Published:Updated:

வருகிறது... இயற்கை விவசாயக் கொள்கை!

ஆர். குமரேசன்

வருகிறது... இயற்கை விவசாயக் கொள்கை!

ஆர். குமரேசன்

Published:Updated:

அறிவிப்பு

##~##

வேளாண் மானியக் கோரிக்கை என்கிற பெயரில், ஆண்டுதோறும் புத்தம் புது அறிவிப்புகளை வெளியிடுவது அரசாங்கத்தின் வழக்கம். அந்த வகையில், ஏப்ரல் 19-ம் தேதியன்று, தமிழக சட்டசபையில் புதுப்புது அறிவிப்புகளை வெளியிட்டு அசத்தியிருக்கிறார் வேளாண் அமைச்சர் தாமோதரன்!

ஒட்டுமொத்த விகடனுக்கும் ஒரே ஷார்ட்கட்!

இயற்கை விவசாயக் கொள்கை!

அமைச்சர் அழகழகாக வெளியிட்ட அறிவிப்புகளில் சில இங்கே இடம் பிடிக்கின்றன.

விவசாயிகளின் வாழ்வாதாரத்தை உயர்த்தும் வகையில், வட்டாரத்துக்கு ஒரு கிராமம் வீதம் ஒருங்கிணைந்தப் பண்ணை மாதிரி கிராமம் உருவாக்கப்படும். உணவு தானியங்களில் அதிக மகசூல் எடுக்கும் விவசாயிகளுக்குப் பரிசு வழங்கப்படும். அனைத்து மாவட்டங்களிலும் தலா ஒரு நுண்ணீர்ப் பாசன மாதிரி கிராமம் அமைக்கப்பட்டு, அதற்கு தேவையான பாசனக் கருவிகள் மானியத்தில் வழங்கப்படும். இயற்கை வேளாண்மை குறித்த புதிய கொள்கை உருவாக்கப்படும். பசுந்தாள் உரம் மற்றும் மண்புழு உரம் தயாரிக்கும் மையங்கள் ஐந்து கோடி ரூபாய் மதிப்பீட்டில் அமைக்கப்படும். தனிநபர் வேளாண் காப்பீட்டுத் திட்டம், நடப்பாண்டில் வேலூர் மாவட்டம், நெமிலி வட்டாரத்திலும், விருதுநகர் மாவட்டம், அருப்புக்கோட்டை வட்டாரத்திலும் செயல்படுத்தப்படும்.

வருகிறது... இயற்கை விவசாயக் கொள்கை!

துவரையில் புதிய முறை!

தமிழ்நாடு வேளாண்மைப் பல்கலைக்கழகக் கட்டுப்பாட்டில் இயங்கிவரும் வேளாண் அறிவியல் மையங்களில், வரும் மூன்று ஆண்டுகளில் 28 சமுதாய வானொலி நிலையங்கள் அமைக்கப்படும். மானாவாரி பயிர்களின் உற்பத்தியை அதிகரிக்க, மண்வள மேம்பாட்டுடன் கூடிய உதவிகள் 50 சதவிகித மானியத்தில் வழங்கப்படும். தமிழக பயறு வகை பற்றாக்குறையை ஈடுசெய்ய, 30 ஆயிரம் ஹெக்டேரில், நடவு முறை துவரை சாகுபடி எனும் புதிய உத்தி மூலம், ஒட்டுமொத்த அணுகுமுறைத் திட்டம் செயல்படுத்தப்படும்.

வட்டார அளவிலான இளைஞர் விவசாயக் குழுக்களுக்கு ஐந்து கோடியே 85 லட்சம் ரூபாய் செலவில் கருவிகள், இயந்திரங்கள் விலையில்லாமல் வழங்கப்படும். மாவட்டத்துக்கு ஒரு வேளாண் தொழிலாளர் குழு என்கிற வகையில் 30 குழுக்கள் அமைக்கப்பட்டு, இக்குழுக்களுக்குத் தேவையான விதைப்பு முதல் அறுவடை வரையிலான பணிகளுக்கான இயந்திரங்கள் இலவசமாக வழங்கப்படும்.

புதுக்கோட்டை மாவட்டம், குடுமியான்மலையில், வேளாண் பல்கலைக்கழகம் மூலம் இரண்டாண்டு வேளாண் பட்டயப்படிப்பு துவங்கப்படும். திருப்பூர் மாவட்டம், ஜல்லிப்பட்டியில் தென்னங்கன்றுகள் உற்பத்தி பண்ணை அமைக்கப்படும். திருவள்ளூர், கோவை, நீலகிரி, திருச்சி, மதுரை, தேனி, திண்டுக்கல், ராமநாதபுரம் உள்ளிட்ட

15 மாவட்டங்களில், மாவட்டத்துக்கு ஐந்து கிராமங்கள் வீதம் 40 முதல் 100 ஹெக்டேர் பரப்பில் தோட்டக்கலை மாதிரி கிராமங்கள் அமைத்து, உயரிய தோட்டக்கலைத் தொழில்நுட்பங்கள் விவசாயிகளுக்குப் பயிற்றுவிக்கப்படும்.

கொய்மலர் மையம்!

பந்தல் காய்கறி சாகுபடியை ஊக்குவிக்க 50 சதவிகித மானியத்தில் விதைகள் வழங்கப்படும். திண்டுக்கல் மாவட்டம் ரெட்டியார்சத்திரம் அரசு தோட்டக்கலைப் பண்ணையில், காய்கறி மகத்துவ மையம் அமைக்கப்படும். கிருஷ்ணகிரி மாவட்டம் தளியில், இந்திய-இஸ்ரேலிய தொழில்நுட்பத்தில் கொய்மலர்கள் மகத்துவ மையம் துவங்கப்படும்.

கொடைக்கானல், அரசு தோட்டக்கலைப் பண்ணையில், நான்கு ஹெக்டேர் பரப்பில், ரோஜா பூங்காவும், கொய்மலர் செயல்விளக்கக் கூடமும் நிறுவப்படும்.

குளிர்பதனக் கிடங்கு!

ஸ்ரீரங்கத்தில் 10 ஏக்கர் பரப்பளவில், புதிய அரசு தோட்டக்கலைப் பண்ணை அமைக்கப்படும். கோவை, நீலகிரி விவசாயிகள் பயன்பெறும் வகையில் மேட்டுப்பாளையத்தில், குளிர்பதன வசதியுடன் கூடிய வணிக வளாகம் அமைக்கப்படும். கிணத்துக்கடவு பகுதியில் காய்கறி மற்றும் பழங்களுக்கென 500 மெட்ரிக் டன் கொள்ளளவுள்ள குளிர்பதனக் கிடங்கு அமைக்கப்படும்.

தேனி ஒழுங்குமுறை விற்பனைக் கூடத்துக்கு குளிர்பதன வசதியுடன் கூடிய வணிக வளாகமும், சங்கரன்கோவில் ஒழுங்குமுறை விற்பனைக் கூடத்தில் குளிர்பதனக் கிடங்கும் அமைக்கப்படும். திருவண்ணாமலை, கடலூர், ஈரோடு, வேலூர், திருச்சி, கோவை, விழுப்புரம் உள்ளிட்ட மாவட்டங்களில் இருக்கும் ஒழுங்குமுறை விற்பனைக் கூடங்களில்,

51 குளிர்பதனக் கிட்டங்கிகள் கட்டப்படும்.

''எல்லாமே விளம்பரம்தான்!’'

வருகிறது... இயற்கை விவசாயக் கொள்கை!

மானியக் கோரிக்கையில் வெளியிடப்பட்டுள்ள அறிவிப்புகள் பற்றி பேசிய திண்டுக்கல் சட்டமன்ற உறுப்பினர் பாலபாரதி (மார்க்சிஸ்ட் கட்சி), ''ஒவ்வொரு ஆண்டும் அரசுகள் மானியங்களையும், திட்டங்களையும் புதிது, புதிதாக போட்டாலும்... விவசாயிகளின் நிலை பாதாளத்தை நோக்கித்தான் பாய்கிறது. அரசுக்கு வருமானம் போதவில்லை என்பதற்காக போக்குவரத்துக் கட்டணம், மின்சாரக் கட்டணங்கள் உயர்த்தப்படுகிறது. ஆனால், விளிம்பு நிலையில் இருக்கும் விவசாயிகளின் விளைபொருட்களுக்குக் கட்டுப்படியான விலையில்லை. இந்த மானிய அறிவிப்பில்கூட எந்த விளைபொருளின் விலையையும் உயர்த்தி அறிவிக்கவில்லை.

சென்ற ஆண்டைவிட விளைபொருட்களின் விலை மிகவும் குறைந்துள்ளது. அதே நேரம் சாகுபடி செலவு அதிகரித்துள்ளது. சாகுபடி செலவுக்கும், விற்பனை விலைக்கும் உள்ள இடைவெளியில் குற்றுயிராகக் கிடக்கிறது விவசாயிகளின் வாழ்வு. இந்த இடைவெளியை நிரப்பாதவரை எத்தனைத் திட்டங்கள், மானியங்கள் போட்டாலும், விவசாய உற்பத்தியையோ, விவசாயிகளின் நிலையையோ மேம்படுத்த முடியாது. மொத்தத்தில் இது விளம்பரத்துக்கான அறிவிப்பே தவிர, விவசாயிகளுக்கான அறிவிப்பு இல்லை'' என்றார் காட்டமாக.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism