Published:Updated:

பூச்சிக்கொல்லி செலவைக் குறைப்பது எப்படி?

பூச்சிக்கொல்லி செலவைக் குறைப்பது எப்படி?
பிரீமியம் ஸ்டோரி
News
பூச்சிக்கொல்லி செலவைக் குறைப்பது எப்படி?

நீங்கள் கேட்டவைஓவியம்: வேலு

அண்மையில்தான், இயற்கை விவசாயத்துக்கு மாறியுள்ளோம். பூச்சிக்கொல்லி தெளித்தே, நிறையப் பாதிக்கப்பட்டுள்ளோம். பூச்சிக்கொல்லிச் செலவைக் குறைப்பது எப்படி?’’

எம்.லாவண்யா, கூடுவாஞ்சேரி. 

பூச்சிக்கொல்லி செலவைக் குறைப்பது எப்படி?

தமிழக வேளாண்மைத்துறையின் உதவி வேளாண்மை இயக்குநரும் பூச்சியியல் வல்லுநருமான நீ.செல்வம் பதில் சொல்கிறார்.

‘‘பயிரைத்தாக்கும் தீமை செய்யும் பூச்சிகளைக் கட்டுப்படுத்த வேண்டும் என்றால், நன்மை செய்யும் பூச்சிகள் நமது வயலில் இருக்கவேண்டும். வயலைச் சுற்றிலும் ஊடுபயிராகத் தட்டைப்பயறு விதைக்க வேண்டும். வளர்ந்த தட்டைச்செடிகளில் அசுவினிப்பூச்சிகள் போய் உட்கார்ந்து கொள்ளும், அப்படி உட்கார்ந்திருக்கும் அசுவினிகளைச் சாப்பிட நன்மை செய்யும் பூச்சிகள் பறந்து வந்து தட்டைச்செடிகளில் குடிபுகுந்துவிடும்.

ஊடுபயிரான தட்டையில் வயலில் போதுமான உணவு கிடைத்து விடுவதால், நாம் பிரதானமாகச் சாகுபடி செய்துள்ள பயிரின் பக்கம் அவை எட்டிப்பாக்காது. அதனால், பிரதான பயிர் சேதாரம் இல்லாமல் விளைச்சலைக் கொடுக்கும். அதேபோல், சாகுபடி வயலைச் சுற்றிலும் 8 அடி இடைவெளியில் ஆமணக்கு விதைகளை நடவு செய்யவேண்டும். செடிகள் வளர்ந்து நிற்கும் பருவத்தில், அதன் இலைகளை நன்றாகக் கசக்கி விடவேண்டும். அப்போது இலைகளில் இருந்து, ஒருவிதமான வாடை வீசும். அந்த வாடை, பூச்சிகளுக்குப் பிடிக்காது. அது வயலுக்குள் நுழைந்து மகசூலைக் காலி செய்யப் படையெடுக்கும் பூச்சிகளை விரட்டி அடிக்கும். 

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பூச்சிக்கொல்லி செலவைக் குறைப்பது எப்படி?

குறிப்பாக, பருத்தி வயலில் இருக்கும் 200 வகைப் பூச்சிகளில் 40 பூச்சிகள்தான் பயிருக்கு எதிரி.  மற்ற பூச்சிகள் எல்லாம் எதிரிப்பூச்சிகளைச் சாப்பிட வந்துள்ள நட்பு பூச்சிகள். தொடர்ந்து வீரியமான பூச்சிக்கொல்லி மருந்துகளைப் பயிர்களுக்குத் தெளித்துத் தீமை செய்யும் பூச்சிகளுடன் சேர்த்து நன்மை செய்யும் 160 வகைப் பூச்சிகளையும் அழித்துவிடுகிறோம்.

நமக்கு நன்மை செய்யும் பூச்சிகளில் முக்கியமானது சிலந்தி. ஒரு ஏக்கர் நிலத்தில் சுமார் 20 ஆயிரம் சிலந்திகள் இருக்கும். ஆனால், நாம் தெளிக்கும் பூச்சிக்கொல்லி விஷம் சிலந்தியையும் விட்டுவைப்பதில்லை. தீமை செய்யும் பூச்சிகளை அழித்தொழிக்கும், நன்மை செய்யும் பூச்சிகள் நமது வயலில் இருக்கவேண்டும் என்றால் பூச்சிக்கொல்லித் தெளிப்பதைத் தவிர்க்க வேண்டும். சரி அதுக்கான மாற்று வழி என்ன என்று நீங்கள் கேட்பது புரிகிறது.

நம் கைக்கு எட்டும் தொலைவில் வளர்ந்து நிற்கும் மருத்துவக் குணம் கொண்ட தாவரங்கள்தான் அதற்கான தீர்வு. வேம்பு, புங்கன், நொச்சி, எருக்கு, கடற்பாலை போன்ற காட்டுச்செடிகளின் இலைகளைப் பறித்து இடித்து, தாவர பூச்சிவிரட்டிகளைத் தற்சார்புடன் தயாரித்துப் பயிர்களுக்குத் தெளிக்கலாம். வேப்பங்கொட்டையில் மட்டும் 18 வகையான பூச்சிக்கொல்லிகளின் குணம் உள்ளது. வேப்பங்கொட்டையுடன் வெள்ளைப்பூண்டு மற்றும் கட்டைப் புகையிலை இரண்டையும் சேர்த்து கரைசல் தயாரித்து, அதைத் தெளித்துச் சாறு உறிஞ்சும் பூச்சிகளைக் கட்டுப்படுத்தலாம். 

பூச்சிக்கொல்லி செலவைக் குறைப்பது எப்படி?

பூச்சித்தாக்குதலுக்கு முன்பாகவே பூச்சிவிரட்டியைத் தெளித்து வைக்கலாம். அதாவது, வேப்பங்கொட்டை 5 கிலோ, வெள்ளைப் பூண்டு அரைக் கிலோ இரண்டையும் சேர்த்து, அம்மியில் அரைத்தெடுத்து, ஒரு வெள்ளைத் துணியில் கட்டி, 10 லிட்டர் நாட்டு மாட்டுக் கோமியத்தில் ஒருநாள் ஊறவைக்க வேண்டும். பிறகு வடிகட்டி, 100 கிராம் காதிசோப்பைக் கரைத்து, 90 லிட்டர் தண்ணீரில் கலந்து பயிருக்குத் தெளிக்க வேண்டும். கவாத்து செய்தபிறகு வரும் தளிர்மீதும் தெளிக்கலாம். இல்லை என்றால், பூ அறுவடை செய்த பிறகு தெளிக்கலாம். 

பூச்சிக்கொல்லி செலவைக் குறைப்பது எப்படி?

இதுவே பூச்சித் தாக்குதல் ஆரம்பித்துவிட்டால், ‘பச்சை மிளகாய் 3 கிலோவைக் காம்பு கிள்ளி அரைத்து எடுத்து, தண்ணீரில் ஊற வைக்கவேண்டும். கால் கிலோ வெள்ளைப் பூண்டை அரைத்து, 100 மில்லி மண்ணெண்ணெயில் கலந்து ஊறவைக்க வேண்டும். இந்த இரண்டு ஊறல்களையும் 10 லிட்டர் தண்ணீரில் கலந்துவிட வேண்டும். இதில் அரை லிட்டரை எடுத்து, 1 டேங்க் (10 லிட்டர்) தண்ணீரில் கலந்து, பயிர்களுக்குத் தெளிக்க வேண்டும். வேப்பங்கொட்டையின் கசப்புத் தன்மைக்கும், பச்சை மிளகாயின் காரத்துக்கும் புழுக்கள், இலைப்பேன், தண்டுத் துளைப்பான் கட்டுப்படும்.

எனவே, பூச்சிக்கொல்லி தெளிக்காமல் விவசாயம் செய்து நன்மை செய்யும் பூச்சிகளைப் பாதுகாப்போம். அவை மூலம் தீமைசெய்யும் பூச்சிகளை அழிப்போம்.’’

(பசுமை விகடன் இதழ் சார்பில் ஈரோட்டில் நடைபெற்ற அக்ரி எக்ஸ்போ- 2018 கருத்தரங்கில், ‘பூச்சிகளும் உங்கள் நண்பர்களே!’ என்ற தலைப்பில் ‘பூச்சி’ செல்வம் பேசியதன் ஒரு பகுதி).

புறாபாண்டி

பூச்சிக்கொல்லி செலவைக் குறைப்பது எப்படி?

விவசாயம், கால்நடை, மீன்வளம் மற்றும் சுற்றுச்சூழல் என்று பல துறைகள் பற்றி வாசகர்களின் சந்தேகங்களுக்கான பதில்களை உரிய நிபுணர்களிடம் பெற்றுத் தருவதற்காகவே ‘புறா பாண்டி’ சும்மா ‘பரபர’த்துக் கொண்டிருக்கிறார்.
உங்கள் கேள்விகளை ‘நீங்கள் கேட்டவை’,  பசுமை விகடன், 757, அண்ணா சாலை, சென்னை-2 என்ற முகவரிக்குத் தபால் மூலமும், pasumai@vikatan.com என்ற முகவரிக்கு இ-மெயில் மூலமும்,
99400 22128 என்ற எண்ணுக்கு வாட்ஸ்அப் மூலமும், facebook.com/PasumaiVikatan என்ற முகவரிக்கும், twitter.com/PasumaiVikatan என்ற முகவரிக்கும்  அனுப்பலாம்.