மத்திய அரசுக்கு எதிராக கேரள அரசு அதிரடி !

இயற்கை, விவசாயிகளின் நலன், சுற்றுச்சூழல்... இதுபோன்ற விஷயங்களில் மக்களின் பக்கமே நிற்கும் கேரள அரசு, தற்போது மத்திய அரசின் விதைச் சட்டம் விஷயத்திலும் அதேநிலையை எடுத்திருக்கிறது.

கேரள வேளாண்மைத் துறை, பல்லுயிர்ப் பெருக்க வாரியம் ஆகியவை இணைந்து, செப்டம்பர் 17-ம் தேதி 'விதைச் சட்ட வரைவு மற்றும் உயிரியல் தொழில்நுட்ப ஆணையச் சட்ட வரைவு' பற்றிய ஒரு நாள் கருத்தரங்கை திருவனந்தபுரத்தில் நடத்தின.

அதிகாரிகள், அரசியல்வாதிகள், விவசாயிகள், மருத்துவர்கள், இயற்கை ஆர்வலர்கள் என பல தரப்பட்டோரும் மத்திய அரசின் விதைச் சட்டத்தை எதிர்த்து பொங்கி விட்டனர் அந்தக் கருத்தரங்கில்.

அதிலிருந்து...

ஆந்திர மாநிலத்தைச் சேர்ந்த விவசாய விஞ்ஞானி நரசிம்ம ரெட்டி பேசும்போது, "ஆண்டுக்கு 5,000 கோடி ரூபாய் அளவில் இந்தியாவில் விதை வர்த்தகம் நடக்கிறது. இதைக் குறிவைத்துதான் பன்னாட்டு நிறுவனங்களெல்லாம் இந்தியாவை நோக்கிப் படை எடுக்கின்றன. 2001-ம் ஆண்டில் இங்கு பத்துக்கும் மேற்பட்ட நிறுவனங்கள் விதைகளை உற்பத்தி செய்து கொண்டிருந்தன. தற்போது மூன்று நிறுவனங்கள் மட்டும்தான் உள்ளன. பெரிய நிறுவனங்கள் எல்லாம் சின்னச்சின்ன நிறுவனங்களை வளைத்துப் போட்டு கபளீகரம் செய்து விட்டதால்தான் இந்த நிலை. கோடிக்கணக்கில் வர்த்தகம் செய்யும் நிறுவனங்களையே இப்படி வளைக்கும்போது, விவசாயிகளெல்லாம் அவர்களுக்கு எம்மாத்திரம்?

தற்போது கொண்டு வரப்பட்டிருக்கும் விதைச் சட்டத்தின்படி, மத்திய அரசிடம் பதிவு செய்தவர்கள் மட்டும்தான் உள்நாட்டில் விதை விற்பனையில் ஈடுபட முடியும். அதேசமயம், பன்னாட்டு நிறுவனங்கள், தங்களின் தாய்நாட்டில் பதிவு செய்திருந்தாலே போதுமாம். இதிலிருந்தே பன்னாட்டு நிறுவனங்களுக்கு வால் பிடிக்கும் மத்திய அரசின் குள்ளநரித்தனம் பட்டவர்த்தனமாகத் தெரியவில்லையா?

விதைச் சட்டத்தில்... விவசாயிகளுக்கும், வியாபாரிகளுக்குமான வித்தியாசத்தைக் கோடிட்டுக் காட்டவேயில்லை. இதன்படி... இனி, எந்த விவசாயியும் தன்னிடம் இருக்கும் விதைகளை யாருக்கும் விற்க முடியாது. சில நூறு ரூபாய்களுக்கு விதைகளை விற்பனை செய்யும் விவசாயி, கோடிக்கணக்கான ரூபாய் வர்த்தகம் செய்யும் நிறுவனத்துக்கு ஈடாகப் போட்டிப் போட்டுத்தான் விற்பனை அனுமதியைப் பெற முடியும். இதெல்லாம் நடக்கிற காரியமா?

ஆந்திராவில் பன்னாட்டு நிறுவனங்கள் அதிக விலைக்கு விதை விற்பனை செய்வதை எதிர்த்து பன்னிரண்டு வழக்குகள் தொடர்ந்தோம். அனைத்துமே தள்ளுபடி செய்யப்பட்டு விட்டன. விதைகளின் விலையை ஒழுங்குபடுத்துகிற அதிகாரத்தை அந்தந்த மாநில அரசுகளுக்குக் கொடுக்க வேண்டும். இல்லையெனில், இந்த நிறுவனங்கள் விவசாயிகளின் தலையில் மிளகாய் அரைத்து விடுவார்கள்'' என்று ஆவேசப்பட்டார்.

கேரள மாநில பல்லுயிர் பெருக்க வாரியத்தின் முன்னாள் தலைவர் விஜயன் பேசும்போது, "இப்படியரு மோசமான சட்டத்தை, நீதித்துறை இதுவரை பார்த்திருக்கவே முடியாது. அவ்வளவு மோசமான சட்டமிது. 'மரபணு மாற்றம் செய்யப்பட்ட விதைகள் பற்றி, அதில் நிபுணத்துவம் பெற்றவர்களைத் தவிர, மற்றவர்கள் கருத்துச் சொன்னால் தண்டனை வழங்கப்படும்' என்று சொல்லப்பட்டுள்ளது. இது நம்முடைய அடிப்படை உரிமையான பேச்சுரிமையைத் தடை செய்யும் விதத்தில் உள்ளது. இதெல்லாம் நம் வாயை மூட வைத்து, பன்னாட்டு நிறுவனங்களுக்கு கம்பளம் விரிக்கிற கதைதான்'' என்று சீறினார்.

நிறைவாகப் பேசிய கேரள விவசாயத் துறை அமைச்சர் 'முல்லக்கர' ரத்னாகரன், "விதை என்றாலே மகிழ்ச்சி என்று அர்த்தம். ஒரு வீட்டில் ஒரு குழந்தை பிறந்ததும், அதைப் பெற்றவர்கள் பக்குவமாகப் பராமரிப்பார்கள். அந்தக் குழந்தை வளர்ந்ததும் எப்படி அந்தக் குடும்பத்தைக் காப்பாற்றுமோ... அதேமாதிரிதான் விதையும். பக்குவமாக வளர்க்கும் விவசாயிகளை அந்த விதைதான் காப்பாற்றும்.

1947-ம் ஆண்டு கடுமையான உணவுப்பஞ்சம் ஏற்பட்டபோது 50 டன் அளவில் இருந்த இந்தியாவின் உணவு உற்பத்தி, இப்போது, 220 மில்லியன் டன்னாக உயர்ந்திருக்கிறது. இதனால் பன்னாட்டுக் கம்பெனிகள் மட்டுமே கொழுத்திருக்கிறதே தவிர, விவசாயிகளுக்கு ஒரு பயனும் கிடையாது. பன்னாட்டு நிறுவனங்களிடமிருந்து வாங்கிய விதைகள் முளைக்காவிட்டால், அதற்கு நிவாரணம் கேட்டு சம்பந்தப்பட்ட விவசாயி... இனி டெல்லிக்குத்தான் போக வேண்டும். இங்கு எத்தனை விவசாயிகளுக்கு டெல்லிக்குப் போகும் வசதி இருக்கிறது? 'பாதிக்கப்பட்ட விவசாயிகளுக்கு உடனடி நிவாரணம் வழங்கும் அதிகாரத்தை மாநில அரசுக்கும் வழங்க வேண்டும்' என்று நாங்கள் கோரிக்கை வைத்திருக்கிறோம். மொத்தத்தில் விவசாயிகளின் உரிமைகளைப் பாதிக்கும் வகையிலான இந்த விதைச் சட்டத்தை கேரள அரசு கடுமையாக எதிர்க்கிறது"என்றார் ஆவேசமாக.

இந்தக் கருத்தரங்கில் விவாதிக்கப்பட்ட அனைத்து விஷயங்களையும் கோப்புகளாக்கி மத்திய அரசுக்கு அனுப்பி வைத்துள்ளது கேரள அரசு. மத்திய அரசின் பதில் நடவடிக்கையைப் பொறுத்திருந்துதான் பார்க்க வேண்டும்.