கீரைகளின் லாப அணிவகுப்பு ,,,!

காலங்கள் மாறினாலும், காட்சிகள் மாறுமா?' என்று சொல்லும் அளவுக்கு கண்கொள்ளாக் காட்சிகளாகவே சில இடங்களில் பெரியளவுக்கு விவசாயம் நடந்து கொண்டுதான் இருக்கிறது. அதுவும் சென்னை புறநகர்பகுதியில் நடக்கிறது என்றால் சும்மாவா...?! ஆச்சர்யமூட்டும் விஷயம்தான்!

சென்னை மற்றும் அதைச் சுற்றியுள்ள பகுதிகள் எல்லாம் பிஸினஸ் மற்றும் தொழிற்சாலைகள் என்றே தாரை வார்க்கப்பட்டுவிட்டன. மக்களும் அதற்கேற்றாற்போல, ஆளுக்கொரு வேலையைத் தேடிக் கொண்டு, அதிலேயே லயித்துப் போய் கிடக்கிறார்கள். அவர்களில் சிலராக இருக்கும் கரைமா நகர் மற்றும் ஆண்டங்குப்பம் கிராமத்தைச் சேர்ந்த சிலர், 'என்ன வந்தாலும் சரி, பாரம்பர்ய விவசாயத்தை மறந்து விடக்கூடாது' என்றபடி பகுதிநேரத் தொழிலாக அதையும் தொடர்ந்து கொண்டிருக்கிறார்கள்!

பல்லாவரம்-குன்றத்தூர் சாலையில்தான் இருக்கின்றன கரைமாநகர் மற்றும் ஆண்டாங்குப்பம் ஆகிய கிராமங்கள். இங்கே சொல்லக்கூடிய அளவுக்கு கீரை சாகுபடியில் கில்லாடியாக இருக்கிறார் ரவி. மனைவி காயத்ரியும் கைகோக்க, தெம்போடு விவசாயத்தைத் தொடர்ந்து வருகிறார் ரவி. சித்தப்பா, பெரியப்பா என்று இவருடைய குடும்பம் கூட்டுக் குடும்பமாகவே இப்போதும் வாழ்ந்து வருகிறது. எல்லோரும் வெவ்வேறு வேலைகளில் செட்டில் ஆகிவிட்டாலும், ஆளாளுக்கு 3 சென்ட், 5 சென்ட் என்று பிரித்துக் கொண்டு கீரை சாகுபடியில் அசத்திக் கொண்டுள்ளனர்.

கீரைக்கு நடுவே மண்டிக் கிடக்கும் களைகளை அகற்றியபடியே நம்மிடம் பேச ஆரம்பித்த ரவி, ''எங்க பகுதியில பெரியளவு விவசாயம் இல்லாட்டிகூட, இந்த கீரை வகைகளை சின்ன அளவுல செய்துகிட்டிருக்கோம். பெருசா வருமானம் இல்லைன்னாலும், சைடு பிஸினஸா எங்களுக்கு கைய கசக்காம வருமானத்தைக் கொடுக்குது.

30 வருஷமா விவசாயம் செய்றேன். அரைக் கீரை, சிறுகீரை, முளைக் கீரை, பசலைக் கீரை, தண்டுக் கீரை, அகத்திக் கீரை, பொன்னாங்கண்ணிகீரைனு எல்லா கீரைகளையும் பயிர் பண்றேன். அரைக்கீரை, சிறுகீரை, முளைகீரை பயிர் செய்றதுக்கு தைப்பட்டம் நல்ல பட்டமுங்க. இந்த மூணு கீரைக்கும் அதிக மழை தேவையில்லை. அதனாலதான் தை மாசத்துல ஆரம்பிக்கிறோம். தை மாசத்திலிருந்து ஆடி மாசம் வரைக்கும் குறைவில்லாத வருமானம்தான். செலவு எல்லாம் பெரிசா இல்லீங்க. ஒவ்வொரு கீரையும் அஞ்சு சென்ட் நிலத்துல பயிர் செய்றேன்'' என்றவர், ஒவ்வொரு கீரையின் சாகுபடி பற்றியும் பிரித்துப் பிரித்து பாடமெடுத்தார்.

அடடே, அரைக்கீரை!

அரைக்கீரை விதைப்பதற்கு முன் நிலத்தை புழுதி கிளம்ப உழவு செய்ய வேண்டும். மாடுகளைப் பயன்படுத்திதான் உழவு ஓட்ட வேண்டும். சிறிய நிலம் என்பதால் டிராக்டர் பயன்படுத்த முடியாது. உழவு செய்யப்பட்ட நிலத்தில் ஐந்து அடிக்கு ஒரு பாத்தி வீதம் கட்டவேண்டும். ஒவ்வொரு பாத்தி ஓரத்திலும் 2 அடி அகல வாய்க்கால் அமைத்தால், தண்ணீர் பாய்வதற்கு வசதியாக இருக்கும். அடியுரமாக தொழுவுரம்

ஒரு டன் கொட்டி நிரப்ப வேண்டும். அதன் மீது கொஞ்சம் தண்ணீர்விட்டு, விதைகளைத் தூவி, உயிர்த் தண்ணி விடவேண்டும். 5-ம் நாள் முளைத்துவிடும். 25-ம் நாள் முதல் அறுவடை செய்யலாம். முதல் அறுவடைக்கு பிறகு, 15 நாளைக்கு ஒருமுறை அறுத்துக் கொண்டே இருக்கலாம். ஒவ்வொரு 15 நாளைக்கும் ஒரு தடவை யூரியா கொடுக்க வேண்டும். 5 சென்ட் நிலத்துக்கு 7 கிலோ தேவைப்படும். கீரையை 15 நாட்களுக்குள் அறுவடை செய்துவிட வேண்டும். இல்லையென்றால், பூக்கள் வளர்ந்து, பயன்படுத்த முடியாமல் போய்விடும்.

இந்தக் கீரை இந்தத் தோட்டத்தில் இருக்கிறது என்று தெரிந்தாலே... வெளியூர் வியாபாரிகள் நேரடியாக வந்து அறுவடை செய்துகொண்டு பணத்தை எண்ணி வைத்துவிட்டுப் போவார்கள். முதல் தடவை 1,500 முதல் 2,000 ரூபாய் வரைக்கும் விலை கிடைக்கும். அறுக்கும் வேலை நமக்கில்லை. விலையை நிதானமாகப் பேசி முடித்துவிட்டால்... நம்முடைய பாக்கெட் நிறைந்துவிடும்.

முத்தான முளைக்கீரை!

உழவு செய்த நிலத்தில் ஒரு டன் தொழுவுரம் கொட்டி நிரப்பி, தண்ணீர் விட்டு விதையைப் போடவேண்டும். 5-ம் நாள் முளை வந்துவிடும். 10-ம் நாள், 15 கிலோ யூரியா கொடுத்தால், செடி பச்சைக் கட்டி அடர்த்தியாக இருக்கும். 25-ம் நாளில் அறுவடை. ஒரு போகத்துக்கு 2,000 ரூபாய் வரை விலை போகும். வியாபாரிகளே வந்து அறுவடை செய்துகொண்டு போவார்கள்.

சிவப்பு மற்றும் பச்சை பொன்னங்கண்ணி!

5 சென்ட் நிலத்தை உழவு செய்து, பத்து அடிக்கு ஒரு பாத்தி கட்டவேண்டும். தொழுவுரத்தை அடியுரமாக ஒரு டன் கொட்டவேண்டும். இந்தக் கீரைக்கு விதையெல்லாம் கிடையாது. அதனால் வெளியூரிலிருந்து நாற்றுகளாக வாங்கி வந்து நடவு செய்யலாம். 5 சென்ட் நிலத்துக்கு 200 கட்டு தேவைப்படும். நடவு செய்த ஒரு மாதம் கழித்து யூரியா 15 கிலோ போட்டால், நாற்று பச்சைக் கட்டும். செடியும் நன்கு வளரும். 10 நாட்களுக்குப் பிறகு, 15 நாளைக்கு ஒரு தடவை, 15 கிலோ யூரியா கொடுக்க வேண்டும். இப்படிச் செய்தால், எட்டு மாதம் வரைக்கும் பணம் பாக்கலாம். அதிகம் மழை இருந்தாலும், ஒன்றும் ஆகாது. முதல் தடவை அறுவடை செய்யும்போது 500 கட்டு கிடைக்கும். வெளியூர் வியாபாரிகள் கட்டு ரூ.2 என்ற விலைக்கு வாங்கிக் கொள்வார்கள்.

பூச்சித் தாக்குதல் அதிகம் இருக்காது. அப்படி இருந்தால்... கடையில் எண்ணெய் மருந்து 100 மில்லி வாங்கி, 20 லிட்டர் தண்ணீரில் கலந்து, வேப்பந்தழையை ஒடித்து, அதில் மருந்தை நனைத்து செடிக்கு மேலே தெளித்துவிட்டால், பூச்சிகள் வராது. இப்படி 5 சென்ட்டுக்கு 200 மில்லி மருந்தை 40 லிட்டர் தண்ணீரில் கலந்து தெளிக்கவேண்டும். பூச்சி இருந்தால் மட்டும்தான் மருந்து அடிக்க வேண்டும். கீரைக்கு அதிகம் மருந்து அடிக்கக் கூடாது. ஏனென்றால், இது உடனடியாக சமைக்கப்படும் பொருள். ரசாயன மருந்துகளைப் பயன்படுத்தினால், அதைச் சாப்பிடுகிறவர்களுக்கு பாதிப்பு ஏற்படக்கூடும்'' என்று எச்சரிக்கையோடு பாடத்தை முடித்தார் ரவி.

பளபளக்குது பசலைக் கீரை!

அடுத்து, 'பசலைக் கீரையைப் பற்றி நான் பேசுகிறேன்' என்று முன்வந்தார் பொன்னி. ''இந்தக் கீரை சாகுபடிக்கு ஆனி பட்டம்தான் சிறந்தது. ஆனி, ஆடி, ஆவணி மாதம் வரைக்கும் பயிர் செய்யலாம். அதன் பிறகு மழைக் காலம் ஆரம்பமாகிவிடும். இது, பசலைக் கீரைக்கு ஆகாது. நடுநிலையான சீதோஷண நிலையே போதும்.

3 சென்ட் நிலத்தில் 10 அடிக்கு ஒரு பாத்தி என மூன்று பாத்திகள் கட்டவேண்டும். மேட்டுப் பாத்தியாக இருக்கவேண்டும். அதிகம் தண்ணீர் தேவையில்லை. மேடாக இருந்தால், தண்ணீர் தேங்காது. பாத்தி கட்டிய நிலத்தில் அரை டன் தொழுவுரம் கொட்டி நிரப்பவேண்டும். பிறகு, 3 விதைகளை இரட்டை விரலால் எடுத்துக் கொண்டு, வரிசையா ஊன்றவேண்டும். உடனே, உயிர்த் தண்ணீர் தரவேண்டும். விதைத்த 5-ம் நாள் முளைத்து விடும். 25-ம் நாள் செடி பெருத்து வளரும். இந்தக் கீரையை அரிவாள் கொண்டு அறுக்க கூடாது. கையாலேயே கணுப் பகுதியாகப் பார்த்து ஒடிக்கலாம். அப்போதுதான் மிச்சமுள்ள கணுப்பகுதி நன்றாக வளரும்.

இப்படி வளரும் கீரையை 15 நாளுக்கு ஒரு முறை ஒடித்துக் கொள்ளலாம். 15 நாளுக்கு ஒரு முறை யூரியா 5 கிலோ கொடுக்கவேண்டும். யூரியா கொடுத்துவிட்டு, உடனே தண்ணீர் பாய்ச்சவேண்டும். அப்படி இல்லையென்றால்... செடி காய்ந்துவிடும். 3 சென்ட் நிலத்தில் ஒவ்வொரு முறையும் 200 கட்டு கீரை கிடைக்கும். கட்டுக்கு, 2 ரூபாய் விலை கிடைக்கும். வியாபாரிகளை நேரடியாக அறுவடை செய்யச் சொன்னால், சரியாக ஒடிக்காமல் விட்டுவிடுவார்கள். சிரமம் பார்க்காமல் நாமே ஒடித்தால்... நமக்கு லாபம்'' என்று உற்சாகமாகச் சொன்னார்.

தண்டுக் கீரை

சுமார் 40 வருடங்களாக கீரை வகைகளைப் பயிரிடுவதை மட்டுமே தொடர்ந்து செய்து வரும் ராணியம்மா... பிறந்தது வளர்ந்ததெல்லாம் சென்னை, அயனாவரத்தில். ஆனால், வாக்கப்பட்டது கிராமத்தில் என்பதால்... விவசாயத்திலும் அசத்துகிறார்.

''3 சென்ட் நிலத்தில் 10 அடிக்கு 1 பாத்தி என மூன்று பாத்திகள் கட்டி, அவற்றுக்கு இடையில 2 அடிக்கு 1 வாய்க்கால் எடுக்கவேண்டும். அரை டன் தொழுவுரத்தைக் கொட்டி நிரப்பிவிட்டு, 100 கிராம் தண்டுக்கீரை விதைகளை ஒரு பாத்தியில மட்டும் விதைத்து தண்ணீர் விட்டால், போதும்... மூன்றாவது நாளே முளைக்க ஆரம்பித்துவிடும். நெல் நாற்றங்கால் பிடுங்குவது போல வேரோடு பறித்து, தண்ணீரில் அலசிவிட்டு, ஒவ்வொரு கீரையாக மூன்று பாத்திகளிலும் நடவு செய்யவேண்டும். மூன்று பாத்திகளிலும் 2,000 முதல் 3,000 வரை நடலாம். மூன்று மாதம் கழித்து தண்டு நன்கு வளர்ந்த பிறகு, வேரோடு பறித்து விற்பனைக்கு அனுப்பலாம். ஒரு தண்டு, மூன்று ரூபாய் என்று விலை வைத்து வியாபாரிகள் நிலத்துக்கே வந்து வாங்கிச் செல்வார்கள்.

தண்டுக் கீரையில் இலைக் குருத்துப்புழு தாக்குதல் அதிகமாக இருக்கும். இதைக் கட்டுப்படுத்த, வீட்டுச் சாம்பலை காலை நேரத்தில் மேலாக தூவினால், குருத்துப் புழு குறையும். இப்போது எல்லாருடைய வீட்டிலும் கேஸ் அடுப்பு என்பதால், சாம்பல் கிடைக்காது. அத்தகையச் சூழலில், பூச்சிமருந்து கடைகளில் இருந்து வாங்கிகிட்டு, வந்து வெள்ளை காடா வேட்டித் துணியில கொட்டி, நல்லா இறுக்கக் கட்டி; அதை அப்படியே கீரை மேல துணியை ஆட்டுனா. துணி ஓட்ட வழியா மருந்து செடி மேல பரவும். இதுதான் சிம்பிளான வழி'' என்று நம்மிடம் விளக்கியவர்,

''கீரை சாகுபடியில பிள்ளைங்களும் எனக்கு ஒத்தாசையா இருக்காங்க. அதனால என்னால தொடர்ந்து இதைச் செய்யமுடியுது'' என்று சொல்லி கீரைக்கு தண்ணீர் பாய்ச்ச சென்றார்.

இப்போதைக்கு கீரைகளின் விலை உயர்ந்துவிட்டாலும், கீரையைப் பாரம்பர்யமாக செய்து வரும் இப்பகுதி மக்களுக்கு ஒரு 'ஓ' தாங்க போடணும்