Published:Updated:

பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!

பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!
பிரீமியம் ஸ்டோரி
News
பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!

பூச்சி மேலாண்மை - 4

லகத்தில் உள்ள அனைத்து உயிர்களுக்கும் தலைமை என்றால் அவை பூச்சிகளாகத்தான் இருக்க முடியும். மனிதர்களைவிடவும் தனிச்சிறப்பு பெற்று விளங்குபவை பூச்சிகள்தாம். மனிதர்களுக்கு ஒரு கருவில் ஓர் உயிர்தான் உருவாகும் என்பது நியதி. அபூர்வமாக ஒன்றைவிடக் கூடுதல் குழந்தைகள் உருவாகலாம். ஆனால், பூச்சி இனங்களில் ஒரே ஒரு முட்டையிலிருந்து ஒரு புழு முதல் ஓராயிரம் புழுக்கள் வரை உருவாகின்றன.

பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!

உதாரணமாகக் குளவிகளை எடுத்துக்கொள்வோம். குளவிகளில் பல ரகங்கள் இருக்கின்றன. ஒரேயொரு முட்டையிலிருந்து ஒரு புழுவை உருவாக்கும் குளவிகள், 60 புழுக்கள்வரை உருவாக்கும் குளவிகள், 1,000 புழுக்களை உருவாக்கும் குளவிகள் எனப் பல வகைகள் இருக்கின்றன. முட்டை, புழு, கூட்டுப்புழு, தாய் அந்துப் பூச்சி என்பவைதான் பூச்சிகளின் வாழ்க்கை நிலை. இவற்றில் குழந்தைப்பருவமான புழுப் பருவத்திலேயே இனப்பெருக்கம் செய்யும் பூச்சி இனங்கள்கூட இருக்கின்றன.

வாழும் இடத்துக்கு ஏற்ப மாறிக்கொள்ளும் திறனிலும் பூச்சிகள்தாம் முன்னிலையில் இருக்கின்றன. கொசு, தண்ணீரில் முட்டையிடுகிறது. புழுப்பருவம் மற்றும் கூட்டுப்பழுப்பருவம் ஆகியவை தண்ணீரில் இருக்கின்றன. கொசுவாக உருவெடுத்தபிறகு, தண்ணீரை விட்டுப் பறந்து வெளியேறி விடுகிறது. இதேபோலத்தான் தட்டானும். இதுவும் தண்ணீரில் முட்டையிடுகிறது. புழுப்பருவம் தண்ணீரில் இருக்கிறது. தட்டானாக உருவெடுத்தபிறகு, தண்ணீரைவிட்டுப் பறந்து வெளியேறி விடுகிறது. ஆனால், கொசுவுக்கு எதிரி தட்டான்தான். நாம் தெளிக்கும் பூச்சிக்கொல்லிகளால் அதிகம் பாதிக்கப்படுபவை தட்டான்கள்தான். கொசுக்களைக் கொல்லத் தெளிக்கும் பூச்சிக்கொல்லியிலிருந்து கொசுக்கள் தப்பித்து விடுகின்றன. கொசுக்களை இயற்கையில் அழிக்கும் தட்டான்கள் பூச்சிக்கொல்லிகளால் அழிந்து விடுகின்றன. அதற்குக் காரணம், இந்தப்பூச்சிகளின் உருவ அமைப்பில் உள்ள வேறுபாடுதான். நாம் தெளிக்கும் பூச்சிக்கொல்லிகள், உருவத்தில் பெரியதாக இருக்கும் பூச்சிகள் மீதுதான் அதிகமாகப் படுகின்றன. பூச்சிகளின் உருவம் சிறியதாக இருக்கும்போது அவற்றின் எதிர்ப்புத்திறன் அதிகமாக உள்ளது. அதனால், பூச்சிக்கொல்லிகளிலிருந்து தப்பிக்கும் வாய்ப்பு கிடைத்து விடுகிறது.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

முட்டை, புழு, கூட்டுப் புழு, தாய் அந்துப்பூச்சி என நான்கு நிலைகளில். ஒவ்வொரு நிலையிலும் ஒவ்வொரு சூழ்நிலையில் வாழக்கூடிய பூச்சிகள் இருக்கின்றன. எடுத்துக்காட்டு, காண்டாமிருக வண்டு. இதன் புழுப்பருவத்தைத்தான் ‘சாணிப்புழு’ என்கிறோம். சாணியில் இருக்கும் புழுதான் பின்னாளில் காண்டாமிருக வண்டாக மாறித் தென்னை மரத்தில் பிரச்னையை உருவாக்குகிறது.

பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!

விவசாயத்தில் பல்வேறு பிரச்னைகளை உருவாக்கும் பூச்சிகளை அழிக்க வேண்டும் என்றுதான் நாம் யோசிக்கிறோம். ஆனால், பூச்சிகளை அழிப்பது அவ்வளவு சுலபமான செயல் இல்லை. பூச்சிகள் நம்மைவிடப் புத்திசாலிகள். அவற்றை அழிக்கவேண்டுமென்றால், முறையான திட்டமிடல் அவசியம். பூச்சிகளைத் தொடர்ந்து கண்காணித்து, அவற்றின் நான்கு நிலைகளையும் தெரிந்துகொள்ள வேண்டும். இந்த நான்கு நிலைகளில் எந்த நிலையில் நமக்கு அதிகத் தொந்தரவு இருக்கிறது, , எந்தச் சூழ்நிலையில் இருக்கின்றன என்பதையும் தெரிந்துகொண்டு... அதற்கு ஏற்ப நமது எதிர் நடவடிக்கைகளை அமைத்துக்கொள்ள வேண்டும்.

சாதாரணமாகத் தாவரங்களில் பூச்சிகள் இருப்பது நமக்குத் தெரியும். வீட்டில் இருக்கும் கரப்பான் பூச்சி, அழுகிப்போகும் உடலில் இருக்கும் புழுக்கள், மண்ணில் உருவாகும் பூச்சிகள், சேமித்து வைக்கும் தானியங்களில் உருவாகும் புழுக்கள் மற்றும் பூச்சிகள், தோல் ஆடைகள் மற்றும் காலணிகளில் உருவாகும் பூச்சிகள், கால்நடைகள்மீது உருவாகும் பூச்சிகள், புத்தகத்தில் உருவாகும் பூச்சிகள் என உலகத்தில் எங்கும் பூச்சிகள் பரவிக்கிடக்கின்றன. சொல்லப் போனால் நாம் வாழும் உலகில் பூச்சிகள் வாழவில்லை. பூச்சிகளின் உலகில்தான் நாம் வாழ்கிறோம். மனிதர்கள் உள்படத் தங்களின் எதிரிகளிடமிருந்து... உருவ அமைப்பில் உள்ள வேறுபாடுகள், வாழ்க்கைச் சுழற்சியில் ஏற்படும் வேறுபாடுகள் போன்றவற்றின் மூலம் சுலபமாகத் தங்களைக் காத்துக் கொள்கின்றன, பூச்சிகள்.

மனிதர்களின் பல நடவடிக்கைகள், பூச்சிகளின் வாழ்க்கை முறையைப் பார்த்து உருவானவைதான். மனிதன்தான் தனக்கான உணவை உற்பத்தி செய்து, எதிர்காலத் தேவைக்காகச் சேமித்து வைக்கிறான் என நினைத்தால் அது உண்மையல்ல. இந்தப் பழக்கத்தை எறும்புகளிடமிருந்துதான் மனிதன் கற்றுக்கொண்டான். இன்னும் சொல்லப்போனால் மனிதர்களுக்கு விவசாயத்தைச் சொல்லிக் கொடுத்ததும்கூட எறும்புகள்தான் என்று சொல்லப்படுகிறது.

அமெரிக்காவில் ‘இலை வெட்டி எறும்புகள்’ என்று ஒரு வகை எறும்புகள் இருக்கின்றன. அவை, இலைகளைச் சின்னச் சின்னதாக வெட்டித் தங்களது வாயில் உள்ள கொடுக்களுக்கிடையே வைத்துத் தங்களது இடத்துக்குள் கொண்டு போகின்றன. அங்கு அவை சிறிய வயல்களை உருவாக்கி வைத்திருக்கின்றன. அந்த வயல்களில் இந்த இலைகளைப் போட்டு ஒரு சில பூஞ்சணங்களை உருவாக்கி, அவற்றைத் தங்களது குழுக்களுக்கு உணவாகக் கொடுக்கின்றன. இப்படிப் புற்றுக்குள்ளேயே விவசாயம் செய்கின்றன, எறும்புகள்.

பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!

எறும்புகள்தான் குழுவாக வாழும் முறையை மனிதனுக்குக் கற்றுக்கொடுத்தவை. கறையான்கள், தேனீக்கள் ஆகியவை கூட்டு வாழ்க்கையை மனிதனுக்குக் கற்றுக்கொடுத்த உயிரினங்கள். எதிர்காலத் தேவைக்காகச் சேமித்து வைக்கும் பழக்கம் மட்டுமல்ல... சேமிப்புக் கலன்களை உருவாக்கும் முறையையும் எறும்புகள்தான் கற்றுக் கொடுத்திருக்கின்றன. எறும்புகளில் ‘தேன் பானை எறும்புகள்’ என்ற ரகம் இருக்கிறது. சேமித்து வைக்கும் உணவுப் பொருள்கள், தேன் போன்ற ஒரு பொருளைச் சேமித்து வைக்கக் குடம் போன்ற ஒரு அமைப்பை உருவாக்கச் சில யுக்திகளைக் கையாண்டன, அந்த எறும்புகள். அதற்காக வேலைக்கார எறும்புகள் புற்றுக்குள்ளேயே சென்று தலைகீழாகத் தொங்கும். இதனால், அதன் வயிறு வீங்கிப் பானைபோல் ஆகிவிடும். அதில் அந்தத் தேனைச் சேமித்து வைத்துக்கொண்டு தொங்கிக்கொண்டிருக்கும். அதனால்தான், இந்த ரகத்துக்குத் தேன் பானை எறும்புகள் என்று பெயர் வந்தது.

மனிதனுக்குத் தற்காப்புக் கலையையும் பூச்சிகள் கற்றுக் கொடுத்திருக்கின்றன. குண்டு வீசித் தாக்குவதையும்... ‘குண்டுவீச்சு வண்டுகள்’ என்ற ரக வண்டுகள்தான் மனிதர்களுக்குக் கற்றுக்கொடுத்திருக்கின்றன. எதிரிகள் இவற்றைத் தாக்க முயற்சி செய்தால், தங்களின் உடலில் உள்ள 2 வாயுக்களைக் கலந்து வயிற்றின் பின் பகுதியில் குண்டுபோல வெடிக்க வைக்கின்றன இந்த வண்டுகள். வெடிக்கும்போது தீப்பொறியும் பறக்கும். அதனால், எதிரிகள் பயந்து ஓடி விடுகின்றனர்.இப்படி எதிரிகளிடமிருந்து தப்பிக்கப் பூச்சிகள் பலவித தந்திரங்களைக் கையாளுகின்றன. தொட்டால் சீறும் புழுக்கள் இருக்கின்றன. இறந்ததுபோலக் கிடக்கும் வண்டுகள், புழுக்கள் இருக்கின்றன. எதிரிகள் வரும்போது பட்டாம்பூச்சிகள் பின் இறக்கையைப் பட்டென்று சேர்த்து விரித்துக் கொள்கின்றன. அப்போது ஆந்தையின் கண்போல இறக்கையில் ஒரு தோற்றம் தென்படும். இது எதிரிகளை அச்சுறுத்தும். தன்னை உண்ணும் எதிரி, வாந்தி பேதியாகிச் சாகும் அளவுக்கு நஞ்சுகளைத் தன் உடலில் வைத்திருக்கும் புழுக்களும் இருக்கின்றன. சில பூச்சிகள் தங்களைச் சாப்பிடும் எதிரிகளுக்கு ஒவ்வாமையை ஏற்படுத்துகின்றன. இதை அறிந்திருப்பதால், எதிரிகள் அவ்வகைப் பூச்சிகளைச் சாப்பிடுவதில்லை. இதனால், அந்த வகைப் பூச்சிகள் எதிரிப் பூச்சிகளிடமிருந்து தப்பித்து விடுகின்றன.

உயிரினங்களை முதுகெலும்புள்ளவை, முதுகெலும்பில்லாதவை என இரண்டு வகைப்படுத்தலாம். பூச்சிகள், முதுகெலும்பில்லாத வகையைச் சேர்ந்தவை. அதே நேரத்தில் முதுகெலும்பில்லாதவற்றில், இறக்கைக் கொண்டு பறக்கக்கூடிய ஒரே உயிரினம் பூச்சி மட்டுமே. பூச்சிகளின் பறக்கும் திறன் இன்று வரை மனிதனால் புரிந்துகொள்ள முடியாத ஆச்சர்யம்தான். அடுத்தபடியாகப் பூச்சிகளின் சாப்பிடும் பழக்கம். ஒரு செடியில் எந்தப்பகுதியைப் பூச்சி சாப்பிடுகிறது என்பதைத் துல்லியமாகச் சொல்லவே முடியாது. இலையிலிருந்து வேர்வரை காலி செய்யும் வண்டுகளும் பூச்சிகளும் இருக்கின்றன. அதேபோல, காயைத் தாக்கும் பூச்சிகள், பூவைத் தாக்கும் பூச்சிகள், வேரைத் தாக்கும் பூச்சிகள், தண்டைத் தாக்கும் பூச்சிகள், இலையைத் தாக்கும் பூச்சிகள் , செடியில் உள்ள சாற்றை உறிஞ்சும் பூச்சிகள் எனவும் பல வகைகள் உள்ளன.

-அறிவோம்


நீ.செல்வம்  தொகுப்பு: ஆர்.குமரேசன்

பூச்சிகளும் நம் நண்பர்களே..! - 2.0 - பூச்சிகளை அழிக்க திட்டமிடல் அவசியம்!