பல்கலைக்கழகத்தின் 'புதிய ஆராய்ச்சி'....

"மண்ணின் வளமே மனித வளம். ரசாயன உரங்களை நேரடியாக மண்ணில் இடுவதைக் குறைத்துக் கொண்டு தொழுவுரத்தோடு கலந்து பயன்படுத்தினால்தான் அந்த மண்வளத்தை மேம்படுத்த முடியும்"

- இதைச் சொன்னது... யாரோ ஒரு இயற்கை விவசாய ஆர்வலரல்ல. கோயம்புத்தூரிலிருக்கும் தமிழ்நாடு வேளாண்மைப் பல்கலைக்கழகத்தின் துணைவேந்தர் முனைவர். ப. முருகேசபூபதி.

'மண் வளம் மற்றும் பயிர் உற்பத்திக்கு உகந்த ஒருங்கிணைந்த சமச்சீர் உர மேலாண்மை' பற்றிய ஆராய்ச்சியில் ஈடுபட்டிருக்கிறது பல்கலைக்கழகம். அதில் கிடைத்திருக்கும் சில தகவல்களைப் பத்திரிகையாளர்களிடம் பகிர்ந்து கொண்டபோதுதான், 'மண்ணின் வளம்' பற்றி, அனைவரையும் திரும்பிப் பார்க்க வைக்கும் வகையில் பேசினார் துணைவேந்தர்.

பல்கலைக்கழகத்தின் மக்காச்சோள வயலைச் சுற்றிக்காட்டியபடியே பேசியவர், "இந்த வயலை 18 பாத்திகளாகப் பிரித்துக் கொண்டு, ஒவ்வொரு பாத்திக்கும் ஒவ்வொருவிதமான உரங்களை அளித்தோம். அதாவது... தழைச்சத்து மட்டும்; தழை+மணி; தழை+சாம்பல்; தழை+மணி+சாம்பல்; சாம்பல் சத்து மட்டும்; மணிச்சத்து மட்டும்; தழை, மணி சாம்பல் சத்துகள்; தழை+மணி+சாம்பல்+சாண எரு, கோழி எரு, தொழு எரு என்று தனித்தனியாக கொடுத்து பரிசோதனை செய்தோம்.

தழைச்சத்துக்காக யூரியா, மணிச்சத்துக்காக சூப்பர்-பாஸ்பேட், சாம்பல் சத்துக்காக பொட்டாஷ்... இவற்றைப் பயன்\படுத்தினோம். பயிர்களுக்குத் தேவையான சத்துக்களை தனித்தோ, கூட்டாகவோ, எருக்களோடு ஒருங்கிணைத்தோ நிலத்தில் தொடர்ந்து இடும்போது... மண் மற்றும் பயிர் இரண்டிலும் ஏற்படும் மாற்றங்களை அறிவதற்காகத்தான் இந்த ஆராய்ச்சி.

தழைச்சத்தை மட்டும் சாண எருவோடு கலந்து கொடுத்தபோது கிடைத்த விளைச்சல், தழை+மணி+சாம்பல் சத்துக்களை மொத்தமாக அளித்த பாத்தியின் விளைச்சலுக்கு ஈடாக இருக்கிறது. தற்போது மக்காச்சோளத்தை ஆராய்ச்சி செய்து இதை உறுதி செய்திருக்கும் நாங்கள், ஏற்கெனவே 151 விதமான பயிர்களை இங்கே பயிரிட்டுத்தான் இந்த முடிவுக்கு வந்திருக்கிறோம். இந்த ஆராய்ச்சி தொடர்ந்து கொண்டிருக்கிறது.

ஒருங்கிணைந்த உர நிர்வாகம் என்பது இயற்கை எரு, ரசாயன உரங்கள், நுண்ணுயிர் உரங்கள் ஆகியவை கலந்ததுதான் என்பது தற்போது நிரூபிக்கப்பட்டிருக்கிறது. இவ்வாறு கொடுக்கும்போது, அதிக விளைச்சல், கூடுதல் வருமானம் கிடைப்பதோடு மண்ணின் வளமும் மேம்படுகிறது. எனவே, விவசாயிகள் ஹெக்டேருக்கு பன்னிரென்டரை டன் அளவில் சாண எரு அல்லது கரிம எருவை ரசாயன உரங்களோடு சேர்த்துப் பயன்படுத்த முன் வரவேண்டும். மட்கியக் குப்பைகளைக்கூடப் பயன்படுத்தலாம்" என்று சொன்னார்.

அவரிடம், "ரசாயன உரங்கள் மற்றும் பூச்சிக்கொல்லிகளால் மண்புழுக்கள் அழிகின்றன என்று இயற்கை விவசாய ஆர்வலர்கள் சொல்கிறார்கள். நீங்களோ, ரசாயன உரத்துடன் இயற்கை உரத்தையும் கலந்து கொடுக்கச் சொல்கிறீர்களே...?'' என்று நம் சந்தேகத்தை எடுத்து வைத்தோம்.

அதற்கு, "பயிர்களுக்காக நிலத்தில் இடும் குருணை மருந்துகளும், பூச்சிக்கொல்லிகளும்தான் மண்புழுவின் அழிவுக்குக் காரணம்" என்று சொன்னார் துணைவேந்தர் முருகேச பூபதி.

ஆக... 'இயற்கை பாதி... செயற்கை பாதி' என்ற உண்மையை இப்போது கண்டுணர்ந்திருக்கும் பல்கலைக்கழகம், 'முழுமையான இயற்கை விவசாயம் மட்டும்தான் விவசாயிகளை வளமாக்கும்' என்று சொல்லும் காலம் வெகுதூரத்தில் இல்லை என்றே தோன்றுகிறது!

படங்கள் தி. விஜய்