Published:Updated:

சிறுதானியச் சாகுபடிக்கு ஏற்ற சித்திரை மாதம்!

சிறுதானியச் சாகுபடிக்கு ஏற்ற சித்திரை மாதம்!
பிரீமியம் ஸ்டோரி
சிறுதானியச் சாகுபடிக்கு ஏற்ற சித்திரை மாதம்!

பாரம்பர்யம்

சிறுதானியச் சாகுபடிக்கு ஏற்ற சித்திரை மாதம்!

பாரம்பர்யம்

Published:Updated:
சிறுதானியச் சாகுபடிக்கு ஏற்ற சித்திரை மாதம்!
பிரீமியம் ஸ்டோரி
சிறுதானியச் சாகுபடிக்கு ஏற்ற சித்திரை மாதம்!

மிழ் மாதங்களில் சித்திரை மாதம், மானவாரி பயிர் சாகுபடிக்குத் தேவையான பணிகளைச் செய்ய ஏற்ற மாதம். தமிழ்நாட்டில் சித்திரை மாதத்துக்குப் பிறகு வரும் வைகாசி, ஆனி, ஆடி ஆகிய மூன்று மாதங்களில் மழையைப் பொறுத்து மானாவாரிச் சாகுபடிப் பணிகள் மேற்கொள்ளப்படும். அந்தவகையில் சித்திரை மற்றும் அடுத்து வரும் மாதங்களில் மேற்கொள்ளப்பட வேண்டிய பணிகள் குறித்துத் திருவண்ணாமலை மாவட்டம், அத்தியந்தல் பகுதியில் உள்ள சிறுதானிய மகத்துவ மையத்தின் தலைவர் முனைவர் பரசுராமனிடம் பேசினோம்.

சிறுதானியச் சாகுபடிக்கு ஏற்ற சித்திரை மாதம்!

“தமிழ்நாட்டில் மானாவாரி விவசாயம் குறைந்துகொண்டே வருகிறது. ஐம்பது ஆண்டுகளுக்கு முன்பு 80 சதவிகித அளவிலிருந்த மானாவாரி நிலங்கள், தற்போது 60 சதவிகித அளவுக்குக் குறைந்துவிட்டன. மானாவாரிப் பயிர்களுக்கான முக்கியத்துவம், குறைந்து கொண்டே வருகிறது. மானாவாரியில் வருமானம் குறைவு, சரியான சந்தை வாய்ப்பு இல்லை என்கிற பொதுவான கருத்து இருக்கிறது. ஆனால், மானாவாரி விவசாயத்தையும் லாபகரமாகச் செய்ய முடியும். அதற்குச் சித்திரை மாதத்தைச் சரியாகப் பயன்படுத்திக் கொள்ள வேண்டும்.

சித்திரை மாதம், சிறுதானியங்களுக்குச் சிறப்பான மாதம். ஏனென்றால் தமிழ்நாட்டில் பெரும்பாலும் மானாவாரி முறையில்தான் சிறுதானியங்கள் சாகுபடி செய்யப்படுகின்றன. சித்திரை மாதத்தில் கிடைக்கும் மழையைக் கொண்டு... நிலத்தில், 2 சால் முதல் 4 சால் வரை உழவு ஓட்டி நிலத்தைத் தயார் செய்ய வேண்டும். இந்தக் கோடை உழவால், களைகள் கட்டுப்படுவதோடு, மண்ணில் உள்ள கூட்டுப்புழுக்கள் மற்றும் பூச்சிகள் ஆகியவை அழிக்கப்பட்டுவிடும். இதனால், குலை நோய் மற்றும் பூச்சித்தாக்குதல், பூஞ்சணத் தாக்குதல் போன்றவை கட்டுப்படுத்தப்படும். கோடை உழவுக்கு அடுத்துக் கிடைக்கும் மழைநீர் மண்ணுக்குள் சேகரமாகி மண் ஈரப்பதத்துடன் இருக்கும்.

சாமை, தினை, வரகு, குதிரைவாலி, பனிவரகு, கேழ்வரகு, கம்பு, சோளம் போன்ற சிறுதானியங்கள் தமிழ்நாட்டில் பரவலாகச் சாகுபடி செய்யப்பட்டாலும்... கேழ்வரகுதான் அதிக அளவில் சாகுபடி செய்யப்படுகிறது. தமிழ்நாட்டின் மொத்த சிறுதானியச் சாகுடிப் பரப்பு 1,21,000 ஹெக்டேர். இதில், கேழ்வரகு மட்டும் 90,000 ஹெக்டேர் பரப்பில் சாகுபடி செய்யப்படுகிறது.

ஒட்டுமொத்த விகடனுக்கும் ஒரே ஷார்ட்கட்!

சிறுதானியச் சாகுபடிக்கு ஏற்ற சித்திரை மாதம்!

இந்த ஆண்டு, ‘அத்தியந்தல்-1’ என்ற சாமை ரகத்தை வெளியிட்டுள்ளோம். இது குறைவான மழையிலும் சிறப்பாக வளரக்கூடியது.  காற்றடித்தாலும் பயிர்கள் சாயாமல் இருக்கும். கேழ்வரகில் ‘கோ-15’ என்ற ரகம் விவசாயிகளால் விரும்பிச் சாகுபடி செய்யப்படுகிறது. முன்பு வெளியிட்ட கோ-4 என்ற கேழ்வரகு ரகத்தைவிட, இந்த ரகம் 10 சதவிகித அளவு கூடுதல் மகசூல் கொடுக்கிறது.

மானாவாரி நிலத்தில் ஜூன்-ஜூலை அல்லது செப்டம்பர்-அக்டோபர் மாதங்களில் சிறுதானியங்களை விதைக்கலாம். இறவைப்பாசன நிலத்தில் எப்போது வேண்டுமானாலும் விதைக்கலாம்.

ஆனால், இறவையில், ஜூன்-ஜூலை அல்லது செப்டம்பர்-அக்டோபர் மாதங்களில் விதைத்தால் சிறப்பான மகசூல் கிடைக்கும். மானாவாரி நிலத்தில் விதைக்க ஒரு ஏக்கருக்கு 5 கிலோ விதை தேவை. இறவைப்பாசன நிலத்தில் விதைக்க 2 கிலோ விதை போதுமானது. ஒரு கிலோ விதைக்கு 10 கிராம் டிரைக்கோடெர்மா விரிடி என்ற விகிதத்தில் சேர்த்து வடிகஞ்சி ஊற்றிப் பிசைந்து விதை நேர்த்தி செய்து விதைக்க வேண்டும்.

மானாவாரியில் ஏக்கருக்கு 2 கிலோ டிரைக்கோடெர்மா விரிடியைத் தொழுவுரத்தோடு கலந்து தூவிவிட்டால் குலை நோய் கட்டுப்படும். (இறவையில் பயிர் செய்பவர்கள் தொழுவுரத்தோடு சூடோனோஸைக் கலந்து கொடுக்கலாம்). ஏக்கருக்கு 2 மூட்டை வேப்பம் பிண்ணாக்கைத் தூவி விதைத்தால், பூச்சித் தாக்குதல் கட்டுப்படும். 

சிறுதானியச் சாகுபடிக்கு ஏற்ற சித்திரை மாதம்!

இறவைப்பாசனத்தில் கேழ்வரகு மற்றும் கம்பு ஆகியவைதான் அதிகமாகச் சாகுபடி செய்யப்படுகின்றன. சாமை, தினை, வரகு, குதிரைவாலி போன்ற பயிர்களை நாற்று விட்டு நடவு செய்தால் நேரடி விதைப்பில் கிடைப்பதைவிட இரண்டு மடங்கு கூடுதல் மகசூல் கிடைக்கும். ஒரு ஏக்கர் பரப்பில் நடவு செய்ய... 8 சென்ட் நிலத்தில் நாற்றங்கால் அமைக்க வேண்டும். மேட்டுப்பாத்திகள் அமைத்து விதைகளைத் தூவினால் 15 நாள்களிலிருந்து 20 நாள்களில் நாற்றுகள் தயாராகிவிடும். வரிசைக்கு வரிசை 30 சென்டி மீட்டர் செடிக்குச் செடி 10 சென்டி மீட்டர் என்ற இடைவெளியில் நாற்றுகளை நடவு செய்ய வேண்டும்” என்ற பரசுராமன் நிறைவாக,

“விதைக்க விரும்பும் சிறுதானிய விதைகளைச் சித்திரை மாதத்திலேயே வாங்கிச் சேமித்து வைத்துக்கொள்ள வேண்டும். வைகாசி, ஆடிப் பட்டங்களில் விதைகளுக்குத் தட்டுப்பாடு ஏற்பட வாய்ப்புண்டு.

எங்கள் சிறுதானிய மகத்துவ மையத்தில், சான்றளிக்கப்பட்ட சிறுதானிய விதைகள் கிலோ 70 ரூபாய் என்ற விலையில் கிடைக்கின்றன. முன்பதிவு அடிப்படையில் விதைகள் வழங்கப்பட்டு வருகின்றன. அதோடு, சாகுபடிக்கான ஆலோசனைகளும் வழிகாட்டல்களும் வழங்கப்பட்டு வருகின்றன” என்று சொல்லிமுடித்தார்.

தொடர்புக்கு, முனைவர் பரசுராமன், பேராசிரியர் மற்றும் தலைவர், சிறுதானிய மகத்துவ மையம், அத்தியந்தல், திருவண்ணாமலை மாவட்டம். தொலைபேசி: 04175 298001.

த.ஜெயகுமார் - படங்கள்: செ.பிரபாகரன்

விதைப்புக்கு ஏற்ற சிறுதானியப் பயிர் ரகங்கள் மற்றும் அவற்றின் வயது!

கேழ்வரகு

கோ-13, பையூர்-2 ஆகிய ரகங்கள், 100-105 நாள்கள் வயது கொண்டவை.

கோ-15 ரகம், 120 -125 நாள்கள் வயது கொண்டது.

சாமை

கோ-4, பையூர்-2, அத்தியந்தல்-1 ஆகிய ரகங்கள் 85-90 நாள்கள் வயது கொண்டவை.

தினை

கோ-7 என்ற ரகம் 80-85 நாள்கள் வயது கொண்டது.

பனிவரகு

கோ-5 மற்றும் டி.என்.ஏ.யூ-202, அத்தியந்தல்-1 ஆகிய ரகங்கள் 70 நாள்கள் வயது கொண்டவை.

குதிரைவாலி

கோ-2 என்ற ரகம், 85 நாள்கள் வயது கொண்டது.

வரகு

கோ-3, டி.என்.ஏ.யு-86 ஆகிய ரகங்கள் 120-125 நாள்கள் வயது கொண்டவை.

கம்பு

கோ-7, கோ-9, கோ (Cu)-9, X-7, ICMV-221 ஆகிய ரகங்கள் 70-80 நாள்கள் வயது கொண்டவை.

சோளம்

கோ-28, கோ-30 ஆகிய ரகங்கள் 95-105 நாள்கள் வயது கொண்டவை.

இந்த ரகங்கள் அனைத்தும், பாரம்பர்ய சிறுதானிய விதைகளிலிருந்து உருவாக்கப்பட்ட ஆராய்ச்சி ரகங்கள். இவை மானாவாரி விதைப்புக்கு ஏற்றவை. ஒரு ஏக்கர் நிலத்தில் விதைக்க 5 கிலோ முதல் 8 கிலோ வரை கேழ்வரகு விதை தேவைப்படும். சாமை, தினை, வரகு, குதிரைவாலி, பனிவரகு, கம்பு ஆகியவையென்றால், 4-5 கிலோ விதைவரை தேவைப்படும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism