Published:Updated:

உணவு தானிய உற்பத்தியில் தமிழகத்துக்கு விருது...

சாதனையா... வேதனையா...? காசி. வேம்பையன்,படங்கள்: தி. விஜய்

உணவு தானிய உற்பத்தியில் தமிழகத்துக்கு விருது...

சாதனையா... வேதனையா...? காசி. வேம்பையன்,படங்கள்: தி. விஜய்

Published:Updated:
 ##~##

நெல், சோளம், ராகி, கம்பு என பலவிதமான தானியங்கள் விளைவித்து, மூட்டை கட்டியதெல்லாம் ஒரு காலம். பொய்த்துப்போன பருவமழை, வேலையாட்கள், தண்ணீர் , மின்சாரம்... என அடுக்கடுக்கானப் பிரச்னைகளால்... துண்டு நிலம் வைத்திருந்த விவசாயிகளின் கோவணமும் உருவப்பட்டு விட்டது. இப்போது, பிழைப்பு தேடி பயணப்பட்ட விவசாயிகள் ஒருபக்கம்; நட்டபயிரைக் காப்பாற்ற முடியாமல் உயிரைவிடும் விவசாயிகள் மறுபக்கம் என்று போரட்ட பூமியாக மாறி இருக்கிறது தமிழக விவசாயம்.

இந்த நிலையில், இந்தியாவில் உணவு தானிய உற்பத்திக்கான 'கிருஷி கர்மன்’ விருது (2011-12-ம் ஆண்டுக்கானது), ஜனவரி 15 அன்று டெல்லியில் ஜனாதிபதி தலைமையில் நடைபெற்ற விழாவில் தமிழகத்துக்கும் வழங்கப்பட்டிருக்கிறது. அதாவது... உணவு தானிய உற்பத்தி அடிப்படையில்... 100 லட்சம் டன்னுக்கும் மேல் உற்பத்தி செய்யும் மாநிலங்கள், 100 லட்சம் டன்னுக்கும் கீழ் உற்பத்தி செய்யும் மாநிலங்கள், பயிர் வாரியான உற்பத்தி என மூன்று வகையில் விருதுகள் வழங்கப்படுகின்றன. இதில், 100 லட்சம் டன்னுக்கும் கீழ் உற்பத்தி செய்த மாநிலங்களில் தமிழகத்துக்கு முதலிடம் கிடைத்துள்ளது. இதில் 100 லட்சம் டன்னுக்கு மேல் உற்பத்தி செய்து பரிசைப் பெற்றுள்ளன வறண்ட பகுதிகளாக இருக்கும் பீகார் மற்றும் மத்திய பிரதேசம் போன்றவை!

உணவு தானிய உற்பத்தியில் தமிழகத்துக்கு விருது...

தமிழகத்தில் 2006-07-ம் ஆண்டுகளில் 82.63 லட்சம் டன் உற்பத்தி செய்யப்பட்ட தானிய உற்பத்தி, 2011-12-ம் ஆண்டுகளில் 16.67% அதிகரித்து, 96.4 லட்சம் டன் உற்பத்தியை அடைத்துள்ளது. அதேநேரத்தில், 2005-ம் ஆண்டு 72 லட்சம் ஹெக்டேராக இருந்த விவசாய நிலப்பரப்பு, 2010-ம் ஆண்டு 40 லட்சம் ஹெக்டேராக குறைந்துள்ளதாக புள்ளிவிவரங்கள் சொல்கின்றன.

நிலைமை இப்படியே நீடித்தால்... உணவுதானிய உற்பத்தியில் தமிழகம் தன்னிறைவு அடைய முடியுமா...

100 லட்சம் டன்னுக்கு மேல் என்கிற இலக்கை அடைய முடியுமா?

இதைப் பற்றி சிலரிடம் பேசியபோது...

உணவு தானிய உற்பத்தியில் தமிழகத்துக்கு விருது...

கோமதிநாயகம், (முன்னோடி இயற்கை விவசாயி): ''குறைந்து போன மண்வளம், பொய்த்துப்போன மழை, அதிகபட்சம் 3 மணி நேரமே வரும் மின்சாரம், முறையான பராமரிப்பு இல்லாத பாசன ஏரிகள் என பலவிதமான பிரச்னைகள் இருக்கும்போது, எந்த விதத்திலும் உணவுதானிய உற்பத்தி அதிகரிக்காது. காவிரி, முல்லை-பெரியாறு, நெய்யாறு என பாசனப் பிரச்னைகள் தலைவிரித்தாடுகின்றன. சாகுபடி நிலங்களை எல்லாம் 'தரிசு’ நிலங்களாகக் காட்டி, வீட்டுமனையாக மாற்றும் போக்கும் அதிகமா இருக்கிறது. ஆட்சியில் அமரும் எந்தக் கட்சிக்கும் விவசாயத்தைப் பற்றிய தொலைநோக்கு பார்வை இல்லை.

'தீவிர உணவுதானிய உற்பத்தி' என்கிற பெயரில் நெல்லை மட்டும் உற்பத்தி செய்கிறார்களே தவிர... மானாவாரி நிலங்களில் விளையும் கம்பு, சோளம், குதிரைவாலி போன்ற சிறுதானியங்களின் உற்பத்தியைப் பெருக்க எந்த நடவடிக்கையையும் மேற்கொள்வது இல்லை. இனியாவது, அரசாங்கம், நெல் உற்பத்தியோடு, சிறுதானியங்கள், பயறுவகைப் பயிர்களின் உற்பத்தியை ஊக்கப்படுத்தினாலே... மண்ணுக்கும், மக்களுக்கும் ஏற்ற தானியங்கள் தாராளமாகக் கிடைக்கும்'' என்றார்.

பாமயன் (வேளாண் பொருளியல் நிபுணர்): ''உணவு தானிய உற்பத்தியில் சாதனையை வரவேற்க வேண்டும். அதேநேரத்தில் ரசாயன உரங்களைக் கொட்டி அதிகமான மகசூலை தொடர்ச்சியாக எடுக்க முடியாது. அதிகப்படியான மகசூல் படிப்படியாக குறைந்துதான் வருகிறது. உணவு தானிய உற்பத்தியை

உணவு தானிய உற்பத்தியில் தமிழகத்துக்கு விருது...

அதிகப்படுத்த வேண்டுமானால் 'நீடித்த நிலைத்த வேளாண்மை’ யுக்திகளைக் கடைபிடிக்க வேண்டும். நிலங்களில் விளைச்சல் குறைவதால் வேளாண் நிலங்களில் செய்யப்படும் முதலீடுகள் குறைவதற்கான வாய்ப்புகள் அதிகமாக உள்ளது. மேலும், விவசாயிகள் வெளியேற்றப்படுவதும், நிலங்கள் மொத்தமாக 'கார்ப்பரேட்’  கம்பெனிகளுக்குக் கைமாற்றப்படுவதற்கான வாய்ப்புகள் உள்ளன. அப்படி நடக்கும்போது, மஞ்சள், வாழை, கரும்பு போன்ற வணிகப் பயிர்களைத்தான் அதிகமான அளவில் உற்பத்தி செய்வார்கள். பிறகு, தானாகவே உணவுதானிய உற்பத்தி குறைந்து, நெருக்கடியானச் சூழ்நிலை உருவாகும்.

பெரிய விவசாயிகள், சாகுபடி பிரச்னைகளைச் சமாளிப்பதற்காக, மரங்களை நடவு செய்விடுகின்றனர். ஓரளவு தண்ணீர்ப் பாசனம் இருக்கும் பகுதிகளில்... 60% அளவுக்கு மஞ்சள், கரும்பு, தென்னை, மூலிகைப் பயிர் என்று வணிகப் பயிர்களும், 40 சதவீதம் அளவுக்கு நெல் சாகுபடியும் நடக்கிறது. மொத்த உணவு தானிய உற்பத்தியில் மானாவாரியில் 55% அளவுக்கு பயறுவகை மற்றும் சிறுதானியங்கள் உற்பத்தி செய்யப்படுகின்றன. இவற்றை உற்பத்தி செய்யும், சிறு விவசாயிகளுக்குக் கடன், காப்பீட்டு, நிலங்களுக்கான சாலை வசதி என்று எந்தவிதமான பாதுகாப்பும் இல்லை.

இதனால், பெரும்பகுதியான சிறுவிவசாயிகளின் நிலங்கள் விற்பனை செய்யப்பட்டு, வீட்டுமனைகளாக மாற்றப்படுகின்றன. அரசு, தற்பொழுது இருக்கும் ஏரி, குளங்களை தூர்வாரி நீர் சேமிப்பு முறைகளைக் கடைப்பிடிப்பதும், 2 ஆண்டுகளுக்கு மேல் தரிசாக போட்டு வைத்திருந்தால், அது தரிசு நிலம் என்று ஆவணங்களில் எழுதிவிடுகிறார்கள். மழையில்லாவிட்டால், நிலம் தரிசாகத்தான் கிடக்கும்.

இதைப் பயன்படுத்தி, தரிசு நிலம் என்று கணக்குக் காட்டி, வீட்டு மனைகளை முளைக்க வைக்கிறார்கள். இதைத் தடுக்க வேண்டும். அப்போதுதான் மற்ற மாநிலங்களை போல நாமும் உணவு தானிய உற்பத்தியில் தன்னிறைவு பெறமுடியும்.''

முனைவர் ராமசாமி (துணைவேந்தர், தமிழ்நாடு வேளாண்மைப் பல்கலைக்கழகம்): ''சாகுபடி நிலங்கள் குறையும் விஷயத்தை... சாலைகள் அமைப்பது, ரியல் எஸ்டேட் பெருகுவது ஆகிய கண்ணோட்டங்களில் மட்டுமே பார்க்கிறோம். இதுவரையில் 19% அளவுக்குதான் காடுகள் இருந்தன. தற்பொழுது,

உணவு தானிய உற்பத்தியில் தமிழகத்துக்கு விருது...

4% பசுமை நிறைந்த மரங்கள் நடப்பட்ட, பசுமைப் பகுதியின் சதவிகிதம் உயர்ந்துள்ளது. கம்பு, ராகி, சோளம் போன்ற தானியங்களை உற்பத்தி செய்த மானாவாரி நிலங்களில்தான் இன்றைக்கு, அதிக அளவில் பழமரங்கள் சாகுபடியும், காய்கறி சாகுபடியும் நடக்கிறது. 2011-ம் ஆண்டு 36.7 லட்சம் ஹெக்டேராக சாகுபடி நிலம் குறைந்திருப்பது உண்மைதான். ஆனால், உணவு உற்பத்தி 106 லட்சம் டன்னாக அதிகரித்துள்ளது. சுதந்திரத்துக்குப் பிறகு, உணவு தானியங்களின் உற்பத்தித் திறன் அதிகரித்துள்ளதே தவிர, குறையவே இல்லை. அதற்கு முக்கிய காரணங்கள் தொழில்நுட்பங்கள்தான்.

இன்றைக்கு, மக்களின் உணவு பழக்க வழக்கங்கள் மாறி வருகிறது. இதுவரையில் தானியங்கள் அதிகமாக சாப்பிட்ட மக்கள்... தற்பொழுது, அதிகமான அளவில் காய்கறிகள், பழங்களையும் சேர்த்துக் கொள்கின்றனர். குழந்தைகள் அதிகமாக பெற்றுக்கொள்வதும் குறைந்திருக்கிறது.

உற்பத்தியாகும் உணவுப் பொருட்களில் 20 முதல் 32% சதவிகிதம் சேதமாகிறது. பதப்படுத்துதல் தொழில்நுட்பத்தின் மூலம் சேதாரத்தைக் குறைக்க முடியும். இவற்றை மக்களிடம் கொண்டு சேர்க்கும் வேலையை செய்து வருகிறோம். படித்த இளைஞர்கள் விவசாயத்துக்கு வருகின்றனர். கண்டிப்பாக இருக்கும் நிலப்பரப்பை வைத்து, தேவையான உணவுப் பொருட்களை அதிகரித்துக் கொள்ள முடியும். தானியப் பற்றாக்குறையை காய்கறிகள் மற்றும் பழங்கள் மூலமாக சமாளித்துக் கொள்ளலாம்.''