Published:Updated:

கூட்டுறவு வங்கியில் ஊழல்... - அதிர்ச்சியில் விவசாயிகள்!

ஒட்டுமொத்த விகடனுக்கும் ஒரே ஷார்ட்கட்

Use App
கூட்டுறவு வங்கியில் ஊழல்... - அதிர்ச்சியில் விவசாயிகள்!
கூட்டுறவு வங்கியில் ஊழல்... - அதிர்ச்சியில் விவசாயிகள்!

பிரச்னைகு.ராமகிருஷ்ணன் - படங்கள்: ம.அரவிந்த்

பிரீமியம் ஸ்டோரி
கூட்டுறவு வங்கியில் ஊழல்... - அதிர்ச்சியில் விவசாயிகள்!

கிராமப் பொருளாதாரத்தை உயர்த்துவதற்காகவே தொடக்க வேளாண் கூட்டுறவு வங்கிகள் உருவாக்கப்பட்டன. பயிர்க்கடன், நகைக்கடன், உர விற்பனை... எனப் பல சேவைகளைச் செய்துவருகின்றன. ஆனால், சமீப காலமாகக் கூட்டுறவு வங்கிகள்மீது பல மோசடிக் குற்றச்சாட்டுகள் எழுந்து வருகின்றன. இதுபோன்றதொரு ஊழல் குற்றச்சாட்டில் சிக்கியிருக்கிறது தஞ்சாவூர் மாவட்டம், பாபநாசம் அருகே உள்ள தேவராயன்பேட்டை தொடக்க வேளாண் கூட்டுறவு வங்கி.

இவ்வங்கியில் சுமார் ஒரு கோடி ரூபாய் அளவுக்கு ஊழல் நடைபெற்றுள்ளதாகக் குற்றம்சாட்டுகிறார்கள் விவசாயிகள். இதுகுறித்து நம்மிடம் பேசிய ‘தஞ்சை மாவட்டக் காவிரி விவசாயிகள் பாதுகாப்புச் சங்க’த்தின் செயலாளர் ‘சுவாமிமலை’ விமல்நாதன். “தொடக்க வேளாண் கூட்டுறவு வங்கிகள்ல அடமானமா வைக்கிற நகைகளை, ‘வங்கி லாக்கர்’லதான் பாதுகக்காணும். ஆனா, இந்தத் தேவராயன்பேட்டை கூட்டுறவு வங்கியில விவசாயிகள் அடகு வெச்ச நகைகளை எடுத்து, இந்தியன் வங்கியில லட்சக்கணக்கான ரூபாய்க்கு அடமானம் வெச்சுருக்கார் வங்கியின் செயலாளர் மணிவண்ணன். இவருக்குப் பணம் தேவைப்படுற சமயங்கள்ல எல்லாம், வங்கியில இருக்கிற நகைகளை எடுக்கிறதை வழக்கமா வெச்சிருந்துருக்கார். ஆனா, இதை ஆய்வுக்கு வந்த அதிகாரிகள் யாருமே கண்டுக்காம அவங்களும் உடந்தையா இருந்திருக்காங்க.

கூட்டுறவு வங்கியில் ஊழல்... - அதிர்ச்சியில் விவசாயிகள்!

இந்த விஷயம் தெரிஞ்சு விவசாயிகள் போராட்டங்கள்ல இறங்கின பிறகுதான், 6 லட்சம் ரூபாய் மதிப்புள்ள நகைகளை மீட்டு, கூட்டுறவு வங்கிக்குக் கொண்டு வந்திருக்காங்க. அதேமாதிரி, விவசாயிகள்கிட்ட பயிர்க்கடனுக்காக வாங்கின ஆவணங்களை முறைகேடாகப் பயன்படுத்தி, பல லட்சம் ரூபாயைச் சுருட்டியிருக்காங்க. இந்த வங்கியோட நிர்வாகக்குழுத் தலைவருக்கு மொத்தமே 9 ஏக்கர் நிலம்தான் இருக்கு. ஆனா, அவருக்கு 36 ஏக்கர் நிலம் இருக்கிறதா போலி ஆவணங்களைத் தயாரிச்சு பயிர்க்கடன், பயிர்க்காப்பீட்டுக்கான இழப்பீடு, வறட்சி நிவாரணம்னு பல லட்ச ரூபாயைக் கையாடல் செஞ்சிருக்காங்க. அதோட மானிய விலையில் விற்பனை செய்ய வேண்டிய உரத்தை வியாபாரிகளுக்கு விற்பனை செஞ்சும் பணத்தைக் கொள்ளையடிச்சுருக்காங்க. இதுவரை கிட்டத்தட்ட ஒரு கோடி ரூபாய் அளவுக்கு ஊழல் நடந்திருக்கு. உடனடியா விசாரணை நடத்தி, தவறு செய்தவங்களைக் கைது செஞ்சு, முறைகேடுகளுக்கு முற்றுப்புள்ளி வைக்கணும்” என்றார்.

இக்குற்றச்சாட்டுகள் குறித்துக் கும்பகோணம் சரகத் துணை பதிவாளர் மாரிஸ்வரனிடம் பேசினோம். “தேவராயன்பேட்டை கூட்டுறவு வங்கிச் செயலாளர் மணிவண்ணனை சஸ்பெண்ட் செஞ்சு, விசாரணை நடத்திட்டுருக்கோம். அவர் முறைகேடுகள் செஞ்சதுக்கான ஆதாரங்களைக் கண்டுபிடித்துத் தொடர் நடவடிக்கைகள் எடுத்திட்டுருக்கோம். அவர், கண்டிப்பாகத் தண்டிக்கப்படுவார். மற்ற வங்கிகள்ல நடந்த முறைகேடுகள் குறித்தும் நேர்மையான விசாரணை கண்டிப்பாக நடைபெறும்” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு