Published:Updated:

ஏன்... ஏன்? தெரிவோம்... தெளிவோம்! - குலைநோயை எப்படித் தடுப்பது?

ஏன்... ஏன்? தெரிவோம்... தெளிவோம்! - குலைநோயை எப்படித் தடுப்பது?
பிரீமியம் ஸ்டோரி
News
ஏன்... ஏன்? தெரிவோம்... தெளிவோம்! - குலைநோயை எப்படித் தடுப்பது?

கேள்வி - பதில்

மா சாகுபடி குறித்த கேள்விகளுக்குக் குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரன் கடந்த சில இதழ்களிலிருந்து பதில்களைச் சொல்லி வருகிறார். அதன் தொடர்ச்சி இங்கே...

“மா சாகுபடியில் உர மேலாண்மை குறித்துச் சொல்ல முடியுமா?” 

ஏன்... ஏன்? தெரிவோம்... தெளிவோம்! - குலைநோயை எப்படித் தடுப்பது?

“மா விவசாயத்தில் உர மேலாண்மை சரியாக மேற்கொள்ளப்பட வேண்டும். ஒவ்வொரு மரத்துக்கும் ஒரு கிலோ மண்புழு உரம், ஒரு கிலோ ஊட்டமேற்றிய தொழுவுரம், ஒரு கிலோ மட்கிய உரக் கலவை (ஆடு, கோழி, பன்றி ஆகியவற்றின் கழிவுகள்) என்ற விகிதத்தில்... நடவு செய்த 3, 6, 9 மற்றும் 12-ம் மாதங்களில் இட வேண்டும். நடவு செய்த 2-ம் ஆண்டில், மேற்சொன்ன அளவு இடுபொருள்களை 3, 9 மற்றும் 12-ம் மாதங்களில் இட வேண்டும். நடவு செய்த 3-ம் ஆண்டிலிருந்து ஆண்டுக்கு இருமுறை, ஒவ்வொரு மரத்துக்கும்... தலா மூன்று கிலோ மண்புழு உரம், ஊட்டமேற்றிய தொழுவுரம், மட்கிய உரக்கலவை ஆகியவற்றைக் கொடுத்து வர வேண்டும். கவாத்துக்குப் பிறகு, புது இலைகள் தொன்றும் காலங்களில் இடுபொருள்களை இட வேண்டும். ஒவ்வொரு முறை இடுபொருள்கள் இடும்போதும், தலா அரைலிட்டர் ஜீவாமிர்தம், பஞ்சகவ்யா ஆகிய இரண்டையும் மரத்தின் தூரில் ஊற்ற வேண்டும். புது இலைகள் வரும் நேரத்தில்... ஒரு லிட்டர் தண்ணீருக்கு 5 மில்லி என்ற விகிதத்தில் பஞ்சகவ்யா அல்லது ஜீவாமிர்தத்தைக் கலந்து இலைவழியாகத் தெளிக்க வேண்டும்.”

“அறுவடை செய்யும் முறைகள் குறித்துச் சொல்ல முடியுமா?”

“மா மரங்களை உலுக்கி அறுவடை செய்யக்கூடாது. காய்கள் கீழே விழும்போது திசுக்கள் அடிபடும். அதனால், காய்கள் அழுக வாய்ப்புள்ளது. எனவே, மா அறுவடைக்கென உள்ள கருவியைப் பயன்படுத்தித்தான் அறுவடை செய்ய வேண்டும். காய்களில் எத்திலீன் ஹார்மோன் சரியான அளவில் சுரந்தால்தான் காய் பழுக்கும். காயில் அடிபட்டால், எத்திலீன் சுரப்பதில் சிக்கல் ஏற்படும். பழங்களைப் பழுக்க வைக்கக் ‘கார்பைடு கல்’ போன்றவற்றைப் பயன்படுத்தக்கூடாது. இயற்கை முறையில் வைக்கோலைப் பரப்பி வரிசையாக அடுக்கி வைத்துத்தான் பழுக்க வைக்க வேண்டும். அறுவடை செய்த பழங்களில் பூஞ்சணத்தொற்று ஏற்பட்டாலும் பழங்கள் அழுக வாய்ப்புண்டு. 1 லிட்டர் தண்ணீரில் 50 கிராம் வேப்பிலைப் பொடி, 50 கிராம் பெருந்துளசிப்பொடி ஆகியவற்றைக் கலந்து தயாரிக்கப்பட்ட கரைசலில் பழங்களை மூழ்க வைத்து எடுத்துத் துடைத்து பிறகு, பழுக்க வைத்தால் பூஞ்சணத்தொற்று ஏற்படாது.” 

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ஏன்... ஏன்? தெரிவோம்... தெளிவோம்! - குலைநோயை எப்படித் தடுப்பது?

“கஜா புயலுக்குப் பிறகு ஏற்பட்டுள்ள பருவநிலை மாற்றத்தால் எந்தெந்தப் பயிர்கள் நோய்த் தொற்றால் பாதிக்கப்பட்டுள்ளன?”

“கஜா புயலுக்குப் பிறகு, இன்னும் முழுமையான அளவில் வெயில் கிடைக்கவில்லை. மேகமூட்டமான பருவநிலைதான் நிலவி வருகிறது. காற்று மற்றும் மண் ஆகியவற்றில் ஈரப்பதம் அதிகமாக இருக்கிறது. இந்தச்சூழ்நிலை மண்ணில் வளரும் சில பூஞ்சணங்களுக்குச் சாதகமாக இருப்பதால்... நெல், தக்காளி, வெங்காயம், மஞ்சள், வாழை போன்ற பயிர்களில் நோய்த்தொற்று ஏற்பட வாய்ப்புள்ளது.”

“நெல் பயிரில் தாக்கும் நோய்கள் மற்றும் அவற்றின் அறிகுறிகள் குறித்துச் சொல்ல முடியுமா?”

“பருவநிலை மாற்றம் காரணமாக நெல் பயிரில் பரவலாகக் குலை நோய்த் தாக்குதல் தென்படுகிறது. இது காலங்காலமாக நெல்லைத் தாக்கக்கூடிய ஒரு நோய். தற்போதைய சூழ்நிலையில், உலகில் 85 நாடுகளில் இந்த நோயால் நெல் பயிர் பாதிக்கப்படுகிறது. இந்தியாவில் பனிக்கருகல் நோய் எனச் சொல்லிவந்த நிலையில்... 1918-ம் ஆண்டில், ‘பைரிக்குலேரியா ஒரைசே’ என்ற பூஞ்சணத்தால் வருவது கண்டறியப்பட்டது. தொடர்ந்து, இந்நோய்க்குக் குலை நோய் எனப் பெயரிட்டனர். இந்நோய் ஏற்படுத்தும் சேதாரத்தின் அடிப்படையில் தடுப்பு நடவடிக்கைகள் மேற்கொள்ளப்பட்டு வருகின்றன. பொதுவாக எல்லாப் பருவங்களிலும், இந்நோய் நெல் பயிரைத் தாக்குவது இயல்பு என்றாலும், பருவநிலை காரணமாக நோயின் தீவிரம் அதிகரிக்கும். சரியான தடுப்பு நடவடிக்கை மேற்கொள்ளப் படாவிடில், 80 சதவிகிதம் வரை மகசூல் இழப்பு ஏற்படும். 

ஏன்... ஏன்? தெரிவோம்... தெளிவோம்! - குலைநோயை எப்படித் தடுப்பது?

இந்த நோயை உண்டாக்கும் பூஞ்சண வித்துகள் காற்றில் பரவிக் கிடக்கும். மேகமூட்டமான சூழ்நிலையிலும், தொடர்மழை மற்றும் தூரல் இருக்கும் சமயங்கள் மற்றும் காற்றின் ஈரப்பதம் 90 சதவிகிதம் மற்றும் காற்றின் வெப்பநிலை 25 முதல் 30 டிகிரி செல்சியஸ் ஆக இருக்கும் சமயங்களிலும் இப்பூஞ்சண வித்துகள் வேகமாகப் பரவி, நெல் பயிரின் இலைகளைத் தாக்கும். நெல் வயலில், அதிகமாக அம்மோனியம் சல்பேட் உரங்களைப் பயன்படுத்தினாலும் இந்நோயின் தீவிரம் அதிகரிக்கும். புயலுக்குப் பிறகு பருவநிலை மாற்றத்தின் காரணமாக இப்பூஞ்சண வித்துகள் காற்றில் பரவி, நெல் பயிரைத்தாக்கும். இப்பூஞ்சணம் தாக்கப்பட்ட இலைகள், நீள்வட்ட வடிவில் பழுப்பு நிற வெளிப்புறத்தைக் கொண்டு நடுவில் சாம்பல் நிறத்தில் இருக்கும். இந்த நீள்வட்ட புள்ளிகள் ஒன்றிணையும் போது இலை சருகுபோல மாறிவிடும்.”

“குலைநோயை எப்படித் தடுப்பது?”

“குலை நோயால் பாதிக்கப்பட்ட நெல் வயல்களிலிருந்து விதைகளைச் சேகரித்து மறு நடவுக்குப் பயன்படுத்தக் கூடாது. விதைப்பதற்கு முன்பாக, ஒரு கிலோ விதைக்கு 10 கிராம் சூடோமோனஸ் என்ற விகிதத்தில் கலந்து விதைநேர்த்தி செய்து விதைக்க வேண்டும். நாற்றுகளையும் சூடோமோனஸ் கரைசலில் நனைத்து நடவு செய்ய வேண்டும். 25 சதுர மீட்டர் பரப்புள்ள நாற்றங்காலில், 2.5 சென்டிமீட்டர் அளவுக்கு நீரைத் தேக்கி, அதில் இரண்டரை கிலோ சூடோமோனஸ் கலந்து இரண்டு மணி நேரம் கழித்து... நாற்றுகளைப் பிடுங்கி வயலில் நடும்போது, நாற்றுகளுக்குக் குலைநோயைத் தாங்கும் எதிர்ப்பு சக்தி கிடைக்கும். கோ-47 என்ற நெல் ரகம் குலைநோய்க்கு எதிர்ப்பு சக்தி கொண்ட ரகம். இந்நோய், நெல்வயல்களில் உள்ள களைகளில் முதலில் தொற்றி, பிறகு நெல் பயிருக்குப் பரவுவதால், வயல்களில் களைகள் இல்லாமல் பார்த்துக்கொள்ள வேண்டியது அவசியம்.

குலைநோய் பாதிக்கப்பட்ட வயல்களில் தூர்கட்டுவதற்கு முன்பாக ஒரு லிட்டர் தண்ணீருக்கு 20 மில்லி எதிர் பூஞ்சணக்கலவை (1 மடங்கு வேம்புத்தூள், 1 மடங்கு பெருந்துளசித்தூள் ஆகியவற்றை 4 மடங்கு தண்ணீரில் கலந்து வடிகட்டிய கரைசல்) என்ற அளவில் கலந்து தெளிக்க வேண்டும். நோயின் தீவிரம் 30 சதவிகிதத்துக்கு மேல் இருந்தால் ஒரு லிட்டர் தண்ணீருக்கு 20 மில்லி எதிர் பூஞ்சணக்கலவை, 5 மில்லி திரவச் சூடோமோனஸ் என்ற விகிதத்தில் கலந்து தெளிக்க வேண்டும். நோயின் தீவிரத்தைப் பொறுத்து, மூன்று நாள்களுக்கு ஒருமுறை இரண்டு தவணைகளில் இக்கரைசலைத் தெளித்து நோயின் தீவிரத்தைக் குறைக்கலாம்.”

மற்ற பயிர்களில் ஏற்பட்டுள்ள பாதிப்புகள் குறித்து அடுத்த இதழில்...

-வளரும்.

ஆர்.குமரேசன்