Published:Updated:

கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...
பிரீமியம் ஸ்டோரி
கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

தொழில்நுட்பம்ஜி.பழனிச்சாமி - படங்கள்:தி.விஜய்

கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

தொழில்நுட்பம்ஜி.பழனிச்சாமி - படங்கள்:தி.விஜய்

Published:Updated:
கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...
பிரீமியம் ஸ்டோரி
கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

‘பலே’ பசுமைக்குடில் தொழில்நுட்பம்!

வீன விவசாய முறைகளில் முக்கியமான ஒன்றாக விளங்குகிறது பசுமைக்குடில் தொழில்நுட்பம். நாற்று வளர்ப்பிலிருந்து பல்வேறு பயிர் சாகுபடிகள் பசுமைக்குடிலில் மேற்கொள்ளப்பட்டு வருகின்றன. ‘குறைவான பரப்பில் அதிக மகசூல்’ என்பதுதான் பசுமைக்குடிலின் தாரக மந்திரம். பசுமைக்குடிலுக்குள் சாகுபடி செய்யும் பயிர்களுக்குப் பட்டம் கிடையாது. பூச்சித்தாக்குதல்களும் இருக்காது. மேலும் பசுமைக்குடில் அமைக்க அரசு மானியமும் கிடைப்பதால், பல விவசாயிகள் பசுமைக்குடில் அமைப்பதில் ஆர்வம் காட்டுகிறார்கள். அவர்களில் ஒருவர்தான், திருப்பூர் மாவட்டம், மடத்துக்குளம் அடுத்துள்ள பாப்பான்குளம் கிராமத்தைச் சேர்ந்த ரமேஷ்குமார். 

கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

ஒரு காலைவேளையில் பண்ணையில் வேலை செய்து கொண்டிருந்த ரமேஷ்குமாரைச் சந்தித்துப் பசுமைக்குடில் சாகுபடி குறித்துப் பேசினோம். “2013-ம் வருஷம், செப்டம்பர் 10-ம் தேதியிட்ட ‘பசுமை விகடன்’ புத்தகத்துல வெளியான பசுமைக்குடில் வெள்ளரிச் சாகுபடி கட்டுரைதான் என்னைப் பசுமைக்குடில் விவசாயியா மாத்தினது. அதுக்கு முன்னாடி நெல், கரும்புனு மாத்தி மாத்திச் சாகுபடி செய்வோம். மொத்தம் 25 ஏக்கர் நஞ்சை நெலம் இருக்கு. நெல்லும் கரும்பும் நல்லாவே விளைஞ்சாலும், பல நேரங்கள்ல கட்டுபடியான விலை கிடைக்கிறதில்லை. அதுக்கு மாற்றா என்ன செய்யலாம்னு யோசிச்சப்பதான் பசுமைக்குடில் பத்திப் படிச்சேன். வீட்டுல சொன்னப்போ எல்லோருமே பசுமைக்குடிலுக்கு ஆதரவு கொடுத்தாங்க.

உடனே, பசுமை விகடன் கட்டுரையில் வந்திருந்த மோகன் செல்லக்குமார்ங்கிற விவசாயியோட தோட்டத்துக்குப் போய்ப் பசுமைக்குடில்ல போட்டிருந்த வெள்ளரியைப் பார்த்தேன். அவர், பசுமைக்குடில்ல வெள்ளரிச் சாகுபடி செய்றது பத்தி முழுசா சொல்லிக் கொடுத்ததோடு மானியம் பத்தியும் சொன்னார். அவர் செம்மண் நிலத்துல பசுமைக்குடில் அமைச்சா நல்லதுனு சொன்னார். அதனால, எங்களுக்குச் சொந்தமான வளமான நிலத்தைத் தேர்ந்தெடுத்தோம். இது மொத்தம் 4 ஏக்கர். நல்ல செம்மண் பூமி. மானாவாரியா மக்காச் சோளம் மட்டும் போட்டுக்கிட்டிருந்தோம். இந்த இடத்துல அமைக்கலாம்னு முடிவு பண்ணினதும் தோட்டக்கலைத்துறை அலுவலகத்துல மானியத்துக்காகப் பதிவு செஞ்சுட்டு... தொழுவுரம், வேப்பம்பிண்ணாக்கு, உயிர் உரங்கள் மூணையும் கலந்துபோட்டு நிலத்தைத் தயார் செய்ய ஆரம்பிச்சோம்.

பதிவு செஞ்ச கொஞ்ச நாள்ல தோட்டக்கலைத்துறையில இருந்து அலுவலர்கள் வந்து... மண், தண்ணீர் ரெண்டையும் பரிசோதனை பண்ணி, பசுமைக்குடில் மானியத்துக்குத் தகுதி இருக்குதானு ஆய்வு பண்ணுனாங்க. அதுக்கப்புறம் 50 சதவிகித மானியத்துல 1,000 சதுரமீட்டர்ல (தோராயமாகக் கால் ஏக்கர்) பசுமைக்குடில் அமைச்சு, பாசனத்துக்கான (ஃபாகர்) கருவிகளையும் பொருத்திக் கொடுத்தாங்க” என்ற ரமேஷ்குமார் தன்னுடைய பசுமைக்குடில் சாகுபடி அனுபவங்களைச் சொன்னார்.
“பசுமைக்குடிலுக்குள்ள 3 அடி இடைவெளியில் 1 அடி உயரத்துக்கு மேட்டுப்பாத்திகள் அமைச்சு, அதுல குடமிளகாய் நாத்துகளை நடவு செஞ்சேன். நான் முக்கால்வாசி இயற்கை விவசாயமும், கால்வாசி ரசாயன விவசாயமாகக் கலந்து செஞ்சிட்டு வர்றேன். செடிகளுக்குக் கடலைப்பிண்ணாக்குக் கரைசலை இடுபொருளாகப் பயன்படுத்தினேன். பசுமைக்குடில்ல பூச்சித்தாக்குதல் இல்லை. ஆனா, பூஞ்சணம், பச்சைப்புழுக்கள் தாக்குதல் வந்ததால, இஞ்சி, பூண்டு, பச்சை மிளகாய்க் கரைசலைப் பயன்படுத்தினேன். நடவு செஞ்ச மூணாம் மாசத்துல அறுவடைக்கு வந்தது. மொத்தம் 6,000 செடிகள் நடவு செஞ்சதுல 3 டன் மகசூல் கிடைச்சது. தொடர்ந்து ஒரே பயிரை நடவு செய்யக்கூடாதுங்கிறதால, அடுத்ததா தக்காளி நடவு செய்யலாம்னு யோசிச்சோம். ஆனா, அந்தச் சமயத்துல தக்காளிக்குச் சரியான விலை இல்லைங்கிறதால கொஞ்சம் தள்ளிப்போட்டோம்.  

கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

அந்த நேரத்துல சின்ன வெங்காயத்துக்கு விலை ஏறிக்கிட்டே இருந்துச்சு. அதனால, கரும்பு அறுவடை முடிஞ்சுருந்த நஞ்சை நிலத்துல சின்ன வெங்காயம் போடலாம்னு முடிவு செஞ்சோம். சின்ன வெங்காயம் போட்டா ஏக்கருக்கு 7 டன் மகசூல் கிடைக்கும். 70 நாள்ல நல்ல வருமானம் பாத்துடலாம்னு தோணுச்சு. வெங்காயத்தை... விதை வெங்காய விதைப்பு, நாற்று நடவுனு ரெண்டு முறையிலயும் சாகுபடி செய்யலாம். அந்தச் சமயத்துல எங்களுக்கு விதை வெங்காயம் வாங்குறதுக்குத் தோதுப்படலை. அதனால, விதை வாங்கி நாத்து விடலாம்னு முடிவு செஞ்சோம்.

நாற்றங்கால் அமைச்சு சின்ன வெங்காய நாத்து உருவாக்குறது சவாலான விஷயம். தட்ப-வெப்ப நிலை ரொம்ப முக்கியம். அதனால, பல விவசாயிகள் நாற்றங்கால் அமைக்கமாட்டாங்க. நாற்றுப்பண்ணைகள்ல நாத்தை விலைக்கு வாங்கி நடவு செஞ்சுடுவாங்க. நாங்க 15 ஏக்கர் பரப்புல வெங்காயம் நடலாம்னு முடிவு செஞ்சிருந்ததால, எங்களோட பசுமைக்குடில்லயே நாத்து உற்பத்தி பண்ணுனா என்னானு யோசனை பண்ணினோம். பசுமைக்குடில்ல வளர்த்த வெங்காய நாற்றுகள் நல்லா வளர்ந்து வந்துச்சு. அதை நடவு செஞ்சதுல, நல்ல விளைச்சல் கிடைச்சது. அதைப்பார்த்த பக்கத்துத் தோட்ட விவசாயிகள், ‘எங்களுக்கும் நாத்து உற்பத்தி பண்ணித்தாங்க’னு கேட்க ஆரம்பிச்சிட்டாங்க. அதனால, தேவைப்படுற விவசாயிகளுக்கு ஒப்பந்த முறையில நாற்று உற்பத்தி செஞ்சு கொடுத்துட்டுருக்கோம். சின்ன வெங்காயத்துக்குத் திறந்த வெளியில் நாற்றங்கால் அமைச்சு வளர்க்குறப்போ, சேதாரம் நிறைய இருக்கும். பசுமைக்குடில்ல வளர்க்குறப்போ கொஞ்சம்கூடச் சேதாரம் இருக்குறதில்லை. அதனாலதான் விவசாயிகள் இதுக்கு ஆர்வம் காட்டுறாங்க” என்றார் ரமேஷ்குமார்.  

கைகொடுக்கும் காய்கறிச் சாகுபடி... வருமானம் தரும் நாற்று வளர்ப்பு...

நிறைவாகப் பேசிய ரமேஷ்குமார், “விவசாயிகள் கொடுக்குற விதையை விதைச்சு நாத்தா வளர்த்துக் கொடுத்துக்கிட்டுருக்கோம். அதுக்குப் பராமரிப்புக் கட்டணமா ஒரு கிலோ விதைக்கு 10,000 ரூபாய் வாங்கிட்டுருக்கோம். நாத்து நடவில் செலவு குறைவா இருக்குறதால நிறைய பேர் எங்ககிட்ட ஒப்பந்தம் போட்டிருக்காங்க. அவங்களுக்குச் சுழற்சி முறையில் நாத்து உற்பத்தி செஞ்சு கொடுத்துட்டுருக்கோம். காய்கறிச் சாகுபடிக்காக அமைச்ச பசுமைக்குடில், இப்ப நாற்றங்கால் உற்பத்தி நிலையமாக மாறிடுச்சு. இதோடு செண்டுமல்லியும் குடைமிளகாயும் போட்டிருக்கோம். மார்க்கெட்டைப் பொறுத்துதான் வருமானமும் இருக்கு. போன வருஷம் ரெண்டரை லட்சம் ரூபாய் வருமானமா கிடைச்சது. இந்த வருஷம் மார்க்கெட் நல்லாருக்கு. எப்படியும் 4 லட்சம் ரூபாய் வரை வருமானம் கிடைக்கும்னு எதிர்பார்க்கிறேன். பசுமைக்குடில்ல குறைஞ்ச நாள்லயே நல்ல வருமானம் கிடைச்சுடுது. இதுக்கு வழிகாட்டுன பசுமை விகடனுக்கு இந்த நேரத்துல நன்றி சொல்லக் கடமைப்பட்டுருக்கேன்” என்றார், நெகிழ்ச்சியாக.

தொடர்புக்கு, ரமேஷ்குமார், செல்போன்: 97900 64910

பசுமைக்குடில் நாற்று உற்பத்தி

பசு
மைக்குடிலுக்குள் வெங்காய நாற்று உற்பத்தி செய்யும் முறை குறித்து ரமேஷ்குமார் சொன்ன விஷயங்கள் இங்கே...

ஆயிரம் சதுரமீட்டர் பசுமைக்குடிலுக்குள் 5 டன் ஆட்டு எருவைக் கொட்டிப் பரப்பிப் பவர் டில்லர் மூலமாக உழவு செய்ய வேண்டும். 9 அடி நீளம் 4 அடி அகலம் என்ற அளவில் தேவையான எண்ணிக்கையில் பாத்திகளை அமைத்துக்கொள்ள வேண்டும். ஒரு ஏக்கர் பரப்பில் நடவுசெய்ய 1 கிலோ வெங்காய விதை தேவை. பாத்திகளில் வெங்காய விதைகளைத் தூவி அவை மண்ணில் புதையுமாறு குச்சி கொண்டு மண்ணைக் கீறி விட வேண்டும்.

தொடர்ந்து பாசனக் கருவிகள் மூலம் காய்ச்சலும் பாய்ச்சலுமாகப் பாசனம் செய்ய வேண்டும். 15 மற்றும் 30-ம் நாள்களில் கைகளால் களை எடுக்க வேண்டும். 40 நாள்கள் நாற்று வளர்வதற்கு அடியுரமாக இட்ட ஆட்டு எருவே போதுமானது என்பதால், வேறு இடுபொருள்கள் கொடுக்கத்தேவையில்லை. நாற்றுகளுக்கு அதிகளவில் இடுபொருள்கள் கொடுக்கக்கூடாது. தேவையான அளவு கடலைப்பிண்ணாக்குக் கரைசலைத் தெளிக்கலாம். 40-ம் நாளில் நாற்றுகளைப் பிடுங்கி வயலில் நடவுசெய்யலாம்.