காப்பீடு

'காய்ஞ்சும் கெடுக்கும்... பேய்ஞ்சும் கெடுக்கும்’ என்று மழையைப் பற்றி கிராமத்தில் ஒரு சொலவடை சொல்வார்கள். ஆம். பொழிய வேண்டிய சமயத்தில் பொழியாமல் விட்டாலும் சரி... தேவையில்லாத சமயத்தில் பொழிந்தாலும் சரி... அதிகம் பாதிக்கப்படுவது, விவசாயம்தான். இத்தகைய இக்கட்டான இயற்கை இடர்பாடுகள் நேரும் சூழ்நிலையில், விவசாயிகளுக்கு ஓரளவுக்குக் கைகொடுத்து வருவது, காப்பீடு திட்டங்கள்தான்.

திட்டங்கள்-மானியங்கள் சிறப்பிதழுக்காக, 'யுனைடெட் இந்தியா இன்ஷூரன்ஸ்’ நிறுவனத்தின் அதிகாரிகள் சிலரிடம் பேசியபோது, தகவல்களை அள்ளித் தந்தனர். முதலில் பேசுகிறார்... இந்த நிறுவனத்தின் முதன்மை மேலாளர் புத்தன்.

''கிராமப் பகுதிகளுக்கான காப்பீடு திட்டத்தில் பயிர்கள், தொழில்கள், உபயோகிக்கும் பொருட்கள்... என அனைத்தின் மீதும் காப்பீடு செய்து கொள்ள முடியும். வாகனங்களுக்குக்கூட காப்பீடு செய்திருக்கும் நாம், எந்நேரத்திலும் பாதிக்கப்படக் கூடிய விவசாயப் பயிர்களுக்கு காப்பீடு செய்வதில் ஆர்வம் காட்டுவதில்லை.

கிராமப்புற காப்பீடு திட்டத்தில் கிராமத்தில் வசித்து வரும் ஒரு நபர், அவருக்கு உரிமையான சைக்கிள், வீடு, பயிர்கள், ஆடு, மாடு, கோழி, பம்ப்செட், சொட்டுநீர்ப்பாசனக் குழாய், தானியங்களை சேமிக்கும் கிடங்கு, தேனீப் பெட்டி, பசுமை வீடு என அனைத்தையும் காப்பீடு செய்யலாம். காப்பீடு காலத்தில் நிகழும் எதிர்பாராத தீ விபத்து, மழை, வெள்ளம், நோய் தாக்குதல், கலவரங்களால் ஏற்படும் சேதம், வனவிலங்குகளின் தாக்குதல், பாம்பு கடித்தல், மாடுகள் ஒன்றையன்று முட்டிக் கொள்வது... போன்றவற்றால் நிகழும் விபத்துக்களுக்கு இழப்பீடு கிடைக்கும்.

ஃபார்ம் பேக்கேஜ் பாலிசி!

ஒரு விவசாயி, தனது வீடு மற்றும் தோட்டத்தில் பயன்படுத்தும் அனைத்துப் பொருட்களுக்கும் சேர்த்து 'ஃபார்ம் பேக்கேஜ் பாலிசி’ என்ற பெயரில் ஒரே காப்பீடு எடுக்கலாம். இதில் விளைபொருட்கள் திருட்டு, தீ, வெள்ளம், கலவரம்... என எந்த வகையில் இழப்பு ஏற்பட்டாலும் இழப்பீடைப் பெறலாம். இதற்கான தொகை விவசாயிகளின் வங்கிக் கணக்கில் செலுத்தப்படும்.

15 ரூபாய் பிரீமியம் செலுத்தி 50 ஆயிரம் வரை இழப்பீடு பெறும் 'ஜனதா பாலிசி’ திட்டத்தில் பாம்பு கடித்தல், குடிசை பாதிக்கப்படுதல் போன்றவற்றுக்கு இழப்பீடு கிடைக்கிறது. பெண்களுக்கான 'அன்னை தெரசா மகளிர் காப்பீடு திட்டம்’ உட்பட நாற்பதுக்கும் மேற்பட்ட காப்பீடு திட்டங்கள், வறுமைக்கோட்டுக்கு கீழே வாழ்பவர்களுக்காக இருபதுக்கும் மேற்பட்ட 'மைக்ரோ காப்பீடு’ திட்டங்கள் இருக்கின்றன. பசுமைக் குடில், மூலிகைப் பண்ணை, நர்சரி தொழில் செய்பவர்களும் காப்பீடு திட்டத்தில் இணைந்து கொள்ளலாம்.  

கால்நடை வளர்ப்பு!

கால்நடை வளர்ப்பவர்களுக்காக, 'கால்நடைகள் காப்பீடு திட்டம்’ செயல்பாட்டில் உள்ளது. இத்திட்டத்தின் கீழ், கன்று ஈனாமல் போய் விடுதல், மடிநோய் தாக்குதல், எதிர்பாராமல் அடிபடுதல் போன்றவற்றுக்கு இழப்பீடு உண்டு. மாட்டின் விலையைப் பொருத்து இழப்பீடு நிர்ணயிக்கப்படுகிறது. வங்கியில் கடன் பெற்று, கால்நடைகள் வாங்குபவர்களுக்கு அந்தந்த வங்கியே காப்பீடு செய்து கொள்ளும்.

பயிர் காப்பீடு!

தோட்டக்கலைப் பயிர்களுக்கு 75% வரை இழப்பீடு கிடைக்கிறது. அதாவது, மொத்த மகசூலில் இருந்து கணக்கெடுக்காமல் பயிர் இழப்பைப் பொருத்து, இழப்பீடு கிடைக்கும். வேளாண் பயிர்களுக்கு மொத்த விளைச்சலைக் கணக்கில் கொண்டு இழப்பீடு வழங்கப்படும்'' என்று திட்டங்கள் பற்றி விவரித்த புத்தன்,

''யுனைடெட் இந்தியா இன்ஸ¨ரன்ஸ் கம்பெனி மூலம் ஆண்டுக்கு 8 கிராமங்கள் தேர்ந்தெடுக்கப்பட்டு கால்நடைகளுக்கான மருத்துவ முகாம்கள் நடத்தி, கால்நடைகளுக்கு இலவச காப்பீடு செய்து கொடுக்கிறோம். தவிர, கிராமங்களுக்கான வளர்ச்சிப் பணிகளையும் மேற்கொண்டு வருகிறோம். இதுபோன்ற வாய்ப்புகள் வரும்போது கிராமப்புற மக்கள் பயன்படுத்திக் கொள்ள வேண்டும். காப்பீடு திட்டங்கள் குறித்து மேலும் அறிந்து கொள்ள, மாவட்ட மற்றும் தலைமைக் காப்பீடு நிறுவனங்களை அணுகலாம்'' என்று சொன்னார்.

அறுவடைக்குப் பிறகும் இழப்பீடு!

அவரைத் தொடர்ந்து பேசிய 'யுனைடெட் இந்தியா இன்ஷூரன்ஸ்’ நிறுவனத்தின் மேலாளர் பிரேமா முகிலன், ''அரியலூர், பெரம்பலூர், கடலூர், விருதுநகர், சிவகங்கை, நாமக்கல், சேலம், தருமபுரி ஆகிய மாவட்டங்கள் தமிழக வேளாண்துறையால் வறட்சி, புயல், மழைத் தாக்குதலுக்கு உள்ளாகும் பகுதிகளாக அறிவிக்கப்பட்டுள்ளன. அந்த மாவட்டங்களில் உள்ள விவசாயிகள்தான் காப்பீடு திட்டத்தின் அனைத்து சலுகைகளும் பெறத் தகுதியானவர்கள். மற்ற மாவட்டங்களில் உள்ள விவசாயிகள் தனிப்பட்ட முறையில் காப்பீடு செய்து கொள்ளலாம். ஆனால், அதற்கான தொகை கூடுதலாக இருக்கும்.

வறட்சிப் பகுதி என்று அறிவிக்கப்பட்டுள்ள மாவட்டங்களில், ஒரு ஏக்கருக்கு பிரீமியம் தொகை 200 ரூபாய் என்றால், அறிவிக்கப்படாத மாவட்டங்களில் 2,000 ரூபாய் என இருக்கும். அறிவிக்கப்படாத மாவட்டங்களில் நெல், வேர்க்கடலை, பயறு வகைகளுக்கு காப்பீடு எடுத்துக் கொள்ள முடியாது'' என்றவர், தொடர்ந்தார்.

''அறிவிக்கப்பட்ட மாவட்டங்களில் 'மகசூல் பயிர் காப்பீட்டு திட்டம்’, 'வானிலைப் பயிர் காப்பீட்டு திட்டம்’ ஆகிய இரண்டு முறைகளின் மூலம் காப்பீடு பதிவு செய்யப்படுகிறது. மகசூலைப் பொருத்தவரையில், 15 கிராமங்களை உள்ளடக்கிய வருவாய் கிராமங்கள் இருக்கும்.

ஒரு வருவாய் கிராமம் என்று கணக்கில் எடுத்துக்கொண்டு அதில் வறட்சி, புயல், மழை, வேறு காரணங்களால் பயிர்கள் பாதிக்கப்பட்டிருந்தால், வெவ்வேறு இடங்களில் பயிர்களை அறுவடை செய்து சோதனை செய்யப்படும். மொத்த மகசூல் அளவில், தற்போது எவ்வளவு இருக்கிறது... எவ்வளவு இழப்பு இருக்கும்... கடந்த ஐந்தாண்டுகளில் மகசூல் எவ்வளவு இருந்தது, என்பதையெல்லாம் கணித்து இழப்பீடு வழங்குவோம்.

அறுவடைக்குப் பிறகு, 14 நாட்களுக்குள் களத்தில் இருந்த பயிர்களுக்கு புயல், வெள்ளத்தால் சேதம் ஏற்பட்டிருந்தால், அடுத்த 48 மணி நேரத்துக்குள் வேளாண் காப்பீடு நிறுவனத்துக்கு தகவல் தெரிவித்தால் உரிய இழப்பீடு கிடைக்கும்' என்று சொன்னார் பிரேமா.

எந்தெந்தப் பயிர்களுக்கு காப்பீடு!

''வறட்சிப் பகுதி என்று அறிவிக்கப்பட்ட மாவட்டங்களில் நெல், கரும்பு, வேர்க்கடலை, பச்சைப் பயறு போன்ற பயிர்களுக்கு காப்பீடு செய்து கொள்ளலாம். 'திருத்தப்பட்ட தேசிய வேளாண் திட்ட’த்தின் கீழ் நடப்பாண்டுக்கான மகசூலை அடிப்படையாகக் கொண்ட மாவட்டங்களாக சிவகங்கை, கடலூர், நாமக்கல் அறிவிக்கப்பட்டுள்ளன.

இத்திட்டத்தின் மூலம் குத்தகைதாரர்கள், வங்கிக்கடன் பெறுவோர் மற்றும் கடன் பெறாதோர் அனைவரும் தகுதியுடையவர்கள். திட்டத்தில் சேரும் விவசாயிகள் வங்கியில் சேமிப்புக் கணக்கு வைத்திருக்க வேண்டும்'' என்று சொல்லும் 'யுனைடெட் இந்தியா இன்ஷூரன்ஸ்’ நிறுவனத்தின் துணை பொதுமேலாளர் ஹேமமாலினி, காப்பீடுக்கான தொகை, கால அளவு போன்றவற்றையும் விவரித்தார். அந்த விவரங்கள், தனியாக அட்டவணையில் இடம்பெற்றுள்ளன!

 தொடர்புக்கு,
யுனைடெட் இந்தியா இன்ஷ§ரன்ஸ் நிறுவனம்,
ஒயிட்ஸ் சாலை, சென்னை-600014
தொலைபேசி: 044-28575404/304,
செல்போன்: 94437-78887

தமிழ்நாட்டுக்கு மட்டும் ஏன் அநீதி?

தமிழகத்தில் அனைத்து மாவட்டங்களும் வறட்சியின் பிடியில் சிக்கித் தவிக்கும் போது, சில மாவட்டங்களுக்கு மட்டும் சலுகையின் கீழ் காப்பீடு அறிவிக்கப்பட்டிருக்கிறது. அதேசமயம்,

ஆந்திரா, கேரளா ஆகிய மாநிலங்களில் 75% அதிகமான பகுதிகள் வறட்சி பாதிக்கப்பட்ட மாவட்டங்களாக அறிவிக்கப்பட்டு, காப்பீடு திட்டங்களின் கீழ் கொண்டு வரப்பட்டுள்ளன. இதுமட்டுமல்லாது, அந்த மாநிலங்களில் உள்ள அனைத்து மாவட்டங்களையும் காப்பீடு திட்டத்தின் கீழ் கொண்டு வருவதற்கும் பேச்சுவார்த்தை நடக்கிறதாம்.

'தமிழ்நாட்டுக்கு மட்டும் ஏன் இந்த அநீதி?' என்று மாநில வேளாண் துறை அமைச்சர் தாமோதரனிடம் கேட்டபோது, ''காப்பீடு திட்டத்தை அனைத்து மாவட்டங்களுக்கும் விரிவு படுத்தவேண்டும் என்ற நோக்கில்தான், சில மாவட்டங்களை மட்டும் தற்போது அறிவித்திருக்கிறோம். படிப்படியாக அனைத்து மாவட்டங்களுக்கும் இதை விரிவுபடுத்தி விடுவோம்.  

முதல்வர் அவர்கள் பயிர்க் காப்பீடு திட்டங்களில் இருக்கும் இடர்பாடுகளைக் களைய 'தனிநபர் வேளாண் காப்பீட்டுத் திட்ட’த்தை அறிவித்துள்ளார். அதை, மத்திய அரசுக்கு அனுப்பினோம். இதுவரை அனுமதி கிடைக்கவில்லை. அது வந்தால் இன்னும் எளிமையான முறையில் காப்பீடுத் திட்டத்தில் விவசாயிகள் பயன்பெற முடியும்'' என்று சொன்னார்.