Published:Updated:

பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!

பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!
பிரீமியம் ஸ்டோரி
News
பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!

பூச்சி மேலாண்மை - 10

விவசாயிகளை மட்டுமல்லாமல், விஞ்ஞானிகளையும் அச்சத்தில் ஆழ்த்திக் கொண்டிருக்கின்றன, அமெரிக்கன் படைப்புழுக்கள். அமெரிக்காவிலிருந்து ஆப்பிரிக்காவுக்குச் சென்று, அங்கிருந்து பல்வேறு நாடுகளை ஆட்டுவித்து, தற்போது இந்தியாவுக்கு வந்து சேர்ந்திருக்கின்றன, இந்த அமெரிக்கன் படைப்புழுக்கள். கடந்த ஆண்டு மே மாதம், கர்நாடகாவில்தான் முதன்முதலில் இவற்றின் தாக்குதல் கண்டறியப்பட்டது. அடுத்த சில நாள்களில் நாடு முழுவதும் தாக்கியிருப்பது தெரியவந்தது. இப்போது சீனா மற்றும் தைவான் ஆகிய நாடுகளையும் அச்சுறுத்திக் கொண்டிருக்கின்றன, இப்புழுக்கள்.

பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!

பெரும்பாலும், மக்காச்சோளத்தில் மட்டும்தான் இப்புழுக்களின் தாக்குதல் இருக்கிறது. ஆனால், இவை 80 வகையான பயிர்களைத் தாக்கும் திறன் கொண்டவை. எந்தப்பயிரை எந்த நேரத்தில் தாக்கும் எனத் தெரியாமல் உலக விஞ்ஞானிகள் மிரண்டு போயிருக்கிறார்கள். இந்தியாவில் நாடு முழுவதும் ஒருங்கிணைந்த தடுப்பு நடவடிக்கைகளை மேற்கொள்ள வேண்டும் என அரசு முடிவு செய்துள்ளது.

இந்திய வேளாண் ஆராய்ச்சிக் கழகத்தின் பரிந்துரைகள், வேளாண்மைத் துறை மூலமாக அனைத்து மாநிலங்களுக்கும் அனுப்பி வைக்கப்பட்டுள்ளன. அந்தக் குறிப்பில், வயல்களைக் கண்காணித்து இனக்கவர்ச்சிப் பொறிகளை வைத்துத் தாய் அந்துப்பூச்சிகளைக் கவர்ந்து அழிக்க வேண்டும் என்பதுதான் அந்தப் பரிந்துரை.

வயல் கண்காணிப்பு குறித்துக் கடந்த இதழில் விரிவாகச் சொல்லியிருக்கிறேன். தாய் அந்துப் பூச்சிகளின் நடமாட்டத்தைக் கண்காணித்து விட்டாலே முட்டைகளைக் கண்டுபிடித்து அழித்துவிடலாம். படைப்புழுக்கள் பயிரின் எந்தப்பகுதியில் முட்டை இடுகின்றன என்பது குறித்தும் ஏற்கெனவே பார்த்திருக்கிறோம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!

படைப்புழுக்களின் வாழ்க்கைச் சுழற்சி பற்றிப் பார்ப்போம். தாய் அந்துப்பூச்சி ஒரு நாளைக்கு 50 முதல் 150 முட்டைகள்வரை இடும். முட்டைக் குவியல் மீது, தாய் அந்துப்பூச்சியின் செதில்களைத் தூவிவிடும். வெளியிலிருந்து பார்த்தால் அது சிலந்திவலை போலத்தான் தெரியும். முட்டையிட்ட 3 முதல் 5 நாள்களில் முட்டைகள் பொரிந்து படைப்புழுக்கள் வெளிவரும். இவை பாம்பு சட்டை உரிப்பதுபோல ஆறுமுறை சட்டை உரிக்கின்றன. ஒவ்வொரு சட்டை உரிப்புக்குப் பிறகும் அடுத்தடுத்த நிலையை அடைகின்றன. மொத்தம் 6 வளர்ச்சி நிலைகள். முதல் மூன்று வளர்ச்சி நிலைகளுக்குள் அவற்றைக் கட்டுப்படுத்தினால் மட்டுமே சேதத்தைக் குறைக்க முடியும்.

நடவு செய்த முதல் 4 வாரங்கள்வரை முன் பருவ வளர்ச்சி நிலையில் செடிகள் இருக்கும். இந்தக்காலத்தில் 5 சதவிகிதத்துக்கு மேல் பாதிப்பு இருந்தால், பயிர் பாதுகாப்பு நடவடிக்கை எடுக்க வேண்டும். 5 முதல் 7 வாரங்கள்வரை பயிர் நடுநிலை வளர்ச்சிப் பருவத்தில் இருக்கும். இந்தக் காலகட்டத்தில் 10% தாக்குதலும், அதன் பிறகு வரும் பின் வளர்ச்சிப் பருவத்தில் 20% தாக்குதலும் இருந்தால், பயிருக்குப் பிரச்னை இல்லை. தாக்குதலைச் சமாளித்துப் பயிர் வளர்ந்துவிடும். இந்த அளவுக்கு மேல் சேதம் ஏற்பட்டால் பாதுகாப்பு நடவடிக்கைகள் அவசியம். மக்காச்சோளத்தில் ஆண், பெண் பூக்கள் தனித்தனியாகப் பூக்கும். அப்படிப் பூக்கும் தருணத்தில் 10% தாக்குதல் கண்டறியப்பட்டால் பயிர் பாதுகாப்பு நடவடிக்கை அவசியம்.

தாக்குதல் அளவை எப்படிக் கண்டுபிடிப்பது என்று பார்ப்போம். வயல் ஆய்வில், வரப்பிலிருந்து 3 அடி தள்ளிக் குறுக்கும் நெடுக்குமாக அல்லது ‘ஜிக்ஜாக்’ முறையில் 20 செடிகளை ஆய்வு செய்ய வேண்டும். இலை, பூ, தண்டு, கதிர், குருத்து எனச் செடியின் அனைத்துப் பகுதிகளையும் சோதிக்க வேண்டும். இதுபோல, வயலில் 5 இடங்களில் கண்காணிக்க வேண்டும். முடிவில், எத்தனை செடிகள் பாதிக்கப்பட்டுள்ளன என்பதைக் கணக்கிட வேண்டும். 5 இடங்களில் மொத்தம் 100 செடிகளில் ஆய்வு செய்து, அவற்றில் 10 செடிகளில் மட்டும் பாதிப்பு இருந்தால் 10 சதவிகித சேதாரம் என்று கணக்கில் கொள்ளலாம்.

இயற்கை விவசாயத்தில் ‘வருமுன் காப்போம்’ என்பதுதான் தாரக மந்திரம். மக்காச்சோளத்தை விதைப்பதற்கு முன்பாகவே சில நடவடிக்கைகளை மேற்கொண்டால் படைப்புழுக்களின் தாக்குதலைத் தவிர்க்கலாம். அவற்றில் முக்கியமானது, கோடை உழவு. கோடை உழவு செய்யும்போது, மண்ணில் கூட்டுப்புழுப் பருவத்தில் இருக்கும் படைப்புழுக்கள் வெளி வந்து பறவைகளுக்கு உணவாகி விடுகின்றன. அதோடு, கோடை உழவு மூலம், மண்ணில் காற்றோட்டம் ஏற்படும். நீர்ப்பிடிப்புத் தன்மை அதிகரிக்கும். அதனால், நுண்ணுயிர்களின் செயல்பாடு அதிகரிக்கும். மக்காச்சோளத்தை ஒரு பகுதியில் ஒரே சமயத்தில் சாகுபடி செய்ய வேண்டும்.

விதைப்புக்கு முன் விதை நேர்த்தி செய்வது முக்கியம். தமிழ்நாடு அரசு, ஒரு விதைநேர்த்தி முறையைப் பரிந்துரை செய்கிறது. அதாவது ஒரு கிலோ மக்காச்சோள விதைக்கு 10 கிராம் ‘பவேரியா பேசியானா’ என்ற  நுண்ணுயிர் உரத்தைக் கலந்து விதைநேர்த்தி செய்து விதைப்பதன் மூலம் பூச்சித்தாக்குதலைக் கட்டுப்படுத்தலாம்.

ஒவ்வொரு பயிருக்கும் ஏற்ற ஊடுபயிர்களைச் சாகுபடி செய்ய வேண்டும். மக்காச்சோள வயலில் தட்டைப்பயறு, உளுந்து, பாசிப்பயறு ஆகியவற்றை ஊடுபயிர்களாக விதைக்கலாம். ஆரம்ப வளர்ச்சிப் பருவத்தில் இனக்கவர்ச்சிப் பொறி, விளக்குப்பொறி ஆகியவற்றை வைப்பதோடு, 1 ஏக்கருக்கு 10 என்ற விகிதத்தில் ‘பறவை தாங்கி’களையும் வைக்க வேண்டும். தென்னை மட்டைகளைத் தலைகீழாகவோ, குச்சிகளை ஆங்கில ‘வி’ வடிவத்திலோ ஊன்றி வைக்கலாம். இந்தக் குச்சிகளில் வந்து அமரும் பறவைகள், தாய் அந்துப்பூச்சிகளைக் காலி செய்யும்.

மக்காச்சோள வயல்களில் வெளிப்பகுதியில் 3 வரிசைகளில் நேப்பியர் புல்லை நடவு செய்ய வேண்டும். 4-ம் வரிசையில் ஆமணக்கை நடவு செய்ய வேண்டும். ஆமணக்குச் செடிகளுக்கான இடைவெளி 8 அடி இருக்க வேண்டும். நிலத்தில் களைகள் இல்லாமல் சுத்தமாகப் பராமரிக்க வேண்டும். சரியான அளவில் உரப்பயன்பாடு இருக்க வேண்டும். சில விவசாயிகள், மழை பெய்துவிட்டது என்பதற்காக யூரியாவை அள்ளித் தூவி விடுவார்கள். உடனே பயிர், பச்சைப் பசேலென மாறும். இதுதான் தாய் அந்துப்பூச்சிகளுக்கான சிக்னல். உடனே களத்தில் இறங்கி, முடிந்த அளவுக்கு முட்டைகளை இட்டுவிடும். பயிரின் அடர் பச்சை நிறத்தைப் பார்த்தால் வழக்கமாக 100 முட்டைகள் இடும் பூச்சி, 150 முட்டைகள் வரை இடும்.

கதிரில் கடினமான உறையுள்ள ரகங்களைத் தேர்வு செய்து விதைப்பதால், படைப்புழுத் தாக்குதலிலிருந்து கதிர்களைக் காக்க முடியும். நடவு செய்த 30 நாள்கள்வரை, பயிரின் நுனிப்பகுதியில்தான் புழு அமர்ந்து இருக்கும். இந்தச் சமயத்தில் நன்றாகச் சலித்த மண் 9 பங்கு, சலித்த சுண்ணாம்பு 1 பங்கு என்ற விகிதத்தில் கலந்து, நுனிப்பகுதியில் தூவுவதன் மூலம் படைப்புழுக்களைக் கட்டுப்படுத்தலாம்.

மூன்றாம் வளர்ச்சி நிலையில் உள்ள புழு, குருத்துக்குள் போய், மேலிருந்து கீழ்நோக்கிப் பயிரைச் சுரண்டிக்கொண்டே வரும். தலைப்பகுதி கீழே இருக்கும் வால்பகுதி மேலே இருக்கும். புழுவின் கழிவுகள், குருத்தில் துளையிட்ட இடத்தை அடைத்துவிடும். இந்தப் பருவத்தில் புழுக்களை அழிப்பது கடினம். கடுமையான பூச்சிக்கொல்லியைத் தெளித்தாலும், புழு தப்பித்துவிடும். மூன்றாம் பருவத்துக்கு மேல் படைப்புழுக்களைக் கட்டுப்படுத்துவது மிக மிகக் கடினமானது.விவசாயிகள் இரண்டு விஷயங்களைக் கவனத்தில் கொள்ள வேண்டும். படைப்புழுக்களின் முட்டைகளைக் கண்டுபிடிக்கும் திறனை வளர்த்துக்கொள்ள வேண்டும். முதல் இரண்டு நிலைப் புழுக்களைக் கையால் பிடித்து நசுக்க வேண்டும் அல்லது மண்ணெண்ணெயை ஒரு டப்பாவில் ஊற்றிப் புழுக்களைப் பிடித்து அதில் போட்டு அழிக்கலாம். வயல் ஆய்வின்போது, தாக்குதல் அறிகுறியுள்ள மக்காச்சோளப் பயிரைப் பார்த்தால், நுனிக்குருத்தில் காய்ந்த வயல் மண்ணை ஒரு கைப்பிடி அள்ளி உள்ளே போட்டு விட வேண்டும். ஏக்கருக்கு 15 எண்ணிக்கையில் இனக்கவர்ச்சிப் பொறிகளைப் பயன்படுத்தி ஆண் அந்துப்பூச்சிகளைக் கவர்ந்து அழிக்க வேண்டும். வயலில் நன்மை செய்யும் பூச்சிகளின் எண்ணிக்கையை அதிகப்படுத்த வேண்டும். அதற்காகச் செண்டுமல்லி போன்ற பூச்செடிகள் நடவு செய்ய வேண்டும்.

பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!

இனக்கவர்ச்சிப் பொறியில், பூச்சிகளைப் பார்த்துவிட்டால் உஷாராகி விட வேண்டும். 1 பொறியில் 3 பூச்சிகளைப் பார்த்தால், ‘டிரைக்கோகிரம்மா பிரிடியோசம்’ என்ற முட்டை ஒட்டுண்ணிகளைப் பயன்படுத்த வேண்டும். ‘டெலினாமஸ் ரிமஸ்’ என்ற நன்மை செய்யும் குளவிகளையும் பயன்படுத்தலாம். இந்தக் குளவிகள், முட்டைக் குவியல்களைத் தேடி அவற்றின்மேல் முட்டையிட்டுவிடும். 1 ஏக்கருக்கு 5 சி.சி (50,000) என்ற எண்ணிக்கையில் ஒரு வார இடைவெளியில் இதைப் பயன்படுத்த வேண்டும்.

மக்காச்சோளப் பயிரின் வளர்ச்சிப் பருவத்தில் 5% முதல் 10% வரை சேதாரம் தெரிந்தால் உயிரியல் பூச்சிக்கொல்லிகளைப் பயன்படுத்த வேண்டும். சில விவசாயிகள், ரசாயனப் பூச்சிக்கொல்லிகளைத்தான் பயன்படுத்துகிறார்கள். அதனால், எந்தப் பயனுமில்லை. இயற்கை விவசாயி, ரசாயன விவசாயி என யாராக இருந்தாலும் முதலில் உயிரியல் பூச்சிக்கொல்லிகளைத்தான் பயன்படுத்த வேண்டும். அப்போதுதான் படைப்புழுக்களைக் கட்டுப்படுத்த முடியும். இது அறிவியல் உண்மை.

மக்காச்சோளம் நடவு செய்த 15 முதல் 25 நாள்களில்…மெட்டாரைசியம் அனிசோபிலியே’ என்ற உயிரியல் பூஞ்சணக் கொல்லியை, 1 லிட்டர் தண்ணீருக்கு 5 கிராம் என்ற அளவில் கலந்து செடியின் நுனிப்பகுதியில் கைத்தெளிப்பான் மூலம் தெளிக்க வேண்டும். இது புழுவின் மேலே பட்டு நோயை உருவாக்கும். இதை மாலை நேரத்தில்தான் தெளிக்க வேண்டும். இதைக் காலையிலோ மதிய வேளையிலோ தெளித்தால் பயன் இருக்காது.

புழுக்களின் இளம்பருவத்தில் 5% அளவு சேதம் இருக்கும்போது... புதிய முட்டைகளைப் பொரிக்காமல் செய்ய 5% வேப்பங்கொட்டைகரைசலைத் தெளிக்க வேண்டும்.மெட்டாரைசியம் அனிசோபிலியேவைத் தெளித்த 10 நாள்களுக்குப் பிறகு, ‘மெட்டரைசியம் ரிலேயி’ என்ற பூஞ்சணக்கொல்லியை, 1 லிட்டர் தண்ணீருக்கு 3 கிராம் என்ற அளவில் கலந்து செடியின் நுனிப்பகுதியில் கைத்தெளிப்பான் மூலம் தெளிக்க வேண்டும். இந்த இரண்டு பூஞ்சணக்கொல்லிகளையும் மாற்றி மாற்றிச் சுழற்சி முறையில் தெளிக்க வேண்டும். இவற்றோடு, ‘பேசில்லஸ் துரிஞ்சியென்சிஸ் குருஸ்டகி’ என்ற பாக்டீரியா பூஞ்சணக் கொல்லியை 1 லிட்டர் தண்ணீரில் 2 கிராம் அளவில் கலந்து தெளிக்க வேண்டும்,

ரசாயனப் பூச்சிக்கொல்லிகளைப் பயன்படுத்துபவர்கள், அவற்றைத் தெளிப்பதற்கு முன்பாக இந்த உயிரியல் பூச்சிக்கொல்லிகளைக் கட்டாயம் தெளிக்க வேண்டும். படைப்புழுவைக் கட்டுப்படுத்த நான்கு ரசாயனப் பூச்சிக்கொல்லிகளை மட்டுமே அரசு பரிந்துரை செய்கிறது. அவற்றையும் வேளாண்மைத் துறை அலுவலர்களின் அறிவுரையுடன்தான் பயன்படுத்த வேண்டும்.

இவற்றைத் தவிர வேறு எந்தப் பூச்சிக்கொல்லியைப் பயன்படுத்தினாலும் ஒரு பயனும் இருக்காது. அதேபோல, நடவு செய்த 8-ம் வாரம் முதல் பூப்பூக்கும் தருணம்வரை எந்த ரசாயனப் பூச்சிக்கொல்லியைத் தெளித்தாலும் பயன் இருக்காது. இந்தப்பருவத்தில் தெளித்தால், இப்புழுக்கள் நாம் தெளிக்கும் ரசாயனப் பூச்சிக்கொல்லிக்கான எதிர்ப்புத்தன்மையை வளர்த்துக் கொள்ளும். அது தொடர் பிரச்னைகளுக்கு வழி வகுக்கும். படைப்புழுக்களுக்குப் பயப்படும் விவசாயிகள் வேறு பயிருக்கு மாறுவது நல்லது.

-வளரும்

நீ.செல்வம், தொகுப்பு: ஆர்.குமரேசன்

பூச்சிகளும் நம் நண்பர்களே..! - 2.0 - அமெரிக்கன் படைப்புழுக்கள்… அழிக்கும் இயற்கை நுட்பங்கள்!

படைப்புழுவை எப்படிக் கண்டுபிடிப்பது?

ரம்பக்கட்டத்தில் பச்சையாக இருக்கும் புழு, இடையில் பல்வேறு நிறங்களாக மாறி, கடைசியில் பழுப்பு நிறத்துக்கு வரும். பழுப்பு நிறம் வரும்போது அதன் பின்புறம் கழிவு வெளியேறும் இடத்தில் சதுர வடிவில் நான்கு கரும் புள்ளிகள் இருக்கும். முன்பக்கம் அதன் வாய் பகுதியில் ஒய் என்ற ஆங்கில எழுத்து தலைகீழாக இருப்பதுபோலக் குறியீடு இருக்கும். இதுதான் படைப்புழுவுக்கான அடையாளம்.