தர்மபுரி மற்றும் கிருஷ்ணகிரி மாவட்ட குடிநீர் தேவையைப் பூர்த்தி செய்ய, ஒகனேக்கல் கூட்டுக்குடிநீர் திட்டம் தீவிரமாக செயல்படுத்தப்பட்டு வருகிறது. நீர் எடுக்கும் மையம், பம்பிங் ஸ்டேஷன் மற்றும் பைப் லைன் பணிகளுக்காக மரங்கள் வெட்டி வீழ்த்தப்படுகின்றன. இதுவரை சுமார் இருநூற்றைம்பதுக்கும் மேற்பட்ட மரங்கள் வெட்டப்பட்டுள்ளன. இதில் சில மரங்கள் நூறாண்டு பழமை கொண்டவை என்பது குறிப்பிடத்தக்கது.

இப்படி தாறுமாறாக மரங்கள் வெட்டப்படுவது... சுற்றுச்சூழல் ஆர்வலர்களிடையே கவலையை ஏற்படுத்தியிருக்கிறது. அதுபற்றி நம்மிடம் பேசிய ‘சமூக பொருளாதார மற்றும் சுற்றுச்சூழல் வளர்ச்சி மைய'த்தின் பொறுப்பாளரான சரவணன், "வளர்ச்சித் திட்டங்களுக்காக மரங்களை வெட்டுவது தவிர்க்க முடியாத காரியம்தான். ஆனால், 'வளர்ச்சிப் பணி என்ற பெயரில் ஒரு மரம் வெட்டப்பட்டால், அதற்குப் பதிலாக பத்து முதல் பதினைந்து மரங்களை உடனே நடவேண்டும்' என்று நீதிமன்றம் உத்தரவிட்டிருப்பது பற்றி அதிகாரிகள் கவலையேபடுவதில்லை என்பதுதான் வேதனை" என்றவர்,

"நம் மாநிலத்தில் இருந்த மரங்களை எல்லாம் இஷ்டத்துக்கு வெட்டி தள்ளி விட்டதால்தான் மழையளவு குறைந்துபோய், பக்கத்து மாநிலங்களிடம் தண்ணீருக்காக சண்டையிட்டு கொண்டு இருக்கிறோம். இப்படிப்பட்ட நெருக்கடியான சூழ்நிலையிலும்கூட விழித்துக் கொள்ளாவிட்டால் எதிர்காலம் இன்னும் மோசமாகிவிடும்" என்று எச்சரிக்கை விடுத்தார்.

வெட்டப்படும் மரங்களுக்குப் பதிலாக, புதிய மரங்கள் நடுவதைப் பற்றி தமிழக வனத்துறை அமைச்சர் செல்வராஜிடம் கேட்டபோது, "அந்தத் திட்டப்பணி ஆரம்பிச்ச பிறகு ஒகனேக்கல் பக்கமே நான் போகலை. பென்னாகரம் இடைத்தேர்தல் பணியில இருந்தப்போகூட கட்சிக்காரர்களெல்லாம் குளிக்கறதுக்காக ஒகனேக்கலுக்கு கூப்பிட்டாங்க. அதுக்கும் போகலை. இப்ப செம்மொழி மாநாட்டு வேலையில பிஸி. அதை முடிச்சுட்டு ஒகனேக்கல் ஏரியாவை பார்வையிட வர்றேன். அதுக்குப் பிறகு எது வேணும்னாலும் கேளுங்க பதில் சொல்றேன்" என்று சொல்லி பிரமிக்க (!) வைத்தார்.

வனவளம் காக்க வேண்டிய அமைச்சரிடமிருந்தே இப்படி பதில் கிடைத்தால், பிறகெப்படி பெய்யென பெய்யும் மழை?!

படங்கள் க. தனசேகரன்