போலி ரசீது... போலிக் கடன்... விவசாயிகளை வீறிட வைக்கும்

பிரச்னை கு.ராககிருஷ்ணன் போலி ரசீது... போலிக் கடன்... விவசாயிகளை வீறிட வைக்கும் . கூட்டு(றவு)க் கொள்ளை!

'வறுமை, அறியாமை, பணம் படைத்தோர் செலுத்தும் ஆதிக்கம், கடன்சுமை ஆகியவற்றால் சீரழிந்து செய்வதறியாது கிடந்த வேளாண் மக்களைக் காப்பாற்ற... காக்கும் கரங்களாக வந்த இயக்கம்தான் கூட்டுறவு இயக்கம்'

.

-இது, தமிழ்நாடு அரசின் கூட்டுறவுத்துறை இணையத்தை அலங்கரிக்கும் வாக்கியம்.

ஆனால், கூட்டுறவுத்துறையில் நடந்து வரும் பல மோசடிகள், இந்த வாக்கியங்களை 'அப்பட்டமானப் பொய்' என்பதை பலமுறை நிரூபித்திருக்கின்றன. அதற்கு சமீபத்திய உதாரணம்... தஞ்சாவூர் மாவட்டம், தேவராயன்பேட்டை தொடக்க வேளாண் கூட்டுறவு வங்கியில் நடந்திருக்கும் ஊழல். கூட்டுறவு வார விழாக்களை நடத்தி, கூட்டுறவுத்துறையின் சாதனைகளைச் சொல்லிவரும் வேளையில் இந்த சம்பவம் பூதாகரமாக வெடித்துக் கிளம்பியிருப்பதுதான் வேடிக்கை!

. தேவராயன்பேட்டை, வளத்தாமங்கலம், கோவிலாம்பூண்டி, மட்டையான் திடல், பொன்மான்மேய்ந்தநல்லூர் என பத்துக்கும் மேற்பட்ட கிராமங்களுக்கு சேமிப்புக்கும், கடன் உதவிக்குமான ஒரே வங்கி... தேவராயன்பேட்டை தொடக்க வேளாண் கூட்டுறவு வங்கி! பயிர்க்கடன், உரம், காப்பீடு, நிவாரணம் என அனைத்துமே இந்த வங்கி மூலம்தான் செயல்படுத்தப்பட்டு வருகிறது. இதில் செயலாளராகப் பணியாற்றிய ரமேஷ், நடத்தியிருக்கும் கையாடல் விவகாரத்தால்... கடந்த நான்கு மாதங்களாக வங்கி செயல்படாமல் முடங்கிவிட, பாதிக்கப்பட்ட விவசாயிகள் போராட்டத்தில் குதித்திருக்கின்றனர்.

இதுபற்றி நம்மிடம் பேசிய, பெருங்கரை கிராமத்தைச் கலியமூர்த்தி, "அந்த ரமேஷ், ரெண்டு மூணு மாசமா வேலைக்கு வரலை. பயிர்க்கடன் கேட்டுப் போனப்போ, 'லீவுல போயிட்டார், பயிர்க்கடன் கொடுக்க முடியாது'னு சொல்லிட்டாங்க. அலையா அலைஞ்சு பாத்துட்டு, கும்பகோணம் மத்தியக் கூட்டுறவு வங்கியில போய்க் கேட்டோம். அங்க இருந்த அதிகாரிங்க, 'போன வருஷம் வாங்கின கடனையே நீங்க முழுசா கட்டல. அதனால இந்த வருசம் உங்களுக்குக் கடன் கிடைக்காது'னு சொன்னாங்க.

. உண்மையில நாங்க எல்லாருமே பாக்கியில்லாம கடனைக் கட்டி முடிச்சுட்டோம். எனக்கு பாக்கி இருந்த 2 லட்சத்து 15 ஆயிரம் ரூபாயையும், தேவராயன்பேட்டை சொஸைட்டியில கட்டி ரசீது வாங்கி வெச்சுருந்தேன். அதைக் காட்டி கேட்டப்ப... 'இது போலி ரசீதுÕனு சொல்லி அதிர வெச்சுட்டாங்க. அந்த ரமேஷ், எங்ககிட்ட பணத்தை வாங்கிக்கிட்டு, அதை வரவு வைக்காம, போலி ரசீது கொடுத்து ஏமாத்தியிருக்கற விவரம் அப்பறமாத்தான் எங்களுக்குத் தெரிஞ்சுது'' என்றார் பரிதாபமாக.

கடங்காநத்தம் கிராமத்தைச் சேர்ந்த ராமலிங்கம், "போலி ரசீது கொடுத்து எங்களையெல்லாம் ஏமாத்தினது தவிர, உரத்தைப் பதுக்கி வெச்சு, கள்ளச்சந்தையில வித்தது... ஊருல இல்லாத ஆளுங்க பேருலயெல்லாம் கடன் கொடுத்தது மாதிரி ஏகப்பட்ட பணத்தைக் கொள்ளையடிச்சதுனு அந்த ரமேஷோட மோசடிப் பட்டியல் ரொம்ப பெருசா நீளுதுÕ' என்று கோபம் பொங்கச் சொன்னார்.

இவ்வளவு விஷயங்களும் வெளிப்படையாகத் தெரிந்துமே... ரமேஷ் மீது இதுவரை சட்டரீதியிலான நடவடிக்கைகளை எடுக்கவோ, பணத்தை மீட்கவோ கூட்டுறவுத்துறை அதிகாரிகள் முயற்சி எடுக்கவில்லை என்பதுதான் வேதனை.

இதைப்பற்றி நம்மிடம் பேசிய காவிரி விவசாயிகள் பாதுகாப்புச் சங்க தஞ்சாவூர் மாவட்டச் செயலாளர் சுவாமிமலை சுந்தரவிமலநாதன், "பல கோடி ரூபாய்க்கு ஊழல் நடந்திருக்கிறது. ஆனால், அதிகாரிகள் அதை மூடி மறைக்கப் பார்க்கிறார்கள். தணிக்கை ஆய்விலேயே, ஏகப்பட்ட நிதி மோசடி நடந்திருப்பதை அதிகாரிகள் கண்டுபிடித்திருக்கிறார்கள். ஆனால், நான்கு மாதத்துக்குப் பிறகுதான் பெயருக்கு சஸ்பெண்ட் செய்யப்பட்டிருக்கிறார். அதையும்கூட வெளியில் சொல்லாமல் விடுமுறையில் போயிருப்பதாக மறைத்துக் கொண்டிருந்தனர்.

.

உயர் அதிகாரிகளுக்கும் இந்த ஊழல்களில் பங்கிருக்கிறது. அதனால்தான் இவ்வளவு பெரிய ஊழல் நடந்தைக் கண்டுபிடித்தும்கூட ரமேஷ் மீது சட்டப்படி கைது நடவடிக்கை எடுக்கவில்லை. மாநிலக் குற்றப் புலனாய்வுத்துறை இதுபற்றி விசாரித்தால்தான் உண்மை தெரியவரும். ஊழலில் தொடர்புடைய மற்ற அதிகாரிகளையும் கண்டுபிடிக்க முடியும்'' என்றார் ஆவேசமாக.

இதற்கிடையில், கும்பகோணம் சரக துணைப்பதிவாளர் ஜெயராஜ், "தவறு செய்த ரமேஷிடம் இருந்து 17 லட்சம் ரூபாய் பறிமுதல் செய்யப்பட்டிருக்கிறது'' என்று தெரிவித்திருக்கிறார்.

தஞ்சாவூர் மண்டலக் கூட்டுறவுச் சங்கங்களின் இணைப்பதிவாளர் சிவாஜியிடம் விளக்கம் கேட்க முயன்றபோது, வெவ்வேறு காரணங்களைச் சொல்லி தவிர்த்ததால், கூட்டுறவுச் சங்கங்களின் மாநிலப் பதிவாளர் ஜடிந்திரநாத் ஸ்வைனிடம் பேசினோம். பொறுமையாக அனைத்தையும் கேட்டுக்கொண்டவர், "கண்டிப்பாக நேர்மையான முறையில் நடவடிக்கை எடுக்கப்படும்'' என்று உறுதி கூறினார்.

காத்திருப்போம்!

.

போலி ரசீது... போலிக் கடன்... விவசாயிகளை வீறிட வைக்கும்

Vikatan Correspondent