Published:Updated:

''ஒற்றை வைக்கோல் புரட்சி!''

மாற்றத்துக்குத் தேவை...மனோபாவ மாற்றம்! மசானோபுஃபுகோக்காமொழியாக்கம்: அரச்சலூர் இரா.செல்வம்

பொங்கல் சிறப்பிதழ்

##~##
விவசாயத்தில் நடக்கும் ரசாயன மாற்றங்கள்... அதனால், சுற்றுச்சூழலில் ஏற்பட்டு வரும் மாசுபாடுகள் போன்றவை, நுகர்வோர்களாக இருக்கும் மக்களுக்கு பெரும்பாலும் தெரியாமலே இருக்கிறது!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இப்படி ஒரு விஷ(ய)ம் இருக்கிறது என்பதே தெரியாதவர்களுமாக... 'இந்த விஷ(ய)ங்களுக்கும் தங்களுக்கும் தொடர்பே இல்லை' என்று நினைப்பவர்களுமாக... கலந்து கிடக்கிறார்கள் நுகர்வோர்கள்.

ஆனால், நுகர்வோரின் விருப்பத்தைச் சார்ந்துதான் விவசாய உற்பத்தியே இருக்கிறது என்பதுதான் உண்மை. தெரிந்தோ... தெரியாமலோ... விவசாயத்தால் ஏற்படும் மாசுபாடுக்கு நுகர்வோரும் ஒரு காரணம் என்பதும் உண்மை!

காய்கறியாக இருந்தாலும் சரி... பழமாக இருந்தாலும் சரி... 'பளபளவென்று இருக்க வேண்டும். கொஞ்சம்கூட புள்ளிகள், வெடிப்புகள் இருக்கக் கூடாது. பார்ப்பதற்கு ஒரே அளவுள்ளதாக இருக்க வேண்டும்’ என்றெல்லாம் நுகர்வோரின் மனதில் திணிக்கப்பட்டுள்ளது. அதனால், அவற்றையே அவர்களும் விரும்புகிறார்கள்! 'வடிவமற்று இருந்தாலும் சரி... ஆனால், தரமானதாகவும், சுவையானதாகவும், ரசாயனம் இல்லாமல் உற்பத்தி செய்யப்பட்டதாகவும் இருக்க வேண்டும்’ என்பதெல்லாம் அவர்களுக்குத் தெரிவதே இல்லை.

''ஒற்றை வைக்கோல் புரட்சி!''

கடைசியில், 'இப்படியெல்லாம் ஒரே மாதிரி, பளபளப்பா இருக்கறதைத்தான் மக்கள் விரும்பறாங்க...' என்று விவசாயிகளின் மனதிலும் கருத்துத் திணிப்பு நடத்தி, அதுமாதிரியே விளைவிப்பதற்காக விவசாயத்தில் அதிகளவு ரசாயனங்கள் பயன்படுத்தப்படுகின்றன.

ஒவ்வொரு பருவத்துக்கும்... ஒவ்வொரு வகையான காய்கள், பழங்களை இயற்கை வகைப்படுத்தி வைத்திருக்கிறது. அந்தந்தப் பருவத்தில் நிலவும் தட்ப வெப்பநிலைக்கு, அந்தந்தப் பருவத்தில் விளைபவற்றை உண்பதுதான் சிறந்தது. ஆனால், இன்றைக்கு அப்படி நடப்பதில்லை. ஒரு பருவத்தில் விளைவதை வேறு பருவத்தில் அதிக விலை கொடுத்து வாங்க நுகர்வோர் தயாராக இருக்கிறார்கள். அதனால்தான் செயற்கையான வளர்ப்பு முறைகளும், அதற்கு உதவியாக ரசாயனங்களும் உள்ளே வருகின்றன.

உண்மையில், ஆரஞ்சுப் பழங்கள் கோடையில் வராது. ஆனால், கோடை காலச் சந்தைக்காக ஆரஞ்சு மரங்களை, பசுங்குடில்களில் வளர்க்கிறார்கள். பருவத்தில் உள்ளதைப் போன்ற வளர்ச்சிக்காகவும், மகசூலுக்காகவும் அதிக ஊட்டம் கொடுக்க வேண்டியிருக்கிறது. அதனால் ஏகப்பட்ட ரசாயனங்களைக் கொட்டுகிறார்கள். இதனால் உற்பத்திச் செலவு அதிகமாகிறது. ஆகவே, அதிக விலைக்கு விற்கப்படுகிறது.

டோக்கியோ சந்தையில் உரியப் பருவத்தில் விளையும் ஆரஞ்சு கிலோ 50 ரூபாய் முதல் 70 ரூபாய் வரை விற்கப்படும். ஆனால், பருவம் தப்பிய காலத்தில் விளைவிக்கப்பட்ட ஆரஞ்சுகள் கிலோ 500 ரூபாய்க்கும் அதிகமாக விற்கப்படுகின்றன. இப்படி அதிக விலை கிடைப்பதால்... தற்போது விவசாயிகளும் பருவம் தப்பியப் பயிர்களை விளைவிப்பதில் அதிக ஆர்வம் காட்டுகின்றனர்.

சந்தையின் தேவைக்காக விளையும்போது மட்டுமல்லாமல், விளைந்த பிறகும் பழங்களின் மேல் ரசாயனங்கள் பூசப்படுகின்றன. இந்த ரசாயனங்களால், சரியாக விளையாத காயும் பழுக்க வைக்கப்பட்டு விடுகிறது. இப்படி முன்னதாகவே பழங்களைப் பறித்து பழுக்க வைப்பதால்... சுவை குறைந்து போகும். அதனால், செயற்கையான ரசாயன இனிப்புச் சுவையூட்டிகளையும் அவற்றில் பயன்படுத்துகிறார்கள். இவற்றை பழங்களின் மேல் பூசுவது தடை செய்யப்பட்டிருந்தாலும், மரங்களில் இருக்கும் காய்களின் மீது தெளிக்கத் தடை இல்லை. இந்த ரசாயனச் சுவையூட்டிகள், விவசாயத்தில் பயன்படுத்தப்படும் ரசாயனங்களின் பட்டியலில் இல்லை. அதனால்தான், இஷ்டத்துக்குப் பயன்படுத்துகிறார்கள்.

பழங்களை, அவற்றின் அளவுக்கு ஏற்ப தனித்தனியாகப் பிரிப்பதற்காகவே இயந்திரம் பயன்படுத்தப்படுகிறது. இந்த இயந்திரத்தில் பல நூறு மீட்டர் தூரம் பழங்கள் உருட்டப்படும்போது, அழுகாமல் இருக்கவும் சில ரசாயனம் மற்றும் வண்ணங்களைப் பூசி, பளபளப்புக்காக ஃபாரபின் மெழுகையும் பூசுகிறார்கள்.

''ஒற்றை வைக்கோல் புரட்சி!''

இத்தனை அரிதாரங்களையும் பூசிக்கொண்டுதான் பழங்கள் சந்தைக்கு வருகின்றன. இப்படிப்பட்ட பழங்களின் பெட்டியின் மீது பூசப்பட்ட ரசாயனங்களின் பட்டியல் இருக்கும். ஆனால், தெளிக்கப்பட்ட பொருட்களின் பட்டியல் இருக்காது.

நுகர்வோர், தாங்கள் வாங்கும் பொருட்கள் பளபளப்பாக இருப்பதால் புதிதாக, தரமானதாக இருப்பதாக நினைக்கிறார்கள். ஆனால், அது முற்றிலும் தவறு. உண்மையில் அவை ஊட்டச்சத்தும், தரமும், சுவையும் குறைந்தே இருக்கும்.

இதுபோன்ற செய்கைகளுக்கு 'நவீனம்' என்கிற வார்த்தைப் பூச்சு வேறு! அதனாலேயே இவைதான் 'தரமானவை' என்றும் நம்ப வைக்கப்படுகிறது. இந்த மனோபாவம் மாறவேண்டும்.

இயற்கையைப் பாடப் புத்தகம் மூலம் புரிந்து கொள்ள முடியாது. அதனுடன் நேசத்துடன் உறவாடினால் மட்டும்தான், அந்தப் பள்ளியில் நாம் கற்றுக் கொள்ள முடியும்.

எனது பண்ணையில் தங்குவதற்கு எத்தனையோ விதமான மனிதர்கள் வருகிறார்கள். அவர்களுக்குத் தேவையான வசதிகளை என்னால் செய்ய முடியாது. ஆனால், என்னிடம் விலை மதிக்க முடியாத ஒன்று உள்ளது. அது... ஒற்றை வைக்கோல்!

இயற்கையாக விளைந்த பயிரின் இந்த ஒற்றை வைக்கோல், ஒரு புரட்சியை உண்டு பண்ண போகிறது. இயற்கையால் முடியும். இயற்கைதான் எல்லாம், இயற்கையே உலகம்... என்பதை ஒரே ஒரு வைக்கோல் உணர்த்திவிடும். எதிர்காலம் இயற்கையின் கையில்தான் உள்ளது.

-புரட்சி விளைந்தது