Published:Updated:

வளமான வருமானம் தரும் வான்கோழி வளர்ப்பு! - 300 வான்கோழிகள்... ரூ. 2,40,000 வருமானம்!

ஒட்டுமொத்த விகடனுக்கும் ஒரே ஷார்ட்கட்

Use App
வளமான வருமானம் தரும் வான்கோழி வளர்ப்பு! - 300 வான்கோழிகள்... ரூ. 2,40,000 வருமானம்!
வளமான வருமானம் தரும் வான்கோழி வளர்ப்பு! - 300 வான்கோழிகள்... ரூ. 2,40,000 வருமானம்!

கால்நடை

பிரீமியம் ஸ்டோரி

விவசாயத்தோடு கால்நடை வளர்ப்பையும் மேற்கொண்டால்... தண்ணீர்ப் பற்றாக்குறை, விலையின்மை, ஆள் பற்றாக்குறை போன்ற பலவிதப் பிரச்னைகளையும் எளிதாகச் சமாளித்து வருமானம் ஈட்டிவிட முடியும். அதனால்தான், பெரும்பாலான விவசாயிகள் தோட்டத்தின் ஒரு பகுதியில் மாடு வளர்ப்பு, ஆடு வளர்ப்பு, கோழி வளர்ப்பு எனக் கால்நடை வளர்ப்பில் ஈடுபட்டு நல்ல வருமானம் ஈட்டி வருகிறார்கள். அந்தவகையில், தண்ணீர்ப் பற்றாக்குறையால் தரிசாகக் கிடந்த நிலத்தில் வான்கோழிப் பண்ணை அமைத்து நல்ல வருமானம் எடுத்து வருகிறார், திருவண்ணாமலை மாவட்டத்தைச் சேர்ந்த சாலமன். 

வளமான வருமானம் தரும் வான்கோழி வளர்ப்பு! - 300 வான்கோழிகள்... ரூ. 2,40,000 வருமானம்!

நாடழகானந்தல் எனும் ஊருக்கு அருகே உள்ள கெங்கப்பட்டு எனும் கிராமத்தில் இருக்கிறது, சாலமனின் வான்கோழிப் பண்ணை. ஒரு காலை வேளையில் வான்கோழிகளுக்குத் தீவனம் வைத்துக் கொண்டிருந்த சாலமனைச் சந்தித்தோம்.

“தாத்தா காலத்துல இருந்தே விவசாயம் செய்றோம். மொத்தம் எட்டரை ஏக்கர் நிலமிருக்கு. அதுல நாலரை ஏக்கர் வானம் பார்த்த பூமி. நானும் சின்ன வயசுல இருந்து அப்பாகூடச் சேர்ந்து விவசாயம் செய்துக்கிட்டிருந்தேன். காலேஜ் முடிச்சபிறகு அப்பாவுக்கு ஓய்வு கொடுத்துட்டு, நான் விவசாயத்துல இறங்கிட்டேன். மானாவாரி நிலத்துல போர்வெல் போட்டும் தண்ணீர் போதுமான அளவுக்குக் கிடைக்கலை. அதனால, கிணத்துப்பாசன வசதி இருக்குற நாலு ஏக்கர் நிலத்துல மட்டும் நெல், நிலக்கடலைனு சாகுபடி பண்ணிட்டுருக்கேன். அதே நேரத்துல தரிசு நிலத்துலயும் ஏதாவது பண்ணனுமேனு யோசிச்சு நாட்டுக் கோழிகளை வளர்த்து முட்டைகளை உற்பத்தி செய்யலாம்னு நினைச்சேன்.

அதுக்காகப் பல பண்ணைகளைப் போய்ப் பார்க்க ஆரம்பிச்சேன். அப்போதான் வான்கோழி பத்தி தெரிஞ்சுகிட்டேன். தமிழ்நாட்டுல அவ்வளவா வான்கோழிப் பண்ணைகள் இல்லைங்கிறதால வான்கோழி வளர்ப்புல இறங்கலாம்னு முடிவு செஞ்சேன். அப்புறம் அண்ணன்கூடச் சேர்ந்து தரிசா இருந்த நிலத்தைச் சீர்ப்படுத்தி வான்கோழிப் பண்ணையை ஆரம்பிச்சோம்” என்று முன்கதை சொன்ன சாலமன் தொடர்ந்தார்.

“ஆரம்பத்துல ஒரு மாச வயசுல 550 வான்கோழி குஞ்சுகளை வாங்கிட்டு வந்து வளர்க்க ஆரம்பிச்சோம். குஞ்சுகளை வாங்கும்போது ஒரு மாச வயசுல வாங்கினா இறப்புகள் அதிகமா இருக்காது. அதெல்லாம் வளர ஆரம்பிச்ச பிறகு ஆண் வான்கோழிகளைக் குறிப்பிட்ட அளவுல மட்டும் வெச்சுக்கிட்டு மீதியைக் கழிச்சுடலாம்னு முடிவு செஞ்சோம்.  அதன்படி வான்கோழிகள் அஞ்சாறு மாசம் வளர்ந்தவுடன் கொஞ்சம் கொஞ்சமா விற்பனை செய்ய ஆரம்பிச்சோம். அந்த வகையில 300 வான்கோழிகளை விற்பனை செஞ்சுட்டோம். 15 கோழிகள் சண்டையிலயும் வெப்பம் தாங்காமலும் இறந்துடுச்சு. இப்போ கையில 200 பெட்டை வான்கோழிகளும் 35 ஆண் வான்கோழிகளும் இருக்கு. அதோட 35 நிகோபாரி கோழிகளையும் வளர்த்துட்டு இருக்கேன்” என்று முன்னுரை கொடுத்த சாலமன் தொடர்ந்தார்.  

வளமான வருமானம் தரும் வான்கோழி வளர்ப்பு! - 300 வான்கோழிகள்... ரூ. 2,40,000 வருமானம்!

“வான்கோழிகள் எட்டு மாச வயசுல பருவத்துக்கு வந்து முட்டையிட ஆரம்பிக்கும். இப்போ இங்க இருக்குற 200 பெட்டை வான்கோழிகள் மூலமா முட்டைகள் கிடைச்சுட்டுருக்கு. ஒரு வான்கோழியிலிருந்து வருஷத்துக்கு 60 முட்டைகள் கிடைக்கும். வான்கோழி முட்டைகளுக்கு நல்ல விற்பனை வாய்ப்பு இருக்குறதால, இப்போ முட்டைகளை விற்பனை செஞ்சுட்டுருக்கோம். வான்கோழிகள் 30 மணி நேரத்துக்கு ஒருமுறை முட்டையிடும். பொதுவா வான்கோழிகள் அடைகாக்குறதில்லை. அதனால, இன்குபேட்டர் மூலமா முட்டைகளைப் பொரிக்க வெச்சு குஞ்சுகளை வளர்க்கலாம்னு இருக்கோம். இந்த வான்கோழிகள் இன்னும் ஒரு வருஷம்வரை முட்டைகள் இடும். அதுக்கப்புறம் முட்டைகள் குறைய ஆரம்பிச்சுடும். அதில்லாம ரெண்டாவது வருஷம் கிடைக்கிற முட்டைகளுக்குக் குஞ்சு பொரிப்புத்திறனும் குறைவாத்தான் இருக்கும். அதனால, அடுத்த ‘பேட்ச்’ வான்கோழிகளை உருவாக்கிக்கிட்டு, இந்தத் தாய்க்கோழிகளை ஒரு வருஷம் கழிச்சு விற்பனை செஞ்சுடுவோம்.

வான்கோழிகளுக்கு 4 கிலோ சமச்சீர் உணவு கொடுத்தா ஒரு கிலோ எடை அதிகரிக்கும்னு சொல்வாங்க. அதன்படி, தினமும் காலையில மக்காச்சோளம், தவிடு, அரிசி, கருவாட்டுத்தூள்னு கலந்து கொடுக்கிறோம். மதியம் கோ-4, கோ-5, சூப்பர் நேப்பியர், அரைக்கீரை, பாலக்கீரைனு பசுந்தீவனங்களைக் கொடுக்கிறோம். சாயங்கால நேரத்துல மேய்ச்சலுக்கு அனுப்பிடுவோம். மேய்ச்சலுக்கு அனுப்புற சமயத்துல கொட்டகையைச் சுத்தப்படுத்தி முட்டைகளைச் சேகரிச்சு வெச்சுடுவோம். வான்கோழிகளுக்குக் கொட்டகையில எப்பவும் தண்ணீர் இருக்குற மாதிரி பார்த்துக்குவோம். தாகம் எடுக்குற கோழிகள் தேவையான அளவு தண்ணீரைக் குடிச்சுக்கும்” என்ற சாலமன் விற்பனை மற்றும் வருமானம் குறித்துச் சொல்ல ஆரம்பித்தார். 

வளமான வருமானம் தரும் வான்கோழி வளர்ப்பு! - 300 வான்கோழிகள்... ரூ. 2,40,000 வருமானம்!

“சில்லறையா வாங்குறவங்க உயிர் எடைக்கு 3 கிலோ அளவுல வாங்குவாங்க. மொத்தமா வாங்குறவங்க அதிக எடை இருந்தாலும் கவலையில்லாம வாங்குவாங்க. வான்கோழியைப் பொறுத்தவரைக்கும் எடை அதிகமா வாங்கினாத்தான் நல்லது. ஏன்னா, 3 கிலோ எடையுள்ள வான்கோழியை இறைச்சிக்காக வெட்டும்போது 300 கிராம் வரை கழிவாகிடும். அதே நேரத்துல 6 கிலோ எடையுள்ள வான்கோழியில் 400 கிராம்தான் கழிவாகும்.

அந்தவகையில இதுவரை 300 வான்கோழிகளை (ஒரு கோழி 3 கிலோவிலிருந்து 6 கிலோ எடை என்ற கணக்கில்) உயிர் எடைக்குக் கிலோ 200 ரூபாய்னு விற்பனை செஞ்சதுல 2,40,000 ரூபாய் வருமானம் கிடைச்சுருக்கு. இதுவரை 600 முட்டைகளை ஒரு முட்டை 15 ரூபாய்னு விற்பனை செஞ்சதுல 9,000 ரூபாய் கிடைச்சுருக்கு. மொத்தமா வான்கோழிகள் மூலமா 2,49,000 ரூபாய் வருமானம் கிடைச்சிருக்கு. இதுவரை தீவனம், மருத்துவச்செலவுகள் எல்லாம் சேர்த்து 93,250 ரூபாய்ச் செலவாகியிருக்கு. இதுல குஞ்சுகள் வாங்கின செலவும் அடக்கம். அந்தக்கணக்குல பார்த்தா இதுவரை 1,55,750 ரூபாய் லாபம் கிடைச்சுருக்கு.

இப்போ கையில இருக்குற வான் கோழிகளோட மதிப்பு கிட்டத்தட்ட 3,00,000 ரூபாய் இருக்கும். இன்னும் ஒரு வருஷத்துக்கு இந்த வான்கோழிகள் மூலமா முட்டைகள் கிடைக்கும். அதெல்லாம் அப்படியே லாபம்தான்” என்று சொல்லி மகிழ்ச்சியுடன் விடைகொடுத்தார்.

தொடர்புக்கு, சாலமன், செல்போன்: 89394 39480.


துரை.நாகராஜன் - படங்கள்: தே.சிலம்பரசன்

நோய்த் தாக்குதலுக்குத் தீர்வு!

வா
ன்கோழிகளுக்கு அம்மை, சளி ஆகிய நோய்கள்தான் அதிகமாக வரும். சீரகம், மிளகு, வெந்தயம், மஞ்சள்தூள் ஆகியவற்றில் தலா 2 ஸ்பூன் அளவு எடுத்து ஒன்றாகக் கலந்து சிறிது தண்ணீர் சேர்த்து அரைத்து, வாரம் ஒருமுறை வான்கோழிகள் குடிக்கும் தண்ணீரில் கலந்து கொடுத்துவந்தால், இந்த நோய்கள் வராது.

வசம்பு, பூண்டு மற்றும் மஞ்சள் ஆகியவற்றைத் தலா 100 கிராம் எடுத்து அரைத்து 5 லிட்டர் தண்ணீரில் கலந்து வான்கோழிகள் மீது மாதம் ஒருமுறை தெளித்துவந்தால் தோல் பிரச்னைகள் வராது.

மேய்ச்சல் முறையில் செலவைக் குறைக்கலாம்!

ரு வான்கோழி வளர்வதற்கு 4 சதுரஅடி இடம் தேவை. அதனால், நாம் வளர்க்கப்போகும் கோழிகளின் எண்ணிக்கையை மனதில் கொண்டு அதற்கேற்ற பரப்பில் கொட்டகையை அமைக்க வேண்டும். கொட்டகையைச் சுற்றி மேய்ச்சலுக்காகக் காலி இடம் இருக்க வேண்டும். கொட்டகையைக் கிழக்கு மேற்காக அமைக்க வேண்டும். மேற்கூரையைத் தென்னை ஓலையால் அமைக்க வேண்டும். 

கொட்டகையின் நான்கு புறங்களிலும் தரையிலிருந்து ஓர் அடி உயரத்துக்கு ஹாலோ-பிளாக் கற்களால் சுவர் அமைத்து, அதன்மேல் கம்பிவேலி அமைத்துக் கொள்ளலாம். நேரடியாகக் கொட்டகைக்குள் மழையாலோ வெயிலாலோ பாதிப்பு ஏற்படக் கூடாது. கொட்டகையின் உள்தரையில் மூன்று அங்குல உயரத்துக்குக் கடலைப்பொட்டைப் பரப்பிவிட வேண்டும். கடலைப் பொட்டுக்குப் பதிலாகத் தேங்காய் நார்க்கழிவு, நெல் உமி ஆகியவற்றையும் பயன்படுத்தலாம். 20 நாள்களுக்கு ஒருமுறை கடலைப்பொட்டை மாற்ற வேண்டும். கொட்டகையில் அடைத்து வைத்து வளர்த்தால், தீவனச் செலவு அதிகமாகும். அதனால், கொஞ்சம் மேய்ச்சல் முறையிலும் வளர்த்தால், செலவு குறையும். 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு