நுட்பங்களைச் சொல்லுங்கள்?’’

எம்.லலிதா, செஞ்சி.

விழுப்புரம் மாவட்டத்தைச் சேர்ந்த முன்னோடி கொய்யா விவசாயி, சுந்தரம் பதில் சொல்கிறார்.

‘‘ஆப்பிள் பழத்தைவிட, கொய்யாவில் நிறைய சத்துகள் உள்ளன என மருத்துவ நிபுணர்கள் சொல்கிறார்கள். அருகில் விளைவதாலும் விலை குறைவாகக் கிடைப்பதாலும் கொய்யாப் பழத்தின் மகிமையை நம் மக்கள் உணராமல் இருந்தனர். இப்போது உணவு சம்பந்தமாக விழிப்பு உணர்வு ஏற்பட்டுள்ளது. அதனால், கொய்யாப் பழத்தைச் சாப்பிடுபவர்களின் எண்ணிக்கையும் கூடி வருகிறது. கொய்யாச் சாகுபடியைப் பொறுத்தவரை வைகாசி மாதம் முதல் ஆவணி மாதம் வரை ஓர் அறுவடை; ஐப்பசி மாதம் முதல் தை மாதம் வரை ஓர் அறுவடை என ஆண்டுக்கு இரண்டு முறை மகசூல் எடுக்கலாம். அதன்படி ஒரு மரத்திலிருந்து சராசரியாக ஆண்டுக்கு 120 கிலோ பழங்கள் கிடைக்கும். இந்த அளவு மகசூல் கிடைத்தால்தான் மரம் ஆரோக்கியமாக உள்ளது என்று அர்த்தம்.

நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?


கொய்யா மரங்களுக்கு அறுவடை முடிந்தவுடன் உரமிட வேண்டும். இப்படிச் செய்தால், மரத்தில் புதிய துளிர்கள், உருவாகி, அடுத்த பருவத்தில் நல்ல மகசூல் கிடைக்கும். இயற்கை உரங்களை இடும்போது மகசூல் கூடுவதோடு, பழங்களின் சுவையும் அதிகரிக்கும்.

ஒவ்வொரு முறை உரமிடும் போதும், ஒரு மரத்துக்கு மூன்று கிலோ தொழுவுரம், ஒரு கிலோ வேப்பம் பிண்ணாக்கு என்ற கணக்கில் இட வேண்டும். பிண்ணாக்கு இடுவதால், மரத்தை நோய்கள் தாக்காது. மரத்தின் தூரிலிருந்து ஒரு மீட்டர் தள்ளி மரத்தைச் சுற்றி மண்வெட்டி மூலம் சிறு பள்ளம் பறித்து, அதனுள் உரத்தைப் பரவலாக இட்டு மூடிவிட வேண்டும்.

வாரம் ஒருமுறை பாசனம் செய்வது நல்லது. நல்லமுறையில் செழிம்பாகப் பாசனம் செய்ய முடியாதென்றால், கொய்யாச் சாகுபடியில் ஈடுபடக் கூடாது. ஒவ்வொரு முறையும் அறுவடை முடிந்த பிறகு, 20 நாள்கள் பாசனத்தை நிறுத்த வேண்டும். அந்தச் சமயத்தில் இலைகள் கொட்டுவதால், செடி ஓய்வு எடுத்துக்கொண்டு, தன்னுடைய சக்தியை அதிகரித்துக்கொள்ளும்.

மரம் அதிகமாகப் படராமல், குடை போன்ற வடிவத்தில் இருப்பதுபோல, மூன்று ஆண்டுகளுக்கு ஒருமுறை கவாத்துச் செய்ய வேண்டும். கிளைகளில் கற்களைக் கட்டித் தொங்கவிட்டு வளைத்தும்விடலாம். அப்போதுதான் சூரிய ஒளி நன்கு கிடைக்கும். அதேபோல, அறுவடையின்போது, காய்ந்த குச்சிகள் மற்றும் மலட்டுக் கிளைகளையும் அகற்றிவிட வேண்டும். ஒல்லியாகவும் நீளமாகவும் வளர்ந்த கிளைகளின் நுனிகளைக் கிள்ளிவிட வேண்டும். இதனால், கிளையில் துளிர்கள் தோன்றிக் காய் பிடிக்கும். இயற்கை விவசாயமுறையில் விளைந்த கொய்யாவின் சுவையே தனிதான். ஒருமுறை அதைச் சுவைத்தவர்கள் மீண்டும் மீண்டும் வாங்கிச் சாப்பிட விரும்புவார்கள். கொய்யாவில் பெரிய அளவுக்குப் பூச்சி, நோய்கள் ஏற்படாது. அப்படி வந்தாலும், அதைப் பூச்சிவிரட்டி, வேப்பெண்ணெய்க் கரைசலைத் தெளித்துக் கட்டுப்படுத்தலாம்.’’

நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?

‘‘இளநீர்க் குடுவையில் செடிகள் வளர்க்கலாம், என்ற தகவல் வாட்ஸ் அப்பில் பரவி வருகிறது. இது உண்மையா?’’

ஜி.பி.சாமி, உடுமலைப்பேட்டை.


இந்த நுட்பத்தைப் பிரபலப்படுத்தி வரும் திருவாரூரைச் சேர்ந்த மரம் வளர்ப்பு ஆர்வலர் கலைமணி பதில் சொல்கிறார்.

‘‘அண்மையில் இளநீர் கடையைக் கடந்து போகும்போது, இளநீர் குடித்துவிட்டு, தூர எறிந்த குடுவைகள் கண்ணில்பட்டன. அப்போது பிளாஸ்டிக் பையில் செடிகளை வளர்ப்பதற்குப் பதிலாக, இளநீர்க் குடுவையில் வளர்க்கலாமே என்ற எண்ணம் உருவானது. உடனே செயல்படுத்திப் பார்க்கத் தொடங்கினேன். அந்தத் தகவலை வாட்ஸ் அப் மூலம் பகிர்ந்திருந்தேன். அதைப்படித்த பலரும், இந்த நுட்பம் பற்றிக் கேட்டு வருகின்றனர். இளநீர்க் குடுவையில் தண்ணீர் வடியும்படியாக இரண்டு, மூன்று ஓட்டைகள் போட்டு, மண், மணல், இயற்கை உரம் ஆகியவற்றைச் சம அளவில் கலந்து, குடுவையில் நிரப்பிச் செடிகளை வளர்த்து வருகிறேன்.

ஏற்கெனவே, நாற்று விடப்பட்ட கன்றுகளை, இந்த இளநீர் குடுவையில் மாற்றி நடவு செய்து, செடி வேர் பிடித்துக்கொண்டதும், இளநீர்க் குடுவையுடன் நிலத்தில் செடியை நடவு செய்யலாம். இதன்மூலம், பிளாஸ்டிக் பையில் நாற்று வளர்க்கும் செலவும் மிச்சமாகும், சுற்றுச்சூழலும் கெடாது. இந்த நுட்பத்தின் மூலம் பலவிதமாகச் செடிகளை வளர்த்துப் பார்த்துப் பரிசோதனை செய்து வருகிறேன். இந்தமுறை முழுமையாக வெற்றி பெற்றதால், எல்லோரிடமும் பகிர்ந்துகொள்கிறேன்.’’

தொடர்புக்கு, செல்போன்: 97865 92738,

விவசாயம், கால்நடை, மீன்வளம் மற்றும் சுற்றுச்சூழல் என்று பல துறைகள் பற்றி வாசகர்களின் சந்தேகங்களுக்கான பதில்களை உரிய நிபுணர்களிடம் பெற்றுத் தருவதற்காகவே ‘புறா பாண்டி’ சும்மா ‘பரபர’த்துக் கொண்டிருக்கிறார்.

நீங்கள் கேட்டவை: குறைந்த விலையில்  மரக்கன்றுகள் எங்கு கிடைக்கும்?

உங்கள் கேள்விகளை ‘நீங்கள் கேட்டவை’,  பசுமை விகடன், 757, அண்ணா சாலை, சென்னை-2 என்ற முகவரிக்குத் தபால் மூலமும், pasumai@vikatan.com என்ற முகவரிக்கு இ-மெயில் மூலமும், 99400 22128 என்ற எண்ணுக்கு வாட்ஸ்அப் மூலமும், facebook.com/PasumaiVikatan என்ற முகவரிக்கும், twitter.com/PasumaiVikatan என்ற முகவரிக்கும்  அனுப்பலாம்.