ஆடு, மாடு வளர்க்கறவங்க அடிக்கடி சொல்ற பிரச்னை, Ôஉண்ணிப் பூச்சிங்க ஆட்டு, மாட்டுத் தோல்ல ஒட்டிக்கிட்டு ரத்தத்தை உறிஞ்சிடுதுÕங்கறதுதான். என்ன மாதிரி மருந்துகளை வாங்கி அடிச்சாலும், அந்த உண்ணிங்க கொஞ்சம்கூட அசைஞ்சிக் கொடுக்காது. ஆனா, நாலு நாட்டுக்கோழியை வாங்கி விட்டிங்கனா, அந்த உண்ணிகளை எல்லாம் ஒரு கை பார்த்துடும். ஆடு, மாடுகளும் ஆரோக்கியமா இருக்கும். நாட்டுக்கோழியில இருந்து வருமானமும் கிடைச்சுடும்.

பப்பாளிச் செடியில ஆணு, பொண்ணு அப்படினு ரெண்டு வகைங்க இருக்கு. சில நேரம், ஆண் மரம் அதிகமா வளர்ந்துடும். ஆண் மரத்துல சடை, சடையா பூ மட்டும்தான் தொங்கும்... காய் காய்க்காது. சின்னச் செடியா இருக்கும்போதே பூ தொங்கறதை வெச்சு ஆணா, பொண்ணானு கண்டுபிடிச்சிடலாம். ஆண் செடியா இருந்தா, அதோட நுனிப் பகுதியை மட்டும் கிள்ளிப்புடுங்க. அது பெண் செடியா மாறிடும். அப்புறம் பாருங்க... அந்த மரத்துல இருந்து பப்பாளி காய்ச்சித் தொங்கும்.

நாட்டுக்கோழி முட்டைய அடைகாக்க வைக்கறதுக்கு முன்ன, முறையா சேமிக்கணும். அதுக்கு இரும்புச் சட்டியில மணலைக் கொட்டி, அது மேல தண்ணி தெளிச்சி விடுங்க. இந்த மணல் மேல சணல் சாக்கை விரிச்சிப் போட்டு, அதுமேல முட்டையை வைங்க. முட்டை மேல எக்காரணம் கொண்டும் ஈரம் படாம பாத்துக்குங்க. மணல்ல மட்டும்தான் ஈரம் இருக்கணும். இப்படி முட்டைங்கள பாதுகாக்குறது... கிட்டத்தட்ட ஐஸ் பெட்டியில (ஃபிரிட்ஜ்) இருக்குறதுக்கு சமம்.

வீட்டுத் தோட்டத்துல இருக்கற ரோஜாச் செடிகள்ல பூச்சி, நோய் தாக்குதல் வந்தா... கண்ணை மூடிக்கிட்டு மருந்து வாங்கி தெளிச்சி பணத்தை வீணாக்காதீங்க. பத்து கிராம் பெருங்காயத்தை, ஒரு லிட்டர் தண்ணியில கலந்து தெளிச்சா பூச்சி, நோய் அண்டாது.

மா மரத்துல அதிக மகசூல் எடுக்க, தர்மபுரி விவசாயிங்க ஒரு தொழில்நுட்பத்தைப் பயன்படுத்துறாங்க. அதாவது, 15 லிட்டர் எருமை மாட்டு மோரை ஒரு பானையில விட்டு, 15 லிட்டர் தண்ணியோட சேர்த்துக் கலந்துக்கறாங்க. பானையோட வாயைத் துணியால வேடு கட்டி, மண்ணுல 21 நாளைக்குப் புதைச்சுடறாங்க. 22&ம் நாள் ஒரு லிட்டர் கரைசலுக்கு, பத்து லிட்டர் தண்ணிங்கற விகிதத்துல கலந்து மா மரத்துல தெளிக்கறாங்க. நல்ல மகசூலைப் பார்க்கறாங்க.