Published:Updated:

வாடகைக்கு வாகனங்கள்..! மானிய விலையில் கருவிகள்..!

படங்கள்: கே. குணசீலன் கு. ராமகிருஷ்ணன்

வாடகைக்கு வாகனங்கள்..! மானிய விலையில் கருவிகள்..!

படங்கள்: கே. குணசீலன் கு. ராமகிருஷ்ணன்

Published:Updated:

வேளாண் பொறியியல் துறை

##~##

விவசாயிகள் சந்திக்கக் கூடிய நெருக்கடிகளில் மிகவும் முதன்மையானது, ஆட்கள் பற்றாக்குறை. இதை சமாளிக்க புதிது புதிதாக ஏராளமான இயந்திரங்கள் வந்த வண்ணம் உள்ளன. இவற்றின் பயன்பாடுகள், விவசாயிகளைச் சென்றடையும் வகையில் ஏராளமான சிறப்புத் திட்டங்களை செயல்படுத்தி வருகிறது, தமிழக அரசின் வேளாண் பொறியியல் துறை. இதுகுறித்து விரிவாகப் பேசுகிறார், தஞ்சாவூர் மாவட்ட வேளாண் பொறியியல் துறை செயற்பொறியாளர் ஆரோக்கியசாமி.

ஒட்டுமொத்த விகடனுக்கும் ஒரே ஷார்ட்கட்!

வாடகைத் திட்டம்!

''வாடகைத் திட்டத்தின் கீழ், மண் தள்ளும் இயந்திரம், உழவு இயந்திரம் உள்ளிட்ட பல்வேறு கருவிகள் வாடகைக்கு விடப்படுகின்றன. நிலத்தை சமன் செய்யும் மண் தள்ளும் இயந்திரத்தின் வாடகை, ஒரு மணி நேரத்துக்கு 910 ரூபாய். உழவு இயந்திரத்தின் வாடகை, ஒரு மணி நேரத்துக்கு 370 ரூபாய்.

வாடகைக்கு வாகனங்கள்..! மானிய விலையில் கருவிகள்..!

டயர் மூலம் இயங்கக்கூடிய அறுவடை இயந்திரத்தின் வாடகை 910 ரூபாய். இதை, தண்ணீர் இல்லாத காய்ந்த நிலத்தில் மட்டுமே பயன்படுத்த முடியும். தண்ணீர் தேங்கிய மற்றும் காய்ந்த நிலம் இரண்டிலும் பயன்படுத்தக்கூடிய செயின் மூலம் இயங்கக் கூடிய அறுவடை இயந்திரம் ஒன்றும் இருக்கிறது. இது, 1,530 ரூபாயில் வாடகைக்குத் தரப்படுகிறது. மண் அள்ளும் இயந்திரம் ஒரு மணி நேரத்துக்கு 845 ரூபாய்க்கு வாடகைக்கு விடப்படுகிறது.

சிறு பாசனத்திட்டம்!

ஆழ்குழாய் கிணறு அமைப்பதற்கான துளையிடும் கருவிகள், எங்களிடம் உள்ளன. துளையிடும் கருவி மூலமாக, 8 அங்குல விட்டம் கொண்ட துளை அமைக்க, ஒரு மீட்டர் ஆழத்துக்கு 130 ரூபாய் வாடகை. இக்கருவி மூலம் சுமார் 300 மீட்டர் ஆழம் வரை துளையிட முடியும். சிறு துளையிடும் கருவி மூலமாக, 6 அங்குல விட்டம் கொண்ட துளை அமைக்க... ஒரு மீட்டர் ஆழத்துக்கு 60 ரூபாய்.

இக்கருவி மூலம் சுமார் 130 மீட்டர் ஆழம் வரை துளையிட முடியும். கைத்துளைப்பான் கருவி மூலமாக, 6 அங்குல விட்டம் கொண்ட துளை அமைக்க... ஒரு மீட்டர் ஆழத்துக்கு 30 ரூபாய் வாடகை. இக்கட்டணத்தில் துளை அமைத்து தருவதோடு மட்டுமில்லாமல், குழாய் பதித்து, சுற்றிலும் கூலாங்கற்களும் நிரப்பித் தரப்படும். குழாய், டீசல், கூலாங்கல் ஆகியவற்றுக்கான செலவுகள் விவசாயியைச் சேர்ந்தவை.

வாடகைக்கு வாகனங்கள்..! மானிய விலையில் கருவிகள்..!

தனியாரை ஒப்பிடும்போது, நாங்கள் வசூலிக்கும் கட்டணம் மிகவும் குறைவானது. அதேசமயம் எங்களுடைய பணிகள் நேர்த்தியாகவும் இருக்கும். ஆழ்குழாய் கிணறு அமைப்பதற்கான இடத்தைத் தேர்வு செய்யவும், ஆழ்குழாய் கிணறு அமைக்கவுள்ள இடத்தில் நிலத்தடி நீர்மட்டம் எந்த ஆழத்தில் உள்ளது என்பதைக் கண்டறிவதற்கும் எங்களிடம் கருவிகள் உள்ளன. மின்னியல் கருவி மூலம் ஆய்வு செய்ய ஒரு சோதனைக்கு 1,000 ரூபாய் கட்டணம் வசூலிக்கப்படுகிறது.

தமிழ்நாடு நீர்வள, நிலவளத் திட்டம்!

ஏரிப் பாசனத்தை மட்டுமே நம்பி இருக்கும் பகுதிகளில் 75 முதல் 100 சதவிகித மானியத்தில் சொட்டுநீர் மற்றும் தெளிப்புநீர்ப் பாசனம் அமைத்துத் தரப்படுகிறது. குறிப்பாக, ஆற்றுப்பாசனத்துக்கு வாய்ப்பில்லாத புதுக்கோட்டை, பெரம்பலூர், ராமநாதபுரம் உள்ளிட்ட மாவட்டங்களுக்கு இத்திட்டத்தில் அதிக முக்கியத்துவம் வழங்கப்படுகிறது.

நாற்று தயாரிக்கத் தட்டுகள்!

இயந்திர நடவுக்கு, நெல் நாற்றுகள் உற்பத்தி செய்ய பிரத்யேகமான பிளாஸ்டிக் தட்டுகள் மிகவும் அவசியமானது. ஒரு ஏக்கருக்கு 60 தட்டுகள் தேவைப்படும். ஒரு தட்டின் விலை 100 ரூபாய். இதற்கு 50 சதவிகிதம் மானியம் வழங்கப்படுகிறது. இத்திட்டத்தில் ஒரு விவசாயி 1,000 தட்டுகள் வரை வாங்கிக்கொள்ள முடியும்.

வாடகைக்கு வாகனங்கள்..! மானிய விலையில் கருவிகள்..!

வைக்கோல் கட்டும் கருவி!

இயந்திரம் மூலம் நெல் அறுவடை செய்யும்போது... வைக்கோல், நிலத்திலேயே விரயமாகிறது. இதனை பெரும்பாலான விவசாயிகள் தீயிட்டுக் கொளுத்துகிறார்கள். இதுபோல் செய்யாமல், வைக்கோலை முழுமையாக மீட்டெடுக்க ஒரு நவீனக் கருவி வந்துள்ளது. இதனை டிராக்டர் மூலம் இயக்க வேண்டும்.

இந்தக் கருவி, நிலத்தில் உள்ள வைக்கோலை சுருட்டி, கட்டு கட்டி கொடுத்துவிடும். இது, 3 லட்சத்து 15 ஆயிரம் ரூபாய் விலையிலும், 4 லட்சத்து 19 ஆயிரம் ரூபாய் விலையிலும், வெவ்வேறு வகைகளில் கிடைக்கிறது. இதற்கு 50 சதவிகிதம் மானியம் உண்டு. ஒரு விவசாயி அதிகபட்சமாக 2 லட்சத்து 4 ஆயிரம் ரூபாய் வரை மானியமாகப் பெற முடியும்.

வேளாண் கழிவுகளைத் தூளாக்கும் கருவி!

தேங்காய் மட்டை உரிக்கும் கருவியின் விலை ஒரு லட்சம் ரூபாய் முதல் ஒன்றரை லட்சம் ரூபாய் வரை இருக்கிறது. இதற்கு 50 சதவிகிதம் மானியம் தரப்படுகிறது.

வாடகைக்கு வாகனங்கள்..! மானிய விலையில் கருவிகள்..!

தென்னை மட்டை, பனை மட்டை, வாழை மட்டை... போன்ற வேளாண் கழிவுகளை நன்கு தூளாக்கி, மண்புழு உரத் தயாரிப்புக்குப் பயன்படுத்தலாம். இந்த தூளாக்கும் கருவியின் விலை 90 ஆயிரம் ரூபாய். இதற்கு 50 சதவிகிதம் மானியம் வழங்கப்படுகிறது.

பல பயிர் கதிர் அடிக்கும் கருவி!

மக்காசோளம், உளுந்து, நெல் உள்ளிட்ட பல பயிர்களுக்கும் ஒரே கருவி மூலம் கதிர் அடிக்கலாம். 3 லட்ச ரூபாய் முதல் மூன்றரை லட்ச ரூபாய் வரை விலையுள்ள இக்கருவிகளுக்கு 50 சதவிகிதம் மானியம் வழங்கப்படுகிறது.

வேளாண்மையை இயந்திர மயமாக்குதல் திட்டம்!

இத்திட்டத்தின் கீழ் பவர் டில்லருக்கு 45 ஆயிரம் ரூபாய்; ரோட்டோவேட்டருக்கு 20 ஆயிரம் ரூபாய்; டிராக்டருக்கு 45 ஆயிரம் ரூபாய் என மானியம் வழங்கப்படுகிறது. நெல் நடவு இயந்திரம், நெல் விதைப்பு இயந்திரம், களையெடுக்கும் கருவி, கவாத்து செய்யும் கருவி, தீவனம் வெட்டும் கருவி, தென்னை மரம் ஏறும் கருவி போன்றவற்றுக்கு 50 சதவிகிதம் மானியம் வழங்கப்படுகிறது'' என்ற ஆரோக்கியசாமி நிறைவாக,

'இதுபோல் இன்னும் பல்வேறு மானியத் திட்டங்கள் உள்ளன. பயன்பெற விருப்பம் உள்ள விவசாயிகள் அந்தந்த மாவட்ட வேளாண் பொறியியல் துறையை அணுகலாம்'' என்றார்.

வாடகைக்கு விட்டும் வருமானம் பார்க்கலாம்!

வேளாண் பொறியியல்துறை மூலமாக 50 சதவிகித மானியத்தில் வைக்கோல் கட்டு கட்டும்

வாடகைக்கு வாகனங்கள்..! மானிய விலையில் கருவிகள்..!

கருவியை வாங்கியுள்ள தஞ்சாவூர் மாவட்டம் மாரியம்மன்கோவில் பகுதியைச் சேர்ந்த மோகன், ''நான் 3 ஏக்கர்ல நெல் விவசாயம் செஞ்சுக்கிட்டு இருக்கேன்.

6 மாசத்துக்கு முன்ன இந்தக் கருவியை வாங்கினேன். இதோட விலை மூன்றரை லட்சம் ரூபாய். இதுல 50 சதவிகிதம் மானியம் போக, மீதி ஒண்ணே முக்கால் லட்சம் ரூபாயை என் கையில இருந்து கட்டினேன். இதை டிராக்டர் மூலமா இயக்கணும். சுமாரா 8 மணி நேரத்துல ஆறு ஏக்கர் வயல்ல உள்ள வைக்கோலை இருநூறுல இருந்து இருநூத்தம்பது கட்டுகளா கட்டி கொடுத்துடும். மத்த விவசாயிகளுக்கும் இதை வாடகைக்குக் கொடுத்திட்டிருக்கேன். ஒரு கட்டுக்கு

30 ரூபாய் வீதம் வாடகை வாங்குறேன்'' என்று சொன்னார்.

 தொடர்புக்கு,

செயற்பொறியாளர்,
வேளாண் பொறியியல் துறை, தஞ்சாவூர்.
தொலைபேசி எண்: 04362-235570
மோகன், செல்போன்: 99446-89024