Published:Updated:

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!
பிரீமியம் ஸ்டோரி
ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

தொழில்நுட்பம்

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

தொழில்நுட்பம்

Published:Updated:
ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!
பிரீமியம் ஸ்டோரி
ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

மிழகத்தில் நிலவும் வறண்ட சூழலுக்கு ஏற்ற பயிர் எலுமிச்சை. கொஞ்சம் தண்ணீர், குறைவான பராமரிப்பு மட்டுமே தேவைப்படும் பயிராக இருப்பதால், பல விவசாயிகள் விரும்பி எலுமிச்சைச் சாகுபடியில் ஈடுபடுகிறார்கள். அந்த வகையில் எலுமிச்சைச் சாகுபடியில் வெற்றிகரமான மகசூல் எடுக்கும் சூத்திரங்களைச் சொல்லித்தருகிறார், சிவகங்கை மாவட்டம், குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரன்.

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

“எலுமிச்சை, வடக்கு சீனாவிலிருந்து அஸ்ஸாம் மாநிலம் வழியாக இந்தியாவுக்குள் நுழைந்த பயிர். ஆசிய நாடுகளைத் தாயகமாகக் கொண்டது எலுமிச்சை. வெப்ப மண்டலப் பிரதேசங்களில் கடல் மட்டத்திலிருந்து 1,000 மீட்டர் உயரம் வரை உள்ள பகுதிகளில் வளரக்கூடிய பயிர் இது. மண்ணின் கார அமிலத்தன்மை 5.5 முதல் 7.5 அலகு வரை உள்ள மண்ணில் சிறப்பாக வளரும். 25 டிகிரி முதல் 30 டிகிரி செல்ஸியஸ் வெப்பநிலையில் வளரக்கூடிய பயிர், எலுமிச்சை. வெப்பநிலை குறைந்தால் பூ எடுக்க, காய் எடுக்க, பழுக்க என அனைத்து நிலைகளிலும் தாமதம் ஏற்படும்.

இது வறட்சிப் பகுதிகளுக்கு ஏற்ற பயிர். போதிய வெப்பநிலையோடு, குறிப்பிட்ட அளவு காற்றின் ஈரப்பதமும் இருந்தால் சிறப்பான மகசூல் கிடைக்கும். அதே நேரத்தில் காற்றின் ஈரப்பதம் அதிகமாக இருந்தாலும் வளர்ச்சி குன்றும். குறிப்பாக, கடற்கரைப் பகுதிகளில் போதிய வெப்பநிலை இருந்தாலும், காற்றின் ஈரப்பதம் அதிகளவில் இருக்கும். அத்தகைய பகுதிகளுக்கு எலுமிச்சை ஏற்ற பயிரல்ல. மண்ணில் இரண்டு மீட்டர் ஆழத்துக்கு நல்ல மண் கண்டம் இருக்க வேண்டும். நிலத்தில் வடிகால் வசதி இருக்க வேண்டும். இதற்குக் குறைவான வேலையாள்கள் இருந்தாலே போதுமானது. சரியாகப் பராமரித்தால் வஞ்சகம் இல்லாமல் வருமானம் கொடுக்கக்கூடிய பயிர் எலுமிச்சை.

ரகங்கள் மற்றும் பட்டம்

பெரியகுளம்-1, செலக்சன்-49, பெங்களூரிலிருந்து வெளியிடப்பட்ட விக்ரம், பஞ்சாப் பாராமதி, லக்னோ-49, அசாம்-49 ஆகியவை பரிந்துரைக்கப்பட்ட எலுமிச்சை ரகங்கள். நமது பகுதிகளில் பெரியகுளம்-1, விக்ரம், புளியங்குடி போன்ற உள்ளூர் ரகங்கள் சிறப்பாக வளர்கின்றன. எலுமிச்சையை ஜூன் முதல் செப்டம்பர் மாதம் வரையிலும், டிசம்பர் முதல் பிப்ரவரி மாதம் வரையிலும் நடவு செய்யலாம்.

ஒட்டுமொத்த விகடனுக்கும் ஒரே ஷார்ட்கட்!

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

தண்ணீர்ப் பற்றாக்குறையாக உள்ள பகுதிகளில் 6 மீட்டர் இடைவெளியில் எலுமிச்சையை நடவு செய்ய வேண்டும். இந்த இடைவெளியில் ஒரு ஹெக்டேர் பரப்பில் 277 கன்றுகள்வரை நடவு செய்யலாம்.

நல்ல மண்வளம், போதுமான தண்ணீர் வசதியுள்ள நிலங்களில் அடர் நடவு முறையை மேற்கொள்ளலாம். நான்கரை மீட்டர் அல்லது 5 மீட்டர் இடைவெளியில் கன்றுகளை நடவு செய்யலாம். 5 மீட்டர் இடைவெளி என்றால், ஹெக்டேர் பரப்பில் 400 கன்றுகள்வரை நடவு செய்யலாம். நான்கரை மீட்டர் இடைவெளி என்றால், ஹெக்டேர் பரப்பில் 494 கன்றுகள்வரை நடவு செய்யலாம்.

6 மீட்டர் இடைவெளியில் நடவு செய்யும்போது 15 ஆண்டுகள்வரை நிலையான மகசூல் எடுக்க முடியும். அத்தனை ஆண்டுக் காலம் தேவை இல்லை. சில ஆண்டுகளில் வேறு பயிருக்கு மாறலாமென நினைப்பவர்கள், அடர் நடவு முறையை மேற்கொள்ளலாம். எலுமிச்சை நடவுக்கு இரண்டு அடி சதுரம், இரண்டு அடி ஆழம் என்ற அளவில் குழி எடுக்க வேண்டும். இரண்டு பங்கு செம்மண், இரண்டு பங்கு மணல், ஒரு பங்கு மட்கிய மாட்டு எரு எனக் கலந்த கலவையைக் குழிகளில் நிரப்ப வேண்டும். ஒவ்வொரு குழிக்கும் பத்து கிலோ அளவு மாட்டு எரு கிடைக்கும்படி கலவையை உருவாக்க வேண்டும். ஒவ்வொரு குழியிலும் தலா அரைக்கிலோ ராக் பாஸ்பேட் இட வேண்டும்.

பிறகு குழியின் மையத்தில் நாற்றுகளை நடவு செய்து தண்ணீர் பாய்ச்ச வேண்டும். நடவு செய்த 3-ஆம் நாள் உயிர்த்தண்ணீர் கொடுக்க வேண்டும். தொடர்ந்து மண்ணின் தன்மைக்கு ஏற்ப 7 முதல் 10 நாள்கள் இடைவெளியில் பாசனம் செய்ய வேண்டும். எலுமிச்சைத் தோப்பில் தண்ணீர் தேங்கினால்... வேர் அழுகல் நோய் அல்லது தண்டு அழுகல் நோய் தாக்கக்கூடும். அதனால், தண்ணீர் தேங்காமல் பார்த்துக் கொள்ள வேண்டும். 

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

எலுமிச்சைச் செடியில் தரையிலிருந்து கிளைகளைப் பரவவிடக் கூடாது. தரையிலிருந்து ஒன்றரை அடி அல்லது 2 அடி உயரம் வரை வளரவிட்டு, அதன் பிறகு கிளைக்க விட வேண்டும். சுமார் மூன்று மாதங்களில் இந்த உயரத்தைச் செடி அடைந்துவிடும். அதுவரையில் சிறிய கிளைகள் உருவாகும்போதே அவற்றை வெட்டி அகற்ற வேண்டும். செடி இரண்டு அடி உயரம் வளர்ந்தவுடன், கிளைகளை வளர அனுமதித்துச் செடியை ஒரு பந்துபோல உருவாக்க வேண்டும். அதேபோல எலுமிச்சை மரத்தை மூன்று மீட்டர் உயரத்துக்கு மேல் வளரவிடக் கூடாது. மேல்புறம் கவாத்து செய்தால், பக்கவாட்டில் கிளைகள் படரும். அப்போதுதான் அனைத்து இலைகளிலும் சூரிய ஒளி பட்டு அதிகக் காய்கள் உருவாகும்” என்ற செந்தூர்குமரன் உர மேலாண்மை குறித்துச் சொல்ல ஆரம்பித்தார்.

உர மேலாண்மை

எலுமிச்சைப் பயிருக்கு பிப்ரவரி, ஜூன் மற்றும் செப்டம்பர் மாதங்களில் உரம் வைக்க வேண்டும். ஒவ்வொரு செடிக்கும் 10 கிலோ தொழுவுரம், ஒரு கிலோ ராக் பாஸ்பேட், ஒரு கிலோ மண்புழு உரம் எனக் கொடுக்க வேண்டும். மூன்றாண்டுகளுக்கு ஒருமுறை ராக் பாஸ்பேட் மற்றும் மண்புழு உரம் ஆகியவற்றின் அளவை ஒரு கிலோ அதிகரித்துக்கொள்ள வேண்டும். முதல் மூன்று ஆண்டுகளில் ஒரு கிலோ ராக் பாஸ்பேட், ஒரு கிலோ மண்புழு உரம் இட்டால் நான்காம் ஆண்டிலிருந்து ஆறாம் ஆண்டுவரை இரண்டு கிலோ ராக் பாஸ்பேட், இரண்டு கிலோ மண்புழு உரம் இட வேண்டும்.

இதுபோல ஆண்டுக்கு மூன்று முறை (பிப்ரவரி, ஜூன், செப்டம்பர் மாதங்களில்) உரம் இட வேண்டும். ஆண்டுக்கு ஒருமுறை ஒவ்வொரு செடிக்கும் அரைக்கிலோ வேப்பம் பிண்ணாக்கு, 200 கிராம் அசோஸ்பைரில்லம், 200 கிராம் பாஸ்போபாக்டீரியா எனக் கலந்து இட வேண்டும்.

எலுமிச்சைச் செடியின் தூரைச் சுற்றி மரத்தின் நிழல் விழும் பரப்பளவுக்குக் களைகள் இல்லாமல் பார்த்துக் கொள்ள வேண்டும். நடவு செய்த மூன்றாண்டுகள் வரை... பாசிப்பயறு, உளுந்து, காய்கறிகள் என ஊடுபயிர்களைச் சாகுபடி செய்யலாம். 

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

எலுமிச்சை ஆண்டு முழுவதும் காய்க்கும் பயிர் என்பதால், ஆண்டுக்கு இரண்டு முறை வளர்ச்சி ஊக்கி கொடுக்க வேண்டும். இலைவழி ஊட்டமாக மீன் அமினோ அமிலம் மற்றும் அரப்புமோர் கரைசல், வேம்பு+புங்கன் எண்ணெய்க் கரைசல், பஞ்சகவ்யா மற்றும் அமுதக்கரைசல் என மூன்று விதமான கரைசல்களைக் கொடுக்க வேண்டும். இந்தக்கரைசல்களில் ஒவ்வொன்றையும் ஒரு லிட்டர் தண்ணீருக்கு இரண்டரை மில்லி என்ற அளவில் கலந்து தெளிக்க வேண்டும். ஏற்கெனவே சொன்ன வரிசைப்படி இந்த மூன்று கரைசல்களையும் பூ பிடித்துக் காய் உருவாகும் வரை 15 நாள்களுக்கு ஒருமுறை சுழற்சி முறையில் தெளித்து வர வேண்டும். இவற்றைத் தெளிக்கும்போது திரட்சியான காய்கள் உருவாகும். அதோடு, அவை ஒரே சீராகப் பழுக்கும். அதனால், சந்தைப்படுத்துவது எளிதாக இருக்கும்.எலுமிச்சை நடவு செய்த மூன்றாம் ஆண்டிலிருந்து அறுவடைக்கு வரும். எட்டாவது ஆண்டிலிருந்து முழு மகசூல் கிடைக்க ஆரம்பிக்கும். 15 முதல் 20 ஆண்டுகள்வரை நிலையான மகசூல் கிடைக்கும். நடவு செய்த மூன்றாம் ஆண்டில் ஒரு மரத்திலிருந்து 50 காய்கள்வரை கிடைக்கும். பிறகு படிப்படியாக அதிகரித்து எட்டாம் ஆண்டிலிருந்து ஒரு மரத்தில் 700 காய்கள் வரை கிடைக்கும்.

இந்தக் கணக்குப்படி பார்த்தால் ஒரு ஹெக்டேரிலிருந்து ஆண்டுக்கு 25 டன் அளவு மகசூல் கிடைக்கும். எலுமிச்சையை முக்கால்வாசி பழுத்த பிறகுதான் அறுவடை செய்ய வேண்டும்” என்ற செந்தூர்குமரன் பூச்சி மற்றும் நோய்கள் குறித்து விவரித்தார்.

பூச்சி, நோய்கள்... கவனம்!

“எலுமிச்சை இலைகள் எப்போதும் பச்சையாக இருக்க வேண்டும். பூச்சிகளால் இலைகளுக்குச் சேதாரம் ஏற்படும் என்பதால், இலைகளைக் கவனமாகப் பாதுகாக்க வேண்டும். இலையைத் தாக்கும் பூச்சிகளில் முக்கியமானது, இலைத்துளைப்பான். இந்தப் பூச்சி, இலையில் வெள்ளை நிறத்தில் கோடு கோடாகப் போட்டுப் பச்சையமே இல்லாமல் செய்துவிடும். எனவே இந்தப் பூச்சி வராமல் பார்த்துக்கொள்ள வேண்டும். 20 லிட்டர் தண்ணீரில் 5 கிலோ வேப்பம் பிண்ணாக்கை இரவு முழுவதும் ஊறவைக்க வேண்டும். காலையில் அந்தத் தண்ணீரில் ஐந்து மில்லி எடுத்து, பத்து லிட்டர் தண்ணீரில் கலந்து தெளிக்க வேண்டும். ஐந்து சதவிகித வேப்பெண்ணெய்க் கரைசல் தெளித்தும் இப்பூச்சியைக் கட்டுப்படுத்தலாம்.

எலுமிச்சையில் சாறு உறிஞ்சும் பூச்சிகளின் தாக்குதலும் இருக்கும். வெள்ளை ஈ, அசுவினி ஆகியவற்றோடு, துரு சிலந்தி தாக்குதலும் எலுமிச்சையில் இருக்கும். இந்தச் சிலந்தி தாக்கினால் இலை முழுவதும் துருப் பிடித்தது போல மாறிவிடும். இப்பூச்சிகள், இலைகள், இளம் தளிர்கள், காய்கள் ஆகியவற்றில் பிரச்னை ஏற்படுத்தக் கூடியவை. இப்பூச்சியால் பாதிக்கப்பட்ட இலைகளைப் பறித்து அப்புறப்படுத்த வேண்டும். பாசனம் குறைவாக இருந்தாலோ தழைச்சத்துப் பற்றாக்குறை இருந்தாலோதான் பூச்சிகள் தாக்கும்.

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

எலுமிச்சைத்தோப்பில் மஞ்சள் வண்ணம் பூசிய தகரங்கள் அல்லது தகர டப்பாக்களில் ஆமணக்கு எண்ணெயைப் பூசி... ஒரு ஹெக்டேருக்கு 12 என்ற விகிதத்தில் கட்டித் தொங்க விட வேண்டும். வெள்ளை ஈ, அசுவினி, சிலந்தி போன்ற பூச்சிகள் இத்தகரங்களில் ஒட்டிக்கொள்ளும்.

பத்து லிட்டர் தண்ணீருக்கு ஒரு லிட்டர் இஞ்சி-பூண்டு கரைசல் என்ற விகிதத்தில் கலந்து தெளித்தும் பூச்சிகளைக் கட்டுப்படுத்தலாம். வெப்பம் அதிகமாக இருந்து பாசனம் குறைவாக இருக்கும் சமயங்களில் பூச்சித்தாக்குதல் இருந்தால்... 15 நாள்களுக்கு ஒருமுறை செடிகள்மீது தண்ணீரை மட்டும் தெளித்து ஈரப்பதமான சூழ்நிலையை உருவாக்கிப் பூச்சிகள் தொல்லையைத் தவிர்க்கலாம்.

எலுமிச்சையைத்தாக்கும் இன்னொரு பிரச்னை, இலைவெட்டுப்புழு. ‘சிட்ரஸ் பட்டர்பிளை’ எனப்படும் இந்தப் புழு, பெரியதாகப் பச்சை நிறத்தில் இருக்கும். இந்தப்புழுக்கள் வண்ணத்துப் பூச்சியின் புழுப்பருவம். இலையின் வாசனையைக் கொண்டுதான், இவை இலைகளைத் தாக்குகின்றன. இவை இலைகளை முழுவதும் வெட்டிச் சாப்பிட்டுவிடும். மூலிகைப் பூச்சி விரட்டி அல்லது இஞ்சி-பூண்டு கரைசல் ஆகியவற்றைத் தெளித்து இப்புழுக்களைக் கட்டுப்படுத்தலாம். இஞ்சி-பூண்டு கரைசலின் வாசனை இலைகளில் இரண்டு மூன்று நாள்கள் மட்டுமே இருக்கும். மூலிகைப் பூச்சி விரட்டிக் கரைசலில் உள்ள மூலிகைச் சாறு இலைக்குள் இறங்கிவிடுவதால், அந்த வாசனை இலைகளில் ஒரு வாரம்வரை இருக்கும். எலுமிச்சை வாசனை இல்லாமல் வேறுபட்டிருக்கும். இந்த வாசனையால் இலைவெட்டுப்புழுக்கள் ஓடிவிடும். கால் லிட்டர் வேப்பங்கொட்டையை இடித்து, இரண்டு லிட்டர் மாட்டுச் சிறுநீரில் கலந்து இரண்டு மூன்று நாள்கள் ஊற விட வேண்டும். பிறகு 20 லிட்டர் தண்ணீரில் இந்தக் கரைசலைக் கலந்து 15 நாள்கள் இடைவெளியில் தெளித்து வந்தால், இலை வெட்டுப் புழுவின் தொல்லையே இருக்காது.

காய்களைத் தாக்கும் பூச்சிகளில் பழத்தில் சாறு உறிஞ்சும் பூச்சி முக்கியமானது. இந்தப் பூச்சியைத் தடுக்க இஞ்சி-பூண்டு கரைசல் சிறந்தது. 250 மில்லி இஞ்சி-பூண்டு கரைசலை 500 மில்லி மாட்டுச் சிறுநீரில் கலந்து, மேலும் 10 லிட்டர் தண்ணீர் சேர்த்துத் தெளிக்க வேண்டும். காய் பழுக்கும் நேரத்தில் இக்கரைசலைத் தெளித்து இப்பூச்சிகளைக் கட்டுப்படுத்தலாம். ‘ட்ரிஸ்ட்டிஸா’ (Tristeza) என்ற ஒருவகை வைரஸ், வாடல் நோயை உருவாக்கும். வெப்பமும் குளிரும் சேர்ந்த பகுதிகளில் இந்த வைரஸ் இருக்கும். அதனால்தான் அந்தப் பகுதிகளுக்கு எலுமிச்சையைப் பரிந்துரையைச் செய்வதில்லை. கடலோர மாவட்டங்களில் வெப்பமும், ஈரப்பதமான காற்றும் இருக்கும். அங்கு இந்தப் பிரச்னை இருக்கும். உள் மாவட்டங்களில் இந்த வைரஸ் பெரும்பாலும் வராது. இந்த வைரஸ் ஒரு பயிரில் கண்டறியப்பட்டால், அந்தப் பயிரில் உள்ள காயின் விதைகளை நாற்றுத் தயாரிக்கப் பயன்படுத்தக் கூடாது. அந்த வைரஸை அழிக்க முடியாது. கடலோர மாவட்டங்களில் இந்த வைரஸ் தாக்க அதிக வாய்ப்பிருக்கிறது.

எலுமிச்சையைத் தாக்கும் முக்கியமான நோய், ‘சொறி நோய்’. இது இலைகள் மற்றும் காய்களைத் தாக்கும். இதற்குப் பிரத்தியேக மருந்து கிடையாது. தென்கிழக்கு ஆசியாவிலிருந்து இந்தியாவுக்கு வந்த நோய் இது. 1910-ஆம் ஆண்டு அமெரிக்காவில் புளோரிடா மாகாணத்தில்தான் சொறி நோய் முதன் முறையாகக் கண்டுபிடிக்கப்பட்டது. இது ‘சாந்தோமோனஸ்’ (Xanthomonas) என்ற வகைப் பாக்டீரியாவால் வரக்கூடிய நோய். முதிர்ந்த கிளைகளிலும் பழங்களிலும் இதன் தாக்குதல் இருக்கும். மழையுடன் வேகமாக அடிக்கும் காற்றில் இது பரவும். 18 மைல் வேகத்தில் காற்று அடிக்கும்போது அந்த நேரத்தில் மழை பெய்தால் இந்தப் பாக்டீரியா வேகமாகப் பரவும். இதுவும் கடலோர மாவட்டங்களில்தான் அதிகம் இருக்கும். இலையில் உள்ள சின்னச்சின்ன துவாரங்கள் வழியே, இந்தப் பாக்டீரியாக்கள் நுழைந்து உள்ளேயுள்ள திசுக்களைத் தாக்கும். இதனால், இலைகளில் நீள்வட்ட வடிவில் நீர்க்கசிவு இருக்கும். இதுதான் சொறி நோயின் அறிகுறி.

காற்று, மனிதன், பண்ணை எந்திரங்கள் மூலமாகவும் இது பரவும். இலையின் அடிப்பகுதியில்தான் முதலில் வரும். 7 முதல் 10 நாள்களில் பரவும். இலையில் பச்சையம் குறைந்து சுருங்கிப் போய்த் தெரியும். அப்போதே நடவடிக்கை எடுத்தால் அதிகப் பாதிப்பைக் குறைக்கலாம். இலைகளின் அடியில் நீள்வட்ட நீர்க்கசிவு இருக்கும்போது சரியாகக் கவனிக்காவிட்டால், செடி முழுவதும் பரவி விடும். ஒரு செடியிலிருந்து இன்னொரு செடிக்கு ஏழு முதல் பத்து நாள்களில் பரவி விடும்.

சொறி நோய் தாக்கிய பழங்களைச் சந்தைப்படுத்த முடியாது. பாதிக்கப்பட்ட கிளைகளை வெட்டிவிட வேண்டும். நோய் தாக்கிய செடிகளில் பதியன் போட கூடாது. நோய் தாக்கிய பழங்களிலிருந்து விதைகளை எடுத்து நாற்றுத் தயாரிக்கப் பயன்படுத்தக் கூடாது. ஆரம்பக்கட்டத்திலேயே 5 சதவிகித வேப்பங்கொட்டை கரைசலைத் தெளித்து இந்நோயைப் பரப்பும் பாக்டீரியாக்களைக் கட்டுப்படுத்தலாம்.

காற்று அதிகமாக வீசும் சமயங்களில் வேகத்தைத் தடுக்கும் வகையில்... எலுமிச்சைத் தோப்பில் ஆங்காங்கு தேக்கு, மகோகனி, அகத்தி, சவுக்கு போன்ற மரங்களை நடவு செய்யலாம். இதனால், காற்றில் பாக்டீரியாக்கள் பரவுவதைத் தடுக்கலாம். தோட்டத்தைச் சுத்தமாக வைத்துக் கொள்ள வேண்டும். ‘சூடோமோனஸ் புளூரோசன்ஸ்-1’ (Pseudomonas fluorescens-1) என்ற நுண்ணுயிரியை ஒரு லிட்டர் தண்ணீருக்கு ஒரு மில்லி என்று கலந்து தெளித்தும் பாக்டீரியாக்களைக் கட்டுப்படுத்தலாம்” என்றார்.

தொடர்புக்கு, பேராசிரியர் செந்தூர்குமரன், செல்போன்: 94438 69408.

ஆர்.குமரேசன் - படங்கள்: எஸ்.சாய் தர்மராஜ்

ஒரு மரத்துக்கு 700 காய்கள், ரூ.1,200 வருமானம்!

சி
வகங்கை மாவட்ட முன்னோடி இயற்கை விவசாயி ஆப்ரகாம். இவர் பல ஆண்டுகளாக எலுமிச்சையை இயற்கை முறையில் சாகுபடி செய்து வருகிறார். அவரிடம் எலுமிச்சைச் சாகுபடி குறித்துப் பேசினோம். “பலா, கொய்யா, எலுமிச்சைனு இயற்கை முறையில சாகுபடி செஞ்சுட்டுருக்கேன். அரை ஏக்கர் நிலத்துல 100 நாட்டு ரக எலுமிச்சை மரங்கள் இருக்கு. ஒவ்வொரு மரத்துக்கும் 15 அடி இடைவெளி விட்டுருக்கேன். நடவு செஞ்சு 10 வருஷம் ஆச்சு. மூணாவது வருஷத்துல இருந்து காய்ச்சுட்டுருக்கு. 

ஏற்றம் தரும் எலுமிச்சை... நடவு முதல் அறுவடை வரையான நுட்பங்கள்!

ஆரம்பத்துல ஒரு மரத்துக்கு முப்பது, நாப்பது காய்கள் கிடைச்சது. ஒவ்வொரு வருஷமும் கொஞ்சம் கொஞ்சமா அதிகரிச்சு இப்போ, ஒரு மரத்துக்கு 700 காய்கள் வரைக்கும் கிடைக்குது. எடைக் கணக்குல பார்த்தா ஒரு மரத்துல இருந்து வருஷத்துக்குப் பத்து கிலோவுக்கு மேல கிடைக்கும். நான் எடைக் கணக்குல விற்பனை செய்றதில்லை. எண்ணிக்கைக் கணக்குலதான் விற்பனை செய்றேன். ஒரு பழம் ஒரு ரூபாய்ல இருந்து ரெண்டு ரூபாய் வரை விலை போகும்.

வருஷத்துக்கு ஒரு மரத்துல ஒருந்து 700 ரூபாய்ல இருந்து 1,200 ரூபாய் வரை வருமானம் கிடைக்கும். என்னைப் பொறுத்தவரைக்கும் அதிகப் பராமரிப்பு இல்லாத பயிர் எலுமிச்சை. வருஷம் ரெண்டு தடவை உரம் வெச்சாப் போதும். நான், ஆட்டு எரு இருபது கிலோ, கடலைப் பிண்ணாக்கு அரைக்கிலோ, வேப்பம் பிண்ணாக்கு அரைக்கிலோனு ஒவ்வொரு செடிக்கும் உரம் வைப்பேன். பூச்சித்தாக்குதல் அதிகம் இல்லை. அப்படியே வந்தாலும் வேப்பெண்ணெய் தெளிச்சாலே போதுமானது. தேவைப்படுறப்போ, பத்து லிட்டர் தண்ணியில 50 மில்லி சூடோமோனஸ் கலந்து தெளிச்சுக்குவேன்” என்று அனுபவத்தைச் சொல்லிமுடித்தார்.

தொடர்புக்கு, ஆப்ரகாம், செல்போன்: 98431 85444

வெயில் அவசியம்!

பெ
ரும்பாலானோர், வீட்டுத் தோட்டத்திலும் எலுமிச்சை வளர்க்கிறார்கள். எலுமிச்சையை மரத்திலேயே 40 முதல் 60 சதவிகிதம் பழுக்கவிட்டுத்தான் பறிக்க வேண்டும். பழுப்பதற்கு அனைத்து இலைகளிலும் சூரிய வெளிச்சம் பட வேண்டியது அவசியம். அதனால், நிழலில் எலுமிச்சையை வளர்க்கக் கூடாது. வெயில் பட்டால்தான் அதிகக்காய்கள் கிடைக்கும். காய்கள் மரத்திலேயே பழுக்கும். 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism