Published:Updated:

வீட்டுத்தோட்டம், மாடித்தோட்டத்தை எப்போது அமைக்கலாம்?

வீட்டுத்தோட்டம், மாடித்தோட்டத்தை எப்போது அமைக்கலாம்?
பிரீமியம் ஸ்டோரி
வீட்டுத்தோட்டம், மாடித்தோட்டத்தை எப்போது அமைக்கலாம்?

வீட்டுத்தோட்டம்

வீட்டுத்தோட்டம், மாடித்தோட்டத்தை எப்போது அமைக்கலாம்?

வீட்டுத்தோட்டம்

Published:Updated:
வீட்டுத்தோட்டம், மாடித்தோட்டத்தை எப்போது அமைக்கலாம்?
பிரீமியம் ஸ்டோரி
வீட்டுத்தோட்டம், மாடித்தோட்டத்தை எப்போது அமைக்கலாம்?

சுமைப் புரட்சி மற்றும் உலகமயமாக்கல் போன்ற காரணங்களால் நமது மரபு விவசாயம் நம்மைவிட்டு அதிக தூரத்துக்குச் சென்று விட்டது. ஓடும் நீரைத் தடுத்துநிறுத்தி அணைகட்டி விவசாயம் பார்த்த முன்னோர்களின் வழிவந்த மக்கள் இன்று புழுங்கல் அரிசிக்கும், பச்சை அரிசிக்கும் வித்தியாசம் தெரியாமல் வாழ்ந்து வருகிறோம். 

வீட்டுத்தோட்டம், மாடித்தோட்டத்தை எப்போது அமைக்கலாம்?

இந்தச் சூழலில் பெருகிவரும் நோய்களும் அதற்குக் காரணமாக விளங்கிவரும் ரசாயன உரமேற்றப்பட்ட காய்கறிகளும் நஞ்சான உணவையே மக்களுக்குக் கொடுக்கிறது. பொதுவாகவே இயற்கையான காய்கறிகளைத்தான் நாம் உண்ண வேண்டும். அதற்கு மூன்று வழிகள்தான் இருக்கின்றன. ஒன்று இயற்கை விவசாயம் செய்வது. இரண்டாவது, இயற்கை விவசாயப் பொருள்களை நம்பத்தகுந்த விவசாயிகளிடம் நேரடியாகப் பெறுவது. இறுதியாக மாடித்தோட்டம் அல்லது வீட்டுத்தோட்டம் மூலமாக இயற்கையான காய்கறிகளை உற்பத்தி செய்து கொள்வது. இந்த வழிகளில் நகரவாசிகளில் பெரும்பாலானோர் இறுதி வழியான மாடித்தோட்ட காய்கறி வளர்ப்பையே பின்பற்றி வருகிறார்கள்.

பெரும்பாலான மக்களிடம் மாடித்தோட்டம் அமைக்கும் ஆர்வம் இருந்தாலும்கூட அவற்றைச் சரியாக அமைப்பது எப்படி என்பது குறித்த தெளிவு இல்லை. ஆனால், இந்த விஷயங்களைப் பின்பற்றினால் உங்கள் வீட்டு மாடியிலும் அள்ள அள்ள குறையாத காய்கறிகளை அறுவடை செய்யலாம். இதுதொடர்பாகச் சம்பந்தப்பட்ட வல்லுநர்களிடம் பெறப்பட்ட தகவல்கள் இங்கே தொகுக்கப்பட்டுள்ளன.

எப்படி அமைப்பது?

மாடித்தோட்டம் அமைக்க முதலில் தேர்வு செய்ய வேண்டியது இடத்தைத்தான். இதற்கெனத் தனியாக ஒர் இடம் தேவையில்லை. மாடியில் காலியாக உள்ள இடங்கள், படிக்கட்டுகள், மாடிச்சுவர்கள் மற்றும் தொங்குத் தொட்டிகள் என மாடித்தோட்டம் அமைப்பதற்கு ஏராளமான இடங்களும், வழிகளும் உள்ளன.

மொட்டைமாடியில் செடிகள் வைப்பதால், தளம் வீணாகும் என்ற கவலை வேண்டாம். தரையில் பாலித்தீன் விரிப்பினை விரித்து அதன்மீது வைக்கலாம். இதுதவிர, பி.வி.சி பைப்புகள், கட்டையாலான பலகைகள் எனப் பல தீர்வுகள் இருக்கின்றன. முதலில் நாம் தேர்வு செய்ய வேண்டியது வெயில் படும்படியான இடம். அதிக வெயில் படும்படியான இடங்களில் நிழல்வலைக்குடில் அமைப்பது சிறந்தது. நிழல் வலைக்குடில் அமைப்பதற்குப் பல எளிய வழிமுறைகளும் இருக்கின்றன. 

ஒட்டுமொத்த விகடனுக்கும் ஒரே ஷார்ட்கட்!

வீட்டுத்தோட்டம், மாடித்தோட்டத்தை எப்போது அமைக்கலாம்?

பொதுவாகத் தொட்டிகள் அமைக்கும்போது எல்லாத் தொட்டிகளையும் ஒன்றாக அமைக்காமல், எளிதாகப் பராமரிக்கும் செடிகளைத் தனியாகவும், அதிகநேரம் பராமரிக்கும் செடிகளைத் தனியாகவும் பிரித்து அமைக்க வேண்டும்.

பிளாஸ்டிக் பைகள், மண் தொட்டிகள், பிளாஸ்டிக் வாளிகள் உள்ளிட்ட பொருள்களில் செடிகளை வளர்க்கலாம். இந்தத் தொட்டிகளில் செம்மண், தென்னைநார்க் கழிவு, மண்புழு உரம், மாட்டு எரு, உயிர் உரங்கள், வேப்பம் பிண்ணாக்கு ஆகியவற்றைக் கலந்து அடியுரமாகக் கொடுக்க வேண்டும். தென்னைநார்க் கழிவானது மண்ணின் ஈரப்பதத்தை முழுமையாகத் தக்க வைத்து செடிகளைக் காக்கும். இதை அளவுக்கதிகமாகப் போட்டால், செடிகளில் வேர் அழுகல் நோய் ஏற்பட்டு, வேர்களும் செடிகளும் பாதிப்படையும். செம்மண், மண்புழு உரம், மாட்டு எரு, உயிர் உரங்களும் பயிர்கள் வளர்வதற்குத் தேவையான சத்துகளைக் கொடுக்கும்.

வேப்பம் பிண்ணாக்கு பயிர்களுக்கு நோய்கள் வராமல் தடுத்து, கிருமிகளை அழிக்கும். மண்கலவை தயாரானதும் உடனே விதைகளை விதைக்கக் கூடாது. 7 முதல் 10 நாள்களில் நாம் தயார் செய்த மண்ணில் நுண்ணுயிர்கள் பெருகி வேலை செய்ய ஆரம்பித்துவிடும். அதன்பிறகே அதில் எந்த ஒரு விதையையும் நடவு செய்ய வேண்டும். இதன்படி விதைப்பு செய்தால், நல்ல விளைச்சல் நிச்சயம்.

எப்படி விதைப்பது?

விதைகளைத் தேர்வு செய்யும்போதும் நடவு செய்யும்போதும் கவனம் தேவை. பை மற்றும் தொட்டியின் அடிப்புறம் நான்கு திசைகளிலும் அதிகப்படியான நீர் வெளியேற துவாரங்கள் இட வேண்டும். தொட்டியில் நடும் விதைகளை முற்றிய காய்களிலிருந்து எடுக்கலாம், கடைகளில் வாங்கி வந்தும் நடவு செய்யலாம். விதைக்கும் விதையானது நாட்டு விதையாக இருத்தல் இன்னும் சிறப்பு.

விதையின் உருவத்தைவிட இரண்டு மடங்கு ஆழத்தில் நடவுசெய்தால் போதுமானது. அதன்பின்னர், மண்ணால் மூடிவிடவேண்டும். கத்திரி, தக்காளி மற்றும் மிளகாய் போன்ற பயிர்களை நாற்றுவிட்டு நடவு செய்வது மிக அவசியம். வெண்டை, முள்ளங்கி, செடி அவரை மற்றும் கீரை வகைகளை நேரடியாக விதைப்புச் செய்ய வேண்டும். 

வீட்டுத்தோட்டம், மாடித்தோட்டத்தை எப்போது அமைக்கலாம்?

விதை விதைத்தவுடன் நீர் தெளிக்க வேண்டும். தொட்டியில் அதிகமான ஆழத்தில் நடக்கூடாது, அதேபோல வழிந்தோடும் வகையில் தண்ணீர் ஊற்றுவதையும் தவிர்க்க வேண்டும். தண்ணீரைத் தெளிக்க உதவும் பூவாளிப் போன்றவற்றைப் பயன்படுத்துவது நல்லது. காய்கறி விதைகளைப் பயன்படுத்தி செடி வளர்க்க பைகள் அல்லது தொட்டிகளைப் பயன்படுத்தலாம். இதற்கு அளவு, வடிவம் என எதுவும் கிடையாது. இதுவே கீரையாக இருந்தால் பாத்தி அமைப்பது போன்று நடலாம். மேலும் பிளாஸ்டிக், மண்பானை, உலோகம் என எல்லா வகைப் பொருள்களிலும் வளர்க்கலாம். செடிகள் வளர்ப்பதற்காகப் பைகளில் அடியுரம் கலந்த மண்ணை நிரப்பும்போது, பையின் நீளத்தில் ஒரு அங்குலத்துக்குக் கீழ் இருக்குமாறு நிரப்ப வேண்டும், முழுமையாக நிரப்பக் கூடாது.

எப்போது விதைக்க வேண்டும்?

மாடித்தோட்டத்தில் காலநிலையைக் கவனிக்க வேண்டும். அதாவது ஜூன், ஜூலை மாதங்கள் மாடித்தோட்டம் அமைக்கச் சரியான மாதம். கோடைக்காலத்தில் வீட்டுத்தோட்டம் போட திட்டமிடலாம்.  எக்காரணம் கொண்டும் விதைகள் நடவு செய்யக் கூடாது. அதன் பின்னர் அக்டோபர், நவம்பர் மாதங்களிலும் நடலாம். சிலர் குளிர்காலக் காய்கறிகளான பீட்ரூட், முட்டைக்கோஸ், அன்னாசி, கேரட் ஆகியவற்றை அக்டோபர் மாதங்களில் நடவு செய்கிறார்கள்.

எப்படிப் பராமரிப்பது?

மாடித்தோட்டத்தில் முக்கியமானது பராமரிப்புதான். ஒருநாள் விட்டு ஒருநாள் தண்ணீர் ஊற்ற வேண்டும். தொட்டி நிரம்பி வழியும் அளவுக்குத் தண்ணீர் ஊற்றக் கூடாது. மாடித்தோட்டத்துக்கு உபயோகப்படுத்தும் உரங்கள் உயிர் உரங்களாகவும், இயற்கை உரங்களாகவும் இருப்பது நல்லது.

மாடித்தோட்டத்தில் பூச்சித்தாக்குதல் ஏற்பட்டால் மூலிகைப் பூச்சிவிரட்டியைக் கலந்து தெளிக்கலாம். செடிகளின் வளர்ச்சிக்குப் பஞ்சகவ்யா தெளிக்கலாம். வேரின் ஆழத்தில் புழுக்களின் தாக்குதலைத் தவிர்க்க வேப்பெண்ணெய்க் கரைசலை நீரில் கலந்துவிடலாம். தற்போது பெரும்பாலான மக்கள் மாடித்தோட்டத்தில் சொட்டுநீர்ப் பாசனமும் அமைத்து வருகின்றனர்.

வாரம் ஒருமுறை செடியைச் சுற்றி மண்ணைக் கொத்திவிட வேண்டும். மண்ணைக் கொத்திவிட்ட பின்பு பஞ்சகவ்யா தெளிக்கலாம். காய்கள் பறிக்கும்போது முற்றிவிடாமல் அவ்வப்போது அறுவடை செய்துவிட வேண்டும். விதைகள் தேவைப்பட்டால், காய்களை முற்றவிடலாம்.

என்னென்ன இடுபொருள்களைப் பயன்படுத்தலாம்?

செடிகள் அதிகக் காய்களைத் தருவதற்குப் பஞ்சகவ்யா 50 மில்லி என்ற அளவில் ஒரு லிட்டர் நீரில் கரைத்துப் பையில் ஊற்ற வேண்டும். பூச்சித் தாக்குதலைத் தவிர்க்க வாரம் ஒருமுறை வேப்பிலைப் பூச்சிவிரட்டியை 2 மில்லி என்ற அளவில் 1 லிட்டர் நீரில் கரைத்து, மாலை வேளையில் செடிகளின் மேல் தெளிக்க வேண்டும். ஒருமுறை விளைந்த செடிகளின் மகசூலுக்குப் பின்னர், மீண்டும் அதில் மண்புழு உரம், வேப்பம் பிண்ணாக்கு, மாட்டு எரு ஆகியவற்றைக் கலந்து மீண்டும் அந்த மண்ணைப் பயன்படுத்தலாம்.

எதையெல்லாம் தவிர்க்கலாம்?

கோடைக்காலத்தில் புதியதாகத் தோட்டம் அமைப்பதைத் தவிர்க்க வேண்டும். காய்கறித் தோட்டம் அமைக்க நிழல்விழும் பகுதியைத் தேர்வு செய்யக் கூடாது. பைகளை நேரடியாகத் தளத்தில் வைக்கக் கூடாது. பைகளைத் தயார் செய்த உடன் விதைப்பு அல்லது நடவினை மேற்கொள்ளக் கூடாது. பைகளை அடர்த்தியாக நெருக்கி வைக்கக் கூடாது.

மாடித்தோட்டத்தால் கிடைக்கும் நன்மைகள் என்ன?

மாடித்தோட்டத்தில் விளையும் பொருள்கள் நம் உடலுக்கு ஆரோக்கியத்தை அளிக்கும். இதனால், மருத்துவச் செலவுகள் குறையும். இதுதவிர அவசரக் காலங்களுக்குத் தேவையான மூலிகைகளை வளர்ப்பது இன்னும் நன்மை தரும். மாடித்தோட்டத்தினால் வீடுகள் குளிர்ச்சியடையும். அதனால், வீட்டில் ஏ.சி போன்ற மின்னணு சாதனங்களின் பயன்பாடும் குறையும். மாடித்தோட்டத்தைப் பராமரிக்கும்போது மனது கவலையிலிருந்து விடுபடும். நாள் முழுவதும் வீட்டில் இருக்கும் பெண்களுக்கும், வேலைக்குச் செல்லும் பெண்களுக்கும் மாடித்தோட்டம் ஒரு சிறந்த மருந்து. வீட்டில் மட்கும் குப்பைகளான பழக்கழிவுகள், காய்கறித் தோல் கழிவுகள், முட்டை ஓடுகள் ஆகியவற்றை வெளியில் கொட்ட தேவையில்லை. செடிகளுக்கு உரமாகப் போடலாம். மாடித்தோட்டத்தில் அதிகமாக விளையும் காய்கறிகளைப் பக்கத்து வீடுகளுக்குக் கொடுப்பதன் மூலமாக நட்பையும் சம்பாதிக்கலாம். இதுபோல இன்னும் பல நன்மைகள் மாடித்தோட்டத்தில் இருக்கிறது.

துரை.நாகராஜன்

கரும்புச்சக்கையில் மூடாக்கு! 

மாடித்தோட்டத்தில் பல ஆண்டுகள் அனுபவம் வாய்ந்த ‘பம்மல்’ இந்திரகுமாரிடம் பேசினோம். “நடவு செய்யும் போது, மண்ணுடன் மாட்டுச் சாணத்தை கலந்து விதைத்தால், செடிகளின் வளர்ச்சி நன்றாக இருக்கும். காலையிலும் மாலையிலும் மாடித்தோட்டத்தைப் பராமரிப்பதே நமக்குச் சிறந்த உடற்பயிற்சியாக இருக்கும். குழாய் மூலம், தண்ணீர் விடும்போது அதிகம் வீணாகும். இப்படி அதிகமாக ஊற்றப்படும் தண்ணீரோடு உரச்சத்துகளும் வெளியேறி விடும். இதனால், குறைவான அளவில் மண்ணை ஈரப்படுத்தும் அளவு மட்டுமே தண்ணீர் கொடுக்க வேண்டும். 

வீட்டுத்தோட்டம், மாடித்தோட்டத்தை எப்போது அமைக்கலாம்?

தண்ணீர்ப் பற்றாக்குறையான காலங்களில் எளிதில் கிடைக்கும் கரும்புச்சக்கையைத் தொட்டிக்கு அடியுரமாகவோ அல்லது மூடாக்காகவோ பயன்படுத்தினால், செடிகளை வறட்சியிலிருந்து காப்பாற்றலாம். ஈரமான மண்ணோடு கூடிய மாடித்தோட்டப் பைகளைத் தரையில் நேரடியாக வைக்கும்போது, தளம் எப்போதும் ஈரமாகவே இருக்கும். இதனால், மாடியின் மேல்தளம் பழுதடைய வாய்ப்புண்டு. அதில் கவனமாக இருக்க வேண்டும். செடிகளுக்கு பஞ்சகவ்யாவைப் பயன்படுத்தினால் செழிப்பாக வளரும்.  அறுவடை முடிந்த பிறகு ஒருவாரம் தொட்டியைக் காயவிட்டு மீண்டும் நடவு செய்ய வேண்டும்.

ரசாயன உரங்களைத் தவிர்க்க வேண்டும். நாட்டு விதைகளைப் பயன்படுத்துவது நல்லது. பஞ்சகவ்யா, சூடோமோனஸ்... போன்ற இயற்கை இடுபொருள்கள் தமிழ்நாட்டில், பரவலாகக் கிடைக்கின்றன. வீட்டுத்தோட்டம் அமைப்பது என்பது, ஒவ்வொருவரின் அனுபவம், ஆர்வத்துக்குத் தக்கப்படி மாறுபடும். விதைகளை மண்ணில் விதைத்த நாள் முதல் இயற்கையை உன்னிப்பாகக் கவனித்துவந்தால், நிறைய விஷயங்களைக் கற்றுக்கொள்ள முடியும். இப்படி கற்றுக்கொள்வதன் மூலம், மாடித்தோட்ட விவசாயத்தில் நீங்களே நிபுணராகி விடுவீர்கள். முயற்சியும், அதைச் சார்ந்த கற்றுக்கொள்ளும் பயிற்சியுமே நம்முடைய தேவை” என்றார்.

தொடர்புக்கு, செல்போன்: 99410 07057

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism