Published:Updated:

நாடன்... ரஸ்தாளி... கற்பூரவள்ளி... பூலாஞ்செண்டு... செவ்வாழை!

ஒட்டுமொத்த விகடனுக்கும் ஒரே ஷார்ட்கட்

Use App
நாடன்... ரஸ்தாளி... கற்பூரவள்ளி... பூலாஞ்செண்டு... செவ்வாழை!
நாடன்... ரஸ்தாளி... கற்பூரவள்ளி... பூலாஞ்செண்டு... செவ்வாழை!

4 ஏக்கர்... 1,550 வாழை மரங்கள்... ரூ. 2,37,500 லாபம்!மகசூல்

பிரீமியம் ஸ்டோரி

“ஒரே ரக வாழையை மட்டும் சாகுபடி செய்யாம, பல வாழை ரகங்களைச் சாகுபடி செஞ்சா, ஒண்ணுக்கு விலை கிடைக்காட்டியும் இன்னொண்ணு மூலமா சரிக்கட்டிடலாம்கிற விஷயத்தை எனக்குச் சொல்லித்தந்தது ‘பசுமை விகடன்’ புத்தகம்தான். அதைத் தொடர்ந்து கடைப்பிடிச்சு வெற்றிகரமா விவசாயம் பண்ணிக்கிட்டுருக்கேன்” என்று மகிழ்ச்சி பொங்கச் சொல்கிறார், தூத்துக்குடி மாவட்டத்தைச் சேர்ந்த மருத்துவர் சந்திரசேகர். மருத்துவப் பணி செய்து கொண்டு ஓய்வு நேரத்தில் இயற்கை விவசாயத்தில் ஈடுபட்டு வருகிறார், சந்திரசேகர்.

நாடன்... ரஸ்தாளி... கற்பூரவள்ளி... பூலாஞ்செண்டு... செவ்வாழை!

தூத்துக்குடி மாவட்டம், ஏரல் எனும் ஊரிலிருந்து 2 கிலோமீட்டர் தொலைவில் இருக்கும் ராஜபதி எனும் கிராமத்தில்தான் சந்திரசேகரின் வாழைத்தோட்டம் இருக்கிறது.

“தாத்தா, அப்பா காலத்துல நெல், வாழைனு சாகுபடி செய்துட்டு இருந்தாங்க. நான் மருத்துவப் படிப்பு முடிச்சதும் பக்கத்துல இருக்குற குரும்பூர்ங்கிற கிராமத்துல கிளினிக் ஆரம்பிச்சுட்டேன். 30 வருஷமா மருத்துவம் பார்த்துட்டுருக்கேன். முன்னாடியெல்லாம் தொழுவுரத்தை மட்டும்தான் பயன்படுத்தி விவசாயம் செஞ்சாங்க. பசுமைப்புரட்சிக்கு அப்புறம் ரசாயன உரம், பூச்சிக்கொல்லிகளைப் புகுத்திட்டாங்க. ஆரம்பக் காலங்கள்ல குறைவான உரம், பூச்சிக்கொல்லிகளைத்தான் பயன்படுத்துனாங்க. அப்புறம் அதிக மகசூல் ஆசையில அளவுக்கதிகமாகப் பயன்படுத்த ஆரம்பிச்சதுல மண்ணும் கெட்டுபோச்சு. படிப்படியா விளைச்சல் குறைய ஆரம்பிக்கவும் எங்க தோட்டத்துல விவசாயத்தையும் குறைச்சுக்கிட்டாங்க. நான் ரொம்ப வருஷம் விவசாயம் பக்கம் வராம கிளினிக், வீடுன்னே இருந்துட்டேன். ஏழு வருஷத்துக்கு முன்ன, சென்னைக்கு ஒரு மீட்டிங்குக்காகப் போயிருந்தேன். அப்போ எதேச்சையா ஒரு கடையில பசுமை விகடனைப் பார்த்து வாங்கிப் படிச்சேன். அதுல இயற்கை விவசாயம் பத்தி நிறைய விஷயங்கள் இருந்துச்சு. அன்னைக்கு நான் வாங்குன புத்தகத்துல இயற்கை முறை வாழைச் சாகுபடி பத்தின மகசூல் கட்டுரை வந்துருந்துச்சு. அதைப்படிக்கவும் சந்தோஷமா இருந்துச்சு. அப்புறம் தொடர்ந்து பசுமை விகடனைப் படிக்க ஆரம்பிச்சேன். 

நாடன்... ரஸ்தாளி... கற்பூரவள்ளி... பூலாஞ்செண்டு... செவ்வாழை!

என் மூத்த மகன் சென்னையில் சாஃப்ட்வேர் இன்ஜினீயரா இருக்கான். அவன் விடுமுறையில வீட்டுக்கு வந்தபோ வீட்டுல இருந்த பசுமை விகடனைப் படிச்சுட்டு... ‘நாமளும் இயற்கை விவசாயம் செய்வோம்ப்பா’னு சொன்னான். அதுக்கப்புறம்தான் எனக்கு இயற்கை முறையில திரும்பவும் நம்ம தோட்டத்துலயே வாழைச் சாகுபடியை ஆரம்பிக்கலாம்னு தோணுச்சு. அப்புறம் கருவேல் மரம் மண்டிக்கிடந்த இந்த நாலு ஏக்கர் நிலத்தைச் சரிபண்ணி இயற்கை விவசாயத்தை ஆரம்பிச்சோம்” என்று முன்கதை சொன்ன சந்திரசேகர் தொடர்ந்தார். “போன 2016-ஆம் வருஷம் இயற்கை விவசாயத்தை ஆரம்பிச்சோம். ஆரம்பத்துல ஒன்றரை ஏக்கர் பரப்புல நாடன், ரஸ்தாளி, கற்பூரவள்ளி, பூலாஞ்செண்டு, செவ்வாழைனு வாழை ரகங்களைக் கலந்து விதைச்சோம்.

இயற்கை இடுபொருள்களைக் கொடுத்ததுல நல்ல மகசூல் கிடைச்சது. அடுத்து மீதியிருந்த இரண்டரை ஏக்கர் நிலத்துலயும் அதே அஞ்சு ரக வாழைகளை விதைச்சோம். இப்போ நாலு ஏக்கர்லயும் வாழை இருக்கு. அறுவடை முடிஞ்சு மறுதாம்பு வளர்ந்துட்டுருக்கு.

நாலு ஏக்கர்லயும் சேர்த்து 750 நாடன் ரக வாழை, 600 ரஸ்தாளி, 300 பூலாஞ்செண்டு, 100 கற்பூரவள்ளி, 50 செவ்வாழைனு மொத்தம் 1,800 கன்னுகளை நடவு செஞ்சோம். அதுல 250 கன்னுகள் காத்துல சாய்ஞ்சுடுச்சு. மீதி 1,550 மரங்கள்லயும் தார்களை அறுவடை பண்ணி விற்பனை செஞ்சுட்டேன்” என்ற சந்திரசேகர் நிறைவாக மகசூல் மற்றும் வருமானம் குறித்துச் சொன்னார். “மொத்தம் இருந்த 1,550 வாழை மரங்கள்ல 750 மரங்களை ஒரு குலை 250 ரூபாய்னு விலைபேசி விட்டுட்டேன். அவங்களே அறுவடை செஞ்சு பணத்தைக் கொடுத்துட்டாங்க. அந்த வகையில 1,87,500 ரூபாய் வருமானம் கிடைச்சது. மீதி 800 மரங்களை ஒரு குலை 200 ரூபாய்னு விலை பேசி அறுவடைக்கு விட்டது மூலமா 1,60,000 ரூபாய் வருமானம் கிடைச்சது.

மொத்தம் நாலு ஏக்கர்ல 3,47,500 ரூபாய் வருமானம் கிடைச்சது. இதில் உழவு, தொழுவுரம், விதைக்கிழங்கு, நடவு, இடு பொருள்கள்னு எல்லாம் சேர்த்து 1,10,000 ரூபாய் செலவாச்சு. அதுபோக, மீதி 2,37,500 ரூபாய் லாபமா நின்னது. அடுத்த அறுவடையப்போ... குலை கணக்குல விலை பேசாம இயற்கை அங்காடிகள்ல எடைக் கணக்குல விற்பனை செய்யலாம்னு இருக்கேன். அப்படி விற்பனை செஞ்சா இன்னும் கூடுதல் விலை கிடைக்கும்” என்று சொல்லி விடை கொடுத்தார்.

தொடர்புக்கு, சந்திரசேகர், செல்போன்: 94439 79761

இ.கார்த்திகேயன் - படங்கள்: ப.கதிரவன்

இப்படித்தான் சாகுபடி செய்யணும்...

ரு ஏக்கர் நிலத்தில் இயற்கை முறையில் வாழைச்சாகுபடி செய்வது குறித்துச் சந்திரசேகர் சொன்ன விஷயங்கள் பாடமாக இங்கே...  

நாடன்... ரஸ்தாளி... கற்பூரவள்ளி... பூலாஞ்செண்டு... செவ்வாழை!

கார்த்திகை, மாசி, வைகாசி ஆகிய பட்டங்கள் வாழைச்சாகுபடிக்கு ஏற்றவை. தேர்வு செய்த ஒரு ஏக்கர் நிலத்தில் ஓர் உழவு ஓட்டிப் பத்து நாள்கள் காயவிட வேண்டும். பிறகு மீண்டும் இரண்டு முறை உழவு செய்து 5 நாள்கள் காயவிட வேண்டும். 7 அடி இடைவெளியில் ஓர் அடி சதுரம், ஒன்றரை அடி ஆழம் என்ற அளவில் குழிகள் எடுக்க வேண்டும். ஒரு ஏக்கர் பரப்பில் 850 முதல் 890 குழிகள்வரை எடுக்கலாம். ஒவ்வொரு குழிக்குள்ளும் ஒரு கூடை தொழுவுரம், இரண்டு கைப்பிடி மண்புழு உரம் என்ற அளவில் போட்டு 5 நாள்கள் குழிகளை ஆற விட வேண்டும்.

நடவுக்காகத் தேர்வு செய்யப்படும் விதைக்கிழங்குகள் ஒவ்வொன்றும் ஒன்றரை கிலோ முதல் இரண்டு கிலோ வரை எடை இருக்க வேண்டும். ஒரு பாத்திரத்தில் 20 லிட்டர் தண்ணீரில் 1 லிட்டர் பஞ்சகவ்யாவைக் கலந்து வைத்துக்கொள்ள வேண்டும். இன்னொரு பாத்திரத்தில் 20 லிட்டர் தண்ணீரில் 1 லிட்டர் இ.எம் கரைசலைக் கலந்து வைத்துக்கொள்ள வேண்டும்.

விதைக்கிழங்குகளை முதலில் பஞ்சகவ்யா கரைசலில் மூழ்க வைத்து எடுத்து, அடுத்து இ.எம் கரைசலில் மூழ்க வைத்து எடுக்க வேண்டும். பிறகு 15 நிமிடங்கள் உலர்த்திக் குழிகளில் நடவு செய்து மேல்மண் கொண்டு குழிகளை நிரப்ப வேண்டும்.

தொடர்ந்து மண்ணின் ஈரப்பதத்தைப் பொறுத்துத் தண்ணீர் பாய்ச்சி வர வேண்டும். நடவு செய்த 5-ஆம் நாளுக்கு மேல் குழிகளில் காற்றுப்புகாதவாறு இறுக்கமாக மண் அணைத்து விட வேண்டும்.  20-ஆம் நாளுக்கு மேல் குருத்து வெளிப்படும். 20-ஆம் நாளில் 200 லிட்டர் தண்ணீரில் 6 லிட்டர் பஞ்சகவ்யாவைக் கலந்து பாசன நீரில் விட வேண்டும். 35-ஆம் நாளில் 200 லிட்டர் தண்ணீரில் 3 லிட்டர் இ.எம் கரைசலைக் கலந்து பாசன நீரில் விட வேண்டும். அதிலிருந்து 15 நாள்களுக்கு ஒருமுறை சுழற்சி முறையில் பஞ்சகவ்யா, இ.எம் கரைசல் இரண்டையும் பாசன நீரில் கலந்துவிட வேண்டும்.

40-ஆம் நாளுக்கு மேல் இலைகள் வரும். வாழையைச் சுற்றி தண்ணீர் தேங்காமல் பார்த்துக்கொள்ள வேண்டும். வாழையில் குலைதள்ளும் நேரத்தில் தண்டுத்துளைப்பான் தாக்குதல் இருக்கும். அதனால், அந்தச்சமயத்தில் 10 லிட்டர் தண்ணீருக்கு 300 மில்லி வேப்பங்கொட்டைக் கரைசல் அல்லது இஞ்சி பூண்டுக்கரைசல் என்ற விகிதத்தில் கலந்து கைத்தெளிப்பான் மூலம் தெளிக்க வேண்டும். ஒவ்வொரு ரக வாழையும் அதன் வயதைப் பொறுத்துக் குலைபோட ஆரம்பிக்கும். தொடர்ந்து அறுவடை செய்யலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு