Published:Updated:

விபூதி... பல்பொடி...வறட்டி சாம்பிராணி...

அற்புதப் பலன்கள் கொடுக்கும் அடிமாடுகள் !கு. ராமகிருஷ்ணன் படங்கள்: ர. அருண்பாண்டியன்

விபூதி... பல்பொடி...வறட்டி சாம்பிராணி...

அற்புதப் பலன்கள் கொடுக்கும் அடிமாடுகள் !கு. ராமகிருஷ்ணன் படங்கள்: ர. அருண்பாண்டியன்

Published:Updated:
##~##

எதற்கும் உதவாதவர்களை, 'அடிமாடு’ என்று திட்டும் வழக்கம் நம்மவர்களிடையே உண்டு. பால் வற்றியப் பசுக்கள், வேலை செய்ய முடியாத வயதானக் காளைகள், எருதுகள் போன்றவற்றுக்கு தீவனம் போட்டு வளர்க்க சங்கடப்படுபவர்கள், இறைச்சிக்காக விற்பனை செய்து விடுவார்கள்.

இப்படிப்பட்ட மாடுகள்தான், 'அடிமாடுகள்' என்று அழைக்கப்படுகின்றன. ஆனால், ''இந்த மாடுகளில் இருந்தும் ஏராளமான பயன்களை அடைய முடியும்'' என்கிற சூட்சமத்தை பலருக்கும் சொல்லிக் கொடுத்து வருகிறார்கள், திருவாரூர் மாவட்டம், திருவீழிமிழலை கிராமத்தில் கோசாலையை நடத்தி வரும், 'கோ ரக்ஷன சமிதி’ அறக்கட்டளையினர்!

ஒட்டுமொத்த விகடனுக்கும் ஒரே ஷார்ட்கட்!

பால் வற்றிய மற்றும் பயன்படாது என்று கைவிடப்பட்ட மாடுகளுக்காக கோசாலையை நடத்திவரும் இந்த அமைப்பினர், பசுவின் கழிவுகளில் இருந்து மதிப்புக்கூட்டிய பொருட்கள் தயாரிப்பதோடு, ஒப்பந்த முறையில் இயற்கை சாகுபடியை இங்கே செய்து வருகின்றனர்.

இதைப் பற்றியெல்லாம் நம்மிடம் பேசிய கோசாலை நிர்வாகி ஆடிட்டர் குருபிரசாத், ''இந்த இடத்துல ஒரு வருஷமா கோசாலை செயல்படுது. சுற்று வட்டார கிராமங்கள்ல இருக்கற விவசாயிகளுக்கு இயற்கை விவசாயத்தைப் பரப்புறதுக்கும், மாடுகளை இறைச்சிக்குனு விற்காம... உபயோகமா பயன்படுத்துறதை சொல்லித் தர்றதுக்கும்தான் இந்த கோசாலையைத் துவக்கினோம்.

இந்த ஒரு ஏக்கர் இடத்தை, கோசாலைக்காக திருவாவடுதுறை ஆதீனம் இலவசமாவே கொடுத்தார். இதை நாங்க கையில எடுக்கறதுக்கு முன்ன காட்டுக்கருவை மண்டிக் கிடந்துச்சு. மாட்டுக் கொட்டகை, அலுவலகம், பணியாளர்களுக்கான வீடு, சாண எரிவாயுக் கலன், விபூதி தயாரிப்புக் கூடம், பல்பொடி தயாரிப்புக் கூடம், இயற்கை இடுபொருட்கள் சேமிப்புக் கூடம், வேளாண் கருவிகள் வைப்பதற்கான கூடம்னு எல்லாமே இங்க இருக்கு.

விபூதி... பல்பொடி...வறட்டி சாம்பிராணி...

இப்போதைக்கு 35 பசு மாடுகள் இருக்கு. இதுல பதினாறு நாட்டுப் பசுக்கள் இருக்கு. எல்லாமே சுத்து வட்டார மக்கள் இலவசமா கொண்டு வந்து விட்டதுதான்'' என்று முன்னுரை கொடுத்த குருபிரசாத், மாடுகளைப் பராமரிக்கும் முறைகள், கோசாலையின் பணிகள் பற்றி சொல்ல ஆரம்பித்தார்.

தினம் 1 கிலோ பசுந்தீவனம்!

''எனக்குச் சொந்தமான ரெண்டரை ஏக்கர் நிலத்துல பசுந்தீவனத்துக்காக... கோ-4 ரக பசுந்தீவனம், வேலி ஓரத்துல சூபாபுல் (சவுண்டல்) ரெண்டையும் நடவு செஞ்சு, இந்தப் பகுதியைச் சேந்த ரெண்டு விவசாயிங்ககிட்ட ஒப்படைச்சுட்டேன். அவங்க, தண்ணி பாய்ச்சி பராமரிச்சுக்கறாங்க.

கோசாலையில வேலை பாக்கறவங்க, பஞ்சகவ்யா, மீன்அமிலம், தேமோர்க் கரைசல், ஐந்திலைக் கரைசல்னு இயற்கை ஊட்டங்களைத் தயாரிச்சு, கொண்டு போய், பசுந்தீவன வயல்ல தெளிச்சுட்டு வந்துடுவாங்க. ஒரு நாளைக்கு ஒரு மாட்டுக்கு ஒரு கிலோ வீதம் பசுந்தீவனம் கொடுக்கிறோம். மீதி இருக்கற பசுந்தீவனத்தை, தோட்டத்தைப் பாத்துக்குற ரெண்டு விவசாயிங்களும் எடுத்துக்குவாங்க,. இதை வெச்சு, ஆளுக்கு ரெண்டு கறவை மாடுகளை அவங்க வளர்த்துட்டிருக்காங்க.

விபூதி... பல்பொடி...வறட்டி சாம்பிராணி...

கோசாலை மாடுகளை காலையில எட்டு மணியில இருந்து, மதியம் ஒரு மணி வரைக்கும் மேய்ச்சலுக்கு அனுப்புவோம். நல்ல விசாலமா கொட்டகை அமைச்சு தரையில கருங்கல் பதிச்சு அதுலதான் மாடுகளைக் கட்டியிருக்கோம். கொட்டகையைச் சுத்தி கொசுவலை கட்டியிருக்கோம்.

10 மின்விசிறிகளையும் போட்டிருக்கோம். அதனால, காக்கா, கொசு, ஈ தொந்தரவு இருக்காது. புண் வந்த மாடுகள தனியா கட்டிடுவோம். காலாற நடக்க விடுறதாலயும், கொட்டகையை சுத்தமா பராமரிக்கறதாலயும் மாடுகள் ஆரோக்கியமா இருக்கு.

சமையலுக்கு சாண எரிவாயு!

கோசாலையில, 22 ஆயிரம் ரூபாய் செலவுல சாண எரிவாயுக்கலனை அமைச்சுருக்கோம். இதுல தினமும் 40 கிலோ அளவுக்கு சாணத்தை தண்ணியில கலந்து ஊத்திடுவோம். இதுல கிடைக்கிற எரிவாயுவை வெச்சுதான் கோசாலையில வேலை பார்க்குற 15 பேருக்கு தினமும் சாப்பாடு தயார் பண்றோம். இந்தக் கலன்ல கிடைக்கற கழிவுகள் (ஸ்லரி), வீரியமான இயற்கை உரம். அதை, உரக்குழியில சேமிச்சு வெச்சு... தேவைப்படுறப்போ பயன்படுத்திக்கிறோம்.

விபூதி... பல்பொடி...வறட்டி சாம்பிராணி...

பசுஞ்சாணத்தைப் பயன்படுத்தி, மரபு முறையில விபூதியும் தயாரிச்சுட்டிருக்கோம். நிறைய கடைகள்ல கலப்பட விபூதிதான் விக்கிறாங்க. அதை உபயோகப்படுத்துறதால அரிப்பு உள்ளிட்ட நோயெல்லாம் வர வாய்ப்பிருக்கு.

சுத்தமான விபூதியை இட்டுக்கிட்டோம்னா, தலையில கோத்திருக்கிற நீரையெல்லாம் உறிஞ்சுடும். இதுதான் ஆரோக்கியமானது. சென்னையில் இருக்கற சமஸ்கிருத கல்லூரித் தலைவர் விழிநாத ஐயர், அவருக்குத் தேவையான விபூதியை வீட்டிலயே தயார் செஞ்சுக்கறார். அவர்கிட்ட இருந்துதான் விபூதி தயாரிக்கிறதை நான் கத்துக்கிட்டேன். அந்த முறைப்படிதான் இங்க விபூதி தயாரிக்கிறோம்.

ஈர பசுஞ்சாணத்தைச் சுத்தப்படுத்தி, அச்சுல வெச்சு யாக சாலைக்கான வறட்டியும் தயாரிக்கிறோம். இது, புகை இல்லாம, ரொம்ப நேரம் எரியும். சென்னை மாதிரியான பெருநகரங்கள்ல இதுக்கு நல்ல வரவேற்பு இருக்குது.

கெமிக்கல் சேர்க்காத ஆரோக்கியமான பல்பொடி, மரத்தூள் சேர்க்காத சுத்தமான கம்ப்யூட்டர் சாம்பிராணி எல்லாத்தையும் தயார் பண்ணிக்கிட்டிருக்கோம். இங்க தயாராகற எந்தப் பொருளுமே உடலுக்குக் கெடுதலை வரவழைக்காது.

இங்க தயாரிக்குற எதையும் விலைக்கு கொடுக்கறதில்ல. கோசாலைக்கு நன்கொடை தர்றவங்களுக்கும், ஊர் மக்களுக்கும் இலவசமாத்தான் கொடுக்கிறோம். விவசாயிகள் உற்பத்தி செய்து கொடுக்கிற பொருட்களை நாங்களே விற்பனை செஞ்சு கொடுக்கவும் தயாரா இருக்கோம்'' என்ற குருபிரசாத்,

''கறவை வத்திப்போன மாடுகளை அடிமாடா விலைக்குக் கொடுக்காம... கடைசி வரைக்கும் பராமரிச்சா... பால்ல கிடைக்கிற அளவுக்கான வருமானத்தை கிட்டத்தட்ட சம்பாதிச்சுட முடியும்கிறதுக்கு இந்த கோசலையே சரியான எடுத்துக்காட்டு'' என்று நம்பிக்கை வார்த்தைகள் சொல்லி விடைகொடுத்தார்.    

 தொடர்புக்கு, குருபிரசாத், செல்போன்: 94444-11772.

 வறட்சியிலும் வரம் தந்த இயற்கை !

எரவாஞ்சேரி கிராமத்தைச் சேர்ந்த விவசாயி செல்லப்பா பேசும்போது ''எனக்கு ஏற்கனவே  இயற்கை விவசாயத்துல ஓரளவுக்கு ஆர்வம் இருந்துச்சு. ஆனாலும் ஏதோ ஒரு தயக்கத்துனால இயற்கை விவசாயத்துக்கு மாறாமலே இருந்தேன். கடந்த ஆண்டு கோசாலைக்காரங்க, ரொம்ப நம்பிக்கையா சொன்னதுனால, ஒப்பந்த சாகுபடிக்கு ஒத்துக்கிட்டேன்.

எனக்கு மொத்தம் மூணேகால் ஏக்கர் நிலம் இருக்கு. இதுல வெள்ளைப் பொன்னி சாகுபடி செஞ்சு கொடுத்தாங்க. முந்தைய ஆண்டுகளைவிட, போன ஆண்டு பூச்சித்தாக்குதல் குறைவா இருந்துச்சு. இரண்டு முறை மூலிகைப் பூச்சிவிரட்டி அடிச்சிக் கொடுத்தாங்க... அதுவும் கட்டுப்பட்டுடிச்சு. பயிர் வளர்ச்சிக்காக பஞ்சகவ்யா, மீன் அமிலம் எல்லாம் தெளிச்சாங்க.  

ஏக்கருக்கு பதினைஞ்சரை மூட்டை மகசூல் கிடைச்சுது. வழக்கமா, ஏக்கருக்கு 30 முதல் 36 மூட்டை வரைக்கும் மகசூல் கிடைக்கும். போன சம்பா பருவத்துல, வறட்சி கடுமையா இருந்ததுனால, ஒழுங்கா தண்ணீர் பாய்ச்ச முடியலை...  இதனால மகசூல் குறைஞ்சிடுச்சு. அடுத்தடுத்த ஆண்டு மகசூல் இன்னும் அதிகரிக்கும்னு நம்பிக்கையா இருக்கேன். போன சம்பாவுல, ரசாயன விவசாயம் பண்ணினவங்களுக்கு ஏக்கருக்கு 5-8 மூட்டை வரைதான் மகசூல் கிடைச்சுது. சிலருக்கு அதுவும் கிடைக்கல. ஆனா, எனக்கு கிடைச்ச பதினைஞ்சரை மூட்டை... இயற்கை விவசாயம் கொடுத்த வரம்'' என்றார் உணர்ச்சி பொங்க.

 நாமே தயாரிக்கலாம் பல்பொடி !

ஒரு கிலோ தூய்மையான நாட்டுப்பசு மாட்டுச்சாணத்தை, சுத்தப்படுத்தி சின்ன வறட்டிகளாக செய்து கொள்ள வேண்டும். 2 கனஅடி அளவில் குழி எடுத்து, அதன் தரைப்பகுதியில் இரும்பு வலையை வைத்து, அதன் மீது 30 கிராம் கற்பூரத்தை பற்ற வைத்து, அதன் மீது வறட்டிகளை அடுக்கி, ஒரு தகரத்தை வைத்து, காற்றுப் புகாமல் மெழுகிவிட வேண்டும். மறுநாள், வெந்தநிலையில் இருக்கும் வறட்டிகளை எடுத்து தூளாக்கி, சலித்துக் கொள்ள வேண்டும்.

விபூதி... பல்பொடி...வறட்டி சாம்பிராணி...

தும்பை பூ, வேப்பிலை, ஆலம் விழுதுகளை சமஅளவு எடுத்து, நன்கு வெயிலில் காயவைத்து தூளாக்கிக் கொள்ள வேண்டும்.

இந்தப் பொடி அரை கிலோ, கரித்தூள் அரை கிலோ, நாட்டுமருந்துக் கடைகளில் கிடைக்கக் கூடிய கருப்பு நிறக் கல் உப்பு 10 கிராம், நாயுருவி இலைத்தூள் 10 கிராம் ஆகியவற்றுடன், சலித்து வைத்திருக்கும் வறட்டிப் பொடியையும் சேர்த்து, அரை லிட்டர் தண்ணீர்விட்டு, 10 நிமிடம் கொதிக்க வைத்து, கட்டியாகும் வரை கிளறவேண்டும். நன்கு ஆறிய பிறகு, 2 நாட்களுக்கு வெயிலில் காய வைத்துத் தூளாக்கினால்... ஆரோக்கியமான மணம் கமழும் இயற்கைப் பல்பொடி தயார். ஐம்பது கிராம் பல்பொடி, 25 ரூபாய் விலையில் விறபனையாகிறது.

 இப்படித்தான் தயாரிக்கணும் இயற்கை விபூதி !

இயற்கை விபூதி தயாரிக்க நாட்டுப்பசு மாட்டின் சாணம்தான் உகந்தது. 20 கிலோ சாணத்தை கல், மண் இல்லாமல் சுத்தப்படுத்தி, சின்னச் சின்ன வடை போல தட்டி, ஒரு வாரம் வெயிலில் காய வைக்க வேண்டும்.

காய்ந்த வறட்டியை துணியில் மூட்டையாகக் கட்டி, பூச்சிகள் தாக்காத அளவுக்கு உயரமான இடத்தில் கட்டித் தொங்கவிட வேண்டும். மூன்று மாதங்களுக்கு பிறகு,

10 அடிக்கு 10 அடி அளவில் செங்கற்களைப் பரப்பி, அதன்மீது நெல் கருக்காவை (பதர்) பரப்ப வேண்டும். பிறகு, காயவைத்த சாணத்தை, தண்ணீரில் நனைத்து, செங்கற்கள் மீது பரப்பி, மீண்டும் கருக்காவைப் பரப்ப வேண்டும்.

இப்படி, கருக்கா, வறட்டி என்று மாற்றி மாற்றி, பரப்பி கோபுரம் போல, பத்து அடுக்கு உருவாக்க வேண்டும். அதன் உச்சியில் திருநீற்றுப் பச்சிலைச் செடியை வைத்து, குறைந்த அளவில் சூடத்தை வைத்து மூட்டம் போட வேண்டும். தீ எரியாமல், புகையுமாறு பார்த்துக் கொள்ள வேண்டும். மூன்று நாட்கள் வரை, இப்படி புகைந்து கொண்டிருக்கும். நன்கு வெந்த நிலையில் கெட்டியான விபூதியாகக் கிடைக்கும்.

இதை நன்கு இடித்துத் தூளாக்கி, இரவு நேரத்தில் மூன்று நாட்கள் பரப்பி வைத்து, நன்கு சலித்துப் பயன்படுத்தலாம். 20 கிலோ சாணத்தில் இருந்து, 2 கிலோ விபூதி கிடைக்கும். இன்றைய சந்தை நிலவரப்படி, ஒரு கிலோ விபூதி குறைந்தபட்சம் 200 ரூபாய்க்கு விற்பனையாகிறது.

 அட, இயற்கை விவசாய ஒப்பந்த சாகுபடி !

திருவீழிமிழலை கிராமத்தைச் சுற்றியுள்ள விஷ்ணுபுரம், தேதியூர், நாலாங்கட்டளை, நல்லுச்சேரி உள்ளிட்ட கிராமங்களில் ஒப்பந்த முறையில் இயற்கை விவசாய சாகுபடியையும் கோசாலையினர் மேற்கொண்டு வருகிறார்கள். அதைப் பற்றிப் பேசிய குருபிரசாத், ''ஏக்கருக்கு 12 ஆயிரம் ரூபாய்

விபூதி... பல்பொடி...வறட்டி சாம்பிராணி...

எங்ககிட்ட கொடுத்துட்டா, நாங்களே விதைச்சு, விளைய வெச்சு, அறுத்து கொடுத்துடுவோம்.

ஆரம்பத்துல 7 ஆயிரம் ரூபாய், அறுவடை முடிஞ்சதும் 5 ஆயிரம் ரூபாய்னு பணத்தைக் கொடுத்தாலே போதும். இது, விவசாயிகளுக்கு பெரிய செலவா தெரியுறது இல்ல. வேலையாள் தட்டுப்பாடு, இடுபொருள் செலவு, இயந்திரங்கள் தட்டுப்பாடுனு எந்த பிக்கல், பிடுங்கலும் இல்லாம, அவங்க கைக்கு நெல்லு கிடைச்சுடுதுல்ல.

அண்டை போடுறதும், தண்ணீர் பாய்ச்சுறதும் மட்டும்தான் விவசாயிகளோட வேலை. மத்த வேலைகளை நாங்களே பார்த்துக்குவோம். போன சம்பா பருவத்துல 45 ஏக்கர்ல நெல் சாகுபடி செஞ்சு கொடுத்தோம்.

உழவு இயந்திரம், பாய் நாற்றங்காலுக்கு தேவையான விரிப்பு, நடவு இயந்திரம், களையெடுக்கும் கருவிகள் எல்லாமே நாங்க வெச்சுருக்கோம். கோசாலையில தயாரிக்கிற இடுபொருட்களையே பயன்படுத்திக்கிறோம். அறுவடையையும் நாங்களே செஞ்சு கொடுத்துடறோம். வைக்கோலை மட்டும் கோசாலைக்கு எடுத்துக்குவோம். நெல்லை, அவங்களே எங்க வேணும்னாலும் வித்துக்கலாம். இயற்கை விவசாயத்துல விளையுறதுனால, இந்த நெல்லுக்கு கிலோவுக்கு சராசரியா 18 ரூபாய் விலை கிடைச்சுடுது. இந்த ஒப்பந்த சாகுபடிக்கு விவசாயிகள்கிட்ட நல்ல வரவேற்பு இருக்கு'' என்றார்..

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism