Published:Updated:

நல்ல வருமானம் கொடுக்கும் நாட்டுக்கத்திரி!

நல்ல வருமானம் கொடுக்கும் நாட்டுக்கத்திரி!
பிரீமியம் ஸ்டோரி
நல்ல வருமானம் கொடுக்கும் நாட்டுக்கத்திரி!

20 சென்ட், 6 மாதங்கள், ரூ. 22,300 லாபம்!மகசூல்

நல்ல வருமானம் கொடுக்கும் நாட்டுக்கத்திரி!

20 சென்ட், 6 மாதங்கள், ரூ. 22,300 லாபம்!மகசூல்

Published:Updated:
நல்ல வருமானம் கொடுக்கும் நாட்டுக்கத்திரி!
பிரீமியம் ஸ்டோரி
நல்ல வருமானம் கொடுக்கும் நாட்டுக்கத்திரி!

கூட்டு, பொரியல், அவியல், வறுவல், வற்றல் எனப் பலவாறாகச் சமைத்து உண்ணக்கூடிய காய்களில் ஒன்று, கத்திரிக்காய். அதனால், எப்போதும் சந்தையில் வரவேற்பு இருக்கும். அதுவும் இயற்கை விவசாயத்தில் விளைவிக்கப்பட்ட நாட்டுக்கத்திரிக்காய் என்றால் சொல்லவே வேண்டியதில்லை. நாட்டுக்கத்திரிக்காயில் சுவை, மணம் அதிகம். நாட்டுக்கத்திரிச் சாகுபடி செய்யும் விவசாயிகள் சந்தை வாய்ப்பைப் பற்றிக் கவலைப்படவே வேண்டியதில்லை. அந்த வகையில் தஞ்சாவூர் மாவட்டம், திருக்காட்டுப்பள்ளி அருகே உள்ள அலமேலுபுரம் பூண்டி கிராமத்தைச் சேர்ந்த அண்ணாதுரை இயற்கை முறையில் நாட்டுக்கத்திரிக்காய்ச் சாகுபடி செய்து நிறைவான லாபம் பார்த்து வருகிறார்.

நல்ல வருமானம் கொடுக்கும் நாட்டுக்கத்திரி!

கடந்த 10.11.2018-ம் தேதியிட்ட பசுமை விகடன் இதழில் ‘டெல்டாவில் மணக்கும் நாட்டுக் கறிவேப்பிலை’ என்ற தலைப்பில் வெளியான கட்டுரைமூலம் ஏற்கெனவே வாசகர்களுக்கு அறிமுகமானவர்தான், அண்ணாதுரை. ஒரு காலைவேளையில் அண்ணாதுரையின் தோட்டத்துக்குச் சென்றோம். கத்திரி வயலில் பறிப்புப் பணியிலிருந்த அண்ணாதுரை, மகிழ்ச்சியாக வரவேற்றுப் பேசினார்.

“இது மணலும் கரிசலும் கலந்த இருமண் பாடு. எனக்கு ஒண்ணே முக்கால் ஏக்கர் நிலம் இருக்கு. ஒரு ஏக்கர் நிலத்துல நெல் சாகுபடி செஞ்சுட்டுருக்கேன். முக்கால் ஏக்கர் நிலத்துல தென்னை இருக்கு. தென்னைக்கு இடையில 30 சென்ட் நிலத்துல ரொம்ப வருஷமா ஊடுபயிராக நாட்டுக்கறிவேப்பிலைச் சாகுபடி செஞ்சுட்டுருக்கேன்.

இந்த வருஷம், 20 சென்ட் நிலத்துல ‘மணப்பாறை நாட்டுக்கத்திரி’ போட்டேன். இயற்கை முறை சாகுபடியில நல்ல மகசூல் கிடைக்குது. இருபது வருஷங்களுக்கு முன்னாடி, அலமேலுபுரம் பூண்டி, சுக்காம்பார், கோவிலடி, நடுப்படுகை, திருசென்னம்பூண்டினு சுத்துப்பட்டு ஊர்கள்ல, அதிகளவுல நாட்டுக்கத்திரிச் சாகுபடி செய்வாங்க. ரசாயன உரத்தைப் பயன்படுத்த ஆரம்பிச்ச பிறகு, வீரிய ரகங்கள் வந்துடுச்சு. அதைச் சாகுபடி செய்றப்போ பூச்சி, நோய்த்தாக்குதலைச் சமாளிக்க முடியாம ஒரு கட்டத்துல கத்திரிச் சாகுபடியையே விட்டுட்டாங்க. இப்போலாம், இந்தப் பகுதியில நாட்டுக்கத்திரியைப் பார்க்கிறதே அபூர்வம்தான். நாட்டுக்கத்திரிக்குத் திருக்காட்டுப்பள்ளி காய்கறிச் சந்தையில எப்பவுமே மவுசு அதிகம்.

என்னோட நாட்டுக்கத்திரிக்காய், பார்க்குறதுக்கே பெருசா இருக்கும். பிஞ்சுலயே நல்லா சதைப்பற்றோடு இருக்கும். நல்ல எடை நிக்கும்” என்ற அண்ணாதுரை கத்திரி வயலுக்கு அழைத்துச் சென்று காட்டியபடியே பேசினார்.

ஒட்டுமொத்த விகடனுக்கும் ஒரே ஷார்ட்கட்!

நல்ல வருமானம் கொடுக்கும் நாட்டுக்கத்திரி!

“கத்திரிச் சாகுபடியில் பூச்சி, நோய்த்தாக்குதலைச் சமாளிக்குறதுதான் சவாலான விஷயம். இயற்கை முறையில நாட்டுக்கத்திரிச் சாகுபடி செஞ்சாலும்… பூச்சித்தாக்குதல் இருக்கத்தான் செய்யுது. தண்டுத் துளைப்பான், வேர்ப்பூச்சி, காய்ப்புழு எல்லாம் வராம இருக்குறதுக்காக ‘வரும்முன் காப்போம்’ நடவடிக்கையா, வேப்பங்கொட்டைக் கரைசல் மாதிரி தடுப்பு மருந்துகளை நானே தயார் செஞ்சு பயன்படுத்துறேன். ஊட்டத்துக்காகப் பஞ்சகவ்யா, மீன் அமினோ அமிலம், மண்புழு உரம் மாதிரியான இடுபொருள்களைப் பயன்படுத்துறேன். நடவு செஞ்சு 180 நாள்கள் ஆகிடுச்சு.

நடவு செஞ்ச 50-ஆம் நாள்ல இருந்து காய்கள் கிடைச்சது. 60-ஆம் நாள்ல இருந்து காய்களைப் பறிச்சு விற்பனை செஞ்சுட்டுருக்கேன். வாரத்துக்கு இரண்டு தடவை காய்கள் பறிக்கிறேன்” என்ற அண்ணாதுரை நிறைவாக மகசூல் மற்றும் வருமானம் குறித்துச் சொல்ல ஆரம்பித்தார்.

நல்ல வருமானம் கொடுக்கும் நாட்டுக்கத்திரி!

“ஆரம்பத்துல ஒரு பறிப்புக்கு 15-20 கிலோ மகசூல் கிடைச்சது. அடுத்தடுத்த பறிப்புகள்ல, மகசூல் படிப்படியாக அதிகரிச்சி, ஒரு பறிப்புக்கு 30-35 கிலோ அளவு மகசூல் கிடைச்சது. போன ஒரு மாசமாகக் காய்ப்பு குறைஞ்சு ஒரு பறிப்புக்கு 20-25 கிலோ மகசூல் கிடைச்சிக்கிட்டுருக்கு. இதுவரைக்கும் மொத்தம் 880 கிலோ காய் கிடைச்சுருக்கு. ஒரு கிலோ 30 ரூபாய் வீதம் 880 கிலோ காய் மூலமா 26,400 ரூபாய் வருமானம் கிடைச்சுருக்கு. இதுல எல்லாச் செலவும் போக 22,300 ரூபாய் லாபம். மொத்தமே 20 சென்ட் நிலங்கிறதால எல்லா வேலைகளையும் நானே செஞ்சுடுவேன். இடுபொருள்களையும் நானே தயாரிக்கிறேன். அதனால, செலவே கிடையாது. அடுத்துக் காய்ப்பு ஓய்ந்திடும். தரையில இருந்து ஓர் அடி உயரத்துக்கு விட்டுச் செடியைக் கவாத்து பண்ணி, முறையாகப் பராமரிச்சா ரெண்டு மாசம் கழிச்சுத் திரும்பக் காய்க்க ஆரம்பிச்சுடும்” என்று சொல்லி விடைகொடுத்தார்.

தொடர்புக்கு, அண்ணாதுரை, செல்போன்: 97881 91470 

கு.ராமகிருஷ்ணன் - படங்கள்: ம. அரவிந்த்

பூச்சி மேலாண்மை!

த்திரியை விதைத்த 15-ஆம் நாள் 52 லிட்டர் தண்ணீரில் 4 லிட்டர் வேப்பங்கொட்டைக் கரைசல், தலா 100 மில்லி புங்கன் எண்ணெய், வேப்பெண்ணெய், 50 மில்லி இலுப்பை எண்ணெய், 25 கிராம் காதி சோப் ஆகியவற்றைக் கலந்து தெளிக்க வேண்டும். 30-ஆம் நாள் கன்றுகளின் பக்கவாட்டில் 3 அங்குல இடைவெளியில் களைகொத்தியால் சிறு குழி எடுக்க வேண்டும். 200 லிட்டர் தண்ணீரில் தலா 10 கிலோ கடலைப்பிண்ணாக்கு, வேப்பம்பிண்ணாக்கு, ஆமணக்குப் பிண்ணாக்கு ஆகியவற்றை ஊறவைத்து, ஒரு குழிக்கு 200 மில்லி வீதம் ஊற்ற வேண்டும். 40-ஆம் நாள் 5 லிட்டர் மாட்டுச் சிறுநீரில், நன்கு இடித்துத் தூளாக்கப்பட்ட நாட்டுக் கருவேல மரப்பட்டை 1 கிலோ, பிரண்டை 1 கிலோ ஊற வைக்க வேண்டும். இதனை வடிகட்டி 2 லிட்டர் கரைசலை எடுத்து, 52 லிட்டர் தண்ணீரில் கலந்து தெளிக்க வேண்டும். 60-ஆம் நாள், 200 வெற்றிலை, 100 கிராம் கிராம்பு ஆகியவற்றைத் தனித்தனியாக இடித்து, 5 லிட்டர் மாட்டுச் சிறுநீரில் ஊற வைக்க வேண்டும். இக்கரைசலில் 2 லிட்டர் கரைசல் எடுத்து 52 லிட்டர் தண்ணீரில் கலந்து தெளிக்க வேண்டும். 20 நாள்களுக்கு ஒருமுறை மேற்கண்ட பூச்சிவிரட்டிகளை மாற்றி மாற்றிக் கொடுத்து வர வேண்டும். இதனால், காய்ப்புழு மற்றும் வேரைத்தாக்கும் பூச்சிகளைத் தடுக்கலாம்.

நாற்று நடவுதான் நல்லது!

20
சென்ட் நிலத்தில் இயற்கை முறையில் நாட்டுக்கத்திரிச் சாகுபடி செய்யும் முறைகுறித்து அண்ணாதுரை சொன்ன விஷயங்கள் இங்கே…

நல்ல வருமானம் கொடுக்கும் நாட்டுக்கத்திரி!

கத்திரியைப் பொறுத்தவரை நாற்று நடவுதான் சிறந்தது. திடகாத்திரமான நாற்றுகளை இயற்கை முறையில் நாமே உருவாக்கிக்கொள்ளலாம். நாற்றங்காலுக்கான நிலத்தை மண்வெட்டியால் கொத்திச் சிறு பாத்திகள் அமைக்க வேண்டும். 30 கிலோ எருவுடன், 20 கிலோ மண்புழு உரம் கலந்து பாத்திகளில் தூவி மண்ணைச் சமப்படுத்தி 100 கிராம் விதையைத் தூவ வேண்டும். தொடர்ந்து 10 கிலோ ஈரமண்ணில் தலா 10 கிலோ எரு, மண்புழு உரம் ஆகியவற்றைக் கலந்து… விதைகள் வெளியில் தெரியாத அளவுக்குத் தூவி விட வேண்டும். பிறகு குச்சிகளுடன் கூடிய இலை, தழைகளைப்போட்டு மூன்று நாள்களுக்குத் தினமும் மாலை வேளையில் தண்ணீர் தெளித்து வர வேண்டும். விதைத்த 5-ஆம் நாள் முளைப்பு தெரிந்தவுடன் இலை, தழைகளை அகற்றிவிட்டுத் தினமும் பாத்திகளை ஈரப்படுத்தும் அளவுக்குப் பாத்திகளின் ஓரங்களில் மட்டும் தண்ணீர் விட வேண்டும்.

நல்ல வருமானம் கொடுக்கும் நாட்டுக்கத்திரி!

விதைத்த 15-ஆம் நாளிலிருந்து வாரம் ஒருமுறை… 2 லிட்டர் தண்ணீரில் 400 மில்லி வேப்பங்கொட்டைக் கரைசலைக் கலந்து தெளிக்க வேண்டும். 20-ஆம் நாளிலிருந்து 10 நாள்களுக்கு ஒருமுறை, 2 லிட்டர் தண்ணீரில் 200 மில்லி பஞ்சகவ்யா மற்றும் 100 மில்லி மீன் அமினோ அமிலம் ஆகியவற்றைக் கலந்து தெளிக்க வேண்டும். 40-60 நாள்களில் நாற்றுகள் முக்கால் அடி உயரத்துக்கு வளர்ந்து நடவுக்குத் தயாராகிவிடும்.

தேர்ந்தெடுக்கப்பட்ட 20 சென்ட் நிலத்தில் கொக்கிக் கலப்பை கொண்டு, இரண்டு சால் உழவு ஓட்டி 500 கிலோ எருவைக் கொட்டிக் கலைத்து ஓர் உழவு செய்ய வேண்டும். பிறகு 2 அடி இடைவெளியில் முக்கால் அடி விட்டம், முக்கால் அடி ஆழம் என்ற அளவில் குழிகள் எடுக்க வேண்டும். பிறகு மேல்மண்ணைக் குழிக்குள் கொட்டி மண்ணை ஈரப்படுத்திக் குழிக்கு 2 நாற்றுகள் என்ற விகிதத்தில் நடவு செய்ய வேண்டும். நாற்றுகள் 3 அங்குல ஆழத்துக்கு மண்ணுக்குள் புதைந்திருக்க வேண்டும். மூன்று நாள்களுக்குத் தினமும் காலை, மாலை என இருவேளைகள் தண்ணீர் கொடுக்க வேண்டும். பிறகு 3 நாள்களுக்கு ஒருமுறை மாலை நேரத்தில் தண்ணீர் கொடுக்க வேண்டும்.  

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism