Published:Updated:

சிறப்பான வருமானம் கொடுக்கும் சிறுதானியங்கள்! - வரகு, கேழ்வரகு, துவரை...

சிறப்பான வருமானம் கொடுக்கும் சிறுதானியங்கள்! - வரகு, கேழ்வரகு, துவரை...
பிரீமியம் ஸ்டோரி
News
சிறப்பான வருமானம் கொடுக்கும் சிறுதானியங்கள்! - வரகு, கேழ்வரகு, துவரை...

மகசூல்

ழையை மட்டுமே நம்பிப் பயிர் செய்யும் பெரும்பாலான மானாவாரி விவசாயிகள், சிறுதானியங்களைத்தான் சாகுபடி செய்கிறார்கள். சிறுதானியங்கள்தான் அதிகப்பாடு இல்லாமல் மகசூல் கொடுக்கக்கூடியவை. அதோடு, வறட்சியையும் தாங்கி வளரக்கூடியவை. அதனால்தான், தமிழகத்தின் தென் மாவட்டங்களில் மானாவாரி நிலங்களில் சிறுதானியங்கள் அதிகளவில் சாகுபடி செய்யப்படுகின்றன. அந்த வகையில், வரகு, கேழ்வரகு ஆகியவற்றை விதைத்து, அவற்றுக்கிடையில் ஊடுபயிராகத் துவரைச் சாகுபடி செய்து திருப்திகரமாக மகசூல் எடுத்திருக்கிறார், விருதுநகர் மாவட்டத்தைச் சேர்ந்த ரெங்கசாமி.

சிறப்பான வருமானம் கொடுக்கும் சிறுதானியங்கள்! - வரகு, கேழ்வரகு, துவரை...

விருதுநகரிலிருந்து 6 கிலோமீட்டர் தொலைவில் உள்ள ரோசல்பட்டி எனும் கிராமத்தில் உள்ளது, ரெங்கசாமியின் நிலம். ஒரு முற்பகல் பொழுதில் ரெங்கசாமியைச் சந்தித்தோம். “இந்தப்பகுதி முழுக்க மானாவாரி விவசாயம்தான். நான் ஆறாம் வகுப்புக்கு மேல பள்ளிக்கூடம் போகலை. அப்பாகூடச் சேர்ந்து விவசாயம் பார்க்க ஆரம்பிச்சுட்டேன். அப்போ பருத்தி, வத்தல் (மிளகாய்), மக்காச்சோளம், சிறுதானியங்கள்னு சாகுபடி செய்வோம். அடியுரமா தொழுவுரம் போடுறதோடு சரி. வேற எதையும் பயன்படுத்தமாட்டோம்.

கிடைக்கிற மழையை வெச்சு பயிர் தன்னால விளைஞ்சு வந்துடும். இடையிலதான் வேளாண்மைத்துறையில இருந்து வந்து ‘அதிக மகசூல் கிடைக்கும்’னு ஆசைகாட்டி எல்லோருக்கும் ரசாயன உரம், பூச்சிக்கொல்லினு கொடுத்துப் பழகுனாங்க. ஊரே அதுக்கு மாறவும் நானும் மாறிட்டேன்.தீவனச்சோளத்துக்கு ரசாயன உரம் போட்டால், மளமளனு வளரும். ஆனால், மாடுகளுக்கு அதைக் கொடுத்தா பாலெல்லாம் அதிகமாகக் கறக்காது. ஒப்பிட்டுப் பார்க்குறப்போ... உரமே போடாத சோளம் வளர்ச்சி குறைவா இருந்தாலும் பால் கூடுதலாகக் கிடைக்கும். அதே மாதிரி, பருத்தி, மக்காச்சோளத்துக்கெல்லாம் ரசாயன உரம் போட ஆரம்பிச்சப்போ மகசூல் அதிகமாத்தான் கிடைச்சது. ஆனா, அதுவரைக்கும் நாங்க பார்க்காத நோய், பூச்சிகளெல்லாம் தாக்க ஆரம்பிச்சது. மண்ணும் இறுக ஆரம்பிச்சுத் தண்ணீர் அதிகம் தேவைப்பட ஆரம்பிச்சது. அதுக்கப்புறம்தான் நான் சுதாரிச்சு ரசாயன உரத்தைக் குறைக்க ஆரம்பிச்சேன்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
சிறப்பான வருமானம் கொடுக்கும் சிறுதானியங்கள்! - வரகு, கேழ்வரகு, துவரை...

ஒரு நண்பர்தான், இயற்கை விவசாய முறையை எனக்குச் சொல்லிக் கொடுத்து, ‘பசுமை விகடன்’ புத்தகத்தையும் கொடுத்தார். ஏற்கெனவே தொழுவுரம், ஆட்டுக்கிடை, மாட்டுக்கிடை பத்தியெல்லாம் தெரிஞ்சுருந்தாலும்... மூலிகைப் பூச்சிவிரட்டி, பஞ்சகவ்யா, ஜீவாமிர்தம், அமுதக்கரைசல் மாதிரியான இடுபொருள்கள்லாம் எனக்குப் புதுசாத்தான் தெரிஞ்சது. அப்புறம்தான் அதையெல்லாம் பயன்படுத்த ஆரம்பிச்சேன்” என்ற ரெங்கசாமி, தனது இயற்கை விவசாய அனுபவங்கள் குறித்துச் சொல்ல ஆரம்பித்தார்.

“இறவைப் பாசனம் உள்ள நிலத்துல, அரை ஏக்கர்ல மக்காச்சோளம் போட்டு மூலிகைப் பூச்சிவிரட்டி, பஞ்சகவ்யா, ஜீவாமிர்தம், அமுதக்கரைசல் மாதிரியான இடுபொருள்களைப் பயன்படுத்திப் பார்த்தேன். விளைச்சல்ல நல்ல மாற்றம் தெரிஞ்சது. அதுல இருந்து நாலு வருஷமா இறவைப்பாசன நிலத்துல இயற்கை விவசாய முறையிலதான் சாகுபடி செய்துட்டுருக்கேன். ஆனா, மானாவாரியா விளைவிக்கிற சிறுதானியங்களுக்கு, எங்க அப்பா காலத்துல இருந்து இப்போ வரைக்கும், நாங்க எந்த இடுபொருளையும் கொடுக்குறது கிடையாது. அடியுரமாகத் தொழுவுரம் போடுறது மட்டும்தான். இது மொத்தம் நாலு ஏக்கர் மானாவாரி நிலம். ஒரு ஏக்கர் நிலத்துல வரகு, கேழ்வரகு போட்டு அதுல ஊடுபயிராகத் துவரை போட்டு அறுவடை முடிஞ்சது. ஒரு ஏக்கர் நிலத்துல தீவனச் சோளம் இருக்கு. மீதி ரெண்டு ஏக்கர் நிலத்தை உழுது தயார் செஞ்சு வெச்சுருக்கேன்” என்ற ரெங்கசாமி, மகசூல் மற்றும் வருமானம் குறித்துச் சொல்ல ஆரம்பித்தார்.

“அரை ஏக்கர் நிலத்துல வரகும், அரை ஏக்கர் நிலத்துல கேழ்வரகும் போட்டிருந்தேன். மொத்தமா ஒரு ஏக்கர்லயும் சேர்த்து ஊடுபயிராகத் துவரை போட்டிருந்தேன். எல்லாத்தையும் அறுவடை செஞ்சப்போ வரகுல 256 கிலோவும், கேழ்வரகுல 123 கிலோவும், துவரையில 412 கிலோவும் கிடைச்சது. மூணையுமே விதைக்காகத்தான் விற்பனை செஞ்சுட்டுருக்கேன். வரகையும், கேழ்வரகையும் கிலோ 40 ரூபாய்னு விற்பனை செய்றேன். துவரையை கிலோ 60 ரூபாய்னு விற்பனை செய்றேன். 

இதுவரைக்கும் 100 கிலோ வரகு, 50 கிலோ கேழ்வரகு, 150 கிலோ துவரைனு விற்பனை செஞ்சுருக்கேன். அதுமூலமா 15,000 ரூபாய் வருமானம் கிடைச்சுருக்கு. விதைப்புல இருந்து அறுவடை வரை 11,000 ரூபாய் செலவு ஆகியிருக்கு. அதுபோக இப்போ வரைக்கும் 4,000 ரூபாய் லாபம். இன்னும் மீதி இருக்குற தானியங்களையும் இதே விலைக்கு விற்பனை செஞ்சுட்டா 24,880 ரூபாய் வருமானம் கிடைக்கும்னு எதிர்பார்க்குறேன். அது முழுக்க அப்படியே லாபம்தான். ஆக ஒரு ஏக்கர்ல வரகு, கேழ்வரகு, துவரை மூணு மூலமா 28,880 ரூபாய் மொத்த லாபமாக் கிடைக்கும்” என்று சொல்லிச் சிரித்துக்கொண்டே விடைகொடுத்தார்.

தொடர்புக்கு, ரெங்கசாமி, செல்போன்: 83000 54080.

இ.கார்த்திகேயன் - படங்கள்: ஆர்.எம்.முத்துராஜ்

இப்படித்தான் சாகுபடி செய்யணும்...

ரு ஏக்கர் பரப்பில் வரகு, கேழ்வரகு மற்றும் ஊடுபயிராகத் துவரை ஆகியவற்றைச் சாகுபடி செய்வது குறித்து ரெங்கசாமி சொன்ன விஷயங்கள் பாடமாக இங்கே...

சிறுதானியங்கள் அனைத்து வகை மண்ணிலும் வளரக்கூடியவை. இவற்றுக்கு ஆடிப்பட்டம் ஏற்றது. தேர்வு செய்த ஒரு ஏக்கர் நிலத்தில் சித்திரை மாதம் கோடை உழவு செய்து வைக்க வேண்டும். பிறகு வைகாசி மாதம் ஓர் உழவு செய்து நிலத்தைக் காய விட வேண்டும். ஆனி மாதம் நான்கைந்து டிராக்டர் தொழுவுரத்தை நிலத்தில் ஆங்காங்கே குவித்து வைக்க வேண்டும். ஆடி மாதம் முதல் மழை பெய்தவுடன், தொழுவுரத்தைக் கலைத்துவிட்டு, ஓர் உழவு செய்து விதைக்க வேண்டும். அரை ஏக்கர் பரப்பில் விதைக்க 3 கிலோ வரகு விதை தேவை. அரை ஏக்கர் பரப்பில் விதைக்க 1 கிலோ கேழ்வரகு விதை தேவை. ஒரு ஏக்கர் பரப்பில் ஊடுபயிராகத் துவரை விதைக்க 3 கிலோ துவரை விதை தேவை.

வரகு, கேழ்வரகு விதைகளைப் பரவலாகத் தூவ வேண்டும். ஒரு கைப்பிடி அளவு விதையை எடுத்து, எட்டு வீச்சுகள் வரை வீசி விதைக்க வேண்டும். துவரை விதையைச் சாலில் விதைக்க வேண்டும். மழை கிடைத்தாலும், கிடைக்காவிட்டாலும்... விதைத்த 6-ஆம் நாளுக்கு மேல் முளைப்பு தெரியும். 30 மற்றும் 65-ஆம் நாள்களில் களை எடுக்க வேண்டும். வேறு பராமரிப்பு எதுவும் தேவையில்லை. கேழ்வரகு 90-ஆம் நாளுக்கு மேல் அறுவடைக்கு வரும். வரகு, 110-ஆம் நாளுக்கு மேல் அறுவடைக்கு வரும். துவரை 175-ஆம் நாளுக்கு மேல் அறுவடைக்கு வரும். துவரையில் காய் பிடிக்கும் நேரத்தில் காய்ப்புழு தாக்குதல் வரும். அதனால், பூவெடுக்கும் சமயத்திலேயே இஞ்சி பூண்டுக் கரைசலைத் தெளித்து விட வேண்டும்.