பல்கலைக்கழகத்தின் பளீர் அறிமுகங்கள் !

தமிழ்நாடு வேளாண்மைப் பல்கலைக்கழகம், ஒவ்வொரு ஆண்டும் புதிய பயிர் ரகங்கள், பண்ணைக் கருவிகள், வேளாண்மைத் தொழில்நுட்பங்கள்... என்று அறிமுகப்-படுத்து-வது வழக்கம். ஜூன் 9 மற்றும் 10-ம் தேதிகளில் கோயம்புத்தூரில் இருக்கும் பல்கலைக்கழக வளாகத்தில் புதிய கட்டடங்களுக்கான அடிக்கல் நாட்டு விழா மற்றும் உழவர் தினவிழா ஆகியவற்றோடு சேர்த்து, இந்த ஆண்டுக்கான புதிய ரகங்கள் வெளியீட்டு விழாவும் நடந்தது.

நிகழ்ச்சியில் பங்கேற்ற வேளாண் துறை அமைச்சர் வீரபாண்டி ஆறுமுகம், பல்கலைக்கழகம் ஆற்றியப் பணிகள், கண்டுபிடிப்புகள் பற்றியெல்லாம் விலாவாரியாகப் பேசினார். கூடவே, "பருப்பு உற்பத்தியை அதிகரிப்பதற்காக கனடாவில் இருந்து விதைகளை இறக்குமதி செய்வதற்காக ஒப்பந்தம் போட்டிருக்கிறோம். நமது விதைகள் மூலம் ஹெக்டேருக்கு

500 கிலோ மகசூல்தான் எடுக்க முடியும். ஆனால், கனடா நாட்டு விதைகளின் மூலம் 1,500 கிலோ மகசூல் எடுக்க முடியும்" என்று அதிசய தகவலைச் சொன்ன அமைச்சர்,

"இந்த ஆண்டிலிருந்து மூன்று வருட படிப்பாக பண்ணைத் தொழில்நுட்பக் கல்வி என்ற படிப்பு, தொலைதூரக் கல்வி மூலம் பல்கலைக்கழகத்தின் கீழ் இயங்கும் ஆராய்ச்சி நிலையங்கள் மற்றும் கல்லூரிகளில் துவங்க உள்ளன. பத்தாம் வகுப்பு தேறியவர்கள், தவறியவர்கள் இதில் சேர்ந்து படிக்கலாம். பல்கலைக்கழகத்தில் உள்ள 'ராமையா தாவர மரபு வங்கி'யில் பல்வேறு நாடுகளில் இருந்து கொண்டு வரப்பட்ட 23,613 நெல் ரகங்கள் பாதுகாக்கப்பட்டு வருகின்றன’’ என்று பெருமையோடு குறிப்பிட்டார்.

நிகழ்ச்சியின் ஒரு பகுதியாக... நாமக்கல்-அல்லி முத்து (மாவில் ஒட்டுக்கன்று), சேலம்- தர்மலிங்கம் (நெல் உற்பத்தி), புதுக்கோட்டை-ராமசாமி (நேரடி நெல் விதைப்புக் கருவி), மதுரை-ஜோஸ்பின் (தேனி வளர்ப்பு), கன்னியாகுமரி-மீனாட்சி சுந்தரம் (வாழை அடர் நடவு) ஆகியோருக்கு இந்த ஆண்டுக்கான 'வேளாண் செம்மல் விருது' வழங்கப்பட்டது. அவற்றை வழங்கிய கையோடு, புதிய ரகங்களை அறிமுகப்படுத்தினார் அமைச்சர்.

இனி புதிய ரகங்களைப் பற்றிப் பார்ப்போம்...

புதிய பயிர் ரகங்கள் அணிவகுப்பு...

நெல்|கோ|50 (TNAU Rice co-50)

சிறப்பியல்புகள் மத்திய சன்ன அரிசி, நல்ல அரவைத்திறன், மித அமைலோஸ் மாவுப் பொருளைக் கொண்டி-ருப்பதால் சாதத்துக்கும், இட்லிக்கும் ஏற்றது, குலைநோய், இலை உறை அழுகல், பழுப்புப் புள்ளி நோய், பாக்டீரியா இலைக் கருகல், துங்ரோ ஆகிய நோய்களுக்கு மிதமான எதிர்ப்புச் சக்தி கொண்டது.

உருவாக்கம் கோ 43- ஏ.டி.டீ 38 ஆகிய கலப்பினங்களில் இருந்து தேர்வு. வயது 130-135 நாட்கள். பருவம் பின் சம்பா-தாளடி

மகசூல் ஒரு ஹெக்டேருக்கு குறைந்தபட்சம் 6,338 கிலோ, அதிகபட்சம் 10,662 கிலோ (ஏ.டி.டீ 46 ரகத்தைவிட 10.11% கூடுதல் மகசூல்)

பயிரிட உகந்த பகுதிகள் நெல் விளையும் அனைத்துப் பகுதிகளும்.

நெல்-டி.ஆர்.ஒய்|3 (TNAU Rice TRY-3)

சிறப்பியல்புகள் இட்லிக்கு ஏற்றது, உலர் நிலங்களிலும் வரும், மத்திய பருமன் அரிசி, 71.3% அரவைத் திறன், 66% அரிசி காணும் திறன், 82.2% அவல் காணும் திறன் கொண்டது. இலைச்சுருட்டுப் புழு, தண்டுத் துளைப்பான் மற்றும் புகையான் ஆகியவைக்கும், குலைநோய், இலை பழுப்புப் புள்ளி, இலை உறை அழுகல் மற்றும் இலை உறை கருகல் ஆகிய நோய்களுக்கு மிதமான எதிர்ப்புத் திறன் கொண்டது

உருவாக்கம் ஆடுதுறை 43 - சீரகச்சம்பா

வயது 135 நாட்கள்

பருவம் சம்பா - பின் சம்பா, தாளடி

மகசூல் ஒரு ஹெக்டேருக்கு குறைந்தபட்சம் 5,833 கிலோ, அதிகபட்சம் 10,666 கிலோ (ஆடுதுறை 46 ரகத்தைக் காட்டிலும் 10.8% கூடுதல் மகசூல், சி.ஆர் 1009 மற்றும் ஏ.எஸ்.டி 16 ரகங்களைவிட 13% கூடுதல் மகசூல்)

பயிரிட உகந்த பகுதிகள் திருச்சி, தஞ்சாவூர், திருநெல்வேலி, திருவாரூர், நாகப்பட்டினம் மற்றும் ராமநாதபுரம்.

கோதுமை-கோ. டபிள்யூ 2 (TNAU Wheat cow-2)

சிறப்பியல்புகள் காலம் தாழ்த்திய விதைப்புக்கும் ஏற்றது, நடுத்தர உயரம், சாயாதத் தன்மை, உதிராத குணம், கவர்ச்சியான சிவந்த தானியம் (பி-கரோட்டின் 3.7 பிபிஎம்), சத்தான தானியம் (புரதம் 13.2%), கருப்பு, மஞ்சள் மற்றும் பழுப்பு துரு நோய்களுக்கான எதிர்ப்புத் திறன்

உருவாக்கம் என்.பி. 200 கதிரியக்க சடுதி மாற்றமுறை

வயது 110 நாட்கள்

பருவம் அக்டோபர் மூன்றாம் வாரம் முதல் நவம்பர் இரண்டாம் வாரத்-துக்குள்

மகசூல் ஒரு ஹெக்டேருக்கு குறைந்தபட்சம் 4,040 கிலோ, அதிகபட்சம் 5,320 கிலோ (என்.பி 200 ரகத்தை விட 26.6% கூடுதல் மகசூல்)

பயிரிட உகந்தப் பகுதிகள் கோவை, திருப்பூர், வேலூர், தேனி, திருவண்ணாமலை, திண்டுக்கல், ஈரோடு, தர்மபுரி மற்றும் கிருஷ்ணகிரி.

சோளம்-கோ 30 (TNAU Sorghum co-30)

சிறப்பியல்புகள் தானியம் மற்றும் தீவனத்துக்கு ஏற்றது, அதிக செரிமானத் தன்மை கொண்ட தட்டு, குருத்து ஈ மற்றும் தண்டுத் துளைப்பானுக்கு மிதமான எதிர்ப்புத்தன்மை கொண்டது, அடிச்சாம்பல் நோய்க்கு எதிர்ப்புத் தன்மை, வெண்முத்து தானியங்கள்

உருவாக்கம் ஏ.பி.கே-1 - டி.என்.எஸ்-291

வயது 100-105 நாட்கள்

பருவம் மானாவாரிக்கு ஆடி, புரட்டாசிப் பட்டங்கள், இறவைக்கு மாசிப் பட்டம்.

மகசூல் மானாவாரியில் ஒரு ஹெக்டேருக்கு 2,800 கிலோ, இறவையில் 3,360 கிலோ. அதிகபட்ச மகசூல் 5,478 கிலோ (கோ.எஸ் 28 மற்றும் எ.பி.கே 1 ரகங்களைவிட முறையே 20.7% மற்றும் 19.3% கூடுதல் மகசூல்) தீவன விளைச்சல் மானாவாரியில் ஒரு ஹெக்டேருக்கு 6,990 கிலோ, இறவையில் 9,290 கிலோ (கோ. எஸ் 28 மற்றும் எ.பி.கே 1 ரகங்களைவிட முறையே 11.1% மற்றும் 11.2% கூடுதல் மகசூல்)

பயிரிட உகந்த பகுதிகள் நீலகிரி மற்றும் காவிரி டெல்டா பகுதிகள் தவிர தமிழகத்தில் சோளம் விளையும் பகுதிகள் அனைத்தும்.

உளுந்து-கோ 6 (TNAU Black gram co-6)

சிறப்பியல்புகள் குறுகிய கால ரகம், ஒரே சமயத்தில் காய்கள் முதிர்ச்சி அடையும் தன்மை மற்றும் காய்கள் வெடிக்காத பண்பு, பருமனான விதைகள் (100 விதைகளின் எடை 5.5 கிராம்), அதிக மாவு தரும் தன்மை. மஞ்சள் தேமல், நுனி கருகல் மற்றும் வேரழுகல் நோய்களுக்கு ஓரளவு எதிர்ப்புச் சக்தி கொண்டது, அசுவினி, தண்டு ஈ மற்றும் புள்ளிக்காய்ப் புழுத் தாக்குதலை தாங்கி வளரக் கூடியது

உருவாக்கம் டி.யூ 2 - வி.பி 20

வயது 60-65 நாட்கள்

பருவம் புரட்டாசிப் பட்டம்

மகசூல் ஒரு ஹெக்டேருக்குக் குறைந்தபட்சம் 733 கிலோ, அதிகபட்சம் 1,800 கிலோ. (பிஜி) 4 மற்றும் வம்பன் (பிஜி) 5 ரகங்களைவிட முறையே 13% மற்றும் 12% கூடுதல் மகசூல்.

பயிரிட உகந்த பகுதிகள் உளுந்து விளையும் அனைத்துப் பகுதிகளும்.

நிலக்கடலை-கோ 6 (TNAU Groundnut co-6)

சிறப்பியல்புகள் வறட்சியைத் தாங்கி வளரும் தன்மை, காய்கள் கொத்தாகக் காணப்படும், உடைப்புத்திறன் 73.5%, எண்ணெய்ச் சத்து 49.5%, விரும்பத்தக்க வகையில் காய்களின் குணங்கள், அதிக எண்ணெய்ச் சத்து கொண்ட பருப்புகள் (49.5%)

உருவாக்கம் சி.எஸ்9-ஐ.சி.ஜி.எஸ் 5 கலப்பின சந்ததிகளில் தேர்வு செய்யப்பட்டது.

வயது 125-130 நாட்கள்

பருவம் மானாவாரி (வைகாசி)

மகசூல் ஒரு ஹெக்டேருக்குக் குறைந்தபட்சம் 1,914 கிலோ, அதிகபட்சம் 3,236 கிலோ. (வி.ஆர்.ஐ.ஜி.என் 7 மற்றும் உள்ளூர் ரகங்களைவிட முறையே 29.4% மற்றும் 77.1% கூடுதல் மகசூல்)

பயிரிட உகந்த பகுதிகள் நாமக்கல் மாவட்டம்.

சூரியகாந்தி-வீரிய ஒட்டு கோ 2 (Sunflower Hybrid co-2)

சிறப்பியல்புகள் அதிக எண்ணெய் சத்து (39.8%), அதிக எடை கொண்ட விதைகள் (48 கிராம்-100 மிலி)

உருவாக்கம் கோ.எஸ்.எஃப் 1 ஏ - சி.எஸ்.எஃப்.ஐ 99

வயது 85 - 90 நாட்கள்

பருவம் ஆடி, கார்த்திகை, மார்கழி ஆகிய பட்டங்கள்

மகசூல் ஆடிப்பட்டத்தில் ஒரு ஹெக்டேருக்கு குறைந்தபட்சம் 1,950 கிலோ, அதிகபட்சம் 3,114 கிலோ. (சன்பிரட் 275 மற்றும் டி.சி.எஸ்.எச் 1 ஆகிய வீரிய ஒட்டு ரகங்களை விட முறையே 13.4% மற்றும் 17.1% கூடுதல் மகசூல்) கார்த்திகைப் பட்டத்தில் ஒரு ஹெக்டேருக்குக் குறைந்தபட்ச மகசூல் 2,230 கிலோ.

பயிரிட உகந்த பகுதிகள் சூரியகாந்தி விளையும் அனைத்து பகுதிகளும்

கரும்பு எஸ்.ஐ-7 (TNAU Sugercane SI- 7)

சிறப்பியல்புகள் அதிக மகசூல் மற்றும் சர்க்கரைச் சத்து, சிறந்த மறு தாம்புத்திறன், எளிதாகத் தோகை உரியும், சுணையற்றது, பூக்காதத் தன்மை, வறட்சி மற்றும் அதிக நீர்தேக்கத்தினைத் தாங்கும், செவ்வழுகல் நோய்க்கு மிதமான எதிர்ப்புத் திறன்.

உருவாக்கம் கோ 99043 - கோகு 93076

வயது 11 மாதங்கள்

பருவம் முன் பட்டம்

மகசூல் நடவுப்பயிரில் ஒரு ஹெக்டேருக்குக் குறைந்தபட்சம் 154 டன், மறுதாம்பில் குறைந்தபட்சம் 146 டன், அதிகபட்சம் 168 டன்.

பயிரிட உகந்த பகுதிகள் கரும்பு விளையும் அனைத்துப் பகுதிகளும்

தென்னை-ஏ.எல்.ஆர் 2 (TNAU coconut ALR-2)

சிறப்பியல்புகள் ஐந்தரை ஆண்டுகளில் காய்க்கும், சீரான மகசூல். ஆண்டுக்குச் சராசரியாக 12 பாளைகள், ஒரு காய்க்கு 135 கிராம் கொப்பரை, எண்ணெய்சத்து 64.7%. வறட்சியைத் தாங்கி வளரும். காண்டாமிருக வண்டு, சிவப்புக் கூன் வண்டு மற்றும் இலைக் கருகல் நோய் ஆகிவைக்கு எதிர்ப்புத்திறன் கொண்டது

உருவாக்கம் டிப்தூர் நெட்டையிலிருந்து தேர்வு செய்யப்பட்டது

வயது 80 வருடங்கள்

பருவம் ஆடி மற்றும் தைப்பட்டம்

மகசூல் ஒரு மரத்தில் ஆண்டுக்கு 109 முதல் 140 காய்கள். (கிழக்குக் கடற்கரை நெட்டை மற்றும் வேப்பங்குளம் 3 ஆகிய ரகங்களை விட முறையே 12% மற்றும் 99% கூடுதல் மகசூல்)

பயிரிட உகந்த பகுதிகள் தென்னை வளரும் அனைத்துப் பகுதிகளும். குறிப்பாக வறட்சிப்பகுதிகளுக்கு ஏற்றது.

கத்திரி-வீ.ஆர்.எம் 1 (TNAU Brinjal VRM-1)

சிறப்பியல்புகள் அதிக மகசூல், இலை, தண்டு, கத்திரிக்காயின் காம்புப் பகுதிகளில் முட்கள் இருக்கும். கொத்துக் கொத்தாக காய்க்கக் கூடியது, காய்கள் முட்டை வடிவம் உடையது, ஊதா நிறக் காய்கள், முனையில் மட்டும் சிறிதளவு பச்சை நிறம் கொண்டவை, இலைப்புள்ளி, வெர்டிசிலியம் வாடல் நோய் மற்றும் எப்பிலாக்கினா வண்டுகளின் தாக்குதலைத் தாங்கி வளரும் தன்மை கொண்டது

உருவாக்கம் இலவம்பாடி முள்ளுக் கத்திரிக்காயில் இருந்து தனித்து தேர்ந்தெடுக்கப்பட்டது

வயது 140-150 நாட்கள்

பருவம் ஆடி, புரட்டாசி மற்றும் கோடைப் பட்டங்கள்

மகசூல் ஒரு ஹெக்டேருக்கு 40 முதல் 45 டன். அதிகபட்சம் 49.88 டன்.

பயிரிட உகந்த பகுதிகள் வேலூர் மற்றும் திருவண்ணாமலை

தக்காளி-வீரிய ஒட்டு கோ-3(TNAU Tomato Hybrid co-3)

சிறப்பியல்புகள் அடர் நடவு முறைக்கு ஏற்றது, பழங்கள் கொத்தாகவும் (கொத்துக்கு 3,5 பழங்கள்) 55.65 கிராம் எடையுடனும், உருண்டை வடிவிலும் இருக்கும். பழங்களில் 5.58 பிரிக்ஸ் மொத்த கரையும் திடப்பொருளும், 0.73 சதம் புளிப்புச் சுவையும், 35.72மி.கி-100கி வைட்டமின் சி சத்தும் அடங்கியுள்ளது. இலைச்சுருள் நச்சுயிரி நோய் மற்றும் வேர் முடிச்சு நூற்புழுவுக்கு மிதமான எதிர்ப்புத் திறன் கொண்டது

உருவாக்கம் எச்.என்.2 - சி.எல்.என் 2123 ஏ

வயது 145 - 150 நாட்கள்

பருவம் பிப்ரவரி-மார்ச்- மே-ஜூன்- நவம்பர்-டிசம்பர்

மகசூல் ஒரு ஹெக்டேருக்குக் குறைந்தபட்சம் 96.2 டன், அதிகபட்சம் 129.5 டன் (கோ.டி.எஸ் 2 மற்றும் லட்சுமி ரகங்களைக் காட்டிலும் முறையே 9.76% மற்றும் 42.24% கூடுதல் மகசூல்)

பயிரிட உகந்த மாவட்டங்கள் கோவை, சேலம், கடலூர், தஞ்சாவூர், மதுரை, தேனி, காஞ்சீபுரம், தூத்துக்குடி, திண்டுக்கல், திருச்சி, தர்மபுரி, கிருஷ்ணகிரி, வேலூர் மற்றும் திருவண்ணாமலை

மிளகாய்-வீரியஒட்டு கோ 1 (TNAU Chilli Hybrid co-1)

சிறப்பியல்புகள் செடிகள் நன்கு படர்ந்து வளரக்கூடியது, காய்கள் இளம்பச்சை நிறத்துடன் நுனி கூர்மையாகவும் 10.5-12.0 செ.மீ நீளமாகவும் காணப்படும், காரத்தன்மை 0.58%, ஒலியோரெசின் 14.0% கொண்டது. பழ அழுகல் நோய்க்கு மிதமான எதிர்ப்புத் திறன் கொண்டது.

உருவாக்கம் செலக்சன் 1 - சி.ஏ 97

வயது 195-205 நாட்கள்

பருவம் ஜுன்-ஜூலை - செப்டம்பர்-அக்டோபர் - ஜனவரி-பிப்ரவரி

மகசூல் ஒரு ஹெக்டேருக்குக் குறைந்தபட்ச மகசூல் பச்சை மிளகாய் 28.10 டன். மிளகாய் வற்றல் 6.74 டன். அதிகபட்ச மகசூல் பச்சை மிளகாய் 34.67 டன். மிளகாய் வற்றல் 8.64 டன் (என்.எஸ் 1701 ரகத்தைவிட பச்சை மிளகாய் 14.65% கூடுதல் மகசூல். மிளகாய் வற்றல் 19.15% கூடுதல் மகசூல்)

பயிரிட உகந்த மாவட்டங்கள் கோவை, சேலம், கடலூர், தஞ்சாவூர், மதுரை, தேனி, காஞ்சிபுரம், தூத்துக்குடி, திண்டுக்கல், திருச்சி, தர்மபுரி, கிருஷ்ணகிரி, வேலூர் மற்றும் திருவண்ணாமலை

செலரி ஓ.டி.ஒய்-1 (TNAU Celery OTY-1)

சிறப்பியல்புகள் கடல் மட்டத்திலிருந்து 900 மீட்டர் உயரத்துக்கு மேல் உள்ள இடங்களில் வளரும், எண்ணெய் விதைகளில் 1.71%, வேர் நூற்புழு, வெள்ளை ஈ மற்றும் அசுவிணி பூச்சிகளுக்கும், இலைப்புள்ளி நோய்க்கும் எதிர்ப்புத்திறன் கொண்டது.

உருவாக்கிய முறை 6 இன செலரி வகைகளிலிருந்து தேர்வு செய்யப்பட்டது.

வயது 115 நாட்கள்

பருவம் ஏப்ரல்-ஜூன் - ஆகஸ்ட்-அக்டோபர் -

பிப்ரவரி-ஏப்ரல்

மகசூல் ஒரு ஹெக்டேருக்கு 30.5 டன் கீரை, 1.40 டன் விதை (உள்ளூர் ரகத்தைவிட கீரை 30.3% கூடுதல். விதை 38.6% கூடுதல் மகசூல்)

பயிரிட உகந்த பகுதிகள் நீலகிரி.

பண்ணைக் கருவிகள்

காய்கறி நாற்றங்கால் சாகுபடிக்கான குழித்தட்டில் விதையிடும் கருவி

சிறப்பியல்புகள் ஒரே இயக்கத்தில் விதை ஒவ்வொன்றாக எடுக்கப்பட்டு குழித்தட்டின் எல்லாக் குழிகளிலும் விதைக்கப்படுகின்றன. இக்கருவியைக் கொண்டு நாளன்றுக்கு 750 குழித்தட்டுகளில் விதையிட ரூ.280 செலவாகிறது. 60% வேலை ஆட்களையும், 52% செலவும் குறைகிறது. கருவியின் விலை ரூ.10,000 (வெற்றிடம் உருவாக்கும் கருவியுடன்)

பவர்டில்லர் டிரெய்லருக்கான திருப்பு வடிவமைப்புக் கருவி (ஸ்டீரிங்)

சிறப்பியல்புகள் பவர்டில்லர் டிரெயிலரை திருப்பும் போது ஓட்டுநர் இருக்கையிலிருந்து இறங்கி ஏறுவதை இத்திருப்பு வடிவமைப்பு தவிர்க்கிறது. ஓட்டுனரின் கைகளுக்கு எளிதாக எட்டக் கூடிய வகையில் கட்டுப்படுத்தும் அமைப்புகள் பொருத்தப்பட்டுள்ளது. வளைவு ஆரம் குறைக்கப்பட்டதால், மிகக்குறைந்த இடத்திலும் திருப்பலாம். பக்கவாட்டிலும், மேலும் கீழுமாகவும் பவர் டில்லரின் கைப்பிடி அசைவதால் ஏற்படும் அசௌகரியம் தவிர்க்கப்படுகிறது. இத்திருப்பு வடிவமைப்பினால் பவர்டில்லர் டிரெயிலரை திருப்புவது எளிதாகவும் பாதுகாப்பாகவும் உள்ளது. கருவியின் விலை ரூ.1000.

புதியதாக வெளியிடப்பட்டுள்ள பயிர் ரகங்களின் விதைகள் மற்றும் கருவிகள் பெற விரும்பும் விவசாயிகள் பல்கலைக்கழகத்தைத் தொடர்பு கொள்ளலாம்.

தொடர்புக்கு ஆராய்ச்சி இயக்ககம், தமிழ்நாடு வேளாண்மைப் பல்கலைக்கழகம், கோயம்புத்தூர்-641 003. தொலைபேசி 0422-2431222.