Published:Updated:

மன்னார்குடிக்கு ரயில் வந்த மர்மம்?!

மீத்தேன் வரும் பின்னே... ரயில் வரும் முன்னே..! கு. ராமகிருஷ்ணன் ஓவியம்: செந்தில்

மன்னார்குடிக்கு ரயில் வந்த மர்மம்?!

மீத்தேன் வரும் பின்னே... ரயில் வரும் முன்னே..! கு. ராமகிருஷ்ணன் ஓவியம்: செந்தில்

Published:Updated:

போராட்டம்

 இது ஓர் அதிசயக் காடு...
எதையும் எதுவும் கொல்லக் கூடாதென்பது கட்டுப்பாடு...
இங்கேயும் ஒரு தேர்தல்...
மான், முயல், மயில் கூட்டமெல்லாம் வாக்காளர்கள்...
சிங்கம், புலி, கரடி, நரி, குரங்கு எல்லாம் வேட்பாளர்கள்...
வாக்குறுதிகள் வாரி வழங்கப்பட்டன.
'நான் வெற்றிபெற்றால், குளிர்காலங்களில் உங்களுக்கு போர்வை போல் கதகதப்பாக இருப்பேன்’ என்றது கரடி.  
'கோழைகளான உங்களுக்கு சகலவிதமான சண்டைகளும் கற்றுக் கொடுப்பேன்’ என்றது சிங்கம்.
'இதுவரை நீங்கள் சுவைத்திடாத, எட்டாத உயரத்தில் உள்ள பழங்களை எல்லாம் பறித்துக் கொடுப்பேன்’ என்றது குரங்கு.
இப்படியாக, இன்னும் பல...
இதற்கெல்லாம் மான், மயில், முயல் கூட்டங்கள் மயங்கவில்லை.
ஆனால், நரியின் வாக்குறுதிகள் வசியப்படுத்தின...
'காட்டின் எல்லை வரை எளிதாகச் சென்று வர, அடையாளப் பாதை அமைத்துத் தருவேன். நம் எல்லைக்குள் இருந்தே வெளியுலகத்தை ரசிக்கலாம்’ என்றது நரி.
நரிக்குக் கிடைத்தது, மகத்தான வெற்றி.
அமைக்கப்பட்டது, அடையாளப் பாதை.
வரத் தொடங்கினார்கள், வேடர்கள்.
சுட்டுக் கொல்லப்பட்டன, அப்பாவி ஜீவன்கள்.
இதில், நரிக்குக் கொடுக்கப்பட்டது, பாதி பங்கு..!

மன்னார்குடிக்கு ரயில் வந்த மர்மம்?!

ஒட்டுமொத்த விகடனுக்கும் ஒரே ஷார்ட்கட்!

இந்த வரிகளில் சொல்லப்பட்டிருப்பது போல், ஏதோ ஓர் உள்நோக்கத்தோடுதான் திருவாரூர் மாவட்டம், மன்னார்குடியில் இருந்து அவசர அவசரமாக அகல ரயில்பாதை அமைக்கப்பட்டு... புத்தம் புதிதாக ஏராளமான ரயில்கள் இயக்கப்படுகின்றனவோ? என்று அதிர்ச்சி கலந்த குழப்பத்தில் உறைந்திருக்கிறார்கள், டெல்டா பகுதி மக்கள்.

''முப்பது-நாற்பது வருசமா மன்னார்குடியில ரயில் வசதியே இல்லாம இருந்துச்சு. ஆனா, இப்ப ஒரு சில வருஷத்துக்குள்ள வேக வேகமா அகல ரயில் பாதை அமைச்சு, மன்னார்குடி-சென்னை, மன்னார்குடி- திருப்பதி, மன்னார்குடி-ஜோத்பூர், மன்னார்குடி-மானாமதுரை, மன்னார்குடி-கோயம்புத்தூர், மன்னார்குடி- மயிலாடுதுறைனு ரயில்களை விட்டுக்கிட்டே இருக்காங்க.

'இந்தியாவுல இருக்கற எல்லா மாநிலங்களுக்கும் ரயில் விடப்போறோம்’னு வேற ரயில்வே அதிகாரிகள் சொல்லிட்டிருக் காங்க. இந்த ரயில் வந்ததால... எங்களுக்கு வசதிங்கிறது உண்மைதான். ஆனா, 'ஒரு மூலையில இருக்கற மன்னார்குடி மேல எதுக்காக இத்தனை அக்கறை’னு பரவலா ஒரு கேள்வி இருந்துச்சு. கொஞ்சம் யோசிச்சுப் பாத்தா, குறிப்பா, மீத்தேன் திட்டம் வேகம் எடுத்ததுக்கப்பறம்தான் ரயில் விட்டிருக்காங்க. முதல்கட்டமா, மன்னார்குடியை சுத்தியுள்ள கிராமங்கள்லதான் மீத்தேன் எடுக்கப் போறாங்க. அதனால, அதிகாரிகள், தொழி லாளர்கள், பன்னாட்டு நிறுவனங்களோட முதலாளிகள்னு எல்லாரும் அடிக்கடி இங்க வரவேண்டியிருக்குமாம். அதுக்காகத்தான் இப்போ பயணிகள் ரயில் விட்டுருக்காங்க. அடுத்து சரக்கு ரயில்களையும் விடுவாங்க.

மீத்தேன் எடுக்குற பணிகளுக்குத் தேவையான இயந்திரங்கள், ரசாயனங்கள் கொண்டு வர்றதுக்கும்... மீத்தேன் எடுக்கும் போது, கிடைக்கக்கூடிய நிலக்கரி மாதிரியான இன்னும் பல பொருட்களைக் கொண்டு போறதுக்கும் சரக்கு ரயில்களைப் பயன்படுத்துவாங்க. ஆகக்கூடி, இந்த ரயிலெல்லாம்... எங்களுக்காக இல்லைங்கிறது இப்பத்தான் தெரியுது'' என்று என்னிடம் தன் கவலையைப் பதிவு செய்தார், வருவாய்த்துறையில் பணியாற்றும் மன்னார்குடிக்காரர் ஒருவர்.

மன்னார்குடிக்கு ரயில் வந்த மர்மம்?!

''முன்னாள் மத்திய அமைச்சர் டி.ஆர்.பாலுதான் மீத்தேன் திட்டத்தைக் கொண்டு வந்தாரு. அவரோட அதிகாரப்பூர்வமான இணையதளத்துலயே இந்தத் தகவல் வெளியானது. மன்னார்குடியில அகல ரயில்பாதை அமைச்சி, ஏராளமான ரயில்களைக் கொண்டு வந்தவரும் இதே டி.ஆர். பாலுதான். அதனாலதான், இதுல ஏதோ சூட்சமம் இருக்குனு சந்தேகப்படுறோம்''

-இது, மீத்தேன் திட்ட எதிர்ப்புக் கூட்டமைப்பின் திருவாரூர் மாவட்ட ஒருங்கிணைப்பாளர் வரதராஜன்.

ஒரு பக்கம் மன்னார்குடியிலிருந்து ரயில்கள் வேகமெடுத்துக் கொண்டே இருக்க... மறுபக்கம், 'மீத்தேன் எடுக்கும் திட்டம் நடைமுறைக்கு வந்தால், அடுக்கடுக்கான ஆபத்துகளைச் சந்திக்க வேண்டியிருக்கும் என்கிற அச்சம்' டெல்டா மாவட்ட மக்களிடம் வேகமெடுக்கத் தொடங்கியிருக்கிறது.

திருவாரூர் அருகே உள்ள வெள்ளக்குடி மற்றும் இதனைச் சுற்றியுள்ள கிராமங்களில் கேஸ் எடுப்பதால், அங்குள்ள மக்கள் சந்திக்கும் அவலங்கள், இப்போதுதான் வெளிச்சத்துக்கு வந்து கொண்டிருக்கின்றன. உச்சிமேடு கிராமத்தில் பெட்ரோல்-கேஸ் குழாய் வெடித்ததால் ஆனந்தராஜ் என்ற சிறுவன் உயிர் இழந்ததையும், சேதுபதி என்ற மாணவன் நடைபிணமாய் மாறியதையும் கனத்த இதயத்தோடு கடந்த இதழில் பகிர்ந்து கொண்டேன். இதேபோன்றதொரு துயரம்... தண்டலை கிராமத்திலும் அரங்கேறியிருக்கிறது.

''இங்க, ரோட்டு மேலேயே பெட்ரோல்-கேஸ் குழாய் போனதால, அதுல லாரி மோதி, கச்சா எண்ணெயோடு கேஸ¨ம் சேர்ந்து வெளியாகி, வெடிச்சிடுச்சி. லாரி முழுக்க நெருப்பு புடிச்சி, ஒரு உயிர் பறிபோயிடுச்சு'' என வேதனையோடு சொல்கிறார்... இப்பகுதியைச் சேர்ந்த சமூக ஆர்வலர் கலைச்செல்வன்.

கச்சா எண்ணெய் கசிவுகளால், இங்குள்ள ஏராளமான விளைநிலங்கள் மலடாகிக் கிடக்கின்றன. நிலத்து மண்ணோடு கச்சா எண்ணெய் கலந்து போனதால்... நிலங்களில் வெப்பம் பல மடங்கு அதிகரித்து, நுண்ணுயிர்கள் மரணிக்கின்றன.

'இந்த மண்ணை அப்புறப்படுத்திவிட்டு, வேறு வளமான மண்ணை நிரப்பி மறுபடியும் சாகுபடி செய்ய முடியாதா?’ என இங்குள்ள விவசாயிகளிடம் கேட்டேன். 'அதற்கு வாய்ப்பே இல்லை. ஏற்கெனவே பல முறை செய்து பார்த்தும், பலன் இல்லை. காரணம், அதிக ஆழத்துக்கு மண் பாதிக்கப்பட்டுள்ளது. சுமார் 6 அடி ஆழத்தில் இந்தக் குழாய்கள் பதிக்கப்பட்டுள்ளதால், பாதிப்பின் வீரியம் அதிகம். கோடை காலங்களில் இந்த நிலங்களில் தானாவே தீ பிடிக்கும்'' என்று திகில் கிளப்பினார்கள்.

''பத்து வருசத்துக்கு முன்ன எங்க நிலத்துல ஓ.என்.ஜி.சி அதிகாரிங்க குழாய் பதிச்சாங்க. மனசுக்கு ரொம்ப கஷ்டமாத்தான் இருந்துச்சு. ஆனாலும் எங்களால தடுக்க முடியல. 'இது சென்ட்ரல் கவர்மென்ட் சம்பந்தப்பட்டது. இதுல நீங்க எதுவும் தடை சொல்ல முடியாது’னு அதிகாரிகள் சொல்லிட்டாங்க. ஆனா, கச்சா எண்ணெய் கசிஞ்சி, எங்களோட ஒரு ஏக்கர் நிலமும், பாழா போயிடுச்சு'' என்று அரசாங்கத்தின் இரும்புக் கரங்களில் சிக்கி தான் நசுங்கிக் கொண்டிருப்பதை கண்ணீர் மல்க என்னிடம் சொன்னார், ஒட்டநாச்சியார் குடி கிராமத்தைச் சேர்ந்த விவசாயி மகேஷ்.

இது ஒரு சோறு பதம்தான். இப்படி எண்ணெய் கசிவுக்கு தங்களின் பசுமை பூமியை பறிகொடுத்திருப்போர்... கொடுத்துக் கொண்டிருப்போரின் பட்டியல்... மிகப் பெரியது

- பாசக்கயிறு நீளும்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism