'எப்பொழுது மின்சாரம் வரும், போகும்' என்று தெரியாத நிலையில், படாதபாடு பட்டு வருகிறார்கள் விவசாயிகள். தோட்டத்திலேயே குடியிருந்தாலும்கூட, இரவு நேரத்தில் கிணற்றடியில் உள்ள மோட்டார் அறைக்குச் சென்று வருவது சவாலான விஷயமாகத்தான் இருக்கும். இத்தகைய விவசாயிகளுக்காகவே அலைபேசி மூலமாகவே மோட்டாரை இயக்கும் மென்பொருளை உருவாக்கியிருக்கிறார் கோயம்புத்தூர் மாவட்டம், காரமடை பக்கத்திலுள்ள சீளியூர் கிராமத்தைச் சேர்ந்த பொறியியல் பட்டதாரி அருண்.

ஒரு குறுஞ்செய்தி அனுப்பினால் போதும், மோட்டாரை இயக்கவோ... நிறுத்தவோ முடியும். தோட்டத்தில் மின்சாரம் இருப்பது, தண்ணீர் நிரம்புவது, மழை பெய்வது, மழை நிற்பது போன்றத் தகவல்களையும் நாம் தெரிந்து கொள்ள முடிகிறது. இதன் மூலம் நாம் வெளியூரில் இருந்து கொண்டுகூட மோட்டாரை இயக்க முடியும். தவிர, இக்கருவியை யாராவது திருட முயற்சித்தாலும்கூட தகவலை உடனடியாக நமக்குத் தட்டிவிடும் தற்காப்பு நடவடிக்கையையும் இக்கருவி எடுப்பது ஆச்சரியமான விஷயம்தான்!

"இயங்குகிற நிலையில் உள்ள எந்த அலைபேசியில் வேண்டுமானாலும் குறைந்த செலவில் இந்த மென்பொருளைப் பொருத்தலாம். ஆயுட்கால சிம்கார்டு பொருத்தி ஆண்டுக் கணக்கில்கூட இதை இயக்கலாம். ஆர்.எஃப், அலைவரிசை மூலமாக இக்கருவி இயங்குகிறது. எந்த மொழியில் வேண்டுமானாலும், இக்கருவியில் இருந்து நாம் தகவல்களைப் பெற முடியும்" என்கிறார் அருண்.

சபாஷ்!

படம் வி. ராஜேஷ்

வறண்ட நிலத்தின் காட்டம் போக்கிய மாதுளை...

மகாராஷ்டிர மாநிலத்தின் மிக வறட்சியான பகுதிகளில் உள்ள விவசாயிகளில் பலரும் கூட தங்களது வங்கிக் கணக்கில் லட்சங்களில், கோடிகளில் பணம் வைத்திருக்கின்றனர்'

-இப்படியரு செய்தியைக் கேட்டதுமே பலருக்கு ஆச்சர்யம் பொங்கலாம்... சிலருக்கு... 'அந்த ஏரியாவுல ஏதாச்சும் ஃபேக்டரி வந்திருக்கும். அதனால நிலத்தோட விலை தாறுமாறா ஏறியிருக்கும். வித்துட்டு, பேங்க்ல போட்டிருப்பாங்க?' என்று தோன்றலாம். ஆனால், அத்தனையும் மாதுளை விவசாயத்தில் கிடைத்த முத்தான வருமானம்தான்!

சாங்கிலி மாவட்டத்திலிருக்கும் வறண்ட பகுதியான அட்பாடி தாலூகாவைச் சேர்ந்த பலரும், இருபது ஆண்டுகளுக்கு முன்பு, வாழ வழியில்லாமல் நகர்ப்புறங்களுக்கு இடம் பெயரத் தொடங்கினர். பிறகு, குறைந்த அளவிலான நீரைப் பயன்படுத்தி மாதுளை பயிர் செய்யும் வித்தையைக் கற்றுக்கொண்ட சிலர், அதை முயற்சி செய்து பார்க்க.. அவர்களுக்கு வெற்றி கிடைத்தது. இந்த விஷயம், சாங்கிலியைத் தாண்டி, நாசிக், சோலாப்பூர் உள்ளிட்ட மாவட்டங்களில் உள்ள வறண்ட பகுதிகளுக்கும் பரவவே... அங்குள்ள விவசாயிகளும் மாதுளையைப் பயிர் செய்ய ஆரம்பித்தனர். மாநிலத்தில், இப்போது ஏறத்தாழ ஒரு லட்சம் ஹெக்டேர் நிலப்பரப்பில் மாதுளை பயிர் செய்யப்படுகிறது என்றால், பார்த்துக் கொள்ளுங்கள்!

''பெரிதாக பராமரிப்பு எதையும் செய்யாமலேயே மாதுளை விவசாயத்தின் மூலம் குறைந்தபட்சம் ஏக்கருக்கு 2 லட்ச ரூபாய் வருமானம் ஈட்ட முடியும். பண்ணையில் முழுக்கவனம் செலுத்திப் பார்த்தால், ஏக்கருக்கு 15 லட்ச ரூபாய் வரைகூட வருமானம் கிடைக்கும். அதனால்தான் ஒவ்வொரு விவசாயியும் லட்சக்கணக்கில், கோடிக்கணக்கில் பணத்தை வங்கிகளில் சேமிக்க முடிகிறது. எங்களுக்குத் தெரிந்து... ஏழு, எட்டு ஏக்கர் வைத்திருக்கும் விவசாயிகள் பலரும் ஒரு கோடி ரூபாய் வரை டெபாசிட் செய்துள்ளனர்'' என்கிறார்கள் இப்பகுதியைச் சேர்ந்த விவசாயத் துறை அதிகாரிகள்.

"இந்தியாவின் மாதுளை விளைச்சலில் 80%, மகாராஷ்டிராவில் இருந்துதான் கிடைக்கிறது. 99-ம் வருடத்தில் 7 டன்னாக இருந்த ஏற்றுமதி, தற்போது 35,000 டன் என்ற அளவுக்கு மேல் எகிறிக் கொண்டிருக்கிறது" என்கிறது, இந்திய வேளாண் சந்தையைக் கவனித்துவரும் 'அபீடா' அமைப்பு அளிக்கும் புள்ளி விவரம்!

இதே மகாராஷ்டிராவில்தான், பருத்தி விவசாயிகள் கொத்துக் கொத்தாக தற்கொலை செய்துகொள்ளும் விதர்பா பகுதியும் இருக்கிறது என்பதுதான் வேதனை!

குவிண்டாலுக்கு 500 ரூபாய் ஊக்கத்தோகை !

பருப்பு வகைகள் உள்ளிட்ட அத்தியாவசிய உணவுப்பொருட்களின் விலை ஏறிக்கொண்டே இருப்பது மத்திய அரசுக்கு பெரும் தலைவலியாக மாறவே, பருப்பு உற்பத்தியைக் கூட்டுவதற்கான வேலைகள் முடுக்கி விடப்பட்டுள்ளனன. விவசாயிகளிடம் கிலோவுக்கு ஐந்து ரூபாய் ஊக்கத் தொகை வழங்கி கொள்முதல் செய்யப் போவதாக அறிவிக்கப்பட்டிருக்கிறது.

இதன்படி... துவரை, உளுந்து மற்றும் பச்சைப் பயறு ஆகியவற்றை பயிர் செய்யும் விவசாயிகளுக்கு, குவிண்டால் ஒன்றுக்கு ரூ.500 ஊக்கத்தொகை கிடைக்கும். இதற்காக சுமார் 2,000 கோடி ரூபாய் அளவுக்கு செலவிட வேண்டியிருக்கும் என்று கணக்கிடப்பட்டுள்ளது. இதன் மூலம் வரும் ஆண்டுகளில் பருப்பு உற்பத்தி கணிசமான அளவில் உயரும் என்றும் எதிர்பார்க்கப்படுகிறது.