மருந்தில்லா வேளாண்மைக்கு வழிகாட்டும் மகத்தான தொடர்

முள்ள முள்ளால எடுக்குற மாதிரி, பூச்சியை வெச்சே பூச்சியை அழிக்க முடியும்'னு மனுஷன் கண்டுபிடிச்சதே பொறிவண்டைப் பார்த்துதான். இரைவிழுங்கிப் பூச்சிகள்ல முக்கியமான, அற்புதமான, ஆச்சர்யமானது இந்த பொறிவண்டு. 1888-ம் வருஷம், அமெரிக்காவுல இருக்கற கலிஃபோர்னியா மாநிலத்து ஆரஞ்சு தோட்டங்கள்ல, பஞ்சுப் பொதி செதில் பூச்சிக தாக்கி, ஆரஞ்சு விவசாயமே அழிஞ்சு போற நிலமை உருவாச்சு. இதை சரி செய்றதுக்காக ஆஸ்திரேலியாவிலிருந்து ‘வெடாலியா’ பொறிவண்டுகளைக் கொண்டு வந்து, ஆரஞ்சு வயல்ல விட்டார்... விஞ்ஞானி ஆல்பர்ட் கோயபல். கொஞ்ச நாள்ல செதில் பூச்சிக இருந்த இடமே தெரியாம போயிடுச்சு.

இதனால சந்தோஷப்பட்ட விவசாயிக, அந்த விஞ்ஞானிக்கு தங்கக் கடிகாரமும், அவர் சம்சாரத்துக்கு வைரத் தோடும் அன்பளிப்பா கொடுத்த கதையை ஏற்கெனவே நான் சொல்லியிருக்கேன். அந்தளவுக்கு முக்கியமானது இந்தப் பொறிவண்டு. இந்தப் பொறிவண்டு இனத்துல... தாய் அந்துப்பூச்சி, புழுப்பருவம் இது ரெண்டுமே, பயிருக்குத் தீமை செய்ற பூச்சி, புழு எல்லாத்தையும் தேடிப் பிடிச்சு அழிக்கும்கிறது ரொம்ப ரொம்ப முக்கியமா கவனிக்க வேண்டிய விஷயம்.

நிறம், காலோட தன்மை, உணர்கொம்புகளோட நீளம், உடம்புல இருக்கற புள்ளிகளை வெச்சுதான் பொறிவண்டுகளை வகைப்படுத்துறாங்க. பொறிவண்டோட தாய் அந்துப்பூச்சி, கவுத்துப் போட்ட துவரம் பருப்பு போல குமிழ் வடிவத்துல இருக்கும். மஞ்சள், இளஞ்சிவப்பு, சிவப்பு, ஆரஞ்சு ஆகிய நிறங்கள்ல புள்ளிகளாவோ, வரிவரியாகவோ இல்லனா... முழு நிறத்துலயோ இருக்கும். முதுகுப் பகுதியில புள்ளிக இருக்கும். சாதாரணமா தாய் அந்துப்பூச்சி 200 முதல் 500 முட்டைக வரை வைக்கும். இலையோட அடிப்பகுதியில, 5 முதல் 30 எண்ணிக்கையில வாழைக்காய் சீப்பு மாதிரி கும்பல், கும்பலா இதோட முட்டைக ஒட்டிக்கிட்டு இருக்கும். இதோட முக்கியமான இரையே அசுவிணிதான். அது கிடைச்சா, பிரியாணி கிடைச்ச மாதிரி! சாதாரணமா ஒரு தாய் அந்துப்பூச்சி, ஒரு நாளைக்கு குறைஞ்சது 50 அசுவிணியைச் சாப்பிடும். அசுவிணி கிடைக்காதப்ப, செதில் பூச்சி, செம்பேன் சிலந்தி, வெள்ளை ஈக்கள்னு பயிர்களுக்குத் தீமை செய்ற பூச்சிகளோட முட்டைக் குவியலைத் தாக்கி அழிக்கிறதுதான் இதோட முக்கியமானப் பொழுதுபோக்கு. மெல்லிசான உடம்புள்ள சாறு உறிஞ்சுற பூச்சிகளுக்கு நடுவுல பொறிவண்டுக நடமாட்டம் அதிகமா இருக்கும், அங்கதான்அதிகமா முட்டையும் வைக்கும்.

பொறிவண்டுக்கு மொத்தம் மூணு பருவம் இருக்கு. 3 முதல் 5 நாளைக்குள்ள முட்டையிலிருந்து பொறிவண்டு புழுவா வெளியே வரும். இதுதான் முதல் பருவம். இந்த பருவத்துல, கருப்பு நிறத்துல முதலை மாதிரியான வடிவத்துல அலைஞ்சிகிட்டிருக்கும். இந்த இளம் புழுக்களால அசுவிணியோட உடம்பைச் சாப்பிட முடியாது, அதனால அதோட உடம்பைத் துளைச்சு, சாறை மட்டும் உறிஞ்சிக் குடிக்கும். கொஞ்சம் வளர்ந்த பிறகு, அசுவிணியை மென்னு சாப்பிடும். இளம்புழுக்கள், கூட்டுப்புழுக்களா மாறுறதுக்கு 10 முதல் 15 நாள் வரைக்கும் ஆகும். அதுக்குள்ள 300 அசுவிணியை காலி பண்ணிடும். 15 நாளைக்கு பிறகு புழு, கூட்டுப்புழுவா மாறிடும். இந்தப் பருவத்துல அச்சு அசலா தாய் அந்துப்பூச்சி மாதிரியே உருவம் இருக்கும். ஆனா... கால், றெக்கை, உணர்கொம்புகள் இதெல்லாம் இருக்காது. கூட்டுப்புழு தன்னோட பின்பக்கத்தை இலையில ஒட்டிக்கிட்டு தொங்கிட்டு நிக்கும். 7 முதல் 10 நாளைக்குள்ள கூட்டுப்புழு பருவம், முடிஞ்சி தாய் அந்துப்பூச்சியா மாறிடும்.

ஒரு வயல்ல அசுவிணி வெள்ளை ஈ, செதில்பூச்சி, மாவுப்பூச்சிக எவ்வளவுக்கு எவ்வளவு அதிகமா இருக்கோ, அதுக்கு ஏத்த மாதிரி பொறிவண்டுகளோட எண்ணிக்கையும் அதிகமாகும். 500 வகைக்கும் மேலான பொறிவண்டுக உலகம் பூராவும் இருக்கு. அசுவிணியைப் புடிச்சி சாப்பிடுற பொறிவண்டுக்கு பேரு காக்சிநெல்லா (coccinella). இது இந்தியாவுல அதிகமாவே இருக்கு. செதில் பூச்சிகளை சாப்பிட்டு வாழுற ச்சிலோகோரஸ் (chilocorus பொறிவண்டு, கொய்யாவிலிருந்து ஆப்பிள் வரைக்கும் பழ மரங்கள்ல இருக்கற செதில் பூச்சிகளைப் புடிச்சு அழிக்குது. மாவுப் பூச்சியைப் புடிச்சி திங்குற கிரிப்டோலமஸ் (cryptolaemus)பொறிவண்டு, மத்த வகையிலிருந்து கொஞ்சம் வித்தியாசமானது. இதோட புழுக்கள் மாவுப்பூச்சி மாதிரியே இருக்கும். மாவுப்பூச்சியோட உடம்புல ஒரு மெழுகுப்பூச்சு இருக்கும். அந்த வாசனையை மோப்பம் பிடிச்சிகிட்டே மாவுப்பூச்சி இருக்குற இடத்துக்கு இதுங்க போயிடும். 'சரி, நம்மாளுதான் போல'னு மாவுப்பூச்சியும் கண்டுக்காது. அதுதான் கிரிப்டோலமஸ§க்கு வசதியாப் போயிடுது. மாவுப்பூச்சிக் கூட்டத்துக்குள்ள புகுந்து, கொஞ்ச நாள்ல மொத்தத்தையும் காலிபண்ணிடும்.

ஒரு பயிரிலிருந்து அடுத்தப் பயிருக்கான இடைப்பட்ட காலத்துல வயல்ல பயிர் இருக்காது, அதனால தீமை செய்ற பூச்சிகளும் இருக்காது. நன்மை செய்ற பூச்சிகளுக்கும் அது கஷ்ட காலம்தான். ஆனா, அதையும் கூட திறமையா சமாளிக்கறதுல கில்லாடிங்கதான் பொறிவண்டுகளோட தாய் அந்துப்பூச்சிக. அந்த மாதிரி நேரங்கள்ல, மலர்கள்ல இருக்கற மகரந்ததை சாப்பிட்டு, அடுத்தப் பயிர் காலம் வரைக்கும் காத்திருக்கும்.

இதைப் படிச்சதுமே, பொறிவண்டுனாலே நன்மைதான் செய்யும்னு முடிவுக்கு வந்துடாதீங்க. 'வெளுத்ததெல்லாம் பால் இல்லை'ங்கிற பழமொழி, பொறிவண்டுக்கும் பொருந்தும். அதிலயே வில்லன்களும் உண்டு!

- பூச்சி பறக்கும்