Published:Updated:

நான்காவது பைப்லைன் திட்டமா.. விவசாயத்தை நசுக்கும் திட்டமா...?

துயரத்தில் தூத்துக்குடி விவசாயிகள்...இ. கார்த்திகேயன் படங்கள்: ஏ. சிதம்பரம்

நான்காவது பைப்லைன் திட்டமா.. விவசாயத்தை நசுக்கும் திட்டமா...?

துயரத்தில் தூத்துக்குடி விவசாயிகள்...இ. கார்த்திகேயன் படங்கள்: ஏ. சிதம்பரம்

Published:Updated:

பிரச்னை

##~##

''ஊருக்கு இளைச்சவன் பிள்ளையார் கோயில் ஆண்டினு சொல்ற மாதிரி... இப்போ நாங்கதான் ஆண்டி நிலைமையில இருக்கோம். இந்த நாட்டில் விவசாயியாக பிறந்தது அவ்வளவு தப்பா என்ன?'' என்று கொந்தளிக்கிறார்கள், தூத்துக்குடி மாவட்ட விவசாயிகள்.

ஒட்டுமொத்த விகடனுக்கும் ஒரே ஷார்ட்கட்!

டிசம்பர் 6-ம் தேதி, 252 கோடியே 44 லட்சம் ரூபாய் செலவில்... மருதூர் அணையில் இருந்து நான்காவது பைப்லைன் மூலம் தூத்துக்குடி மாநகராட்சிக்கு தினசரி

9 கோடியே 70 லட்சம் லிட்டர் தண்ணீர் எடுக்கும் திட்டத்தை வீடியோ கான்ஃபரன்சிங் மூலம் துவக்கி வைத்துள்ளார், முதல்வர் ஜெயலலிதா. இதுதான் பிரச்னையே!

'இத்திட்டத்தை அரசு கைவிட வேண்டும்’ என்று பல மாதங்களாக விவசாயிகள் போராடி வரும் சூழ்நிலையில்... விவசாயிகளை அலட்சியப்படுத்தி, முதல்வர் திட்டத்தைத் துவக்கி வைத்திருப்பதில், கடும் அதிருப்தியில் இருக்கிறார்கள், விவசாயிகள். இதனால், தாமிரபரணி நதி நீர்ப் பேரவை விவசாயிகள், விவசாயிகள் குறை தீர்க்கும் நாளைப் புறக்கணித்தோடு, அரசின் திட்டத்தை எதிர்த்து, மாவட்ட ஆட்சியர் அலுவலக வளாகத்தில் உண்ணாவிரதப் போராட்டத்தையும் நடத்தியுள்ளனர்.

நான்காவது பைப்லைன் திட்டமா.. விவசாயத்தை நசுக்கும் திட்டமா...?

கார் சாகுபடியை காவு வாங்கிய திட்டம்!

இதுபற்றிப் பேசிய விவசாயிகள், ''நெல்லையில் 40 ஆயிரம் ஏக்கர், தூத்துக்குடியில் 46 ஆயிரத்து 107 ஏக்கர் பரப்பில் கார், பிசானம், அட்வான்ஸ் கார் எனப்படும் முன்கார் சாகுபடி முறைகள் இருந்தன. மூன்று சாகுபடி முறை இருந்து என்ன பயன்? தண்ணீர் இருந்தால்தானே பயிர் வளரும்? திருவைகுண்டம் அணையில் இருந்து

நான்காவது பைப்லைன் திட்டமா.. விவசாயத்தை நசுக்கும் திட்டமா...?

20 எம்.ஜி.டி திட்டத்தின் மூலம் தொழிற்சாலைகளுக்கு நாள் ஒன்றுக்கு 9 கோடி லிட்டர் தண்ணீர் எடுக்கிறார்கள். இதனால், அணையின் கொள்ளளவு எட்டு அடியில் இருந்து ஓர் அடியாக குறைந்து விட்டது. இத்திட்டம் அமலுக்கு வந்த 75-ம் ஆண்டுக்குப் பிறகு, தூத்துக்குடி மாவட்டத்தில் கார் சாகுபடிக்கு அரசு அனுமதி மறுத்துவிட்டது. இத்திட்டத்தின் மூலம் பொதுப்பணித் துறையிடமிருந்து ஆயிரம் லிட்டர் தண்ணீரை 50 பைசாவுக்கு வாங்கி, தொழிற்சாலைகளுக்கு 15 ரூபாய்க்கு விற்று வரும் தமிழ்நாடு குடிநீர் வடிகால் வாரியம், பொதுப்பணித்துறைக்கு 100 கோடி ரூபாய் பாக்கி வைத்துள்ளது.

சினிமாவுக்கு சீராட்டு.. விவசாயத்துக்கு வேட்டு!

சினிமா நூற்றாண்டு விழாவுக்கு அரசு சார்பில் 10 கோடி நிதி அளிக்கும் முதல்வர், இங்குள்ள 53 குளங்களையும், ஸ்ரீவைகுண்டம் அணையையும் தூர்வார சொற்ப நிதியாவது அளித்திருக்கலாம். ஸ்ரீவைகுண்டம் அணையைத் தூர்வார ஸ்டெர்லைட் நிறுவனம் 10 லட்ச ரூபாய் அளித்துள்ளது. இதைவிட அரசாங்கத்துக்கு வேறு கேவலம் உண்டா? கையில் இருந்து காலணாகூட அரசு செலவழிக்க வேண்டாம். குடிநீர் வடிகால் வாரியம் பாக்கி வைத்துள்ள 100 கோடி ரூபாயைக் கொடுத்தாலே, 53 குளங்களையும், ஸ்ரீவைகுண்டம் அணையையும் தூர்வாரி விவசாயிகளின் துயர் துடைக்கலாம். இதைப் பல முறை கூறியும் அரசு காதிலே வாங்கிக் கொள்ளவில்லை. இந்த லட்சணத்தில் விவசாயத்துக்கு உலை வைக்கும் இன்னொரு திட்டத்தையும் தொடங்கி விட்டனர்'' என்று கொதித்தனர்.

தாமிரபரணி நதிநீர்ப் பேரவையின் அமைப்பாளரான 93 வயதான மூத்த விவசாயி நயினார் குலசேகரன், ''தூத்துக்குடி மாவட்டத்திலுள்ள 46 ஆயிரத்து 107 ஏக்கரில் தண்ணீர் இல்லாமல் 20 ஆயிரம் ஏக்கர் தரிசாகி விட்டது. 'மருதூர் அணையில் இருந்து நாலாவது பைப்லைன் திட்டம் மூலம் தூத்துக்குடி மாநகராட்சிக்கு தண்ணீர் கொண்டு செல்லும் திட்டம் தவறானது’ என மதுரை மண்டல பொதுப்பணித்துறை தலைமைச் செயற்பொறியாளர் சம்பத், அரசுக்கு அறிக்கை அனுப்பியும், திட்டத்தை நிறைவேற்றியிருக்கிறது இந்த அரசு. மருதூர் அணையில் இருந்து தூத்துக்குடிக்கு தண்ணீர் கொண்டு செல்லும் இத்திட்டத்தைத் தடை செய்யாவிட்டால், எஞ்சியுள்ள நிலங்களில் விவசாயம் அடியோடு அழிவதோடு, 1,053 கிராமங்களுக்கான குடிநீர் விநியோகமும் தடைபடும்.

நான்காவது பைப்லைன் திட்டமா.. விவசாயத்தை நசுக்கும் திட்டமா...?

அதற்காக தூத்துக்குடிக்கு தண்ணீர் கொடுக்க வேண்டாம் என்று நாங்கள் சொல்லவில்லை, ஸ்ரீவைகுண்டம் அணையில் இருந்து வீணாக கடலில் கலக்கும் 10 டி.எம்.சி தண்ணீரை முக்காணி-சேர்ந்தமங்கலம் ஆற்றில் லோயர் டேம் அமைத்து, அதிலிருந்து தூத்துக்குடிக்கு தண்ணீர் எடுக்கலாமே... மருதூர் அணையில் இருந்து கோரம்பள்ளம் பகுதி வழியாக தண்ணீர் எடுக்கலாம். இப்படி பல வழிகள் இருக்க, ஏன் விவசாயிகளின் வயிற்றில் அடிக்க வேண்டும்?'' என்று கேள்வியை எழுப்பியவர்,

''இது விவசாயிகளின் போராட்டம் மட்டுமல்ல. அனைவருக்குமான போராட்டம். தண்ணீர் இல்லை என்பதற்காக ஊரை விட்டு வேறு தொழிலைத் தேடி ஓடிப் போவதற்கு விவசாயிகள் ஒன்றும் கோழைகள் அல்ல. தண்ணீருக்காகப் போராடுவோம். விவசாயத்துக்கு உலை வைக்கும் நாலாவது பைப்லைன் திட்டத்தை அரசு கைவிடும் வரை உண்ணாவிரதம் இருக்கத் தயாராக இருக்கிறேன்'' என மார்பில் ஓங்கி அறைந்தபடி ஆவேசத்துடன் கண்ணீர் விட்டார்!

தடை செய்யக் கோரி வழக்கு!

விவசாயிகள், தொழிற்சாலைகள், பொதுமக்கள் என யாருக்கும் பாதிப்பில்லாமல் இந்தத் திட்டத்தைச் செயல்படுத்த மாற்று வழிகளை அமல்படுத்தக் கோரியும், தற்போது தொடங்கியுள்ள நான்காவது பைப்லைன் திட்டத்தைத் தடை செய்யக் கோரியும் ஆயக்கட்டுதாரர் உரிமைப் பாதுகாப்பு வழக்காகவும், பொதுநல வழக்காகவும் மதுரை உயர்நீதிமன்றத்தில் விவசாயிகள், விவசாய சங்கங்கள் சார்பில் வழக்கு தொடுக்கப்பட்டுள்ளது.

''அரசு கவனத்துக்குக் கொண்டு செல்கிறேன்..!''

நான்காவது பைப்லைன் திட்டமா.. விவசாயத்தை நசுக்கும் திட்டமா...?

இந்தப் பிரச்னை பற்றி தூத்துக்குடி மாவட்ட ஆட்சியர் ரவிக்குமாரிடம் பேசினோம், ''அரசுத் தரப்பில் 4-வது பைப்லைன் திட்டம் செயல்படுத்தப்படுவதற்கு முன்பே அதன் நிறை மற்றும் குறைகள் ஆராயப்பட்டன. மக்களின் குடிநீர்த் தட்டுப்பாட்டு பிரச்னையைத்  தீர்ப்பதற்காகவே இத்திட்டம் முதல்வரால் தொடங்கி வைக்கப்பட்டது. ஆரம்பம் முதலே விவசாயிகள் இத்திட்டத்துக்கு எதிர்ப்பு தெரிவித்து வருகின்றனர். விவசாயிகளுக்கும், மக்களுக்கும் பாதிப்பு இல்லாமல், வேறு வழிகள் இருக்கும்பட்சத்தில், அதை மனுவாகக் கொடுத்தால், அரசாங்கத்தின் கவனத்துக்குக் கொண்டு செல்கிறேன்'' என்று சொன்னார்.

இது குடிநீர்த் திட்டமல்ல... குடிகெடுக்கும் திட்டம்!

'குடிநீர்த் திட்டம் என்ற பெயரில் செயல்படுத்த உள்ள இத்திட்டத்தின் உண்மையான நோக்கம் பொதுமக்களுக்கு குடிநீர் கொடுப்பதல்ல... பொதுமக்கள் பெயரில் தனியார் நிறுவனங்களுக்கும், தொழிற்சாலைகளுக்கும் தண்ணீர் கொடுக்கத்தான் இப்படி ஒரு திட்டத்தை, எதிர்ப்புகளை மீறி செயல்படுத்துகிறார்கள்’ என்று சொல்லும் விவசாயச் சங்கப் பிரதிநிதிகள், அதற்கான ஆதாரங்களையும் சொன்னார்கள்.

''தற்போது, 38 ஆயிரத்து 325 வீட்டு குடிநீர் இணைப்பு, 1,607 வீடு அல்லாத குடிநீர் இணைப்பு, 5 சிறிய சாப்பாட்டுக் கடை மற்றும் தொழிற்சாலை என மருதூர் அணையில் இருந்து குடிநீர் இணைப்புகள் வழங்கப்பட்டுள்ளன. ஆனால், 'இந்த நாலாவது பைப்லைன் திட்டம் அமலுக்கு வந்தவுடன், 38 ஆயிரத்து 325 வீட்டு குடிநீர் இணைப்புகளுடன், கூடுதலாக 1,675 வீட்டு குடிநீர் இணைப்புகளை அதிகரித்து, 40 ஆயிரம் என்று உயர்த்தப் போகிறார்கள். அதேசமயம், 1,607 வீடு அல்லாத குடிநீர் இணைப்புகளுடன், புதிதாக 21 ஆயிரத்து 353 இணைப்புகளைச் சேர்த்து 22 ஆயிரத்து 960 ஆகவும், 5 தொழிற்சாலை இணைப்புகளுடன் புதிதாக 1,195 இணைப்புகள் அதிகரித்து 1,200 இணைப்புகளாகவும் வழங்கப்படும்’ என அறிவித்திருக்கிறார்கள். இதன்படி பார்த்தால், வெறும் 1,675 வீட்டு இணைப்புகளை மட்டுமே புதிதாகக் கொடுத்துவிட்டு, 22 ஆயிரத்து 548 வீடு அல்லாத மற்றும் தொழிற்சாலை இணைப்புகளைக் கொடுக்க இருக்கிறார்கள் என்பதை இதிலிருந்தே தெளிவாகத் தெரிந்து கொள்ளலாம்'' என்கிறார்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism