Published:Updated:

இன்னும் எத்தனை சாட்சிகள் தேவை?!

இன்னும் எத்தனை சாட்சிகள் தேவை?!

பிரீமியம் ஸ்டோரி
##~##
அனைவருக்கும் பசுமை வணக்கம்!

ஆற்று மணல்... ஆற்றங்கரையோரத்துக்கு மட்டுமல்ல, அங்கிருந்து பல கிலோ மீட்டர் தூரத்திலிருக்கும் ஊர்களுக்காகவும் நீரைச் சேமித்து வைத்திருக்கும் அட்சயப்பாத்திரம். ஆனால், இந்த அருமையை உணராமல், ஆற்று மணல் மூலம் கிடைக்கும் பணத்துக்காக... ஆறுகளைச் சுரண்டும் கூட்டம் பெருகிக் கொண்டே இருக்கிறது!

ஆளுங்கட்சி, எதிர்க்கட்சி என்று கூட்டுப் போட்டுக் கொண்டு, இந்த பஞ்சமாபாதகத்தைத் தொடரும் கொடூரக் கூட்டம், எதிர்ப்பவர்களைக் கொன்று குவிக்கின்றது. அரசு அதிகாரிகள், பொதுமக்கள் என்று, இவர்களிடம் உயிரைப் பறிகொடுப்பது தமிழகத்தில் தொடர்கதையாகி விட்டது.

இதோ... புதுக்கோட்டை மாவட்டம், மாத்தூர் பகுதியைச் சேர்ந்த 30 வயது கார்த்திக், 26 வயது ராஜேஷ் ஆகிய உடன்பிறப்புக்கள்... அப்பகுதியிலிருக்கும் கோரையாற்றில் மணல் அள்ளுபவர்களைப் பற்றி புகார் தெரிவித்ததற்காக... சில தினங்களுக்கு முன் கொடூரமாக கொல்லப்பட்டுள்ளனர். கொலைச் சதியின் பின்னணியில் அதே பகுதியைச் சேர்ந்த ஆளும் அ.தி.மு.க. புள்ளி கைநீட்டப்படுகிறார்.

இப்படித்தான் ஓராண்டுக்கு முன்பு, திருநெல்வேலி மாவட்டம், நம்பியாற்றில் மணல் கொள்ளையைத் தடுக்கச் சென்றதற்காக லாரி ஏற்றிக் கொல்லப்பட்டான் ஓர் இளைஞன். அதைச் செய்தவர்களும் அ.தி.மு.க-வில் பொறுப்பில் இருந்தவர்கள்தான்.

'மணல் கொள்ளையை இரும்புக் கரம் கொண்டு அடக்குவேன்' என்று முழங்கிக் கொண்டிருக்கிறார் முதல்வர் ஜெயலலிதா. ஆனால், அவருடைய கட்சிக்காரர்களோ... 'மணல் கொள்ளையை எதிர்ப்பவர்களைக் கொன்று குவிப்போம்' என்று கொக்கரித்தபடி வலம் வருகிறார்கள்.

'இந்தியா முழுக்கவே சுற்றுச்சூழல் அமைச்சகத்தின் அனுமதியில்லாமல், ஆறுகளில் மணல் அள்ளக்கூடாது' என்று சில மாதங்களுக்கு முன்புதான் அதிரடி உத்தரவைப் பிறப்பித்திருக்கிறது தேசிய பசுமைத் தீர்ப்பாயம். ஆனாலும், தமிழகத்தில் மணல் கொள்ளை துளிகூட தடுத்து நிறுத்தப்படவில்லை என்பதற்கு சாட்சியாகவே... இந்த இரு உயிர்கள் பறிபோயிருக்கின்றன.

இன்னும் எத்தனை சாட்சிகள் தேவைப்படுமோ நீதியை நிலைநாட்ட?!

- ஆசிரியர்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு