Published:Updated:

வெகுமதி கொடுக்கும் வெங்காயம்... நடவு முதல் அறுவடை வரை!

வெகுமதி கொடுக்கும் வெங்காயம்... நடவு முதல் அறுவடை வரை!
பிரீமியம் ஸ்டோரி
வெகுமதி கொடுக்கும் வெங்காயம்... நடவு முதல் அறுவடை வரை!

தொழில்நுட்பம்

வெகுமதி கொடுக்கும் வெங்காயம்... நடவு முதல் அறுவடை வரை!

தொழில்நுட்பம்

Published:Updated:
வெகுமதி கொடுக்கும் வெங்காயம்... நடவு முதல் அறுவடை வரை!
பிரீமியம் ஸ்டோரி
வெகுமதி கொடுக்கும் வெங்காயம்... நடவு முதல் அறுவடை வரை!

மூர்த்திச் சிறிது என்றாலும் கீர்த்திப் பெரிது என்று சொல்வது, சின்ன வெங்காயத்துக்குச் சரியாகப் பொருந்தும்.  நல்ல லாபத்தை ஈட்டித் தரும் பயிர்களில் வெங்காயத்துக்கு முக்கிய இடம் உண்டு. சாம்பார் வெங்காயம் என்றழைக்கப்படும் சின்ன வெங்காயத்தை அதிக அளவில் உற்பத்தி செய்யும் நாடு சீனா. இரண்டாம் இடத்தில் இருக்கிறது, இந்தியா. உற்பத்தியில் சீனா முதல் இடத்திலிருந்தாலும் சர்வதேசச் சந்தையில் இந்திய வெங்காயத்துக்குத் தனி மரியாதை உண்டு. அதற்குக் காரணம், இந்திய வெங்காயத்தின் காரத்தன்மைதான்.

வெகுமதி கொடுக்கும் வெங்காயம்... நடவு முதல் அறுவடை வரை!

இந்திய வெங்காயத்தின் காரத்தன்மைக்குக் காரணம், நம் மண்தான். இந்திய மண்ணைக் ‘கந்தகப் பூமி’ என்று சொல்வார்கள். அந்தளவுக்கு மண்ணில் ‘சல்ஃபர்’ அதிகமாக இருக்கிறது. அதனால்தான் இந்திய வெங்காயத்தின் தரம் சிறப்பாக இருக்கிறது. அதற்குக் கூடுதல் விலையும் கிடைக்கிறது.

வெங்காயத்தை ஆண்டு முழுவதும் சாகுபடி செய்யலாம் என்றாலும், விவசாயிகள் ஓரிரு பருவத்தில் ஒட்டுமொத்தமாக விளைவித்து விடுகிறார்கள். இதனால், விலை கிடைப்பதில் சிக்கல் ஏற்படுகிறது. நமது வெங்காயம், அதிகளவில் ஏற்றுமதியாகிறது. அதனால், பல நேரங்களில் சந்தையில் வெங்காயம் பற்றாக்குறை ஏற்படுகிறது. இதைத்தவிர்க்க, ஆண்டு முழுவதும் சாகுபடி செய்ய வேண்டும். எப்போதும் சந்தையில் வெங்காயம் கிடைக்கும் நிலையை ஏற்படுத்தினால், விவசாயிகளுக்குச் சீரான விலை கிடைக்கும்.

குறைந்த நாள்களில் நல்ல வருமானம் தரக்கூடிய பயிரான வெங்காயத்தை, அறிவியல் ரீதியான தொழில்நுட்பங்களைப் பயன்படுத்திச் சாகுபடி செய்தால், சிறப்பான மகசூலை எடுக்க முடியும். வெங்காயச் சாகுபடி நுட்பங்கள் பற்றி, தமிழ்நாடு கால்நடை மருத்துவ அறிவியல் பல்கலைக்கழகத்தின் ஓர் அங்கமான சிவகங்கை மாவட்டம், குன்றக்குடி வேளாண் அறிவியல் மையத்தின் தலைவர் மற்றும் பேராசிரியர் செந்தூர்குமரன் சொன்ன விஷயங்கள் இங்கே…

வெங்காயம் ஒரு வெப்ப மண்டலப் பயிர். பொதுவாக, ஜனவரி மாதம் முதல் மே மாதம் வரை வெங்காயம் சாகுபடி செய்யப்படுகிறது. மழைக்காலங்களில் தண்ணீர் தேங்காத மேட்டுப்பாங்கான நிலங்களில் சாகுபடி செய்யலாம்.

ரகங்கள்

கோ-1 : இந்த ரகம், நடுத்தரக் காரத்தன்மை உடையது. சிவப்பு நிறத்தில் இருக்கும். இதன் ஒரு தூரில் 7-8 வெங்காயங்கள் இருக்கும். வயது 90 நாள்கள். ஒரு ஹெக்டேரில் 10 டன் மகசூல் கிடைக்கும்.

கோ-2 : நடுத்தர வெங்காயம். நல்ல காரத் தன்மையுடையது. சிவப்பு நிறம். ஒரு தூரில் 7-9 வெங்காயங்கள் இருக்கும். வயது 65 நாள்கள். ஒரு ஹெக்டேரில் 12 டன் மகசூல் கிடைக்கும்.

கோ-3 :
சிவப்பு நிறம். வயது 65-70 நாள்கள். ஒரு தூரில் 8-10 வெங்காயங்கள் இருக்கும். ஒரு ஹெக்டேரில் 15 டன் மகசூல் கிடைக்கும்.

கோ-4 : இளஞ்சிவப்பு ரகம். ஒரு தூரில் 8-13 வெங்காயங்கள் இருக்கும். வயது 70-80 நாள்கள். ஒரு ஹெக்டேரில் 10 டன் மகசூல் கிடைக்கும்.

கோ-5 : தற்போது சந்தையில் இந்த ரக வெங்காயம்தான் அதிகளவில் இருக்கிறது. மேலே பார்த்த நான்கு ரகங்களைவிட, இது அளவில் சற்றுப் பெரியதாக இருக்கும். இதை நாற்று நடவு செய்ய வேண்டும். வயது 90-100 நாள்கள். இதை விதைக்காகவும் சாகுபடி செய்யப்படுகிறது. வெங்காயமாக எடுத்தால் ஒரு ஹெக்டேரில் 18 டன் மகசூல் கிடைக்கும். விதையென்றால் 250-300 கிலோ அளவு மகசூல் கிடைக்கும்.

அக்ரி பவுண்ட் டார்க் ரெட் : டெல்லியிலிருந்து வெளியிட்ட ரகம் இது. நல்ல சிவப்பு நிறம் உடையது. அளவில் பெரியதாக இருக்கும். வயது 65-75 நாள்கள். ஒரு தூரில் 5-7 வெங்காயங்கள் இருக்கும். ஒரு ஹெக்டேரில் 18 முதல் 20 டன் மகசூல் கிடைக்கும்.

ஒட்டுமொத்த விகடனுக்கும் ஒரே ஷார்ட்கட்!

வெகுமதி கொடுக்கும் வெங்காயம்... நடவு முதல் அறுவடை வரை!

மண்

வெங்காயச் சாகுபடிக்கு நல்ல வடிகால் வசதியுள்ள, தண்ணீர் தேங்காத நிலம் தேவை. இறுக்கமான மண், சுண்ணாம்பு கலந்த மண், செம்பொறை, களிமண், களர் உவர் நிலங்களில் சாகுபடியைத் தவிர்ப்பது நல்லது. மண் இறுக்கமாக இருந்தால் மண்ணுக்குள் வெங்காயம் பெருக்காது. எனவே நல்ல வடிகால் வசதியுடைய பொலபொலப்பான இலகுவான மண்ணில் வெங்காயத்தைச் சாகுபடி செய்யலாம்.

வண்டல் கலந்த செம்மண், வண்டல் மண் ஆகியவை வெங்காயச் சாகுபடிக்கு ஏற்றவை. மண்ணின் கார அமிலத்தன்மை 6.5-7.5 அலகு வரை இருக்க வேண்டும். நல்ல வெயில் கிடைக்கும் பகுதிகளில் நல்ல மகசூல் கிடைக்கும். கன்னியாகுமரி, மேட்டுப்பாளையம் போன்ற பகுதிகள், சில மலை அடிவாரப் பகுதிகளில் பகல் நேர வெயில் விரைவில் முடிந்துவிடும். அந்தப் பகுதிகளில் நல்ல மகசூல் கிடைக்காது. அறுவடைக் காலத்தில் அதிக வெயில் இருந்தால் மிகவும் நல்லது.

பருவம்

வெங்காயத்தை ஆண்டு முழுவதும் சாகுபடி செய்யலாம். ஏப்ரல் முதல் மே வரையும், அக்டோபர் முதல் நவம்பர் வரையும் விதை வெங்காயம் மூலம் சாகுபடி செய்யலாம். ஆனால், வயலில் தண்ணீர் தேங்கக்கூடாது. விதை மூலம் சாகுபடி செய்பவர்கள் கோ-5 ரகத்தைப் பயன்படுத்தலாம். கோ-5 ரகத்துக்கு, மார்ச் மாதம் முதல் ஜூன் மாதம் வரையான காலம் மிகவும் ஏற்றது. இந்தப் பருவத்தில் நடவு செய்ய பிப்ரவரி மாதமே விதைகளை விதைத்து, நாற்றுத் தயாரிப்பில் இறங்கிவிட வேண்டும். நாற்று உற்பத்திக்கு இரண்டு மாதங்கள் பிடிக்கும்.

கோ-5 ரகம் தவிர மற்ற ரகங்களில் குமிழ் வெங்காயத்தை (விதை வெங்காயத்தை) நேரடியாக நடவு செய்யலாம். விவசாயிகள், விதை வெங்காயம் பெரியதாக இருக்க வேண்டும் என நினைக்கிறார்கள். ஆனால், அது தவறான எண்ணம். வெங்காயத்தின் அளவில் பெரியதையும் சிறியதையும் தவிர்க்க வேண்டும். நடுத்தர அளவுள்ள வெங்காயமே விதைப்புக்கு ஏற்றது.

கோ-5 ரக விதையை விதைப்பதாக இருந்தால், ஒரு ஏக்கர் நிலத்துக்கு 1 கிலோ விதைத் தேவைப்படும். மற்ற ரகங்களிலிருந்தால் விதை வெங்காயத்தைத்தான் விதைக்க வேண்டும். ஒரு ஏக்கர் நிலத்துக்கு 400-450 கிலோ விதை வெங்காயம் தேவைப்படும்.

விதை நேர்த்தி

கோ-5 ரகத்தைச் சாகுபடி செய்வதாக இருந்தால், நாற்று விட்டுத்தான் நடவு செய்ய வேண்டும். விதைகளை ஆறிய வடிகஞ்சியில் நனைத்து சிறிது நேரம் உலர விட வேண்டும்.

பிறகு நுண்ணுயிர் உரமான 4 கிராம் அசோஸ்பைரில்லம் அல்லது சூடோமோனஸைத் தூவி விதைநேர்த்தி செய்து நாற்றங்காலில் விதைக்க வேண்டும். தரமான, வீரியமான நாற்றுகளைப் பெறுவதற்கு நல்ல மேட்டுப்பாங்கான நாற்றுப்படுக்கை அமைத்துக்கொள்ள வேண்டும்.

வெகுமதி கொடுக்கும் வெங்காயம்... நடவு முதல் அறுவடை வரை!

விதை வெங்காயமாக இருந்தால், தலா 500 கிராம் அசோஸ்பைரில்லம், பாஸ்போ பாக்டீரியா, டிரைக்கோடெர்மா அஸ்பரெல்லம் (விரிடி) ஆகிய நுண்ணுயிர் உரங்களை 10 லிட்டர் கஞ்சியில் சேர்த்து, ஓர் அண்டாவில் கலந்துகொள்ள வேண்டும். அதற்குள் விதை வெங்காயத்தை மூழ்க வைத்து எடுத்து நிழலில் ஒரு மணிநேரம் உலர வைக்க வேண்டும். விதைநேர்த்தி செய்து நடவு செய்தால், தூர் மற்றும் தாள் அழுகல் நோய் வராது.

நிலம் தயாரிப்பு

நடவுக்கு முன்பாக நிலத்தைச் சீரமைத்து மண்ணில் நீர் தேங்காத வகையில் வாய்க்கால், பாத்திகளை அமைத்துக்கொள்ள வேண்டும். பொதுவாக 2 சதவிகிதச் சரிவு இருப்பதுபோல் நடவு வயல் நிலத்தை அமைத்துக்கொள்ள வேண்டும். அப்போதுதான் தண்ணீர் தேங்காது. கடைசி உழவின்போது, ஒரு ஏக்கருக்கு 10 டன் மட்கிய எருவை இட்டு உழவு செய்ய வேண்டும். நடவுக்கு 15 நாள்களுக்கு முன்பு, ஏக்கருக்கு 100 கிலோ வேப்பம் பிண்ணாக்கு, 150 கிலோ ராக் பாஸ்பேட் இட்டு, மண்ணைப் புரட்டி விட வேண்டும். அதன் பிறகே பார் எடுத்து, நடவு செய்ய வேண்டும். பார் அமைக்கும்போது குறுக்கு, நெடுக்குமாகப் பார்களை அமைக்க வேண்டும். சொட்டுநீர்ப் பாசனம் செய்யும் விவசாயிகள், மேட்டுப்பாத்தி முறையில் பார் அமைத்துக் கொள்ள வேண்டும்.

நடவு

குறுக்கு நெடுக்கு முறையில் நடவு செய்வதாக இருந்தால் பாருக்குப் பார் 45 சென்டிமீட்டர் இடைவெளி இருக்க வேண்டும். பாரின் இரண்டு பக்கங்களிலும், மையத்திலும் 10 சென்டிமீட்டர் இடைவெளியில் விதை வெங்காயத்தை அல்லது நாற்றை நடவு செய்ய வேண்டும். நடவுக்கு முன்பாகப் பாசனம் செய்து, பாத்திகளை இலகுவாக்கிக் கொள்ள வேண்டும். 

வெகுமதி கொடுக்கும் வெங்காயம்... நடவு முதல் அறுவடை வரை!

நடவு செய்த 3-ம் நாள் உயிர்த்தண்ணீர் பாய்ச்ச வேண்டும். அதன் பிறகு மண் கண்டத்தைப் பொறுத்து 7-10 நாள்கள் இடைவெளியில் பாசனம் செய்யலாம். சொட்டுநீர்ப் பாசனம் செய்யும் விவசாயிகள், மேட்டுப்பாத்திகளில் செடிக்குச் செடி 12 சென்டிமீட்டர், வரிசைக்கு வரிசை 20 சென்டிமீட்டர் இடைவெளியில் ஆறு வரிசைகள் நடலாம்.

களை நிர்வாகம்

நடவு செய்த ஒரு மாதம் வரை களைகள் இருப்பதைப் பொறுத்தோ குறிப்பிட்ட இடைவெளியிலோ கைகளால் களை எடுக்க வேண்டும். வெங்காயத்தண்டு மென்மையாக இருப்பதால், களைக்கொத்தால் களை எடுப்பதைத் தவிர்ப்பது நல்லது. இதேபோன்று கோனோவீடரையும் தவிர்ப்பது நல்லது.

உர மேலாண்மை

இயற்கை விவசாயம் செய்பவர்கள், விதைப்புக்கு முன்பாகச் சணப்பு விதைகளை விதைத்து, மடக்கி உழவு செய்ய வேண்டும். இதனால், மண்ணுக்குத் தேவையான தழைச்சத்து கிடைக்கும். நடவுக்கு ஒருநாள் முன்பு அடியுரமாக 100 கிலோ மண்புழு உரம், ஏழரை கிலோ கோழி எரு, தலா ஒரு கிலோ அசோஸ்பைரில்லம், பாஸ்போ பாக்டீரியா ஆகியவற்றைக் கலந்து பாத்திகளில் தூவ வேண்டும்.

வெகுமதி கொடுக்கும் வெங்காயம்... நடவு முதல் அறுவடை வரை!

நடவு செய்த 30-ம் நாள் மேலுரமாக 250 கிலோ மண்புழு உரம், தலா ஒரு கிலோ அசோஸ்பைரில்லம், பாஸ்போ பாக்டீரியா, 150 கிலோ கடலைப் பிண்ணாக்கு கலந்து தூவ வேண்டும். இதை, 45-ம் நாள் மீண்டும் கொடுக்க வேண்டும். சொட்டுநீர்ப் பாசனம் செய்யும் விவசாயிகள் 25-ம் நாள் ஒரு லிட்டர் இ.எம் கரைசலை 250 லிட்டர் தண்ணீரில் கலந்துப் பாசனம் செய்ய வேண்டும். 45-ம் நாள் 500 மில்லி அசிட்டோபேக்டரை (நுண்ணுயிர் திரவம்) 75 லிட்டர் தண்ணீரில் கலந்து சொட்டுநீர் அமைப்பு வெஞ்சுரி மூலமாகக் கொடுக்க வேண்டும். இருபது நாள்களுக்கு ஒருமுறை 150 கிலோ கடலைப்பிண்ணாக்கு கொடுக்க வேண்டும். வெங்காயத்துக்குத் தேவையான சல்ஃபர் நிலத்தில் இருக்கும். அதை வெங்காயத்தால் நேரடியாக எடுத்துக்கொள்ள முடியாது. கடலைப் பிண்ணாக்கு சல்ஃபர் சத்தை மண்ணிலிருந்து வெங்காயம் எடுத்துக்கொள்ள உதவும். ஜீவாமிர்தத்தையும் பாசனத் தண்ணீரில் கலந்துவிடலாம்.

வளர்ச்சி ஊக்கி

தலா இரண்டு லிட்டர் மீன் அமினோ அமிலம், பஞ்சகவ்யா ஆகியவற்றை 100 லிட்டர் தண்ணீரில் கலந்து, அக்கரைசலிலிருந்து 200 மில்லி எடுத்து 10 லிட்டர் தண்ணீரில் கலந்து தெளிக்க வேண்டும். நடவு செய்த 40 நாள்களுக்குப் பிறகு மூன்று முறை தெளிக்க வேண்டும். இயற்கை விவசாயம் செய்யும் விவசாயிகள் வளர்ச்சி ஊக்கியை முறையாகக் கடைப்பிடித்தால்தான் செடி வளர்ச்சியும் வெங்காய வளர்ச்சியும் சிறப்பாக இருக்கும். நடவு செய்த பத்தாவது நாள், ஒரு லிட்டர் அமுதக்கரைசலை 10 லிட்டர் தண்ணீரில் கலந்து கொடுக்க வேண்டும். ஒரு லிட்டர் ஜீவாமிர்தத்தை 10 லிட்டர் தண்ணீரில் கலந்து 30-ம் நாள் கொடுக்க வேண்டும். 45-ம் நாள் 250 மில்லி ஜீவாமிர்தத்தை 10 லிட்டர் தண்ணீரில் கலந்து தெளிக்கவேண்டும். மீண்டும் கொடுப்பதால் வெங்காயத்தின் நிறம் நன்றாக இருக்கும். மண்ணுக்கடியில் வெங்காயக் குமிழின் அளவு விரிவடையும்.

பூச்சி மேலாண்மை: இலைப்பேன்

வெங்காயத்தை நான்கு வகையான பூச்சிகளும் இரண்டு வகையான நோய்களும் தாக்குகின்றன.இதில் முக்கியமான பூச்சி இலைப்பேன். நடவு செய்த 10-ம் நாளுக்கு மேல் இதன் தாக்குதல் இருக்கும். இது தாக்கினால், வெங்காயத்தாள்கள் காய்ந்து வெளிர் மஞ்சள் நிறமாக மாறும். இது இலையின் நுனியில் உள்ள பச்சையைச் சுரண்டிவிடும். இதனால், தாளின் நுனி கருகிவிடும். இதைப் பலரும் இலைக்கருகல் நோய் என நினைக்கிறார்கள். ஆனால், இது பூச்சியால் ஏற்படக்கூடிய பிரச்னை. பூச்சிவிரட்டிதான் சிறந்த மருந்து. இலையில் பச்சையம் இல்லையென்றால் மண்ணுக்கடியில் வெங்காயம் வளர்ச்சியடையாது. எனவே வெங்காய இலைத்தாள்களைப் பசுமையாக வைத்துக் கொள்ள வேண்டும்.

வெகுமதி கொடுக்கும் வெங்காயம்... நடவு முதல் அறுவடை வரை!

இதைத் தடுக்க வெங்காயத்தை நெருக்கமாக நடவு செய்யக் கூடாது. அதிகளவு உரமிடக்கூடாது. இவற்றைச் சரியாகக் கடைப்பிடித்தும் இலைப்பேன் தாக்குதல் இருந்தால்… 10 நாள்கள் இடைவெளியில் கற்பூரக்கரைசலைத் தெளிக்க வேண்டும். இரண்டு மில்லி இஞ்சி-பூண்டு கரைசலை, ஒரு லிட்டர் தண்ணீரில் கலந்து, பயிர்களுக்குத் தெளித்தும் கட்டுப்படுத்தலாம். அதிக பரப்பில் வெங்காயம் சாகுபடி செய்பவர்கள் இருபது வரிசைக்கு ஒரு வரிசை சூரியகாந்தியை நடவு செய்ய வேண்டும். குறைவான பரப்பில் நடவுசெய்பவர்கள் வரப்பு ஓரங்களில் சூரியகாந்தியை நடவு செய்யலாம். இப்படிச் செய்வதால் இலைப்பேன் பிரச்னையைக் குறைக்கலாம். வெங்காய வயலில் களை இருக்கவே கூடாது. களைச்செடிகளில் இலைப்பேன் இனப்பெருக்கம் செய்யும். 500 கிராம் பூண்டை இடித்துச் சாறாக்கி அதில் 5 மில்லி எடுத்து ஒரு லிட்டர் தண்ணீரில் கலந்து களைச்செடிகளில் வரும் முன் காப்பானாகத் தெளித்தால், இலைப்பேன் தாக்குதலிலிருந்து தப்பிக்கலாம்.

வெள்ளை ஈ

நடவு செய்த 30-ம் நாள் பயிர் பச்சைக் கட்டி நிற்கும். பயிர் மிகவும் செழிப்பாக இருக்கும் நேரம். இந்த நேரத்தில் வெள்ளை ஈ தாக்குதல் தொடங்கும். இவற்றில் பெரிய புழுக்கள், தண்டை ஓட்டைப் போட்டு உள்ளே புகுந்து, மேலிருந்து கீழ்நோக்கி வெங்காயத்தைச் சுரண்டும். இது அடித்தாள் அருகே மண் இடுக்குகளில் முட்டை போடும். மண் பொலபொலப்பாக இருந்தால் முட்டை போட முடியாது. கட்டிக்கட்டியாக இருந்தால் முட்டை போடும். 

வெகுமதி கொடுக்கும் வெங்காயம்... நடவு முதல் அறுவடை வரை!

எனவேதான் வெங்காய வயலில் மண் பொலபொலப்பாக இருக்கவேண்டும். விதைத்த 30-ம் நாள் மூன்று சதவிகித வேப்பெண்ணெய்க் கரைசல் அல்லது தலா கால் கிலோ கொத்தமல்லி, புதினா இலைகளை இடித்துச் சாறு எடுத்துக்கொள்ள வேண்டும். அதில் 5 மில்லி எடுத்து, ஒரு லிட்டர் தண்ணீரில் கலந்து தெளிக்க வேண்டும். இதைச் செய்தாலே வெள்ளை ஈ தாக்குதலைக் குறைக்கலாம். வெர்டிசிலியம் லெக்கானி என்ற நுண்ணுயிர் திரவத்தை, ஒரு லிட்டர் தண்ணீரில் 5 மில்லி என்ற அளவில் கலந்து தெளித்தும் கட்டுப்படுத்தலாம்.

வெட்டுப்புழு

இலைகளில் பச்சையம் சுரண்டப்பட்டு ஓட்டை ஓட்டையாக இருக்கும். பச்சையம் குறைந்த வெங்காயத்தாள்களால் தரமான வெங்காயத்தைக் கொடுக்க முடியாது. வளர்ந்த புழுக்கள் தாள்களை வெட்டிவிடும். இதனால், வெங்காயம் தனியாகவும், தாள் தனியாகவும் போய்விடும். இதோடு பயிரின் வளர்ச்சி பாதிக்கப்பட்டு வெங்காயம் அழுகிக் காயும். வெட்டுப்புழுவைத் தடுக்க… வரப்பு ஓரங்களில் ஆமணக்கை நடவு செய்ய வேண்டும். தாய் அந்துப்பூச்சி, ஆமணக்கு இலையில் முட்டை வைக்கும். இந்த முட்டைகள் ஆமணக்கு இலைகளில் சந்தனக் கூடுபோல இருக்கும். அப்படி இருக்கும் இலைகளைப் பறித்து அழித்து விட வேண்டும்.

பேசில்லஸ் துரிஞ்சியென்சிஸ் என்ற நுண்ணுயிர் திரவத்தை 10 மில்லி என்ற அளவில் ஒரு லிட்டர் தண்ணீரில் கலந்து வாரம் இரண்டு முறை தெளிக்க வேண்டும் அல்லது பெவேரியா பேசியானா என்ற பூஞ்சணப் பொடியை 5 கிராம் எடுத்து 10 லிட்டர் தண்ணீரில் கலந்து தெளிக்கலாம். இதை ஏழு முதல் பத்து நாள்கள் இடைவெளியில் தெளிக்க வேண்டும்.

நோய் மேலாண்மை: அடித்தாள் அழுகல்

வெங்காயத்தைப் பாதிக்கும் முக்கியமான நோய் அடித்தாள் அழுகல். இந்த நோய் தாக்கிய வெங்காயத்தாள்களின், தரையை ஒட்டிய தண்டுப்பகுதி அழுக தொடங்கும். இது இலைப்பேனால் ஏற்பட்டதா, இல்லை நோயா என்ற குழப்பம் வரும். நோய் தாக்கிய வெங்காயத்தில் தாள்கள் தனியாக விழுந்துவிடும். இதை வைத்துக் கணிக்க வேண்டும். நடவு செய்யும்போது விதைநேர்த்தி செய்து நடவு செய்வதுதான், இந்த நோய் வராமல் தடுக்கும் எளிமையான வழி. நோய் தாக்கிய பயிரில், டிரைக்கோடெர்மா அஸ்பரெல்லம் (விரிடி) அல்லது சூடோமோனஸை 5 மில்லி எடுத்து ஒரு லிட்டர் தண்ணீரில் கலந்து தெளிக்க வேண்டும்.

ஊதா கொப்புள நோய்

தாள் கருகி, நுனியைக் கத்தியால் சீவி விட்டதுபோல் சூம்பி இருக்கும். கருகிய தாள்களில் கறுப்பு நிறத்தில் வளையம் மாதிரி புண்கள்போல இருக்கும். குளிர் காலங்களில்தான் இந்த நோய் தாக்கும். இதற்கும் விதை நேர்த்திதான் தீர்வு. ஒரு கிலோ வெங்காயத்துக்கு டிரைக்கோடெர்மா ஹார்சியானம் என்ற எதிர் பூஞ்சணத்தை 10 கிராம் அளவில் எடுத்து விதைநேர்த்தி செய்து விதைக்க வேண்டும். நோய் தாக்கிய பயிர்களில் 5 சதவிகித வேப்பங்கொட்டைச் சாறு மற்றும் 2 சதவிகித துளசிச்சாறு சேர்த்து தெளித்தும் இந்நோயைக் கட்டுப்படுத்தலாம்.

கரீப் பூட்டை வெங்காயம் அறுவடை செய்து ஒரு வாரம் கழித்துப் பார்த்தால், உள்ளே கறுப்பாகப் பூஞ்சணம்போல இருக்கும். உரிக்க உரிக்கச் சருகுதான் வரும். இந்த நோய் தாக்கிய வெங்காயம் தரம் குறைந்துவிடும். நல்ல விலை கிடைக்காது. வீட்டில் உள்ள வெங்காயங்களில் சிலவற்றின் முனைகளில் கறுப்பாக இருப்பதைப் பார்க்கலாம். இதுதான் கரீப் பூட்டை நோய். இதைத் தடுக்கத் தலா ஒரு கிலோ குப்பைமேனி, காகிதப்பூ இலைகளை இடித்து, அதன் சாற்றுடன் இரண்டு லிட்டர் தண்ணீரைக்கலந்து கொள்ள வேண்டும். அந்தக் கலவையில் பத்து மில்லி எடுத்து ஒரு லிட்டர் தண்ணீரில் கலந்து தெளிக்க வேண்டும். இலைவழித் தெளிப்பானாகப் பயன்படுத்தப்படும் பூஞ்சணம் மற்றும் பாக்டீரியா நிவாரணிகளைச் சூரிய வெப்பம் அதிகம் நிலவும் பகல் நேரங்களில் தெளித்தால் பலன் இருக்காது. ஆகவே, இந்த வகையான இயற்கை நிவாரணிகளை வெயில் குறைந்த காலை வேளையில் தெளித்துப் பயன்பெறலாம். மேலும் குளிர்காலத்தில் இந்த எதிர் பூஞ்சண, பாக்டீரியா நிவாரணிகள் நல்ல பலனைத் தந்து மகசூல் பெருக்கத்துக்கு வழிவகைச் செய்யும்.

அறுவடை

ரகத்துக்கு ஏற்றவாறு 70 முதல் 90 நாள்களில் வெங்காயத்தை அறுவடை செய்யலாம். அறுவடை செய்வதற்கு முன்பாகப் பாசனத்தை நிறுத்த வேண்டும். தாள் 65 முதல் 70 சதவிகிதம் காய்ந்த பிறகுதான் அறுவடை செய்ய வேண்டும். மேலே தாள் காய்ந்தும், மண்ணுக்கு மேலே பச்சையாக இருக்க வேண்டும். வெங்காயத்தை அறுவடை செய்தவுடன் தாளை வெட்டக்கூடாது. ஒரு நாள் காய விட வேண்டும். விலை கிடைத்தால் உடனே விற்பனை செய்யலாம். இல்லாவிடில் பட்டறையில் சேமிக்க வேண்டும். பட்டறையில் ஈரத்தோடு சேமிக்கக் கூடாது. தாளோடு அறுவடை செய்து, இரண்டு நாள்கள் நிழலில் காய வைத்துப் பட்டறையில் சேமிக்கலாம். 

தொடர்புக்கு, பேராசிரியர் செந்தூர்குமரன், செல்போன்: 94438 69408.

ஆர்.குமரேசன்

ஏக்கருக்கு எட்டு டன் மகசூல்!

தி
ண்டுக்கல் மாவட்டம், வேடசந்தூர் அருகேயுள்ள கல்வார்பட்டியைச் சேர்ந்தவர் விவசாயி சுப்பிரமணியிடம் வெங்காயச் சாகுபடி குறித்து பேசினோம். அவர், “ஒரு ஏக்கர் நிலத்துல கோ-5 ரக வெங்காயத்தை நடவு செஞ்சிருக்கேன். ஒரு கிலோ விதை வாங்கி நாத்து உற்பத்தி செஞ்சு நடவு செஞ்சேன். விதை வெங்காயத்தை நட்டா, ஏக்கருக்கு பத்தாயிரத்துல இருந்து இருபதாயிரம் வரைக்கும் அதுக்கே செலவாகிடும். அதுக்கு பதிலா விதை மூலமா நாத்து தயாரிச்சு நடவு செஞ்சா, ஏக்கருக்கு 3,500 ரூபாய்தான் ஆகுது. நாற்றங்கால்ல வளர 45 முதல் 60 நாள்கள் ஆகுது. நடவு செஞ்சதுல இருந்து அறுவடை வரை 90-95 நாள்கள் ஆகுது.

வெகுமதி கொடுக்கும் வெங்காயம்... நடவு முதல் அறுவடை வரை!

வெங்காயச் சாகுபடியில சாறு உறிஞ்சும் பூச்சியும், இலைப்பேனும்தான் பிரச்னை. அதுக்கு பவேரியா பேசியானா, வெர்டிசீலியம் லக்கானியைத் தெளிக்கிறேன். ஒரு டேங்க் (10 லிட்டர்) தண்ணிக்கு  ரெண்டையும் தலா 50 கிராம் எடுத்து, அதோட 50 கிராம் நாட்டுச்சர்க்கரை கலந்து தெளிப்பேன். இது மூலமா நோய் கட்டுப்படுது. போன வருஷம் ஒரு ஏக்கர் முப்பது சென்ட்ல கோ-5 வெங்காயத்தை நடவு செஞ்சிருந்தேன். எட்டு டன் மகசூல் கிடைச்சது. இந்த தடவை ஒரு ஏக்கர்ல தான் நடவு செஞ்சிருக்கேன். ஏழு டன் மகசூல் கிடைக்கும்னு எதிர்பார்க்குறேன்’’ என்றார்.

தொடர்புக்கு, செல்போன்: 63797 41237.

வெங்காயம் மேலும் சில தகவல்கள்...

சேமிக்கும் முறை

திக வெங்காயம் இருந்தால் பட்டறை அமைத்துச் சேமிக்கலாம். 500 கிலோவுக்கும் கீழ் இருந்தால் பெரிய பட்டறை தேவையில்லை. தரையிலிருந்து ஒரு அடி உயரத்திற்குச் செங்கல் அல்லது கற்களை நான்கு மூலைகளிலும் வைக்க வேண்டும். அதற்கு மேல் கம்புகளைப் படுக்கை வசத்தில் குறுக்கும் நெடுக்குமாக வைக்க வேண்டும். மேலே தென்னை மட்டைகளை அடுக்க வேண்டும். அதற்கு மேல் இரண்டு அடி உயரத்தில் வெங்காயத்தைக் கொட்டி, பிரமிடுபோலக் குவித்து வைக்க வேண்டும். மழை தண்ணீர் படாமல் மேலே கூரை அமைத்துக்கொள்ள வேண்டும். 

வெகுமதி கொடுக்கும் வெங்காயம்... நடவு முதல் அறுவடை வரை!

அதிக அளவில் வெங்காயம் இருக்கும்பட்சத்தில் பெரிய பட்டறை அமைக்கலாம். இதற்குத் தரையிலிருந்து இரண்டு அடி உயரத்தில் கற்களை வைத்து, அதில் கம்புகளைப் படுக்கை வசத்தில் வைக்க வேண்டும். அகலம் இரண்டு அடி இருக்க வேண்டும். பட்டறைக்காக மூங்கில் தப்பைகள் விற்பனையாகின்றன. அவற்றைக் கொண்டு, ஐந்தடி உயரத்தில் நான்கு பக்கமும் கட்டிக்கொள்ள வேண்டும். மேலே கூரை அமைத்துக்கொள்ள வேண்டும். கீழ், மேல் பகுதிகள் மற்றும் நான்கு பக்கங்களிலும் காற்றோட்டம் இருப்பதுபோல் அமைத்துக்கொள்ள வேண்டும். இந்த மூங்கில் தப்பை அறைகளுக்குள் மூன்று அடுக்குகளில் வெங்காயத்தைச் சேமிக்கலாம். ஐந்தடி உயர மூங்கில் தப்பைக்குள் ஒன்றேகால் அடி உயரத்தில் முதல் அடுக்கும், அடுத்து பத்து சென்டிமீட்டர் இடைவெளியில் ஒரு மூங்கில் தடுப்பும், அடுத்ததாக ஒன்றேகால் அடி உயரத்தில் இரண்டாம் அடுக்குமாக மொத்தம் மூன்று அடுக்குகளில் வைத்து மூன்று மாதங்கள் வரை சேமிக்கலாம். அதற்கு மேலும் சேமிக்க வேண்டியிருந்தால், பட்டறையிலிருந்து வெங்காயத்தை வெளியே எடுத்து மீண்டும் இதே முறைப்படி அடுக்கி வைத்து அடுத்த மூன்று மாதங்கள் வரை சேமிக்கலாம்.

வெகுமதி கொடுக்கும் வெங்காயம்... நடவு முதல் அறுவடை வரை!

நாற்று உற்பத்தி

வெ
ங்காய விதை, பாக்கெட்டுகளில் அடைத்து வரும் பாக்கு போன்ற தோற்றத்தில் இருக்கும். மேட்டுப்பாத்தி முறையில் நாற்றங்கால் அமைத்துக்கொள்ள வேண்டும். ஒரு ஹெக்டேர் நடவு செய்வதாக இருந்தால் 10 சென்ட் நிலத்தில் நாற்றங்கால் தயாரிக்க வேண்டும். 3 மீட்டர் நீளம், 1 மீட்டர் அகலம், 15 சென்டிமீட்டர் உயரத்தில் மேட்டுப்பாத்தி அமைக்க வேண்டும். ஒரு படுக்கைக்கும் அடுத்த படுக்கைக்கும் இடையே ஓர் அடி இடைவெளி இருக்க வேண்டும். 150 கிலோ மட்கிய மாட்டுச்சாணம், ஒன்றே கால் கிலோ டிரைக்கோடெர்மா அஸ்பரெல்லம் (விரிடி) ஆகியவற்றை ஒவ்வொரு படுக்கையிலும் இட்டு மண்ணைப் புரட்டி விட வேண்டும். பாத்தி தயாரானவுடன், பாத்தியின் மேல் விரலால் கீறி விதைகளைத் தூவ வேண்டும். ஒரு கீறலுக்கும் (வரிசை) அடுத்த கீறலுக்கும் 5 முதல் 7.5 சென்டிமீட்டர் இடைவெளி இருக்க வேண்டும். விதை தூவிய பிறகு, சிறிய அளவில் வெட்டிய வைக்கோலைப் போட்டு மூட வேண்டும். மட்கிய மாட்டுச் சாணத்தைத் தூளாக்கியும் பாத்தியின் மேல் தூவலாம். பிறகு, பூவாளி மூலமாகத் தண்ணீர் தெளிக்க வேண்டும். 6 முதல் 7 நாள்களில் முளைப்பு எடுக்கும். விதைகள் முளைத்துப் பதினைந்தாவது நாளில் ஒரு லிட்டர் தண்ணீருக்கு 2 கிராம் என்ற அளவில் டிரைக்கோடெர்மா அஸ்பரெல்லம்(விரிடி) கலந்து தூரில் ஊற்றி விடுவதன் மூலம் நாற்றழுகல் நோயிலிருந்து காப்பாற்றலாம். 50-55 நாள்களில் நாற்றுகள் தயாராகிவிடும். நாற்றங்காலை, மரங்களுக்கு இடையிலோ பசுமைக்குடிலுக்குள்ளோ அமைப்பது நல்லது.

ஒருங்கிணைந்த மேலாண்மை

வெ
ங்காயச் சாகுபடியில் ஒருங்கிணைந்த மேலாண்மையைக் கடைப்பிடிக்க வேண்டும். வெங்காய வயலில் இரண்டு வரிசை மக்காச்சோளம், 20 வரிசைக்கு ஒரு வரிசை சூரியகாந்தி, வரப்புகளில் ஆமணக்கு என நடவு செய்ய வேண்டும். விதைநேர்த்தி செய்து விதைத்தல், முறையான வளர்ச்சி ஊக்கிகளைக் கொடுத்தல் போன்றவற்றைக் கடைப்பிடிக்க வேண்டும். ஒரு ஹெக்டேருக்கு 12 மஞ்சள் வண்ண அட்டையை வைக்க வேண்டும். ஒரே நிலத்தில் தொடர்ந்து வெங்காயத்தைச் சாகுபடி செய்யாமல், பயிர் சுழற்சி முறையைக் கடைப்பிடிக்க வேண்டும்.

வெங்காயத்தின் வரலாறு!

வெ
ங்காயத்தின் தாயகம் இந்தியா. இங்கிருந்துதான் உலகம் முழுவதும் பரவியிருக்கிறது. இந்தியாவிலிருந்து கிரேக்கர்கள் மூலமாக உலகம் முழுவதும் வெங்காயம் பரவியது. ஆனால், வெங்காயத்தை உணவுப் பொருளாக உலகத்துக்கு அறிமுகப்படுத்தியவர்கள், எகிப்தியர்கள்தான். ‘சாலட்’ என்ற வார்த்தையை எகிப்தியர்கள்தான் அறிமுகப்படுத்தினர். பிரமிடுகள் கட்டும் ஆள்களுக்குக் கஞ்சி போன்ற உணவுதான் கொடுக்கப்பட்டது. அதற்குச் சைடிஷாக வெங்காயம் கொடுக்கப்பட்டிருக்கிறது. அப்படித்தான் இது உணவுப் பொருளாக அறிமுகமானது. இதில் சல்ஃபர் அதிகம் உள்ளதால் பதப்படுத்தும் தன்மை இருக்கிறது. இறந்த உடல்களைப் பிரமிடுகளில் அடக்கம் செய்த எகிப்தியர்கள், பதப்படுத்துவதற்காக வெங்காயத்தைப் பயன்படுத்தி இருக்கிறார்கள். 

வெகுமதி கொடுக்கும் வெங்காயம்... நடவு முதல் அறுவடை வரை!

இந்தியாவில் 15 மாநிலங்களில் வெங்காயத்தைச் சாகுபடி செய்கிறார்கள். ஆண்டுக்காண்டு இதன் சாகுபடிப் பரப்பு அதிகரித்துக்கொண்டே இருக்கிறது. 2013-ம் ஆண்டு 1.24 லட்சம் ஹெக்டேர் பரப்பிலிருந்த வெங்காயம், 2016-17-ம் ஆண்டு 2.25 லட்சம் ஹெக்டேராக அதிகரித்திருக்கிறது. கடந்து பத்தாண்டுகளில் வெங்காயம் முக்கியப் பயிராக மாறியிருக்கிறது.   

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism