Published:Updated:

தக்காளி... பூச்சி மற்றும் நோய் மேலாண்மை!

தக்காளி... பூச்சி மற்றும் நோய் மேலாண்மை!
பிரீமியம் ஸ்டோரி
தக்காளி... பூச்சி மற்றும் நோய் மேலாண்மை!

தொழில்நுட்பம்

தக்காளி... பூச்சி மற்றும் நோய் மேலாண்மை!

தொழில்நுட்பம்

Published:Updated:
தக்காளி... பூச்சி மற்றும் நோய் மேலாண்மை!
பிரீமியம் ஸ்டோரி
தக்காளி... பூச்சி மற்றும் நோய் மேலாண்மை!

கடந்த இதழ் தொடர்ச்சி...

தக்காளிச் சாகுபடியில் கடைப்பிடிக்க வேண்டிய தொழில்நுட்பங்கள் குறித்து... குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரன் சொல்லியிருந்த விஷயங்கள் கடந்த இதழில் இடம் பெற்றிருந்தன. அதன் தொடர்ச்சி இங்கே... 

தக்காளி... பூச்சி மற்றும் நோய் மேலாண்மை!

காய்ப்புழு

தக்காளியில் பெரிய பிரச்னை காய்ப்புழுத்தாக்குதல். தக்காளிச் செடியில் பூப்பூத்துக் காய்கள் உருவாகும் சமயத்தில், அதாவது காய்கள், கடுகின் அளவில் இருக்கும் சமயத்திலேயே... தாய் அந்துப்பூச்சிகள் முட்டையிடத் தொடங்கிவிடும். இப்பூச்சிகள், இலைகளின் பின்புறம், இலைகளின் மேற்புறம் மற்றும் காய்களின் மேலே உள்ள காளிக்ஸ் எனப்படும் பகுதி ஆகிய பகுதிகளில் சுமார் 500 முட்டைகள்வரை இடும். முட்டையிலிருந்து வெளிவரும் இளம் புழுக்கள் முதலில் இலைகளைச் சாப்பிடும். தொடர்ந்து காய்களைத் துளைத்து உள்ளே நுழைய ஆரம்பிக்கும். காய்களும் வளர்ந்துகொண்டே இருப்பதால், காயில் உள்ள துளைகள் அடைபட்டுவிடும். இந்தப்புழுக்கள் பிறந்த 15 நாள்கள் முதல் 20 நாள்கள்வரை தீவிரமாக உணவெடுக்கின்றன. அதன் பிறகு அவை கூட்டுப்புழுப் பருவத்துக்குத் தயாராகிவிடும். அந்த இடைப்பட்ட காலத்தில் காய்க்குள் இருந்தே சாப்பிட்டுக் கொண்டிருக்கும் காய்ப்புழுக்கள் வளர்ந்து காயில் துளையிட்டு வெளிவரும்.

ஒட்டுமொத்த விகடனுக்கும் ஒரே ஷார்ட்கட்!

தக்காளி... பூச்சி மற்றும் நோய் மேலாண்மை!

அந்தச் சமயத்தில்தான் நாம் காய்ப்புழுத் தாக்குதலை உணர முடியும். ஆனால், அந்தச் சமயத்தில் எந்த முறையைக் கையாண்டாலும் காய்களைக் காப்பாற்ற முடியாது. அதனால், முன்னெச்சரிக்கை நடவடிக்கை மூலமாகத்தான் காய்ப்புழுக்களைக் கட்டுப்படுத்த முடியும் என்பதை நினைவில் வைக்க வேண்டும். தக்காளி நடவு செய்த 35-ஆம் நாளில் கிட்டத்தட்டப் பாதி அளவுப் பூக்கள் எடுத்துவிடும். அந்தச் சமயத்தில், ஒரு லிட்டர் தண்ணீருக்கு 50 மில்லி இயற்கைப் பூச்சிவிரட்டி அல்லது ஒரு லிட்டர் தண்ணீருக்கு 30 மில்லி வேப்பெண்ணெய் என்ற விகிதத்தில் கலந்து செடிகள் முழுவதும் படுமாறு தெளிக்க வேண்டும்.

காயிலிருந்து வெளிவரும் புழுக்கள் மண், மண்ணில் உள்ள சருகுகள், தக்காளிச் செடியின் இலை மற்றும் கணு இடைவெளிகள் ஆகியவற்றில்தான் கூட்டுப்புழுப் பருவத்தைக் கழிக்கும். பிறகு அதிலிருந்து வெளிவரக்கூடிய தாய் அந்துப் பூச்சி மறுபடியும் இனப்பெருக்கம் செய்யும். அதனால், வயலில் மண் அணைக்கும்போது மண்ணில் உள்ள கூட்டுப்புழுக்களைச் சேகரித்து அழித்துவிட வேண்டும்.

தக்காளி நடவு செய்யும்போது 15 வரிசைக்கு ஒரு வரிசை சாமந்திப்பூவை நடவு செய்ய வேண்டும். இது கவர்ச்சிப் பயிராக இருந்து, தாய் அந்துப்பூச்சிகளைக் கவரும். ஒரு ஹெக்டேருக்கு 12 இனக்கவர்ச்சிப் பொறிகள் வைப்பதன் மூலமும் காய்ப் புழுக்களைக் கட்டுப்படுத்தலாம். ‘டிரைக்கோகிரம்மா ப்ரெட்டியோசம்’ (Trichogramma Pretiosum) என்ற முட்டை ஒட்டுண்ணியையும் பயன்படுத்தலாம். ஒரு அட்டையில் ஒரு லட்சம் ஒட்டுண்ணிகள் இருக்கும். இதைப் பூப்பூக்கும் நேரத்தில் (வயலில் கட்டி வைக்க வேண்டும். காய்ப்புழுவின் தாய் அந்துப்பூச்சி சிறிய பிஞ்சுகளில் வைக்கும் முட்டைகளை இந்த ஒட்டுண்ணிகள் அழித்துவிடும். ஒரு வாரம் வைத்திருந்து எடுத்து விட வேண்டும். மீண்டும் 25 நாள்கள் இடைவெளியில் இந்த ஒட்டுண்ணி அட்டைகளைக் கட்டிவிட வேண்டும்.

தக்காளி... பூச்சி மற்றும் நோய் மேலாண்மை!

கடைகளில் கிடைக்கும் ‘கிரைசோபெர்லா கார்னியா’ (Chrysoperla Carnea) என்ற இரைவிழுங்கி பூச்சிகளைப் பயன்படுத்தியும் காய்ப்புழுக்களை அழிக்கலாம். இவை புழுக்களைத் தேடிப்பிடித்துச் சாப்பிட்டு விடுகின்றன. நடவு செய்த 30-ஆம் நாளிலிருந்து வாரம் ஒருமுறை, இந்த இரைவிழுங்கிப் பூச்சிகளை வயலில் விடலாம்.காய்ப்புழுக்களை அழிக்கப் ‘பேசில்லஸ் துரின்ஜியான்சிஸ்’ (Bacillus Thuringiensis) என்ற பூஞ்சணத்தையும் பயன்படுத்தலாம். ஒரு லிட்டர் தண்ணீருக்கு 2 கிராம் என்ற விகிதத்தில் கலந்து தெளிக்க வேண்டும். இப்பூஞ்சணம் காய்ப்புழு மேல் வளர்ந்து, புழுவைக் கொன்றுவிடும்.

பூண்டு, வெங்காயம் ஆகியவற்றைத் தக்காளி வயலின் வரப்பில் நடவு செய்தாலும் காய்ப்புழுக்கள் கட்டுப்படும்.

வெள்ளை ஈ

வெள்ளை ஈக்கள் தாக்கிய செடியில் இலைகள், வெளிர் பச்சை நிறத்தில் இருக்கும். அடிப்பகுதி கீழ்நோக்கி சாய்ந்து சுருண்டு அப்படியே பட்டுப்போய்விடும். இது தக்காளியில் ‘பிகோமோ வைரஸ்’ (Begomo Virus) என்ற கிருமியைப் பரப்பும் பூச்சி. இப்பூச்சியால் உண்டாகும் சேதத்தைவிட, இப்பூச்சியால் பரவும் வைரஸால் ஏற்படும் சேதம்தான் அதிகம். இந்த வைரஸ் தாக்கினால் செடிகளில் இலைச்சுருள் நோய் பரவும். நோய் தாக்கிய ஒரு செடியில் அமரும் இப்பூச்சிகள், அடுத்தடுத்து வேறு செடிகளில் அமரும்போது வயலில் உள்ள செடிகள் அனைத்திலும் இந்த இலைச்சுருள் நோயைப் பரப்பும் வைரஸ்கள் பரவிவிடும். வைரஸுக்கு இன்னும் மருந்து கண்டுபிடிக்கப்படவில்லை என்பதால், வெள்ளை ஈக்களை அழித்தால் மட்டுமே இந்த நோயிலிருந்து தக்காளிச் செடிகளைக் காப்பாற்ற முடியும்.

இந்த ஈக்கள் இலைகளில்தான் முட்டையிடுகின்றன. முட்டை இடப்பட்ட இலைகளில்... தோசைமாவைத் தெளித்து விட்டதுபோல வெண்மை நிறத்தில் சில புள்ளிகள் தெரியும். இந்த அறிகுறி தென்பட்டவுடனேயே சுதாரித்து அவற்றை அழிக்க வேண்டும். ஏதாவது செடியில் இலைகள் சுருங்கிக் காணப்பட்டால் அந்தச்செடியை வேரோடு பிடுங்கி, வேறு இடத்துக்குக் கொண்டு போய் எரித்துவிட வேண்டும்.

தழைச்சத்து குறைவாக இருக்கும் வயல், போதுமான அளவு பாசனம் செய்யாத வயல்கள்தான் வெள்ளை ஈக்களின் இலக்கு. தக்காளி வயலைச் சுற்றியோ உள் வரப்புகளிலோ துத்திச் செடிகள் இருந்தாலும் வெள்ளை ஈக்கள் வரக்கூடும். பழைய தகர டப்பாக்களில் மஞ்சள் பெயின்ட் தடவி ஆமணக்கு எண்ணெய் தேய்த்து வயலில் ஆங்காங்கே கட்டி வைத்து வெள்ளை ஈக்களைக் கவர்ந்து அழிக்கலாம். ஒரு ஹெக்டேருக்கு 12 டப்பாக்கள் வரை வைக்கலாம். வாரம் ஒருமுறை டப்பாவைச் சுத்தப்படுத்தி மீண்டும் ஆமணக்கு எண்ணெய் தடவி வைக்க வேண்டும்.

புரோட்டீனியா புழு

புரோட்டீனியா புழுக்கள் இளம்பருவத்தில் இலையைச் சல்லடையாக மாற்றிவிடும். வளர்ந்த நிலையில் இப்புழுக்கள் இலை முழுவதையும் தின்னத் தொடங்கிவிடும். இதன் தாய் அந்துப்பூச்சிகள், கூட்டம் கூட்டமாக இலையில் முட்டையிடுகின்றன. முட்டையிடப்பட்ட இலைகளில் கறுப்பு நிறத்தில் திட்டுத் திட்டாக இருக்கும்.

இந்தப் புழுக்களால் இலைகள்தான் அதிகளவில் பாதிக்கப்படும். இலைகள் இல்லாத செடியில் பூ உருவாகாது. இதன் கூட்டுப் புழுக்கள் மண்ணில் இருக்கும். கோடை உழவு செய்யும்போது, இந்தக் கூட்டுப் புழுக்கள் அழிந்துவிடும். அதனால்தான் கோடை உழவு அவசியம்.

தக்காளியில் வரப்புகளில் கவர்ச்சிப் பயிராக ஆமணக்கு பயிரிட வேண்டும். புரோட்டீனியா புழுக்களை உருவாக்கும் தாய் அந்துப்பூச்சிகள் முட்டை இட ஆமணக்கு இலையைப் பயன்படுத்தும். முட்டை இட்ட அறிகுறி தெரிந்தவுடன், முட்டை இடப்பட்ட ஆமணக்கு இலைகளைப் பறித்து எரித்துவிட வேண்டும்.

ஒரு ஹெக்டேருக்கு ஒரு விளக்குப் பொறி (சோலார் அல்லது பேட்டரியால் இயங்கும் பொறி) வைக்க வேண்டும். இனக்கவர்ச்சிப் பொறியாக இருந்தால், ஒரு ஹெக்டேருக்கு 15 பொறிகளை வைக்க வேண்டும்.

நச்சு உணவை வைத்தும் இப்புழுக்களைத் தடுக்கலாம். ஐந்து கிலோ அரிசித் தவிடு, அரைக்கிலோ வெல்லம், அரைக் கிலோ வேப்பம் பிண்ணாக்கு, 200 கிராம் தவிடு அனைத்தையும் வேப்பெண்ணெய் விட்டுப் பிசைந்து ஆங்காங்கே வைத்து விட்டால்... இதைச் சாப்பிடும் புழுக்கள் மலட்டுத் தன்மை அடைந்துவிடும்.

மாவுப்பூச்சி

மாவுப்பூச்சியால் பெரிய பிரச்னை இல்லை என்றாலும் ஒரு செடியைத் தாக்கினால் வயல் முழுவதும் பரவிவிடும். இவற்றைத் தடுக்க... 25 கிராம் மீன் எண்ணெயைக் காதிசோப் கரைசலுடன் கலந்து தெளிக்கலாம். தொடர்ந்து ஒரு லிட்டர் தண்ணீருக்கு 30 மில்லி வேப்பெண்ணெய் மருந்து என்ற விகிதத்தில் கலந்து தெளிக்க வேண்டும். மாவுப்பூச்சி அறிகுறி தெரிந்தவுடன் அழித்துவிட வேண்டும்.

இலைப்பேன்

இலையில் ஆங்காங்கே திட்டுத்திட்டாக இலைப்பேன்கள் காணப்படும். இவை தாக்கினால், பூக்கள் முதிர்ச்சி அடையும் முன்பே கருகிவிடும். இவை தக்காளியில் புள்ளி வாடல் நோயை உருவாக்கக்கூடிய வைரஸையும் பரப்புகின்றன. பாதிக்கப்பட்ட செடிகளில் இலைகள் சுருங்கிக் காணப்படும். அப்படிக் காணப்படும் செடிகளை வேரோடு பறித்து அழித்துவிட வேண்டும். பழைய தகர டப்பாக்களில் மஞ்சள் பெயின்ட் தடவி ஆமணக்கு எண்ணெய் தேய்த்து வயலில் ஆங்காங்கே கட்டி வைத்து வெள்ளை ஈக்களைக் கவர்ந்து அழிக்கலாம். ஒரு ஹெக்டேருக்கு 15 டப்பாக்கள் வரை வைக்கலாம். வாரம் ஒருமுறை டப்பாவைச் சுத்தப்படுத்தி மீண்டும் ஆமணக்கு எண்ணெய் தடவி வைக்க வேண்டும்.

கடைகளில் கிடைக்கும் ‘கிரைசோபெர்லா கார்னியா’ (Chrysoperla Carnea) என்ற இரைவிழுங்கிப் பூச்சிகளைப் பயன்படுத்தியும் இலைப்பேன்களை அழிக்கலாம்.

தக்காளி... பூச்சி மற்றும் நோய் மேலாண்மை!

15 நாள்கள் இடைவெளியில் தொடர்ந்து வேப்பெண்ணெய்க் கரைசல் தெளித்தும் இலைப்பேன்களை அழிக்கலாம்.

தக்காளியைத் தாக்கும் நோய்கள்

நாற்றங்காலில் வரும் நோய் கழுத்தழுகல். அதற்குக் காகிதப்பூ கரைசலை அளிக்க வேண்டும் என்று ஏற்கெனவே பார்த்தோம். நாற்றுகளை நடவு செய்தபிறகு வயலில் வாடல் நோய் வர வாய்ப்பு இருக்கிறது. இதன் அறிகுறி பச்சையாக இருக்கும் இலை நரம்பு, வெள்ளையாக மாறும். மனிதர்களுக்கு வரும் ஒரு நோயை ரத்தசோகை என்று குறிப்பிடுவது போல இதைப் ‘பசுமைச் சோகை’ என்பார்கள். இலை நரம்பு முழுவதும் வெளிறிப்போய் இருக்கும். இளம் இலைகள் கருகி, வாடி, காய்ந்துவிடும். காம்பு உதிர்ந்து இலை கொட்டி விடும். செடி வாடி அப்படியே இறந்துவிடும். வாடல் நோய் வராமல் இருக்க, பயிர் சுழற்சி மிக மிக அவசியம். தக்காளி வயலின் அருகில் பருத்திச் செடி இருக்கக் கூடாது.

தக்காளியை, ‘பாக்டீரியா வாடல் நோய்’ என்ற இன்னொரு வாடல் நோயும் தாக்கும். மண்ணில் அதிக ஈரம், அதிக வெப்பம் இருந்தால் பாக்டீரியா வாடல் நோய் உருவாகும். இதன் அறிகுறி, மேல் பகுதியிலிருந்து இலைகள் கொஞ்சம் கொஞ்சமாக வாட ஆரம்பிக்கும். கீழே உள்ள கடைசி இலை வாடுவதற்குள்ளாகவே செடி மடிந்துவிடும். பளபளப்பாக இருக்கும் தண்டு பழுப்பு நிறத்தில் மாறிவிடும். பாதிக்கப்பட்ட செடியை வேரோடு பிடுங்கி எரித்துவிட வேண்டும்.

பாதிக்கப்பட்ட செடியை எடுத்துத் தண்ணீரில் மூழ்கவைத்தால், தண்ணீருக்கு மேலே சின்னச் சின்னதாக வெள்ளை நிறத்தில் முட்டைகள் போன்று மிதக்கும். இப்படி மிதந்தால் பாக்டீரியா வாடல் நோய் தாக்கியுள்ளது என்பதைக் கண்டுகொள்ளலாம். பயிர் சுழற்சி மூலம்தான் இதைத் தடுக்க முடியும். தட்டைப் பயறு, மக்காச்சோளம், தக்காளியெனச் சுழற்சி முறையில் பயிர் செய்தால் இந்நோய்த் தாக்குதல் குறையும்.

முன்பருவ இலைக்கருகல் நோய்


குளிர் காலத்தில் தாக்கக்கூடிய நோய் இது. இலையில் மஞ்சள் நிறத்தில் சின்னச் சின்னப் புள்ளிகள் தோன்றும். மஞ்சள் நிறத்தின் நடுப்பகுதியில் கறுப்பாக மாறும். அந்தப் புள்ளிகள் அனைத்தும் ஒன்று சேர்ந்து வளையம்போல மாறும். வளையம் பெரிதாகப் பெரிதாக மஞ்சள் நிறம், பழுப்பு நிறத்துக்கு மாறும். அதன்பிறகு இலைகள் கருகத் தொடங்கும். தக்காளி வயலுக்கு அருகில் உரக் குழிகள், குப்பைக்கிடங்குகள் இல்லாமல் இருந்தாலே இந்நோயைக் கட்டுப்படுத்தலாம்.

அறுவடை

தக்காளியில் முக்கால் பாகம் பழுத்தவுடன்தான் அறுவடை செய்ய வேண்டும். காயாக அறுவடை செய்யக் கூடாது. நாட்டு ரகங்களாக இருந்தால் ஒரு ஹெக்டேரிலிருந்து 15 டன் முதல் 40 டன் வரை மகசூல் எடுக்கலாம். கலப்பு ரகங்களாக இருந்தால் 60 டன் முதல் 90 டன் வரை மகசூல் எடுக்கலாம்.

தொடர்புக்கு, பேராசிரியர் செந்தூர்குமரன், செல்போன்: 94438 69408

ஆர்.குமரேசன் 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism